تويت
$ رحلتى مع التوفيـر ..نصائح للتقليل من فاتورة الكهرباء ُ Energy Bill $ ج 6 ☆ردود قيمة
السلام عليكم حبوباتى
إتأخرت عليكم فى المواضيع معلش اليوم عندنا ثلوووووووج وصقيييييييع علشان كده إمبارح نزلت ألحق لى كام عرض قبل ما يخلصوا
وبمناسبة الثلوج والبرد والصقيع موضوعنا النهاردة عن فاتورة الكهربا ومحاولة التوفير فيها بالذات مع وجود هذا البرد الفظيع
التوفير فى فاتورة الكهرباء:
كل شهر تيجى لنا فاتورة كهربا وغاز تعكنن علينا بالذات فى الشتاء... الجو بارد وصقيع والتدفئة شغالة ليل ونهار وفى بعض المناطق مننا بيكون العكس هو الصحيح والتبريد شغال ليل مع نهار وبالذات هنا التدفئة مركزية يعنى فى البيت كله مش بس مجرد تكييف فى بعض الغرف..تكلفة التدفئة عالية وتسحب مبلغ كبير ده غير بقى البوتاجاز واللمبات وباقى الأجهزة المستهلكة للكهرباء .....دى شوية الحاجات اللى عملتها محاولة منى لتقليل الفاتورة
أولا : الأولاد ... الأولاد ... وكمان الأولاد لازم يتعلموا لما يخرجوا من غرفة يقفلوا النور ولما يقوموا من قدام التليفزيون يتقفل واللعب زى الوى(Wii) والإكس بوكس(X-Box) والسونى(PS) تتقفل السى دى بلاير يتقفل وأهم منهم الكمبيوتر لازم يتقفل بيسحب كهرباء عالية جدا جدا لازم يتعودوا إن التوفير مش أوبشن مش حاجة إختيارية ومنها التوفير فى الكهرباء والمياة قولى لهم ربنا بيزعل مننا لو أسرفنا والشيطان بيكون مبسوط
ثانيا: كونى إنتى ووالدهم المثل الأعلى ما تخرجيش من مكان وتسيبى الأنوار مفتوحة والأجهزة شغالة بدون حاجة لذلك ما فيش نور يكون مفتوح إلا النور بتاع المكان اللى قاعدين فيه وبس
ثالثا: إستبدلى كل اللمبات فى البيت باللمبات الموفرة للطاقة بتفرق كتييييييييير قوى فى الإستهلاك وهتلاحظى فرق جامد فى الفاتورة
رابعا: لو عايشة فى المناطق الباردة فى الشتاء زى عندنا إخبزى وشغلى الفرن على الطبيخ والصوانى بالليل لما تكون الحرارة فى أقل معدلاتها فى اليوم ولو عايشة فى المناطق الحارة برضه إشتغلى بالليل لما تكون درجة الحرارة أحسن علشان ما تزوديش من سخونة البيت
خامسا: دورى على المناطق اللى بيجيلك منها سرسوب الهوا الساقع مثلا من الشبابيك أو فيه شرخ فى زجاج أو من تحت عقب الباب وحاولى تلاقى حلول مش بأقول لك تغيرى النوافذ بتاعة البيت بأخرى معزولة عزل جيد لأن ده مكلف جدا لكن ممكن لو حاجة فيها شرخ تصلحيها مثلا عندى البيت قديم والعزل فيه مش كويس والباب بيسرب هوا من تحت بقيت أحط قدامه زى بطانية وأسد بيها مكان دخول الهوا
يعنى أهه حل برضه و الجيش بيقول لك إتصرف ههههههسادسا : الغرف اللى مش مستخدمة مفيش داعى ندفيها واللا إيه؟ يعنى عندك غرفة واللا إتنين مش مستخدمين إقفلى الهوايات فيهم خالص هيوفر لك جزء كويس من الطاقة بس خللى بالك ما تقفليش جزء كبير من البيت علشان فيه فنيين مش بينصحوا بكده وبيقولوا ده بيخلى الهيتر يشتغل أكتر بس من تجربتى أنا قفلت تقريبا 1/3 البيت والفاتورة قلت كتير
سابعا : حاولى تلاقى درجة حرارة معقولة للبيت وتراعى فيها وجود الصغار أو لو عندك بيبى يعنى مش ضرورى نعملها غابة إستوائية زمان أول ما جينا هنا ما كناش متعودين على البرد وكان الثرموستات بنعمله على 80 فهرنهايت علشان نحس بالدفئ دلوقتى لو عملنا كده هنولع كلنا
ثامنا: لما تكونى مش فى البيت فى الشتا وطى الثرموستات خالص ( ملحوظة ممنوع عندنا نقفل الثرموستات علشان أنابيب المياة ما تتجمدش وتطق) ولما نكون فى الصيف نقفله خالص مش مشكلة يعنى لو دخلنا من برة وكان البيت حر مش هيكون زى برة كمان فيه ناس بتقول لو إنتى فى منطقة حااارة ورطبة لما بيقفلوا التكييف لمدة طويلة مثلا مسافرين شهرين واللا حاجة بيرجعوا يلاقوا الخشب عليه عفن!!! طبعا أنا ما جربتش الموضوع ده لأن الجو عندنا جاااااااااااااف جدا فى الصيف وفى الشتاء
تاسعا : دائما تتأكدى إن شفاط الهواء فى الحمامات والمطبخ مقفولة .... كتير مننا بيسيب الشفاط فى الحمام بعد ما يآخد دش مفتوح لساعات بالذات لو حمام بيدخله الأولاد فقط والشفاط بيسحب كهربا كتير
عاشرا : شيلى كل الشواحن من الفيشة لما تكون مش مستخدمة مثل شواحن الموبايلات واللابتوب الشاحن اللى فى الفيشة بيسجب كهرباء حتى لو الجهاز بتاعه مش واصل عليه
11- كمان حاجة مهمة إهتمى بتغيير فلتر الهوا لأن فلتر الهواء المسدود بيؤثر على دورة الهوا فى البيت ويخليه يستهلك كهربا أكثر من 4 ل 6 أسابيع بيقولوا لازم يتغير.
12- لو بيتك بيدخله شمس إفتحى الستاير وخللى الشمس تدخل من كل مكان ممكن .... هتدفى البيت ببلاش
تدفئة طبيعية13- إستخدمى ستائر Thermal لعزل البرودة والحرارة الشديدة فى الصيف
14- فيه ناس بتنصح بتقليل الحرارة جدا يعنى بالليل نخليها فى حدود 65 فهرنهايت أو أقل كمان والكل يتغطى بالبطانية الكهربائية بصراحة أنا قلقانة من حكاية البطانية الحرارية دى بالذات مع الأولاد مش مرتاحة ليها حاسة إنها ممكن تكهربنا هههههههه
يعنى دى بعض الحلول اللى أنا إستخدمت بعضها ويا ريت لو فيه حد منكم عنده فكرة مجربة ممكن تساعدنا
حبى للجميع موااااااااااااااه
تعليق