السلام عليكم ورحمة الله وبركاته

لوسمحتم يا حبيباتى محتاجة مساعدتكم فى حاجة

انا مخطوبة و هشترى اجهزتى قريب ان شاء الله فكنت عاوزة اعرف رايكم فى الغسالات الفول اوتوماتيك والهاف اوتوماتيك والفوق اوتوماتيك

انا عارفة الفول والهاف اوتوماتيك وشفتهم لكن الفوق اوتوماتيك ماشفتهاش قبل كدة

مين جربتها وياترى حلوة ولا ايه ؟

انا هجيب ان شاء الله توشيبا سمعت انها احسن نوع وبفكر اجيب الهاف اوتوماتيك لانها هتغسل الغسيل كله مش زى الفول اوتوماتيك لازم يبقى كله لون واحد وبكدة هفضل اركن فى الغسيل لحد ماقدر اغسله لكن الهاف اوتوماتيك زى الغسالة العادية بس بتشطف وتعصر زى الفول اوتوماتيك وكمان ممكن استخدم مسحوق عادى مش شرط اوتوماتيك

بس سمعت حديثا بقى عن الفوق اوتوماتيك ودى كمان ممكن نستخدم لها مسحوق عادى لكن بقى عيبها مافيهاش نظام حرارى يعنى مش فيها سخان يسخن المياة ولا مؤشر تظبطيه على درجة حرارة معينة

مين بقى ياحلوين جربها وياترى ايه الاخبار حلوة يعنى بتنظف الغسيل حلو من غير مياة سخنة ولا غسيلها مش اد كدة يعنى اجيبها ولا اجيب فول ولا هاف اوتوماتيك ؟

ياريت اللى تعرف تساعدنى وجزاكم الله خيرا

بصى ياايمان أنا عن نفسى عندى فوا اتوماتك ومريحانى جدا وعلى فكره اللى عندى ممكن تشغليها نص برنامج يعنى مش لازم تركنى الهدوم لى حابه قليلين باشغلهم نص برنامج وجربت الهاف فى شقه المصيف بس وحشه جدا زيها زى العاديه بهدله...أما الفوق فادى فعلا ناس كتير بيتكلموا عليها وجربوها وبيقولوا أنا حلوه جدا وعمليه ومنها ال10 كيلو بتشيل كتيييييييير انا عندى جارتى لما عزلت أشترت الفوق أتوماتك ومريحاها جدا بالذات موضوع المسحوق العادى ده روعه...والاختيار ليكى

قصدك ايه بالفوق اتوماتيك اللي تيجي غسالة مع التجفيف 100% ا مع التعقيم انا ناوية اشتريها بس ما اعرف الافضل محتارة بين توشيبا وبين جنيرال اليكتريك

الاميرة همس

جزاكى الله خيرا على ردك بس عاوزة اقولك ان ميزة الهاف اوتوماتيك انها بتغسل الغسيل كله فى يوم واحد اه صحيح هى زى العادية بس بتشطف و تعصر زى الاوتوماتيك

لكن الفول اوتوماتيك مش هينفع اغسل الغسيل كله فى يوم واحد يعنى يوم اغسل الابيض ويوم تانى الفواتح ويوم تالت الغوامق وعلى حسب درجة اللون وطبعا لازم استنى لحد مااكون كدة حبة غسيل حلوين اقدر اشغل الغسالة بيهم

لكن الهاف لو عندى حبة غسيل ابيض صغيرين وحبة الون هقدر اغسلهم كلهم فى يوم واحد من غير ماركن فاهمانى

وبرده انا مش عارفة نظام الفوق اوتوماتيك ايه يعنى هى زى الفول اوتوماتيك بس الفرق الوحيد هو المسحوق ولا ايه الفرق يعنى ؟ اللى تعرف تقولى الله يكرمكم

اضواء

جزاكى الله خيرا على ردك ياقمر بس ماهو انا معرفش الفوق اوتوماتيك دى نظامها ايه وكنت بسال على اللى عندها تقولى نظامها ايه ومريحاها ولا لا وكدة فاهمانى

و على فكرة انا سمعت ان توشيبا افضل نوع وبرده اسالى

اهلا حبيبتي ايمان منورة الركن
بصي يا جميل
انا عندي غسالة اوتوماتيك وغسالة هاف اوتوماتيك
بغسل على الاوتوماتيك الفوط والملايات والكوفرتات والترنجات والجينزات
والحاجات التقيلة عليا
وبسيب الغسالة الهاف اتوماتيك للغسيل السريع اليومي المتكرر
طبعا انتي عارفة الاولاد غسيلهم كتير ازاي

وبالنسبة للغسالة الفوق اوتوماتيك
سلفتي اشتريتها وبقالها عندها سنة وبتشكر فيها جداااااااااا
بس بصراحة انا عاجبني غسالتيني اوي
ومقدرشي استغنى لا على الاوتوماتيك ولا على الهاف

وربنا يوفقك يا قمر

الغالية ام خالد

وحشتينى اوى يا قمر و نورتى ياحبيبتى الموضوع بردك وزدتيه شرف ربنا يعزك

بصى ماما قالتلى هاتى الفول اوتوماتيك وانا هجيبلك غسالة صغيرة عادية تغسلى عليها الحاجات الصغيرة واللى مستعجلة عليها بس انا قلت هدوش دماغى بغسالتين ليه وكمان تكلفة

بس ممكن لو تكرمتى تقوليلى ايه نظام الفوق اوتوماتيك دى يعنى لو تقدر تساليلى سلفتك هى نظامها ايه يعنى زى الاوتوماتيك ولا ايه وايه الفرق بينهم

وجزاكى الله خيرا يا عسل

ابنتي الغاليه ايمان الله يسعدك ويتتم لك بالخير والسعاده
كان عندي زانوسى اتوماتك 18 بروجرام وده منذ حوالي 15 عام ولكن عن نفسي انا كانت مغلباني كانت كتيرة الاعطال ويمكن خلال ال15 سنه صرفت عليها اكثر من ثمنها
وطبعا دي خامتها احسن كتير من خامات اليومين دول
وتصادف اني عزلت من شقه الي شقه واخذت الغساله معي وكانت شقتي القديمه موجوده لاني كنت اسكن في بيت والدي فبعد بحث طويل كانت فريش منزله نوع الغساله الفوق اتوماتيك اشتريتها وكان ثمنها من الشركه ب 990 جنيه وطبعا النقل علي المشتري
لكن انا اشتريتها من محل بجانب المنزل بتاع ادوات كهربيه ب 1100 جنيه وجابها لغاية المنزل
طولت عليكي ههه معلش لكن بحكي لكي بالتفصيل الممل
وجائت الشركه وركبها ب20 جنيه ولها الضمان
طبعا لما اكون في شقتي الجديده اغسل في الزانوسي
ولما اذهب لشقتي القديه يومين اغسل علي الفريش الي هي فوق اتوماتيك
الفرق بينهم اولا في مدة الغسيل
زانوسي تاخذ ساعتين وتلت الغسله الواحده صح
الفريش تاخذ 50 دقيقه
فريش تاخذ اي نوع مسحوق سواء اتوماتيك او عادي
باشتري للفريش مسحوق اريال الكيس كيلو ب10 جنيه ونصف وهو مسحوق عادي
وطبعا ممكن تاخذكميه صغيره جدا غسيل وتضبطي كمية الميه علي اد كمية الغسيل
بالنسبه لوصلة الميه ليها وصلتين وصله تاخذ ميه من الحنفيه الساقعه ووصله تاخذ من الحنفيه السخنه الي جايه من السخان الي عندك اما الزانوسي ففيها السخان بداخلها طبعا واكيد انتي عارفه ده
وصدقيني الغسيل بيطلع منها كانه شبه ناشف
حبيبتي شويه وحكملك لاني اشتريت كمان الغساله التوشيبا الفوق اتوماتيك ايضا

اكمل ليكي القصه
في رمضان الماضي عطلت الغساله زانوسي واتصلحت بمبلغ كبير واتكرر العطل وعطلت تاني فقررت اشتري واحده تاني وقلت اغير فاشتريت توشيبا الي هي فوق اتوماتيك 7 كيلو وهي نفس المواصفات بتاعت الفريش غير انها ليس لها وصلة الميه السخنه يعني لو عايزه تغسلي بميه سخنه انتي تحطيها من فوق عادي وطبعا بتضبطي البرنامج زيها زي الغساله الاوتوماتيك
بتحطي الغسيل يطلع نظيف خلاص كده
ثمنها 14500 تقريبا مش فاكره بالضبط
انا عن نفسي شايفه انها عمليه جدا لكن لي اقارب اشتروها ولم تعجبهم لانها علي حد قولهم بتوبر الملابس بسيط جداا خصوصا ملابس الخروج والطرح وما شابه ذلك ولو عايزه اية استفسار اسالي وانا ان شاء الله اجاوب عليها وعلي فكره خدمة فريش ما بعد الشراء احسن بكتير من خدمة توشيبا متعبين جدا جدا

السلام عليكم

أنا جربت الغسالة الي بابها من فوق بس ما عجبتني لانها ما بتسخن المي
وطبعا اذا المي مو ساخنة ما بينظف الغسيل وخصوصا الابيض من شان هيك رحت غيرتها
وجبت غسالة ال جي الي بتسخن لوحدها وما شاء الله عليها
مع العلم حتى الي بابها من فوق كانت ال جي بس ما حبيتها
وان شالله تتوفقي بشراء الاجهزة الكهربائية كلها والف مبروك سلف

ام احمد ومصطفى

جزاكى الله خيرا على ردك ياقمر وانتى ماطولتيش ولا حاجة كفاية اهتمامك وردك

بس انا عاوزة استفسر عن حاجة بس انا مش عارفة هى غلطة كتابة ولا ايه تمن الغسالة الفوق اوتوماتيك 14500 مش معقول !!!!!!!! اكيد دى غلطة كتابة صح ؟؟؟؟؟؟؟

وهو كدة يعنى الفرق الوحيد بين الفول اوتوماتيك والفوق اوتوماتيك هو المسحوق والسخان بس ؟ يعنى مافيش فرق تانى ولا ايه ؟

دنيا احمد

وعليكم السلام ورحمة الله وبركاته

جزاكى اله خيرا على ردك ياحبيبتى والله يبارك فيكى ربنا يعزك على دعواتك الحلوة دى ويارب ارسى على بر لانى بجد محتارة ومش عارفة اعمل ايه