بسم الله الرحمن الرحيم
السلام عليكم و رحمة الله و بركاته ،،، ازيكم يا بنانيت يا حلوين ، وحشتوني أوي أوي ،، مش عارفة ليه النهاردة نفسي مفتوحة أوي على الحلويات ،، يمكن لأني من فترة طويلة ما أكلتش حلويات لأني عايزة أنزل 2 كيلو ،، لكن النهاردة خلاص حاسة ان مقاومتي انهارت ،، قلت خليني أكتب لكم صنف من الحلويات يمكن أشبع يلا ربنا يسهل.......
المقادير:
250 جم شوكولا محلاة ( كادبوري أو جالاكسي مثلا)
2 معلقة شاي زبدة
ربع فنجان سكر بودرة
2 بيضة صغيرة مفصول الصفار عن البياض ، فانيليا
1 معلقة شاي نسكافيه
3 معالق طعام ماء
1 فنجان حليب
1 معلقة طعام زبدة سايحة
1 معلقة شاي سكر
ربع معلقة شاي ملح
125 جم دقيق منخول
1 بيضة كبيرة
الطريقة:
-نسيح الشوكولا مع الزبدة في حمام مائي
-نذوب النسكافيه في الماء
-نضرب السكر مع صفار البيض و الفانيليا و النسكافيه و نضيفهم على خليط الشوكولا
-نضرب بياض البيض حتى يتماسك و نضيفه على الخليط السابق و نقلبه و نحطه في الثلاجة حوالي ساعتين
لعمل الكريب:
-نحط الدقيق في طبق العجن و نعمل حفرة في الوسط
-نحط البيضة في الوسط و نقلبها كويس مع الدقيق و بعدين نضيف الحليب و نضرب كويس
-نضيف الزبدة و الملح و السكر و نخلطهم كويس و نخلي العجينة ترتاح نص ساعة
-ندهن طاسة متوسطة بقليل من الزبدة و نحطها على النار و نصب كمية من العجين تكفي لتغطية الطاسة ( حوالي فنجان صغير) و نخليها لحد ما تستوي و بعدين نقلبها على الناحية التانية و هكذا لحد ما يخلص المقدار
-نحشي كل واحدة بمعلقة كبيرة من الحشو و نلفها و نرشها بسكر بودرة أو ممكن نستغنى عنه و نقدمها بالهنا و الشفا ..
شكله ما فيش فايدة هاقوم أعمل حاجة حلوة و أمري لله........................
الروابط المفضلة