بسم الله الرحمن الرحيم
الله اكبر الله اكبر الله اكبر
الله اكبر كبيرا والحمدلله كثيرا
وسبحان الله بكرة واصيلا
وصل الله على سيدنا محمد وعلى اله وصحبه وسلم
************************
**********************
*********************
اخياتي === بناتي
جبت لكم سالفه دايم تقولها اميمتي
عن تربية الابناء خاصه البنات وكيف
انهم يتعاملون معهم بحكمه
والسالفه هي ان واحد زوج بنته
الوحيده على شاب عاقل
يخاف الله بمعاملته مع اهل
بيته
وكانت البنت وحيدة امها
ومدللتها
بمواصفات ذاك الزمن
وكان يتحمل عصبيتها لان
ابو البنت عزيز عليه وهو
صديق ابوه
مره راح الاب للمسجد قبل الاذان يبي
يذكر الله ويقوم اليل قبل صلاة الفجر
وكانت المساجد مفتوحه للمحتاج وابن السبيل واول مادخل للمسجد ويشوف صدفه زوج بنته نائم بالمسجد استغرب ليه زوج بنته ينام بالمسجد وهو توه عريس له كم شهر *على طول بحكم انه اب ظن ان الزوج مايحب بنته وعزم على اخذ بنته من بيتها وطلب من الزوج تطليقها=وهو رايح يبي يصحي زوج بنته بعنف فجاه رجع عليه تعقله وتعوذ من الشيطان
وقام وقراء قران وقام اليل وسبح وهلل وشافه الامام قاله ترا زوج بنتك مو هاذي اول مره ينام بالمسجد
وترا يابو فلان الذيب بالتسليب(بالقليب) شف وش السالفه
وقبل الاذان بوقت صحى رجل بنته برفق ولين ويوم ان الشاب شاف عمه هو الي صحاه مات من الحياء راح وتوظى وصلى له ركعتين وبعد الاذان صلى الفجر واول ماطلعوا الناس مسك زوج بنته قاله هاه ياوليدي وش هالسواة انت مالك بيت يضفك اجل تنام بالمسجد وش بلاك ??
قاله زوج بنته ياعم تراي
من زمان ابقولك بس
مستحي منك هاذي بنتك
الله يسلمك كل ماطق عودن عود=يعني كل مره= وصارت بينناء مناقشه
لو ارد عليها الكلمه مرتين
او ارفض لها طلب مهما
كان الطلب صغيراوكبير=
تبدا تردح برجولها
وتصيح وتصارخ (طلقني ) مهما حاولت
اثنيها عن طلبها تزيد عناد
وصياح وعلشان ماتهور
واسويها اهج منها وانام بالمسجد لاني اذا جلست بالبيت
ماخلتني انام ولا ارتاح
وانا كداد بعيشتي اخاف
اسويه ترا ياعم موب كل مره امسك نفسي
علشان تسذا انام بالمسجد
السموحه ياعمي == قاله انت تحبها وتبيها
قال ياعم تراها ماهيب رخيصتن عندي
يكفي انها بنتك
=======================
قاله ابوها اذا طلبت الطلاق طلقها بهالطريقه الي ابقولك عليها
====================
راح كل واحد لبيته
ومرت الايام فجاه دخلت
عليهم بنتهم وهي تصايح وشوي يجيها انهيار عصبي هي ظنت ان ابوها يبي يعصب
يروح على طول لرجل بنته
ويهاوشه
المهم قال لبنته انتي ماتبينه
قالت وهي معصبه ودموع ومشاهق لا مابيه
ابيه يطلقني وخلاص طلقني
قالها طلقك
قالت نعم يايبه
قالها وش قالك
قالت طلقني بالثلاث =
قالي (طالق= طالق=طاق)
قالها ابوها انتي عديتيهن
قالت نعم ثلاث مرات قالي طالق
قالها خلاص يبنيتي بيتن رباك ماراح يتخلى عنك وانااوريك به ولد فلان
هي كانت تبيه ومتعلقه به
بس الدلع والدلال==انتظرت يومين ثلاثه اسبوع
شهر بدوا يحسون انها قلقانه ومتوتره
وكم مره تسال ابوها ماجاء يمك
افلان ويوم انها كثرت السؤال نهرها ابوها قالها
انتي الي طلبتي الطلاق وخلاص هاذا هو طلقك وش تبين فيه لا وطلقك بالثلاث مالك رده واتفق مع امها انها تكرفها بالبيت ولا تخلي لها وقت ترتاح فيه وكان لهم خدامه تجي تساعد امها
وقت ماتحتاجها وابوها راعي عزايم وكشتات = وذبحها الكرف قالت لمها وين فلانه الي هي الخدامه قالت ابوك خسران بتجارته ماقدر اناديها وبعدين وشوله الخدامه وانتي عندي
ومره كان عند ابوها شايب عايب
سئ الخلق والاخلاق ومزواج وبخيل ويسمونه المدود وكان يتقهوى عند ابوها وسالت البنت ابو فلان هالمدود وشوله جاي عند ابوي
قالت امها يمكن جاي يخطبك بعد ماخلصت عدتك قامت رمت الي بايديها وراحت لغرفتها وجلست
تصيح صياح يوجع التسبد=الكبد)
دخلت عليها امها قالت لها
وراتس تصيحين قالت انا مابي الشايب المدود
انا ابي رجلي ولد فلان
قالت امها خبز خبزتيه يالرفلى كليه
قالت انا الي غلطانه دايم
اطلب الطلاق واقف عود بحلقه مادري ليش هالمره على طول قالي =طالق=طالق= طالق=ياوييل تسبدي
قالت امها من رفالتك وعجزك يالعجازه
ماوراء صبر عليك ولا نفع فيك
انتي بنتي وعرفك الحين قومي غسلي السجاد عند ابوك عزيمه وانا ابروح لبيت اهلي بالديره وسوي لبوك جريش وقرصان ترا ابوك هو الي طالب والله الله بالطبخ السنع =قعدت تصيح قالت يمه ان تعبت من الكرف قولي لبوي يخف عن العزايم شوي
قالت امها لانا بقايله ولا يحزنون
وانتبهي تقولين له لانه واعد روحه يزوجك من الشايب ابو فلان المدود
اذا كثرتي الحنه
وسمعت ان زوجك خاطب ويبي يعرس
اول ماقالت لها امها هاكلمه
طبت من طولها وغمى عليها
قامت امها ورشت وجهها وسمت عليها= وكل ذاك اليوم وهي مريضه وتصيح وعافت الاكل واو ماشافها ابوها عرف انها استوت== قال لامها انا رحت للمطوع واستفتيته وانه يقول الطلاق بالثلاث تعد وحده لانها كانت غير طاهره ذاك اليوم علمي بنتك تستعد يبي يجي ياخذها بعد يومين
واول ماسمعت قعدت تصيح وتضحك بوقت واحد ولا نامت ذاك اليوم
نادت المشاطه==كوفيره ذاك الزمان علشان تسوي لها منكير وبديكير كخخخخخخخ
نادتها تمشط شعرها بالورد وتخضب ايديها ورجلينها وهي مهيب مصدقه
نفسها
وقبل تروح لبيتها مسكها بوها وقالها
اذا جيتي يمنا مرتن ثانيه مطلقه لاتلومين الا نفسك تراي ابزوجك من ابو فلان المدود الي انتي ماتواطنينه بعيشة الله
وخلي عنك الدلع والرفاله وطولت اللسان تراهم ماينفعونك
========================
***********************
وتدرون ان الاب اتفق مع رجل بنته انه يبي يربيها من اول وجديد
وانه ماطلقها والكلمه الي سمعت وهو يرددها==طالق==طالق==طالق
هي نفسها
طارق==طارق==طارق==
بس الخبله مع الصياح والعصبيه
وقلة الادب
ماسمعتهم زين تحسب نفسها تسمع طالق كخخخخخخخخخخخخخ
من عجبتها السولافه تدعي لميمتي والمسلمين اجمعين بالرحمه
ومن لم تعجبها ترا بطرف الشاشه
دويرا زرقاء بوسطها سهم ابيض الله لايضرها
ترعص عليها وتقلب الصفحه ووج-----
ولا بلاشششششش
دمتم بود
الروابط المفضلة