شكرا جزيلا لام جورى وعلى فكرة احنا ان شاء الله هنبقى جيران وهادوشك السنة الجاية باسئلتى لانى هانقل سكنى لحدايق الاهرام وهادور برضه على مدارس كويسة

مصممة برضه اتعبك
جزاكى الله خيرا الملف رائع وانا هادخل علالفيس بوك علشان اعرف ازاى نربى ولادنا صح وشكرا لاهتمامك

كتبت بواسطة احلى ماما

السلام عليكم جميعا
جمعة مباركة للجميع محتاجة مساعدة من كل الامهات الحلوين انا فمشكلة كبيرة اوى ومش عارفة اقررممكن تساعدونى
انا عندى بنوتين الاولى فkg1 وعمرها دلوقتى 6 سنوات و4شهور فمدرسة اسمها المستقبل المتميزة بصراحة المدرسة ممتازة جدا لكن بتاخد سن كبير بواجه مشكلة ان بنتى هتكون فpri 1 هتتم 8سنوات هيكون وقتها اولاد عمها وخالتها اللى فنفس السن ف 3 ابتدائى هما تعليم خاص بس مش لغات
انا دلوقتى عايزة انقلها لمدرسة لغات خاصة لpri 1 على طول بس قلقانة لانها مش هتاخد kg2 وهل هاقدر خلال الاجازة ادرس معاها لوحدى بحيث انها متتاثرش فpri 1

دة بالنسبة لبنتى الاولى

اما التانية فهى فشهر اكتوبر 4سنوات و8 شهور بتمنى مدرسة اختها تقبلها بس عندى شك فكدة ولو مقبلتهاش معنديش فكرة عن المدارس هنا لانى كنت مسافرة السعودية ولاسباب خاصة كتير مقدمتش هناك وطبعا الامور كلها جت فوق بعض على راسى لوحدى لان باباهم مساااااااااااااااااااااااااااااااااااااااااااافر

ارجوكم وكل ام عندها خبرة تجاوبنى انا ساكنىة فمنطقة حلوان واحسن مدارس موجودة راهبات وانا مش عايزة اقدم فيها لو ممكن تقولولى عن مدارس فالمعادى واسعارها وعناوينها او حتى تليفوناتها ربنا يجازيكم خير وبشكركم جدا على الملف الرائع جدا دة

بالنسبة لمدارس المعادي اسمع عن نارمر المعادي انها ممتازة بس اسعارها غالية لو في حد من البنات في منطقة المعادي ممكن يفيدك اكتر

يا جماعة انا عملت المقارنة دى ولميت فيها كل المعلومات الى اتقالت عن جينيس والمصرية الدولية علشان كل الامور تكون واضحة قدام عنينا واحنا بنختار وان شاء الله انا رايحة المدرستين بكرة لو فى اى حد عايز يسأل اى اسئلة هناك يقولى دلوقتى

الفصول

المصرية
الكى جى والابتدائى فى مبنى واحد وهو مبنى منفصل عن مبنى الاعدادى والثانوى والفصول واسعة وللكى جى جاردن رمل وفيها لعب بس مش كبيرة اوىانا عارفة ان كل اتنين فى ديسك ومتهيالى مفيش لوكر كثافة الفصل 20 - 22 يتم فصل الاولاد عن البنات فى الفصول من اولى ابتدائى
جينيس
مبنىالك الكى جى منفصل عن البرايمرى والفصول واسعة وجميلة جدا والجاردن مفروشة موكيت اخضر بصراحة امنة وشكلها حلو اوى والالعاب متنوعة ومختلفة فى البرى الكلاسات حلوة برضه وفى ديسك لكل طالب وفى لوكر فى كل كلاس يتم فصل الاولاد عن البنات من رابعة كثافة الفصل 20 - 22

المناهج

المصرية
فى الانجلش بياخدوا ماكميلان بياخدوا شيتات كل اسبوع و بيبقى فى شيتات للمراجعة الشهرية وفى كويز كل اسبوع فى العربى و الماس والانجليزى الساينس مفيش كتاب بيدو شيتات للساينس يحلوها بعد شرح الدرس فى الكلاس بس الامتحان بيبقى اورال وده برضه فى الفرنش KG2 فى الانجليزى بياخدوا منهج اورال وستورى صغيره فى العربى بياخدوا الحروف كل حرف عليه 3 كلمات بالتشكيل وبعض الجمل البسيطة واخدوا المد والس اخدوا الارقام لحد 100الجمع والطرح بس ارقام صغيرة والرقم الاكبر والاصغر
جينيس
فى الانجلش بياخدوا ماكميلان وبياخدوا فى KG2 جمل اورال واسئلة وكل يوم خميس بيبعتوا ورقة فيها حاجات الاسبوع اللى خدوها كلها الورال والريتن
خدوا لغاية 100 فى الماس اورال ولغاية 46 ريتن
عندهم فرنش اورال بياخدوا فيه شيتات
وعندهم ساينس اورال بس ليه كتابين واحد شرح وواحد هوم وورك كتاب ظريف جدا فيه توصيل وحاجات خفيفة كدة وفى كويز كل اسبوع فى العربى و الماس والانجليزى بالنسبة للبريمرىفى شيتات اسبوعية وفى شيتات قبل الامتحان بالنسبة للانجلش بس لكن الباقى فى بوكليت وشيت قبل الامتحان

الرسم

المصرية
بيرسموا عادى فى الاسكتش
جينيس
حصة عادية بيرسموا فيها مواضيع مختلفة

الانشطة

المصرية
فى كمبيوتر وعندهم حصة موفى كل اسبوع بيفرجوهم على كرتون كانو بيعملوا حفلة السنتين اللى فاتت بس تقريبا السنة دى مش حيعملوا الرياضة : اشتراك اللعبة 50 + الباص 50
جينيس
فى يوم الخميس اكتيفيتى كتير هم بيخيروا الولاد اول السنة هيختاروا ايه و فى كمبيوتر وماس وتمثيل وسياحة ده طبعا غير سباحة ورماية وركوب خيل خارج المدرسة جمباز وكاراتيه وموسيقى وكمبيوتر داخل المدرسة واشتراك شهرى 60 جنيه وبالباص بالنسبة للانشطة اللى خارج المدرسة

حفلات

المصرية
حفلة العيد الصغير والكبير وبيعرفوهم مراسم الحج
حفلة مولد النبى
حفلة راس السنة الهجرية
حفلة عيد الام
جينيس
حفلة عيد الأم , حفلة تنكريه وحفلة الحج (كعبة وذبح خروف)ده جد مش هزارالسنة دى دبحوا خروف فى المدرسة
اليوم الريفى وده بيبقى فيه خبز فطير وجمل وكارته وحصان
كرنفال وده بيبقى زى معرض بيع منتجات لأولياء الأمور والمدرسين والطلبة

تحفيظ القرأن

المصرية
القران بيدرسوا جزء عم فى كى جى وجزء كل سنة فى برايميرى الحفظ مش اجبارى مفيش تحفيظ فى المدرسة
جينيس
فى محفظ شيخ للكى جى والبرى جزء كل سنة مش اجبارى بس بيمتحنوا فيه وليه درجة فى الشهادة ضمن الأكتيفتى

اليونيفورم

المصرية
الكى جى بنطلون كحلى وتىشيرت لبنى للولاد وبينك للبنات السبورت تريينج كحلى وتىشيرت لبنى
البرايميرى بنطلون او جيب كحلى وتى شيرت بيج من النصف و اورنج من جنب وكحلى الجنب التانى و السبورت وير كحلى وتى شيرت اورانج
جينيس
بيتغير كل 4 سنين والسنة دى هيتغير هو كان بنطلون كافيه وتى شيرت اصفر فى لبنى للكى جى والبرى والسبورتنج تريننج لبنى فى اخضر
السنة الجديدة هيبقى الكى جى احمر فى كحلى والبرى مش عارفة

نطق اللغة

المصرية
النطق كويس وعلى فكرة حتى مدرسات القران والعربى بيتكلمو معاهم انجليش وعلى فكرة المدرسة اللى بتديهم انجليش اورال مش مصرية كانت اجنبية بس مش عارفة جنسيتها ايه وكانت مش بتتكلم عربى
جينيس
النطق كويس بيدخلوا اللاب مع تيتشر اجنبية وكمان بيدخلوا لاب الكمبيوتر

العيوب

المصرية
المدرسة المبانى مش جديدة بس مش وحشة معقولة
مساحة المدرسة مش كبيرة قوى بس فى ملاعب وحمام سباحة صغير بس زى قلته
جينيس
وعيبها ان المدرسين بيتغيروا كتير بس بصراحة السنة دى ما حدش اتغير خالص وتانى حاجة ان السنة دى كان فى دروب فى الادارة علشان جديدة

المصاريف

المصرية
المصاريف للكى جى 3750 وللبرايميرى 4200 والباص اععتقد فى حدود 1300 1400 فى الهرم
اليونيفورم الطقم (لبس عادى+سبورت حدود 300
جينيس
المصروفات للكى جى 4100 والبرايمرى4600 الباص + خصم 10% للطفل الاكبر لو فيه طفلين 1500 لفيصل 1350للأقرب 1300لحدائق الهرم اليونيفورم حوالى 350 حسب العدد اللى هتاخديه

الاميرة طماطم
بارك الله فيكي حبيبتي علي المجهود الرائع ده
طبعا انا بعيدة عن منطقتكم بس عجبتني اوي المقارنة دي...ان شاء الله هتسهل عليكم كتير وربنا يوفقكم

يا امهات فى نقطه مهمه اوى احنا نسينا نسأل عنها

هل المدرسه بعد ما بندفع المصاريف كلها بتطالب بأى مصاريف زياده طول السنه الدراسيه؟
كتب مثلا - ملازم - دروس تقويه اى حاجه من ديه؟
يا ريت يا دينا و يا ام جورى تردوا علينا بخصوص المصريه و جينيس

و كنت عاوزه اعرف الرحلات فى المدرسه اخبارها ايه؟ و ال fees بتاعتها بتبقى كام؟

يعنى هل فيه استغلال فى النقطه ديه و لا ايه رأيكم؟

جزاكى الله خيرا يا طماطم

كتبت بواسطة bent masr

على بالى بقالك يومين يا مريهان,بأقول فينها؟؟؟ غايبة عنا ليه؟؟
بصى يا جميلة....أنا رأيى مش هايبقى مزبوط أوى,لأنى فى غريانى جربت الكى جى فقط, و فى المصرية معلوماتى أكتر عن ابتدائى,يعنى مرحلتين مختلفتين تماماااااااااااااااااا, لكن هاحاول أرد عليكى قدر استطاعتى
*المدرستين بيدوا ماكميلان
أنا بأدرس سنة تالته (مدرسة البنات) و سنة رابعه (المدرسة المشتركة)....بالنسبة للغة, حاسة ان الموضوع استعداد عند الطالب بنسبة كبيرة....يعنى هما بيفهموا كويس و احنا بنتكلم انجليش معاهم طول الوقت ,لكن مش كل الطلبة بيتكلموا بنفس المستوى.....فيه ناس كويسة و فيه ناس مش أد كده خالص و عموما البنات لغتهم أحسن من الأولاد
أسمع ان مدرسين الانجليزى فى غريانى ممتازين جدا فى ابتدائى و أسمع كمان ان الألمانى عندهم قوى جدا(بس أنا مدخله ابنى فرنساوى عشان أنا درست فرنساوى مش ألمانى)

*الأنشطة......
هى دى النقطة اللى حاسه فيها فرق فعلاً ...
المصرية بيهتموا بالأنشطة أوى....حفلات أكتر, مناسبات أكتر.... بيعملوا كل سنة يوم اسمه( sports day(ELSians day بيبقى يوم جمعة و فيه مسابقات رياضية و ألعاب و فقرات فنية و بازار ,و .....و.....و.....
كل 3 شهور بيعملوا حفل عيد ميلاد مجمع للأطفال
أحسن فصل كل شهر بييجوا out of uniform (بلبس عادى,مش اليونيفورم) ليوم واحد....و دى بتبقى حاجه مفرحة جدااااااااااااااااااا للأطفال
بجانب الدراسة,فيه science club,drama club,art club,music ,جماعة دينية.....و ده بيكون وقت الفسحة,الأولاد بيتجمعوا مع المدرسة و يعملوا أنشطة غير مناهج الدراسة.....

أعتقد ان غريانى مافيهاش كل الأنشطة دى,لكن مثلا اهتمامهم بالدين جميل جدا ....صدقينى عندى بالدنيا لما ألاقى ابنى بيعلى الراديو عشان يسمع أسماء الله الحسنى و يقوللى احنا بناخد دى فى المدرسة!!!!! تخيلى ان أنا كان عندى مشكلة فى حفظ سورة العلق,دايما كنت ألخبط فيها,لكن اللى خلانى أحفظها انى اتكسفت ابنى يكون حافظها و أنا لأ....و كمان قلت لازم أحفظها عشان أراجعها معاه
يعنى.....طبعاً دى مش نقطة أساسية,لكن ليه لأ نحط الأطفال فى مكان ينمى فيهم الحس الدينى؟؟؟؟ بصراحه المصرية مافيهاش اهتمام خالص بناحية الدين... هى الحصة بتاعة الوزارة و بس

و نقطة كمان لفتت نظرى.... مبانى و تجهيزات غريانى أحلى من المصرية( مع استثناء ان المصرية فيها مسرح كبير و غريانى مافيهاش) لكن شكل المبانى و الفصول و حتى الباص فى غريانى أحلى, سواء فى كى جى أو ابتدائى

بصى, أنا صليت استخارة كذا مرة و مرتاحة انى أسيبه فى غريانى و كمان باباه مشجع, ان شاء الله ده يكون الخير...........ماهو ماحدش بياخد كل حاجه!!!!

والله فتحت نفسي لغرياني من كلامك يابنت مصر ماتعرفيش هيا قفلت باب التسجيل ولا لسه انا عندي بنتين في برايمري 1 &3 وولد حيدخل كي جي 1 انا قدمتلهم في المصرية وحددوا لهم معاد للانترفيو لما نرجع من السعودية بس خايفه لو ماتقبلوش لاني مش في دماغي مدرسة تانية بس لو غرياني كويس مستوى الانجلش بتاعها انا عندي الدين نقطة اساسية وعارفة انه نقطة ضعف المصرية
معلش حتعبك بس اسأليلي عن التسجيل في غرياني لو قدرتي
معلش حتقل عليكي بس كنت عايزة اسالك تعرفي مناهج انترناشونال اسمها بيرسون (سكوت فريدمان) دي اللي بيدرسوها اولادي هنا وهل هي مختلفة عن مكميلان عايزة اعرف هما حيمتحنوهم في حاجات يعرفوها ولا لسه ماخدوهاش
ما كدبش عليكم انا اترعبت امبارح لما عرفت ان امتحان بريمري 1 ساعة وبريمري 3 ساعة ونص ليه حيمتحنوهم في ايه
وخصوصا انهم نظامهم هنا تقييم مستمر مافيش امتحانات طويلة كده ربنا يستر
ياريت كمان اي حد عنده فكرة يطمنني علشان انا كده قلقت زيادة

كتبت بواسطة أم جورى

مش شرط والله بس غالبا بيبقى التانى متعب شوية عن الأول

وبجد التالت بيبقى شقاوة ولماضة يعنى جوجو هتبقى كدة ربنا يستر وتبقى شقاوة لذيذة

اه يابنتي الثالث عندي مصطفى شقاوة ولماضة وكل ما حد يعمل حاجة غلط يقلده ده غير انتاجه الشخصي من المقالب والمفاجات غير السارة ابدا وعارف كويس انه بالضحك والهزار وياحبيبتي يامامي خلاص لاعقاب ولا يحزنون ربنا يعينا على تربيتهم ويبارك فيهم في اولاد المسلمين جميعا

كتبت بواسطة ٍPossy

السلام عليكم يا معمارية مصرية
أنا من معسكر مدينة نصر بس حاليا في دبي وراجعة انشاء الله بعد شهر

أنا عندي توأم ولاد مأدرش اقول إن في إختلاف بينهم الاتنين هيجننوني يعني محدش أطيب من التاني ولكن عندي تفسير للموضوع دا من وجهة نظري المتواضعة :

بالنسبة لحكاية الطفل الأول أنه بيكون أشطر أعتقد إن الموضوع دا لو في معظم الأحيان صح ربما يكون بسبب إن الطفل الأول بيكون أخد كل المميزات أثناء تكوينه أقصد الجينات الوراثية الممتازة يعني A1 في كل الصفات
يجي بأى التاني ياخد الحبة الفاضلين من الصفات الممتازة وتبدأ الصفات الكويسة تقل تدريجيا مع الطفل الثالث والرابع إلخ .....

يعني دا تفسيري للموضوع دا والله أعلم وعلى فكرة في حالات استثناء يعني مثلا زوجي رغم إن هو أصغر إخواته إلا إنه أكثرهم ذكاء ونجاح في دراسته وفي عمله.

و برده في تفسير تاني إنه ربما الطفل التاني بيكون مظلوم لأنه بييجي بعد ما الأم تكون دللت واهتمت أكثر بالأولاني ودا طبعا بيستنفد كل طاقتها لأنها بتكون فرحانة بيه أوي يجي التاني فالأم مش بيكون عندها طهقان ليه ويظهر دا في معاملتها وطبعا دا بيحدث لا شعوري ودا طبعا يأثر على سلوك التاني فيعمل شقاوة وحركات تجنن ممكن علشان يلفت النظر ليه وبرده الله أعلم

وأسفة على الإطالة

وربنا يهدي أولادنا جميعا

ترجعي بالسلامة ان شاء الله
وانا كمان في الرياض وراجعه السنه دي
مش متاكدة من موضوع الجينات اللي قلتيه بس متفقة معاكي في اخر نقطة فعلا الاول بياخد مننا وقت كبير بنديهوله بسعادة اما التاني بيجي واحنا خلاص ابتدينا نزهق ونتعب ربنا يصلح حالهم جميعا

كتبت بواسطة kouky5

انا ملاحظة كدة برضه واعتقد ان الاهتمام بيكون بالطفل الكبير دايما اكتر التاني ودايما بنكون مستعجلين عليه في كل حاجة عايزين ندخله المدرسة بدري نشتركله في كل الانشطة وبنركز عليه اوي..واللهي انا كمان ساعات بحس بالذنب

اهلا بيك في معسكر المذنبون
فعلا بحس التاني مش اقل ذكاء ابدا بس عدم اهتمامنا بيه بالقدر الكافي سبب عنده عدم التركيز وبيعتمد على المدرسة اكتر كتير مننا على عكس الاول تماما