أطباق للحمية والتخفيف .... ملف متواضع لعيون الغالية أمانى

**صاحبة الـ@ـسك** · 19-10-2011, 01:08 AM

السلام عليكم حبوبات

معلش أمانى عارفة إنى وعدتك وطال الإنتظار
الطبخة إستوت وإتحرقت كمان ههههه
بس إتاكلت والحمد لله

اليوم هأقدم لكم مجموعة من طبخاتى للحمية والتخفيف وكل واحدة وشطارتها

أنا لا أؤمن إطلاقا بتاتا البتة
بالحمية التى يقوم فيها الفرد بحرمان جسمه
من شئ معين حتى الحلويات

يعنى الإعتدال فى كل شئ أحسن بكتير
وعلى هذا فريجيم السعرات
من أحب أنواع الريجيم إلى قلبى
فهو يسمح الأرز والمكرونة فى حدود
والبروتين فى حدود
والحلويات ممكن مرة كل أسبوع

رغينا كتير وجه وقت الجد
بسم الله نبدأ

**صاحبة الـ@ـسك** · 19-10-2011, 01:09 AM

دجـــاج صينى

المقــــادير

صدور دجاج الكمية اللى تحبيها

للتتبيل: صويا صوص + باربكيو صوص
ملح و فلفل
ثوم مهروس ( أو بودرة)
مستردة

خضار أى أنواع تحبيها
+ نودلز أنا إستخدمت مكرونة سمراء للريجيم

الطريقة

تغسل الفراخ جيدا بالخل
ثم تتبل بالتتبيلة السابقة

نقطع بصل شرائح مع فصين ثوم على النار
مع معلقتين زيت بالعدد

ثم يوضع الدجاج ويقل تقليبتين حتى يصير أبيض
ثم تضاف باقى الخضروات

أنا هنا جبت كيس خضار (Stir Fry)
فيه مشروم وقرنبيط وأسباراجوس وفاصوليا خضراء
وحطيت معاه جزر شرائح
ويقل حتى تمام النضج وتأكدى من الملح وممكن تزودى صويا صوص

تسلق المكرونة أو النودلز حسب التعليمات على العلبة
ويقدم بالهنا والشفا

طبق آخر

وممكن تآكليه مع عيش أسمر وخلاص
بالهنا والشفا

**صاحبة الـ@ـسك** · 19-10-2011, 01:09 AM

تــــــــــــــاكو الدجاج

طبعا ممكن الإستغناء عن خبز التاكو
وإستبداله بخبز الريجيم

المقـــــادير

نفس تتبيلة الدجاج السابقة ( التتبيلة دى أنا أخدتها من المنتدى هنا
بس مش فاكرة مين صاحبتها أعتقد أم المجد جزاها الله خيرا)

توضع قطع الدجاج فى قليل من الزيت على النار بعد التتبيل

نقلب حتى تستوى تماما

نحضر الخضروات ( بصل طماطم وخس ممكن فلفل أخضر)

نحضر خبز التاكو ويحشى بالمقادير السابقة
ويرش بجبنة الموتزاريللا

ممكن تآخدى واحدة فقط وبجانبه الفراخ مع الخضروات فقط بدون الخبز

وعليكم بالعافية

**صاحبة الـ@ـسك** · 19-10-2011, 01:10 AM

الطبق الثالث
وراك الدجاج المحشية بالأرز

الطبق ده من ملف الغالية أخت فى الله
http://www.lakii.com/vb/showthread.php?t=681495

المقادير

مجموعة من أوراك الدجاج
أرز للحشو

أنا عملت نوعين
أرز محشى وأرز الفراخ المحشية أو الحمام اللى بالبصل
والفلفل الأسود

النوعين كانوا حلوين جدا

أنا عملت غلطة إنى ما قسمتش الورك
الوراك اللى عندى كانت كبيرة
فالأحسن تقسميها نصفين لو كانت كبيرة
وتدقيها جدا ثم تحشيها بمعلقة أة إثنين أرز
ثم تلف فى الفويل
وتسلق

ثم تخرج بعد ما تستوى

شكلها مش عاطفى بالمرة لأنها كانا كبيرة فعلا

تشوح فى زيت على النار أو تحت الشواية

أنا قطعت واحدة علشان يبان الأرز من جوه

لذيذة جدا وخفيفة
وقدمتها مع فاصوليا متشوحة على الناز فى قليل من الزيت

طعمها لذيذ الفاصوليا كده بأرش عليها كمان ثوم بودرة وفلفل أسمر

وبألف هنا

**صاحبة الـ@ـسك** · 19-10-2011, 01:10 AM

فراخ بانية فى الفرن

المقادير

صدور فراخ مقطعة صوابع رفيعة
1/2 كوب دقيق
ملح وفلفل وثوم بودرة
بيضتين مخفوقتين
وبقسماط

تخلط التوابل مع الدقيق جيدا

ثم توضع فى كيس
وتوضع معها قطع الفراخ حتى تغطى من كل جانب بالتتبيلة
ثم تؤخذ قطع الفراخ وتغطس فى البيض ثم البقسماط وترص فى صينية بالفرن

يمكنك رش الفراخ بخاخ الزيت

الحقيقة أنا ما عملتش كده
لأنى لسه هأضيف صوص يحتوى على زيت

المهم توضع الفراخ فى فرن حار مسخن مسبقا حوالى 400 فهرنهايت
يعنى 200 درجة مئوية
10 دقائق لكل جانب وممكن تفتحى عليها الشواية
علشان تتحمر أكتر
الحقيقة هى عجبت الأولاد كده

بالنسبة لينا كانت محتاجة تتبيل أكتر
فعملت صوص البافالو
وهو كالآتى

أى هوت صوص عندك حوالى 1/2 كوب
+ 1/4 كوب زبدة سايحة

الحقيقة أنا عملت الآتى
معلقتين زيت طعام أى نوع
+ 1/4 كوب باربكيو صوص
+ حوالى 4 ملاعق كبيرة هوت صوص
وده لأنى خفت من إن الصوص يكون حااار جدا

لكن المرة القادمة بإذن الله هأزود الهوت صوص
لأنه بالنسبة لى كان متوسط وغير حار بالمرة
أما زوجى فكان مظبوط علشانه

غطسى الفراخ فى الصوص قبل إنتهاء السوا ب 5 دقائق
ثم إتركيها بالفرن 5 دقائق أو 10

هتطلع توووووحفة فعلا وعجبتنا جدا جدا

لقطة أخرى

فعلا طلعت جميلة وخفيفة غير الفراخ المقلية

وبألف هنا

**صاحبة الـ@ـسك** · 19-10-2011, 01:10 AM

إلى هنا وتنتهى وصفاتى لليوم
لكن ما زال فى جعبتى الكثير
أتمنى أن أستطيع إستكمال وصفاتى
وأن تستفيدوا منها
وأتمنى أن يعجبك يا أمانى
وتكون وصفات إستحقت الإنتظار

تسلموا لى يا غاليين
ولا تنسونى من صالح دعاءكم

**amani1** · 19-10-2011, 01:19 AM

الاطباق لي
انا الاول كنت بستني فيهم
الحيقرب منهم حازعل قوي
يسلموا ايديكي يا احلي بطوطه والف صحه وهنا علي قلبك
كل ما طال الانتظار كل ما ايجي الاحلي

**amani1** · 19-10-2011, 01:20 AM

من الفرحه نسيت واحد
خخخ

**صاحبة الـ@ـسك** · 19-10-2011, 01:48 AM

كتبت بواسطة amani1

من الفرحه نسيت واحد
خخخ

ههههههههههههه ضحكتينى يا منمن
تسلمى حبيبتى على مرورك
والحمد لله إنهم عجبوكى

**The Rose** · 19-10-2011, 08:17 AM

وجبات مشهية
تسلم ايديكى يارب

انتقلت منتديات لكِ النسائية إلى هذا الرابط:
منتديات لكِ النسائية
هذا المنتدى للقراءة فقط.

الموضوع: أطباق للحمية والتخفيف .... ملف متواضع لعيون الغالية أمانى

أدوات الموضوع

العرض