اخواتى الغاليات انا مبسوطة جدا من اهتمامكم وردكم عليا ويا ريت يا نهى تبعتى لى المنهج ضرورى جدا جدا كمان يانهى يا ريت تحكى لنا لو تعرفى تجربة احد مع المعاهد الازهرى لغات وهل حفظ القران يوثر على باقى المواد كمان يا فرح اشكرك جدا ويا ريت تقول لنا لو لكى تجربة مع هذا المنهج

ازيك ياملوكة ربنا يحفظ بنتك ويوفقها في مدرستها يااارب

بصي هو انا لسة بنتى بردو هاتدخل كى جى 1 والمدرسة بردو قالولى انهم بيدو ماكميلان دا كلام مدرسة روان الجديدة اللى لسة مرحتهاش بس غالبا كده هادخلها فيها او السراج المنير اللى في الهضبة الوسطى لانى رحت شفته وعجبنى اسلوب الادارة
بس على موضوع حفظ القران ياثر انا اعرف ناس مدخلين ولادهم في الغد المشرق اللى في التجمع وبصراحة موضوع القران هو انتى لو بتتابعى كويس وبتراجعى معاها باستمرار يبئا مفيش مشكلة معاكى خالص

اما بئة لو كسلتى وسيبتيها كده حفظت مع المدرسة وخلاص وجيتى بئة عالامتحانات بس تراجعيلها هاتحسي انها كتير وانو مش سهل وكده لكن مش بياثر على باقي المواد خالص عادى جدا وبعدين تعرفي في ناااااااااااس كتير همها تدخل ولادها المدرسة الفلانية عشان بيدوهم كزا لغة ومن اولى ابتدائي بياخد فرنساوى داغيير انو بيكون واخد مستوى رفيع ومستوى عادى في الانجليش يعنى 3حاجات طيب ودة مش يبئا كتير على طفل كده؟؟؟؟؟؟؟؟؟؟طب وليه انا بنتى دى مسئولة عنها ولما تحفظ القران من الاول كده هاتدعيلك بعد كده لانك حفظتيها من صغرها وماقصرتيش معاها

على فكرة التعب كله في الازهري لحد الاعدادية بعد كده المواد الشرعية في ثانوى تعتبر مراجعة للى قبل كده وطبعا المواد الشرعية اصلا مابتاخدهاش الا في اولى اعدادى وبعدين الثانوية عندهم سنة واحدة مش زى الثانوى العام فلو فكرتى في الموضوع عالمدى الطويل هاتحسي انو جاى بفايدة كبيرة بالاضافة الا انك لو مسكتى كتاب اى مادة زى الفقه او السيرة او الحديث هاتلاقي انو مش كم خااااالص بس تفرق بئة انها لما تدخل اولى اعدادى دى تكون سن بلوغ ولازم تعرف فقه الحاجات بتاعة سنها زى الطهارة وكده

فنصيحة انك ماتشيليش هم القران ولا المواد الشرعية وانويها نية لله وربنا هاييسرهالك بنيتك الصالحة ان شاء الله
ربنا يقدر لك الخير يارب

وعلى فكرة بياخدو لغة تانية من اولى اعدادى اللى اعرفه انها فرنساوى بس سمعت ان في معاهد بيخيروهم بين فرنساوى والمانى(الله اعلم المعلومة دى اكيد ولا لا)

نهى ياريت تبعهتيلي المنهج انا كمان وربنا يجازيكى كل خير يارب

ان شاء الله فى معهد جديد اخر مدينة الشروق ازهرى و لغات حيفتح السنة ده اسمه

مدرسة طلائع الامل الازهريةللغات

و انا روحت المدرسة و مستبشرة خير

هم طبعا يعنى بالنسبة ليهم اول سنة

بس اتكلمت معاهم و لقيت ليهم مبدا واضح فى التعليم

مديرة المدرسة قالت انها حتختار من الكتب اللى بتتدرس حاليا فى مدارس اللغات افضل المواضيع و حتجمعها فى بوكلت للتدريس

و المنهج اللى حتلاقيه جاب نتيجة افضل هو اللى حتقوم بعد كده بتدريسه فى السنة الاحقة

و اسعارهم مناسبة

يعنى البيبى كلاس ب 3000 من غير الباص

لو سمحتم انا عيزة ودي بنتي مدرسة فرنسية بس عيزة تكون مصارفها معقولة يعني متتعداش 3000 جنيه وطبعا مفيش قدامي غير تجريبي فرنساوي هل يترا من العضوات عرفا مدرسة تجربي فرنساوي تلحقني بيها

السلام عليكم ورحمة الله وبركاته
اخواتى الاعزاء طلبة وطالبات المدارس المصرية
يشرفنى ان اقدم لكم بعض من مناهج التعليمية المصرية لعلها تفيدكم فى ظل الظروف الراهنة من غلق المدارس بسبب انفلونزا الخنازير
حفظكم الله من كل سوء

ابدئها بتاريح الثانوية العامة بمرحلتيها
التحميل اضغط على الرابط التالى


//

وعليكم السلام ورحمة الله وبركاته

حياكِ الله أختي ياسمين بيننا..
وبارك الله فيكِ على الموضوع ولكن يُمنع إضافة روابط لمنتديات أخرى..
شاكرة لكِ تفهمك وبانتظار جديدك ..

السلام عليكم يا امهات مصر
كنت بسأل بس إذا في حد يعرف حاجة عن مدرسة زوسر برنسس في التجمع الخامس ولا لا
لأني عاوزة اقدم لبنتي فيها وكنت عاوزة استفيد من خبرتكم في المدارس

يا جماعة اية اخبار المدارس انا حقدم لبنتى السنة دى برى سكول عايزة خبرات ارجوكم
و مزايا الازهرى و عيوبة

انا كمان بدور على مدرسة اسلامية و ليس ازهرية و طبعا لغات و اللغات فيها تكون قوية و ميكونش شغلها جامد يعنى مريحة لبنتى فى المذاكرة..و مصاريفها تكون معقولة يعنى 6 او 7 او 8
و اهم حاجة يكون حد جربها فعلا و شكر فيها مش مجرد بالسمع...........انا محتارة اوى و وقت التقديم قرب اوى. و سالت فى الفاروق و الفاروق الاسلامية و بياخدو سن كبير مع ان بنتى سوف تتم 4 سنين فى شهر 11 الا انهم رفضوا! و الفرق شهر واحد !!!!!!!!!!
مستنية اى معلومات و شكرا

اية يا جماعة محدش عندة اى معلومات و الا اية