-
أختي دانه انا متزوجه من واحد هو اصغر اخوانه وتعرفين غلاوة اخر العنقود عند امه
ومريت بنفس مشكلتك على قولتك معتمدين عليه بكل شي حتى مو بمشاوير امه لا بمشاوير اخواته المتزوجات وبناتهم بعد . وياليت يا اختي شفنا تقدير بالعكس لو يتعذر عن طلب واحد يزعلون منه ويقولون اني انا السبب
لكن يا اختي ارجوك لا تخربين حياتك عشان ها المواضيع وسعي صدرك واحتسبي الاجر
وصدقيني الحبيب مع اهله لا بد يكون حبيب مع زوجته
ولا تكثرين مناقشات مع زوجك في ها الموضوع لان اكثر شي يضايق الرجال اذا سولفتي له عن اهله والا بينتي له انك متضايقه منهم
صدقيني يا اختي هذي تحصل في بداية الزواج لكن بعدين بتلاقينه متفرغ لك انتي لحالك خاصة اذا جبتي له طفل صغيرون يملا عليكم حياتكم ما راح يلقى ذيك الساعه وقت لطلبات الناس الثانين
واهم شي لا تعودين اخته تطلع معاكم لان مشاويركم خاصه لكم ومن ابسط حقوقك انك ترفضين جيتها معكم لكن بأسلوب لطيف ما يزعل اخته ولا يزعله
نصيحه اخيره حاولي تسعدين زوجك قدر ما تستطيعين وتكونين طيبه مع اهله لأن كل شي بأجره
-
مشكورين كلكم على ردودكم ونصايحكم والله بردتوا قلبي حسيت ان في احد حاس فيني ...... اختي خالدة انا فعلا اول كنة لهم وزوجي هو البكر عندهم وبالنسبة لعلاقتي فيهم فهي ولله الحمد اكثر من ممتازة وانا فعلا حاطتهم على راسي من فوق وهم يحبوني ويقدروني وحتى هالاشياء اللي تضايقني انا حبيت اقولها لكم واستشيركم وتعطوني اقتراحاتكم وانا ما كلمت زوجي فيها ولا اهله لأني ما احب اجرحه بشي وهو للأمانة شايلني على راسه من فوق واظن مراعاة اهله هم ابسط حق له علي ....
لكن مثل ما قلت لكم اخواتي الواحد وده يعيش هالايام ويستمتع فيها وده تكون له خصوصية بحياته ويحس ان له بيته واستقلاليته يعني لما اهله يطلبون شي والله على عيني وعلى راسي والله انا اللي اشجعه على هالشي بس في طلبات مو معقولة ومو ضرورية والواحد صج يتضايق منها ويحس انها تنغص عليه عيشته بالله عليكم وحدة طالعة مع ريلها الوقت متأخر حده وجو رومانسي وفجأة يرن التلفون اخته تبي عشا من مطعم ما عندهم خدمة توصيل وتبي الحبيب يوصله لها مع ان عندها سيارة وسايق واهلها الله يخليهم لها موجودين والمطاعم متوفرة يعني لازم هالمطعم بذمتكم الواحد ما يرتفع ضغطه ؟؟؟
وعن طلعاتها معانا كلما نطلع وماناخذها ...... ليش ما اخذتوني ؟؟؟؟؟ ووين رحتوا ؟؟ وزن فوق راس اهلها بصراحة شي يضايق حتى لو كانوا اهله الله يحفظهم بصفي بس هم الكلام يا اخواتي يغث وانا مو ملزومة كل مشوار اروحه معاها صح والا لا ؟؟ ...
اتمنى تواصلكم معاي لأني صج محتاجة للي اكلمه وينصحني .... ولكم جزيل الشكر
-
انا اسفة يا دانة اني داخلة عرض بس راح اقولك شي زي ما يقولون حطيه حلقة في اذنك
اول نقاش حاد عن اهل زوجك معاه راح يكون نقطة سوداء في حياتكم وراح تندمين عليه طول العمر
بس لازم تكونين شاطرة في اشعار زوجك باهمية خصوصية اوقاتكما عاد شوفي ايش يحب
وانتي وشطارتك تخليه هو يهتم ما حد يقطع عليكم اوقاتكم الحلوه بس الله يعينك