تويت
*وصفه مبتكره*سنجارى قطع بصلصة (سى فود) وطريقة تحضير الصلصة فى البيت من مطبخى
سنجارى قطع بصلصة (سى فود) وطريقة تحضير الصلصة فى البيت من مطبخى
السلام عليكم ورحمة الله وبركاته
اهلاً بيكم حبيباتى تشرفوا موضوعى المتواضع بإذن الله ، طبعاً كل اللى هتدخل الموضوع..داخلة بدافع الفضول أو التوفير..ومعاكم حق لو بدافع التوفير،عشان لما بندخل السوبر ماركت بنلاقى أنواع صلصات كتير تحت مسميات مختلفة والفضول بيخلينا عايزين نجربها ...والنهاية إما بنخاف نجربها أو بنخرج شاريين حاجات غير اللى احنا كنا محتاجينها.
المهم قررت انى أفيد زي مابستفيد كتيييييييييييييير منكم واعمل صلصة السى فود فى البيت وأستعملها فى طبق سمك وان شاء الله تجربوها وتعجبكم أكتر من الجاهزة وكفاية انها من ايدك ومضمونة.
كان عندى سمك روسى (اسمه كدا فى مصر..نسبة للأسطول الروسى اللى كان يصطاده ويجمده)،قلت اعمله سنجارى بس قطع زي مابحبه وكمان أغير طعمه وشكله فى النهاية..بس بجد طلع تحفة وحبيته..والصلصة كانت مفاجأة ويكفى انها فريش ومن غير مواد حافظة.
نبدأ بسم الله:
مكونات الصلصة:
1. جذور /رؤوس فجل أبيض مقشرة ومقطعة قطع صغيرة..الفجل اللى اقصده طعم جذوره حارة وتلسع فى اللسان ..لو الفجل الأحمر له نفس الخصائص ينفع نستخدمه..بصراحة مش استخدمته قبل كدا
2. ماء /من2 إلى 3 ملاعق كبيرة
3.خل
4. ملح
وكمان هنحتاج وقت استخدام الصلصة:
1. كاتشاب..مش كان عندى فعملته بعصير طماطم وخل وسكر وتوابل وغليتهم على النار
2. صلصة حارة/chilli استبدلتها بشطة فريش مفرومة(هريسة حارة)
3. بصل أحمر..أو اي نوع
4. عصير ليمون
5. ملح
الطريقة:
الكميات اللى استخدمتها كانت بالعين،وواضحة فى الصور
نضع قطع الفجل فى الخلاط/البلندر وعليهم كمية ماء بسيطة و من غير ماتغمرهم،وكمان كمية خل معقولة وملح.
صورة الفجل الأبيض
الكمية اللى استخدمتها
.........................................
ممكن نحفظ الخليط الناتج فى برطمان زجاجى محكم الغلق فى الثلاجة لمدة 10أيام..أنا استخدمتها فى نفس اليوم لأنها كانت كمية صغيرة وكنت محتاجاها فى نفس الوقت.
.................................................. .
ووقت الإستخدام نضيف عليها كاتشاب.. تقريباً نصف كمية الخليط.
ونضيف الشطة الحارة ، والكمية حسب رغبتنا..ولو عندك اطفال وعايزة تلغيها ، براحتك..
وكمان نضيف بصلة صغيرة مقطعة ويستحسن تكون بصلة حمرا ،وعصير ليمون وملح ولو محتاجة خل تانى ممكن نزود شوية.
...........................................
والنتيجة...طعم حار لاذع طفيف الحلاوة يفتح النفس ويجوع ..ومش كنت متخيلة انى هحبها واشتهيها مرة تانية.
..............................
مكونات السمك:
1. سمك روسى قطع..او النوع اللى تحبيه
2. سلطة للحشو:كانت عبارة عن طماطم ، بصل ، فلفل بارد..أي لون ، توم ، كسبرة/كزبرة خضراء ، ملح ، كمون ، ليمون ، زيت...وضفت عليهم كمية من الصلصة اللى جهزتها.
الطريقة:
جهزت السمك،رشيته من الداخل والخارج بملح خفيف وحشيته بالسلطه.
............................
جبت صينية وغلفتها من الداخل بالفويل(للنظافة ومنعاً للإلتصاق) ورصيت السمك فيها ودهنته زيت وسكبت عليه باقى ماء السلطه، ودخلتها الفرن من غير تغطية .
.................................
بعد نضجها قدمتها فى طبق وجملتها بالبقدونس والخيار.
صورة عن قرب
أقرب للتعذيب والتجويع..على طريقة ام مالك
..................................
حضرت حلة فيها صلصة سى فود وغليتها على النار بدون زيت او زبدة ووضعت فيها قطعتين سنجارى على سبيل التجربة وتركتها تغلى 3 دقائق مع التقليب.
................................
وقدمتها على اوراق خس وسكبت باقى الصلصة المغلية فوقها ومعاها رز أبيض.
والطعم كان حكاية..جديد ولذيذ ومش محتاج أي مقبلات معاه...اتفضلوه بالهنا.
صورة عن قرب عشان خاطر كبرياء بتحب اللقطات دى
بتمنى اكون قدمت حاجة مفيدة ، والله يجعله دايماً عامر على الجميع..واتفضلوه بالهنا على قلوبكم...
إذا كنتى زائرة وقررتى نشر الموضوع فى منتدى آخر، فأرجو من الله ألا تنسى وتذكرى انه منقول.
ادعولى ربنا يتمملى زواجى بخير..أنا فى أمس الحاجة لتلك الدعوة.
تعليق