كنت حاسه ان الإنفجار هيحصل من زمان و اخيرا حصل .
علشان تفهموا الوضع انا حامل في بداية الشهر الثامن , مغتربة يعني مش معايا حد غير انا و زوجي و بنتي, بنتي عندها سنة و 4 شهور , زوجي والله طيب جدا و لذيذ و انا بموت فيه لكن فيه عيب خطير انه متدلع زي كل الرجال العرب مش بيساعدوا في حاجه حتي لو ايه !! شغل البيت ده شغل الست بغض النظر عن حالتها بقى , حامل مش حامل طب م احنا امهاتنا كانو مخلفين بال 7 و ال 8 عيال و مكانوش بيشتكوا اشمعنى انتِ محتاسة ب طفل واحد !!! ده الكلام اللي بيتقال .
المهم , حصل الإنفجار ازاي ؟؟
قاللي يوم كذا اوعدك هنتغدى بره , فرحت و ما صدقت اني مش هطبخ , ماكلتش كويس و عامله حساب الخروجة و الغدى لأني مش بخرج كل يوم و مبصدق اخرج اشم هوى , اتفاجئت يومها اني مش هخرج زي مكنت فاكرة لأ ده الظروف حكمت اننا نروح مشوار تاني , OK , NO PROBLEM , طبعا طول النهار مأكلتش و باليل و احنا راجعين قاللي انت اللي غلطانة ليه مأكلتيش قبل كده ؟ اجيبلك بيتزا ؟( علشان اخرس و يبقى كده اوفى بوعده ) قلت لأ ميرسي , بس انا بأجي في آخر اهتماماتك ولا بيفرق معاك كلامي علشان كده مش هكلمك تاني مدام مفبيش فايدة من الكلام.
طبعا كان في زعل , و تاني يوم كان طبعا لسه في زعل وانا اتحايل و اصالح و مفيش فايدة , طب انا غلطانة , مفيش فايدة , باحضر الأكل بسرعة لأنه هيخرج و هو بيستعجلني بغضب , بنتي تحت رجلي في المطبخ و بتزن وانا خايفة حاجة سخنة تيجي عليها و هو مش بيساعدني و ياخدها شوية , البيت مقلوب و انا تعبانة و مش قادرة اعمل حاجة وهو قلب البيت زيادة و برضة مش بيساعدني , لبس و هيخرج
-لأ ارجوك انا خلصت الأكل و تعبت على ما عملته كُل الأول ,
- كُلي معايا !
-هغير للبنت علشان بتعيط !
-غيرلها بعدين !
-ازاي بس ؟؟ كل انت علشان هتخرج و انا بعدين هاكُل !
زعل و زعق و ثار
- طب حقك عليا بس كُل علشان انا تعبت على ما عملت الأكل
-لأ مش واكل !
بس !! حصل الإنفجار بقى , صرخت و لطمت و شديت شعري وانا بقول (طب انا اعمل ايه !! اعمل ايه !!! اعمل ايه !! )
هو اتفاجئ وانا اتفاجئت قبليه من نفسي , و اللي زعلني ان بنتي خافت شوية بس الحمد لله متأثرتش قوي .
يا جماعه انا هرموناتي مش مظبوطة والله و بعيط من اقل حاجة و باتأثر من اي كلام ده بالإضافة لأني اصلا عصبية و حاليا تعبانة و عايزة اللي يطبطب عليه مش يتعبني اكتر , ما علينا اللي حصل حصل و انا كان لازم افضفض.
الروابط المفضلة