اختيار المدرسه امر صعب

السلام عليكم ورحمه الله وبركاته
انا فى مشكله كبيره جدا مطيره النوم من عينى ونفسى اخد رايكم
انا ساكنه فى المنيل وبنوتى هتكون شهر 10 القادم 4 سنين الا 20 يوم جميل لحد كده
ابوها بقى عايز مدرسه عربى خاصه مش لغات وتكون بتفص البنين عن البنات من بدرى وتكون التربيه فيها والتعليم كويسين فواحد نصحه وشكر له فى مدرسه الصرح بالمعادى ولما سالنا فيها وجدنا ان الباص اخره للنيل البدراوى فبالتالى لازم حد يجيبها ويوديها
مشكلتى بقى انه رافض اللغات لان فيها ثقل على العيال فى المذاكره وتكلفتها عاليه نسبيا والمعلومات اللى بتحفظ مش بلغتنا العربيه بتتنسى سريعا والدليل هو وزمايله اللى درسو باللغات فمش عايز يتزحزح عن الفكره دى وبيقولى انى اوديها واجيبها من المدرسه اللى مختارها وايه المشكله واهو اتعب شويه علشان مستقبل العيال؟!!!!!!!!!
طب انا معايا بنوته تانيه عمرها الان 9 شهور مش عارفه اعمل ايه؟
طول الليل مش عارفه انام المشكله ان مالهاش بديل بباص لو حد يعرف بديل يقولى
المضحك ان احنا فى شهر 2 روحنا للصرح ولما سالنا هناك عن الباص واضح ان اللى كان موجود ما كانشى عارف النظام فخلالنا البحر طحينه ودلوقتى معاد التقديم فيها شهر 4 اللى احنا فيه بعد ما كل المدارس عملت انترفيوهاتها وخلصت وقفلت انا سلفتى ما شاء الله عملت لابنها انتر فيوه فى 5 مدارس ونجح فيهم بس كلها مدارس لغات اللى جوزى كارهم مش عارفه اعمل ايه ومش عارفه اقنعه ازاى دول مش سنه ولا اتنين دول عمر تانى سبحانه الحى القيوم
استحلفكم بالله تنصحونى وتدلونى ولا حول ولا قوه الا بالله العلى العظيم

صدقينى كلنا محتارين وتعبانين زيك بالظبط وانا كمان محتاره فى اختيار المدرسه المناسبه لابنى الصغير لكن عن تجربه شخصيه ما فيش احسن من مدارس اللغات والمستقبل كله لها ولو تابعتى اعلانات الوظائف الخاليه حتلاقى كل الاعلانات بجانب الشهاده بيتكتب ويفضل خريجو مدارس اللغات هو ده المستقبل
الدراسه مش صعبه قوى ولكنها محتاجه بس مجهود من البيت بجانب المدرسه
حاولى تقنعى زوجك وربنا يهديه لك ويبارك فى اولادك ويوفك للى فيه الخير

جزاك اله كل خير يا هناء على ردك السريع عليا وربنا يوفقنا جميعا جميعا للخير والسعاده