السلام عليكم ورحمة الله وبركاته
أولا كل عام وأنتم بخير وأكيد كلنا بلشنا نفكر شو بدنا نقدم بالعيد وهي طريقة المعمول اللي بعمله كل سنه وهي الطريقة اعتمدتها بعد ما جربت كتير طرق ولقيتها اقرب شي للمعمول الشامي وسهله كتير
هي أول مشاركه الي بهالقسم اتمنى انه تعجبكم وان شاءالله لما اعملها بنزل الصور
المقادير
3 كاسات سمنه
كاسة زيت
10 كاسات طحين منخول
كاسه ونص سكر مدوبه بكاسه ونص ماء
الطريقه
اعجني الطحين مع الزيت اولا افركيه بأطراف اصابعك وبعدين اضيفي السمنه وكملي العجن بعد ما يتداخل مع بعضه كويس اضيفي السكر المدوب بالماء شوي شوي واعجني
بس خلص شايفين قديش سهله وسدقوني الطعم كتير لذيذ
الحشوات
التمر انا بضيف عليه سمسم فقط لأن العجينه فيها دسم كفايه مافي داعي للسمنه
الفستق اضيفي عليه قطر طبعا مضاف اله ماء زهر أو سكر وماء زهر براحتك
الجوز انا بضيف عليه شوية صغيره سمنه وقرفه كتير بدون سكر السكر برشه على الوجه قبل التقديم طبعا سكر مطحون أو اضيفي قطر بدون ماء زهر وقرفه وساعتها مافي داعي للسكر المطحون عالوش
موضوع الحشوات بيرجع لذوقك الشخصي دائما
ملاحظات
اذا طلعت العجينه سائله معك مافي مشكله حطيها بالبراد وطلعي منها شوي شوي احشيهم
ممكن تضيفي بهارات المعمول بس بما اني شاميه فما بضيف اي نوع من انواع البهار للمعمول
كبدايه جربي نص الكميه أو ربعها واذا عجبتك وظبطت معك ساعتها بتعملي اكتر
استعملي نفس الكاس لجميع المقادر
لا تدخليها الفرن الا لما يكون حمي تمام حتى تحتفظ بالرسمه
بتمنى انكم تجربوها ويارب تعجبكم
كل عام وانتم بخير
واللي حابه تاخد فكره عن النتيجه هي الصوره بس سدقوني عادة بيطلع احلى بكتير بس هي المره قلت بعمل شطاره وخففت السمنه فما اخد شكل القالب كتير بس سدقوني الطعم رائع
رد مع الاستدلال
الروابط المفضلة