اخواتى اقدم لكم الان بعض من وصفاتى المشاركه فى مسابقه المعجنات التقليديه من كل البلاد العربيه
البوريك المصرى
طبعا مشهور فى مصر جدا ودائما نجده مع الباعه المتجولين لكن الافضل طبعا عمله فى المنزل واليكم المقادير
3 كوب ونصف دقيق
2 بيض
نصف كوب حليب
ملعقه كبيره ممسوحه خميره
ملعقه صغيره سكر
ربع كوب زبده
ذره ملح
ذره فلفل اسمر
الطريقه
نذوب الخميره فى اللبن والسكر وبنتركها جانبا خمس دقائق ثم نضيف اللبن على الدقيق ونعجن
وبعد خمس دقائق عجن نضيف البيض
نضيف الزبده فى الاخر ونراعى ان تكون طريه لا متجمده ولا سائله ونعجن الى ان تتكون العجينه هكذا
نتركها ساعه ونصف تختمر جيدا وهذا شكلها بعد تمام الاختمار
ومننساش بيض للتزين وسمسم وحبه البركه
نفرد العجينه ونضع الحشوه اعذرونى نسيت اصور الخطوه دى وبعدين نقطع العجين مثلثات او على شكل المنين او القطايف
اى شكل انتوا تحبوه ونرصه فى صينيه الفرن وندهنه بالبيض والسمسم وحبه البركه
نتركه حوالى ربع ساعه على حراره 200 وبعدين نشغل الشوايه من فوق علشان ياخذ لون
وده شكله بعد الخبز يارب يعجبكم
هنا حقدم لكم الكسكسى المصرى بالدقيق وطريقه جدتى كانت صعبه جدا جدا وكان ليه طقوس خاصه هو الاستيقاظ مبكرا والتحضير لعمله والعيله كلها كانت تتجمع يوم الكسكسى وغالبا بيبقى يوم الجمعه
زى ماقلتلكم الطريقه صعبه لكن مع تقدم العلم طبعا اصبح الصعب سهل
لان فى اختراع اسمه فوود بروسيسور اه لو كان موجود ايام جدتى
اكيد كان حيريح لها ايدها كتير لانها كانت بتتعبها بعد عمل الكسكسى لما يتطلبه من مجهود فائق لفرك العجين
فى طبق عميق ننخل الدقيق وبعدين نرش عليه ربع كوب الماء
خدوا بالكم رش وليس وضعه مره مره واحده
نقلب الخليط معا وفى الكبه او الفوود بروسيسور نضع كميه كميه ونطحن
ثانيه ونتوقف وثانيه اخرى ونتوقف
الى ان يكون شكل الدقيق عباره عن حبيبات هكذا وارجوكم لا تكثروا من مقدار الماء
لو عندك حله الكسكسى استخدميها ولو مفيش زى حلاتى يبقى نضع ماء فى حله ونضع فوقها مصفاه المكرونه او منخل سلك ونضع قطعه قماش نضيفه ونضع الكسكسى هكذا
ونغلق الشاشه تماما تماما ونتركه عالنار نصف ساعه
بعد مرور ربع ساعه نفتح عليه ونقلبه بملعقه خشبيه ونغلق القماش مره اخرى
بعد مرور نصف ساعه ننزله من عالنار ونضع الكسكسى فى المنخل السلك وطبعا تحته طبق عميق
ونفرك باليد هكذا لكى تنزل الحبيبات الصغيره من فتحه المنخل
طبعا حيكون فيه حبيبات كبيره لم تنزل من المنخل ودى نفركها براحه الكفين ونتاكد انه لا يوجد اى تكتلات فى الكسكسى ويكون بهذا الشكل
نعيده مره اخرى عالنار بنفس طريقه القماشه وايضا نص ساعه وبعدها ننزله من عالنار ونضيف الزبده او السمنه البلدى حوالى كوب الا ربع للكميه المذكوره ونفرك الزبده بالكسكسى براحه اليد شوفوا لونه تحول للذهبى نتيجه للزبده
هنا يكون جاهز للتقديم ممكن مع بط او فراخ وطبعا اخواتنا المغربيات والتونسيات بيعملوه بالخضار بس ياريت يقولولى عالطريقه
وممكن نضع عليه سكر بودره ويزين بالمكسرات والقرفه
ملحوظه
ممكن نعمل كميه ونضعها فى الفريزر شهر او اتنين ولكن بدون زبده وعند الاستخدام نسخنه ونضيف الزبده
دلوقتى حقدم لكم اكله غريبه شويه او شويتين هى مصريه اصيله لكن قليل جدا جدا اللى يعرفها
لماذا
لانها تقريبا بنفس طعم الغريبه لكن تختلف عنها فى التزيين
وحنشوف طريقتها مع بعض
الوصفه اسمها
العدليه
المقادير
2 ونصف كوب دقيق
كوب زبدة طرى وليس سائل بدرجه حراره الغرفه
كوب سكر بودره (مهم يكون بودره )
بياض بيضتان
فانيليا
3 ملاعق كاكاو (اختيارى)
نصف معلقة بيكنج بودر
للتزيين
سمسم -حبه البركه- مكسرات
الطريقه
ننخل الدقيق مع البيكنج باودر ونضعه جانبا
نضع فى العجانه(او باستخدام المضرب الكهربائى) الزبده والسكر
نضرب بالسلاح السلك الشبيه بالمضرب
الى ان يتحول الخليط الى الشكل الكريمى هكذا
نضيف بياض البيض والفانيليا ونضرب مره اخرى وبعدين نضيف الدقيق على مراحل الى ان تتكون عجينه بهذا الشكل
نقسم العجينه قسمين وده اختيارى ممكن جزء نتركه ابيض والاخر نضيف عليه الكاكاو هكذا
بعد تقسيم العجينه نبدأ فى تشكيلها بهذا الشكل
او بعد تشكيلها نضع وجهها فى السمسم او حبه البركه ونغرز المكسرات فى المنتصف
نرصها فى رف الفرن المبطن بورق زبده ونراعى ان نباعد بين الحبات لانها بتتسع وطبعا نزينها باى طريقه كما فى الصوره
نضعها فى الرف المتوسط على حراره 180 لمده ربع ساعه وبعدها المسى بايدك سطحها لو تجمد تبقى استوت ومش محتاجه تفتحى الشوايه من فوق تتحمر ابدا
وطبق تانى لاحلى بنات
يارب وصفاتى اليوم تكون عجبتكم
الى اللقاء فى وصفات مصريه صميمه من مطبخ ام نور
وبالتوفيق للجميع
الروابط المفضلة