أرجو من الأخوات المصريات أومن بعرفن طريقة عمل المنين كتابته لي على وجه السرعه فانا محتاججاه ضروري بالمررررررررررررة..... أرجوكم:W :W :W :W :W :W

أختي الحبيبة تمارا ،،،، معايا طريقة منين جربته العيد اللي فات و طلع حلو كتير ،، هاكتبها لك و يا رب تعجبك ..

المقادير:
1 كيلو دقيق
2 كوب سمن
نصف كوب زيت
2 معلقة كبيرة سمسم محمص خفيف
2 معلقة شاي خميرة جافة
1 معلقة شاي سكر سنترفيش
1 كوب ماء دافيء
2 معلقة شاي ريحة كحك أو معلقة شاي شمر محمص و مطحون + معلقة شاي يانسون محمص و مطحون
ربع معلقة شاي ملح

للحشو: ( يمكن عملها سادة بدون حشو )
نص كيلو عجوة ، معلقة كبيرة سمنة ، 2 معلقة كبيرة سمسم محمص ، 1 معلقة صغيرة قرفة

الطريقة :
-نفصص العجوة و نفرمها ناعم و نعجنها بالسمنة و السمسم و القرفة
-نحط الخميرة مع السكر و ندوبها في الماء الدافيء و نسيبها شوية لحد ما تخمر
-ننخل الدقيق مع الملح و نحطه في طبق العجين و نخلط معاه السمسم و ريحة الكحك أو الشمر و اليانسون
-نسخن السمنة كويس و نصبها فوق الدقيق و نقلب بالمعلقة لحد ما يبرد
-نضيف الزيت و نبس العجينة كويس ( نفركها باليد )
-نضيف الخميرة و نعجن العجينة كويس أوي لحد ما تبقى العجينة ناعمة
-نغطي العجينة و نخليها في مكان دافيء لحد ما تخمر
-نأخد قطعة من العجين في حجم قبضة اليد و نفردها على شكل مستطيل و نحشيها بالعجوة و بعدين نقفل العجين على العجوة و نضغط على العجين و نقطعه بالسكينة على شكل صوابع أو نشكله بأي شكل تاني و نرصه في الصواني و ندهن الوش بسمنة سايحة و نخلي المنين يخمر تاني
-ندخل الصواني فرن متوسط الحرارة لحد ما يستوي
و بالهنا و الشفا يا رب يعجبكم

معلش تمارا حبيبتي ،، السمنة كوب و نص بس لأنهم لو كانو كوبين هيكون المينين ناعم شوية و على فكرة لو بتحبي الشمر و اليانسون ممكن تزوديهم يعني يبقى مثلا معلقة كبيرة من كل نوع