الرز باللبن المصرى اللذيذ

الكمية دى طبعا ممكن تضاعفيها حسب افراد اسرتك
تنعى كوب صغير ارز فى كوب لبن لمدة ساعتين ده طبعا بعد ما تكونى غسلتى الرز كويس اوى
و بعدين تحطى الرز فى حله و معاه كوب لبن على نار هادية لغاية مايستوى الرز و بعدين تضيفى عليه لتر لبن حليب و كوب كبير سكر و نص معلقة صغيرة فانيليا و اثناء ما هما على النار تضربى فى الخلاط 4 ملاعق كبيرة نشا مع ربع كوب ماء او لبن و اول ما اللبن اللى على النار يغلى توطى النار و تصبى اللى فى الخلاط بالراحة و تقلبى و فى اقل من 3 دقايق هيكون جاهز معاكى اسهل و اسرع رز باللبن ان شاء الله و طبعا تحطيه فى اطباق او كبايات و تسيبيه يبرد شوية و بعدين تدخليه التلاجة


المهلبية

المهلبية هى نفس طريقة و مقادير الرز باللبن بس من غير رز
و ممكن تزودى معاها معلقتين كبار كاكاو سادة المر و تبقى مهلبية شوكولاته تحفة الاطفال هيحبوها اوى ان شاء الله

ملاحظات

ممكن بدل اللبن الحليب تستخدمى لبن بودرة فى الوصفات دى كلها انا بستخدم معلقة كبيرة لكل كوب ماء يعنى 4 ملاعق للتر
بضرب النيدو مع الماء كمان فى الخلاط عشان يدوب كويس
و فى مهلبية الشيكولاته بضرب معاهم كمان الكاكاو فى الخلاط
الاسرع بقى لو عندك غلاية الماء الكهربائية
يبقى هتسخنى الماء و تحطيه على النار و تاخديه شوية صغيرين تضربيهم فى الخلاط مع ... النيدو ... النشا ... الكاكاو حسب كل وصفة


لو جربتو وصفات و نجحت ادعولى و ردوا عليا و رمضان كريم

جزاكي الله خير

مشكوره عزيزتي

شكرا على المرور و باهنا و الشفا و لو فى استفسار انا جاهزة

تسلمي طرق حلوه بارك الله فيك الف شكر

م ش ك و ر هـ

يعطيج العافيهـ

طريقة بجد سهلة أوى .....تسلم أيدددددددك

الله يسلمك يا نسرين و بالهنا و الشفا
و اله وحشتينى مصر و اهل مصر و اكل مصر (الغربة وحشة)

تسلم يدك علي الوصفة السهلة لكن عندي سؤال
(تنعى كوب صغير ارز فى كوب لبن لمدة ساعتين ده طبعا بعد ما تكونى غسلتى الرز كويس اوى
و بعدين تحطى الرز فى حله و معاه كوب لبن )
هل كوب اللبن رقم 2 غير اللي نقعت فيه الرز؟

الله يعطيك العافية حبيبتي