تويت
حكـــايتى فى الغـــربة .... من الــ ..... إلى الــ ...... ✿متميز✿الجزء 1
أولا أحب أعرفكم بنفسى
أنا صاحبة المسك ومشهورة هنا بالمنتدى بإسم بطوطة ( نسبة إلى الإسم السابق لى كوسة وبط)
أو أم حسن نسبة إلى إبنى الأكبر
ثانيا : أنا قصدت إنى أسيب عنوان الموضوع للتشويق
علشان ما أحرقش القصة ههههه
أنا مصرية مغتربة هنا بأمريكا من 9 مارس 2007
أحببت أن أشارككم الدرس اللى تعلمته بالغربة
يمكن حد يستفيد أو أساهم فى إنفاذ واحدة فى نفس وضعى
الموضوع اللى هأتكلم معاكم فيه موضوع كبير وعلشان تحسوا بيه أكتر لازم أحكى لكم الحكاية من الأول
طبعا لما جيت هنا ما كنتش طايقة حد ولا حاجة ويوم السفر كنت متماسكة جدا على الرغم
من بكاء الجميع عند توديعى بالمطار
لكن بمجرد ما إن إرتفعت الطائرة عن أرض مصر الحبيبة بكيت كتير قوى
أنا كنت مسافرة لوحدى مع أطفالى ( حسن 4 سنوات وعبد الرحمن سنة ونصف)
وكانت رحلة طويلة ومتعبة ووصلت هنا بالليل ومع إن زوجى كان محضر الطعام
وورد وهدايا والذى منه الراجل ما قصرش الصراحة
إلا إنى كنت ضاااااااااااربة البوووووووز المتين ومدياله الوش الخشب زى ما بنقول فى مصر
مع إن القرارا أخدناه مع بعض هو بيشتغل فى شركة أمريكية لها مقر فى مصر
ومرة زارهم مدير من الفرع الأمريكى فى فرع مصر وأعجب بزوجى وقرر نقله
لفرع أمريكا بالفرع الرئيسى هنا فى كلورادو وإستخرنا الله ومشينا فى الموضوع
وهو سبقنا هنا ب 3 أشهر وبعدين إحنا حصلناه
المهم فضل زوجى غلبان معايا يا عينى ويحاول يراضينى ومرة نتخانق وأعيط
ومرات يطبطب على ومش عارف يعمل إيه لأننا واخدين قرار
مش هينفع هو يكون فى مكان وإحنا فى مكان لازم كلنا مع بعض
وكنت حاسة إنى هأموت ومش ممكن أقدر أعيش فى البلد دى مفيش حد شبهى
طبعا إنتو أكيد فاهمين وحاسين باللى أنا بأقوله معظمنا شعر بالإكتئاب
مفيش ناس بيتكلموا زيينا مفيش حد شكلنا وقليلين اللى لابسين الحجاب بنشوفهم بالصدفة
وكنت كل أما أتضايق أنزل أشترى حاجات وأبعزق فلوس على أى حاجة وخلاص
لبس جزم شنط حاجات للمطبخ أجهزة أكل كل حاجة وأى حاجة وزوجى
لقانى بأرتاح كده فسابنى وقال المهم إنى أكون مبسوطة
طبعا أول سنة نزلت مصر وما كنتش أقدر ما أنزلش نزلت فى صيف
2008 وتجهيزات وهدايا والذى منه ومصاريف على الآخر فى مصر وإنتو عارفين
التذاكر غالية لوحدها تقريبا السفر لمصر أخد مننا حوالى 8000 دولار
والسنة اللى بعدها فى صيف 2009 برضه نزلنا مصر وصرفنا حوالى 9000
كان معانا منهم 4000 والباقى بقى يا حلوين عملنا فيه إيييييييييييييييييييييه؟
تـــابعونـــى
فى الحلقة القادمة للتشويق والإثارة أكمل بإذن الله
تعليق