✿*موضوع متميز*✿ومع الحلقه الاخيره لحلويات العيد من برنسس لك1 خساره تفوتكم
ووصلنا يا غوالى للحلقه الاخيره
اللى فيها البهاريز كلها
وانا عمله زى العيال الصغيره
اموت فى البهاريز
يالا ندخل فى الموضوع
البتيفور
قبل ما اقول مقاديره انا ليا حكايات مع البتيفور ده
كل سنه كان ليا مقادير شكل علشان اوصل للطعم اللى بأكله من محلات الحلوانيه النضيفه مره ازود البيض الاقيه حجر معايا وانا بأكله اقول مش هو ده
مره تانيه اخد مقادير تانيه وويكون الزبده فيها زياده
تكون النتيجه انه ناعم جدا لدرجه انى مش عارفه امسكه والزقه مع بعض
لكن اخيرا والحمد لله
وكلى فخر بالنتيجه اللى وصلتلها هش ومتماسك وناعم طبعا صعب تلاقى ال3 صفات يجتمعوا فى حاجه وده كانت وصفه لشيف حلوانى
ولاهو ناشف ومحجر ولا هو طرى ومش عارفه امسكه
المقادير
1 كيلو زبده من التلاجه
1و نصف كوب سكر بودره
3 ابيض بيض
1 وربع كيلو دقيق
تنتوفه ملح
فانيليا
الطريقه
اخفق الزبده جيدا مع السكر حتى يكون الملمس كريمى
واضيف الزلال زى السرسوب على الخليط الموجودواخفق جيدا حتى يتجانس الخليط واضيف اخيرا الدقيق واقلبه بايدى واضعه فى كيس الحلوانى واعمل الاشكال بتاعتى وادخلهم الفرن المدهون زيت بسيط
على درجة حراره 180 درجه لمدة 20 دقيقه طبعا هى اسمرت منى لانى كنت متخيله انى بتعامل مع الاحجار اللى كنت بتعامل معها قبل كده
لكن ده مش محتاجه لوقت طويل علشان تستوى
وبعد ما يستوى اخرجه واسيبه يهدى والزقه بالمربى وادهن طرفه شوكولاته سايحه ومكسرات محمصه
بسكوت القرفه
كيلو دقيق
1/2 كيلو زبده
1/2 كيلو سكر بودره
6 بيضه
2 م صغيره قرفه
بكنج بودر
لبن لو لزم الامر
الطريقه
اضع الدقيق على السكر على البكنج بودر على القرفه واخلطهم على بعض واعمل حفره فى النص واضع الزبده والبيض والفانيليا والفهم بايدى السوايل ده للتجانس وبعد كده الفهم مع البودره اللى حواليها
وفردها بالنشابه واقطعها دوائر صغيره دايره بخرم من النص ودايره من غير خرم
عندى ملاحظه العجينه بتكون طريه جدا
فلو قدرتى تفرديها على ورق زبده او بلاستيك علشان تعرفى تشيليها يكون افضل
وحتى ولو قطعتيها سميكه شويه علشان تعرفى تنقليها للصاج وبعد ما تنقليها بتطيها بايدك علشان ترفع شويه
لانك حتلزقى اتنين فوق بعض فلو الاتنين سماكتهم كبيره حيكون جامد فى الاكل
فخمتوا ولا NO فخمتوا
وادخلها الفرن وبعد السوا الزقها بالمربى
اللانكشير
كيلو دقيق
3 كوب كورن فلاور
3 كوب سكر بودره
2 كوب زبده
4 بيضه
فانيليا /بكنج بودر
لبن للضروره
الطريقه وبنفس الشكل
النواشف مع بعض والسائل مع بعض فى النص
واعجنها كويس
واكور العجينه واسويها
ولما تبرد الزقهم بالمربى وادحرجها بالمكسرات او بالجوز
بسكوتات النوتيلا والبندق
الموضوع عادى خالص
عجينه التارت
3/4 كوبسكر ناعم
2 بيضه
2 كوب دقيق
1 كوب زبده
وكله يفرك باليد
ويبطن بها قوالب التارتات الصغيره
وادخلها الفرن تستوى
ولما تخرج وتبرد 1/2 م ص نوتيلا وعليها بندقتين او كراميله او شوكولاته مذابه واليكم سلامى
رد مع الاستدلال
كتبت بواسطة مروة ابراهيم
[
الروابط المفضلة