السلام عليكم و رحمة الله و بركاته:
أخواتي و حبيباتي
من أول ما أجيت للبحرين ، جبلنا زوجي هالأكلة من أحد المطاعم الهندية و كتييييير حبيناها و صرنا دائما" نجيبها، بعدين قلت لحالي رح نضل ناكلها من السوق لازم أعرف كيف بتصير، شو الهنود أحسن مني ، و اشتغل المفتش كونان بقلب الأكلة لحد ما عرفت كيف بتصير و ساويتها ، و لما داقها زوجي شك بحالو أنو ايمتى جابها و مو عرفان .
المهم حبوها كتيير و طلعت نفس الشي.
و بتصير باللحم و بالدجاج، نحنا نحبها بالدجاج أكتر...
طولت عليييييكن و حكيت كتيير ، يلا تعالوا نشوف كيف بتصير:
المقادير:
دجاجة مسلوقة و مخلية من العظم
زنجبيل ، كزبرة خضرا ، بهارات هندية ، ملح
بطاطا مقطعة مكعبات و محمرة بالزيت
بندورة(طماطم) مبشورة
بصلة مقطعة قطع صغيرة
2 سن توم
حبة فليفلة خضرا
ملعقة كبيرة كمون
الطريقة:
*نقلب البصلة و التوم ب 4 ملاعق زيت نباتي.
* نضيف الزنجبيل المبشور و الكزبرة الخضرا المفرومة، و نخلط المواد مع بعض.
*نضيف الفليفلة المقطعة قطع صغيرة.
* نضيف البندورةو نخلط المواد جيدا" .
* نحمر البطاطا نص تحمير.
* بعد ما تدبل البندورة و تقارب على الاستواء نضيف الدجاج المقطع قطع صغيرة و البطاطا المقلية.
* نضيف نص كوب ماء و الملح و البهارات و نغطي الوعاء و نترك الطبخة على نار هادئة، حتى تختلط المواد مع بعض و تتجانس و تنشف المي شوي.
* بصراحة ريحة الكمون مع الزنجبيل طالعة بتاااخد العقل .
* أنا سكبت الطبق قبل بوقت من التمازج النهائي لأنو الشعب العربي كان واقف على باب المطبخ و عم يطالبوا بلائحة منظمة اليونيسف لحقوق الطفل بالطعام و الشراب، أنتو خلوها كمان شوي .
* تؤكل مع الخبز العربي أو الهندي متل ما بتحبوا، أنا عندي ديمقراطية و ما رح اجبركن على شيييي
*و لاكتمال القيمة الغذائية لا تنسوا صحن السلطة و كمان بالطريقة يلي بتحبوها...أنا بحب السلطة الخضرا.
*تفضلوا مع ألف صحة و هنا***
* كلوها و هي ساخنة أطيب و أدفى بالبرد*****
الروابط المفضلة