يانواعم انا كل ما ادخل الركن هنا
ادخل واكون نفسى اتنكر
وقول يا حيطه خبينى
علشان خيابتى فى لف المعجنات
فمن فضلكم ماتبصوش على القشره الخارجيه وتعمقوا فى الجوهر
انا حسه انى بعمل عمليه جراحيه
مع شوية اضافات من عندى خلتلها رائحه رائعه وكل ده لسه موصلتش للحشو
ندخل فى الموضوع
كنت عايزه اعمل حواوشى وجربت العجينه ده ومعنتش حستخدم غيرها ان شاءالله
المقادير
6 اكواب دقيق
3/4 كوب زيت
ملعقة خميرة كبيرة
ملعقة ك بيكنك باودر
3 ملعقه سكر
ملعقة صغيرة ملح
4 ملاعق كبار حليب بودرة
علبة زبادي
كوب ونص ماء دافي ممكن شوي اكثر او اقل حسب نوع الدقيق
حلو الكلام
انا ضفت
م ص زعتر
1/2 م ص جوزة الطيب
1/2 م ص قرنفل
والجديد
م ص ممتلئه بصل بودره
وعجنت كله على بعضه
الجاف لوحده والسائل لوحده
وفى الاخر عجنت العجينه وسيبتها تخمر فى فرن دافىء مسبقا ومتغطيه بفوطه منديه بمايه سخنه
وهى بتخمر
عملت خلطة الحواوشى
1 كيلو لحمه مفرومه
1/4 كيلو بصل شرائح
1/2 كيلو فلفل اخضر شرائح لانى بحبه كتير
ملح فلفل بهارات لحمه
وقلبتهم مع بعض كويس
زى العجين
ووحطهم على النار مع شويه زبده
لغايت ما استوت اللحمه ومعدش ليها اى صوص
عملت العجينه كور
وحشيتها
وسيبتها تخمر تانى ودهنتها بيض مضروب باللبن ودخلتها الفرن
خبزت صاجين واحد من فوق والتنى تحتيه
وفتحت الشوايه فى الاخر خالص علشان ادى لون للوش
وكالعاده يعنى مشجديده
الصاج اللى فوق لونه اغمق منى
المشكله مش اللون بل بالعكس انا لونه عجبنى انا كنت خايفه العجينه تكون نشفت
واول ما طلعت من الفرن
جيبت قطعة زبده مسحت بها على الوش وايدى وهى مبلوله مايه فشفشتها على الحواوشى وبنفس الفوطه المنديه لفيت الصاج بيها
والحمدلله طلع طعمه ورائحته وطراوة العجينه وهشاشتها ملهاش حل \
وعلشان غالبا عندى حزبن فى البيت فالحزب التانى طلب بيتزا
ومن نفس العجينه
فردتها وحطيت صوص البيتزا المميز
3 طمطمايات
1 بصله ملح فلفل
متهيألى مشمحتاجه اى توابل كفايه اللى فى العجينه
واضرب فى الخلاط وصفى وسبكى على النار
وفردتها على العجينه
وحشيت نص العجينه
نفس اللحمه المفرومه اللى فوق والنص التانى سلامى وبسطرمه وزيتون اسود وفرشت على الصينيه جبنه شيدر ورومى جديده مبشوره
ودخلتها الفرن
وما شاء الله انا كنت عامله كلو دقيق
اندثر ومكنش له اى اثر تانى يوم الصبح
وشكرا لاستحمالكم ليا
لكن وعن ثقه متناهيه
جربيها وادعيلى
وادعوا لام مريم
الروابط المفضلة