السلام عليكم ورحمة الله وبركاته
يارب تكونوا طيبين ومرتاحين جميعا ،،
أنا ما أعرف للمقدمات بإختصار شديد اسمعوا حكايتي للأخر وأفتوني:
بعد ماتخرجت كتب الله لي وظيفة في نفس المدينة اللي تعيش فيها جدتي وعمتي الأرملة ، أبوي وجدتي وعمتي أصروا علي إني أسكن في بيت عمتي لأنه كبير وفاضي على قولتهم مافيه غير عمتي وجدتي وابن عمتي الثلاثيني ، في البداية استصعبت الوضع بحكم وجود شاب في البيت بعدين جدتي خبرتني إن ابن عمتي أغلب وقته خارج البيت بحكم طبيعة دوامه الطويل ويدوب يرجع للأكل والنوم والويكند مقضيها طلعات مع الشباب ، وعمتي سهلتلي كل شيء ونزلت إبنها في غرفة تحت وأنا فوق نومتي وجلستي مع عمتي وجدتي وأغلب وقتي جالسة في الدور العلوي وطلباتي تجيبها لي الخدامة ، اللي حصل إني تركت أهلي وجيت عندهم وكنت في البداية مو متقبلة الوضع بعدين اتعودت عليهم والحقيقة إني كنت مبسوطة لأن عمتي طيبة وبنت حلال وكانت تعاملني مثل لو إني بنتها وأحسن وجدتي فرحت بجيتي عندهم على قولتها البيت كان فاضي ومافيه حس وجيتي انتي وعملتيلنا حس و مشيت الأيام الحمدلله، وابن عمتي عمري مالمحته ولا لمحني لأن البيت كبير زي ماقلت وهو بعالمه تحت وأنا بعالمي فوق ، لكن كم مرة شفته عند السيارة و أنا طالعة للدوام وهو توه راجع من دوامه الصباح ، بعد شهور من سكني عندهم عمتي وجدتي انعزموا على فرح وحاولوا فيني أجي معاهم بس أنا رفضت لأني ما أعرف الناس أبدا غير إنه بأخر يوم في الإسبوع وأنا مداومة ومالي نفس للسهر والطقطقة فما رحت معاهم ، راحت جدتي وعمتي وياليتهم ماراحوا نمت تقريبا هذيك الليلة على الساعة 11 ونص بالليل وما مداني أدخل في النوم إلا أحس باب غرفتي ينقفل أطالع إلا أشوف زول رجال إلا هو ابن عمتي أنط من مكاني وأصرخ بأعلى صوتي وأبكي ومافيه أحد حولي بكيييييت وانجنيت اتوسلت له ما يلمسني لكن للأسف لمسني كان أقوى مني ماقدرت أقاومه حلفته بعمتي وجدتي يبعد عني بس ماكان يسمعلي دخلت في حالة رعشة مو طبيعية جسمي ينفض وقلبي بيطلع من بين ضلوعي من الخوف وأذكر إني سبيته ولعنته واستعطفته لما يئست منه وصرت مثل الدمية في يده لا أرى لا أسمع لا أتكلم دموعي ونحيبي سيدة الموقف وهو أخذ اللي يبغاه وراح ، ما أدري كيف عدت هذيك الليلة أذكر إني دخلت في نوبة بكاء هستيرية جلست أضرب في نفسي وأشد شعري وأضرب راسي في الجدار أحس إني فقدت عقلي ساعتها لما نمت من كثر الصياح عمتي وجدتي رجعوا من الفرح وناموا بغرفهم ولا دروا عن شيء واليوم الثاني واللي بعده كان ويكند وقضيته كله في غرفتي أتحجج إني تعبانة والحمدلله دورتلي حجز وجيت عند أهلي في جدة وأنا كلي هم ما أقدر أقولهم اللي صار ولا أقدر أقول ما أبغى أرجع أعيش عند عمتي لأن أبوي بيشك وهو بطبيعته شديد ومايمشي عليه أي شيء ولازم يعرف إش سبب رغبتي إني أترك السكن معاهم خصوصا جات لي فترة لما تعودت عليهم كنت مبسوووطة مرة ومرتاحة يعني لازم يعرف ليش هالتغيير المفاجئ ، جلست إسبوع ورجعت مدينتي الثانية وقتي كله في غرفتي أتعذر يا تعبانة يا بنام يا مشغولة ، بعد اسبوع من رجعتي جاتني عمتي فرحانة وطايرة من السعادة وقالتلي إن ولدها يبغى يتقدملي مسكينة ولدها مجننها سنوات وهي تجري وراه تبغى تزوجه تقول مدري كيف الحين هو جاني بنفسه وطلبك انتي بالإسم ، قالتلي يابنتي إذا ماعندك مانع بكلم أخوي ، طبعا تمت الخطوبة والزواج في فترة وجيزة بدون الدخول في التفاصيل حقتها ونفسيتي كانت وقتها في الحظيظ !
مشكلتي الآن: إني ماني قادرة أنسى تفاصيل هذيك الليلة ، تجيني نوبات بكااااااااء مو طبيعية بعد العلاقة مع العلم إني مافقدت عذريتي لما تحرش فيني ، زوجي ساعات أحس إني أكرهه وساعات ما أحس اتجاهه بأي مشاعر وعمري ما حبيته من فعلته السودا ، ما أدري ليه هو سوا كذا تبريره الوحيد إنها لحظة ضعف وعلى قولته هذاني صلحتها !!!!!!!!!!!!!
صارلي 4 شهور متزوجة ، ساعات أفكر بالطلاق وساعات لا ، محتارة في أمري ، زوجي باين منه طيب ويحاول يساعدني أخرج من الحالة اللي أنا فيها لدرجة إنه أقترح علي نطلع نعيش بشقة لحالنا يمكن أنسى على باله البيت هو اللي يذكرني بالذي مضى !! ودائما يردد على مسامعي والله لحظة ضعف والشيطان غلبني !!!!!! لكن هيهات الأمر مو بالسهولة اللي هو يتوقعها النسياااان صعب صعب جدا !
انصحوني أطلع من البيت ولا أنفصل ولا إش أسوي بعمري ؟ هل أقدر أتخلص من الماضي وأرميه ورى ظهري ولا مستحيل ؟ أبغى أتناسى اللي حصلي وأعيش طبيعية بدون ضيقة وبكي وعصبية وزعل أغلب الوقت ، أحس زوجي يميل لحكاية البيت لحالنا بس بالنهاية تارك الموضوع لي وأنا مرتاحة هنا مع عمتي وجدتي أقضي وقتي معاهم حتى بوجوده، و ادعولي ربي يكشف الغمة عني ويشرح صدري هاليومين نزلت جدة عند أهلي لوحدي وتركته بالرياض أحس ضايقة فيني الوسيعة المشكلة همي ما أقدر أقوله لأحد مصيييييبة وبنفس الوقت ماني قادرة أتجاوز الحزن العميق اللي بداخلي لوحدي .
أعذروني على الإطالة حاولت بقدر الإمكان ما أدخل في التفاصيل من البداية ، هدفي بس تفهموا موضوعي وتعطوني رأيكم ونصايحكم .
الروابط المفضلة