شرح الفستان ( ورشة عمل دون ردود )

[أم قسمت]

ده شرح الفستان
اللي في الرابط ده

http://www.lakii.com/vb/a-80/a-778194/

البنات عايزين الشرح متتابع
علشان كده عملت الموضوع ده للشرح بس
ماحدش يرد هنا واي استفسار اعملوه في الموضوع التاني
خلاص اتفقنا ---ماحدش يرد ____

بسم الله الرحمن الرحيم
ده الموضوع اللي حانتناقش فيه

http://www.lakii.com/vb/a-80/a-778595/

حانبدا من بانده الوسط
وده الباترون




والغرزه حايكون شكلها كده



الغرزه مكونه من مضاعفات 5
لو حاتعملي البانده مقفوله زي الفستان كده بتعملي مضاعفات ال5
انا باحب اعمل الضهر كله مفتوح علشان اظبط المقاس علي البيبي
يعني لو طلعت ضيقه شويه ممكن اعمل مرد واوسع سم او 2سم
المهم انا عملتها مفتوحه وزودت غرزه
يعني بدات علي مضاعفات ال5 +1+سلسله للارتفاع
بالنسبه للمقاس انا حااعمل مقاس 6شهور واخدت المقاس من الجدول بتاع ساكنه الجبل
يعني 54سم محيط الصدر
بدات ب71 سلسله بالخيط التخين +سلسله للارتفاع




اعملي غرز حشو علي كل السلاسل=71 غرزه حشو



السطر 1-
سطر الاعمده
ولفي --
-ثم اعملي 3سلسله ثم
اعملي عمود في ثاني غرزه حشو ----ثم اعملي سلسلتين



ثم في ثالث غرزه حشو اعملي عمود --ثم عمودين في كل من غرزتي الحشو التاليتين (كده عملتي 3عمود في ال3غرز حشو
(ثم سلسلتين وسيبي غرزتي حشو -ثم اعملي 3عمود في كل من ال3غرز حشو التاليه )
كرري مابين القوسين منتهيه بعمودين
وده شكل السطر للبانده

السطر 2
سطر المراوح

اعملي سلسله ولفي واعملي غرزه حشو في راس العمود الاخير من السطر اللي لسه مخلصاه
ثم اعملي 5عمود في اللوب الاول المكون من سلسلتين من السطر السابق(اللي لسه مخلصاه)
ثم (غرزه حشو في العمود الاوسط من ال3عمود التاليه-ثم 5عمود في اللوب التالي)


وكرري مابين القوسين حتي نهايه السطر وانهي السطر
بغرزه حشو في ثالث سلسله من ال3سلاسل بدايه السطر
ولفي


وده شكل السطر


السطر3-



ده سطر الاعمده
اطلعي ب4سلاسل ولفي




دلوقت انتي قدامك المروحه المكونه من 5عماويد
سيبي اول عمود فيهم ---واعملي 3عمود في ال3عمود التاليه --وسيبي اخر عمود من ال5عماويد للمروحه



(ثم سلسلتين -ثم في المروحه التاليه المكونه من 5عماويد سيبي اول عمود فيهم ---واعملي 3عمود في ال3عمود التاليه --وسيبي اخر عمود من ال5عماويد للمروحه )وكرري حتي نهايه السطر ---اقفلي بسلسله ثم عمود في غرزه الحشو



السطر 4-
سطر المراوح
3سلاسل ولفي
وفي نفس الغرزه اعملي عمودين -ثم غرزه حشو في العمود الاوسط من ال3عمود التاليين



(ثم 5عمود في اللوب التالي المكون من سلسلتين -ثم غرزه حشو في العمود الاوسط من ال3عمود التاليه )وكرري حتي نهايه السطر وانهي السطر ب3عمود في اول عمود من السطر السابق




السطر 5-
سطر الاعمده
3سلاسل ولفي


اعملي عمود في العمود التالي-(ثم سلسلتين ثم في المروحه التاليه المكونه من 5عمود سيبي اول عمود فيهم ---واعملي 3عمود في ال3عمود التاليه --وسيبي اخر عمود من ال5عماويد للمروحه )وكرري حتي نهايه السطر ---


اقفلي بسلسلتين ثم عمودين في اول عمودين من السطر السابق (يعني عمودين في اخر غرزتين )



وده شكل الشغل وماحدش يقول لي ايه المشبك اللي علي الارض ده هههههههه

[أم قسمت]

بسم الله الرحمن الرحيم
كده خلصنا البندا
حانيجي من الطرف السفلي ونبدا شغل الجيبه او التنوره
انا حبيت اعمل سطر حشو باللون اللي حااعمل بيه الجيبه ---حسيت ان شكل الشغل حايكون احلي وبيكون عد الغرز والشغل اسهل
خصوصا لما حاتعملي المروحه حاتلاقي صعوبه في الشغل علي سلسله القاعده

لو مش عايزه مش مشكله





وبعدين اقفلي بمنزلقه ---(عليها سهم اخضر)
واطلعي ب3سلاسل-ثم في نفس الغرزه اعملي( عمود-سلسله-عمودين)
سيبي غرزتين واعملي (عمودين-سلسله-عمودين)


وكرري حتي نهايه السطر واقفلي بمنزلقه

السطر 2
امشي بمنزلقه حتي اللوب الاوسط في اول مروحه
وشوفي بقي
السطر ده حانبدا نقسم الجيبه ولو عايزه تعملي سطر او سطرين كمان قبل ماتقسمي حسب رغبتك
يغني انتي اللي حاتتحكمي في السطور وبدايه التوسيع في كل مره وعدد المراوح
انا بدات التقسيم مع السطر الثاني
في الفستان الاصلي هي عامله النظام ده
مروحتين-سلسل-مروحه-سلسله-3مراوح-سلسله-مروحه-سلسله-مروحتين

انا عملت
مروحتين-سلسله-مروحه-سلسله-مروحتين-سلسله-مروحه سلسله
المروحه دي اللي حانوسع فيها هي والسلسله اللي جنبها من الناحيتين بس اغلب التوسيع حايكون في المروحه


المجموعات بقي اللي مكونه من مروحتين او من ثلاثه مراوح دي حاتكون ثابته من اول الفستان لاخره
كده


يبقي دلوقت انتي حاتعملي سطر مراوح عادي ولو عايزه تزوديه اعملي حسب رغبتك
وبعدين تبتدي تقسمي حسب رغبتك برضه
اما بطريقه الفستان الاصلي ---او بطريقتي او ممكن كمان تعملي بدل مروحتين ---تعملي 3مراوح
اه ونسيت كمان حاجه
لما جيت اعمل السطر الاول كنت باسيب 3غرز بين المروحه واللي بعدها علشان مش عايزه الفستان يوسع قوي
وحسيت اني لما كنت باسيب غرزتين بس ان السطر زاد معايا ----لو عايزه تعملي كده ممكن --يعني السطر الاول في الجيبه اتحكمي فيه براحتك علشان بعد ماتظبطي العدد بتلتزمي بيه
المهم
السطر ده حاتعملي مروحه فوق كل مروحه
وتقسمي بالنظام اللي انتي عايزاه
وعلي طول في السطور اللي بعد كده حاتقفلي بمنزلقه في ثالث سلسله من سلاسل البدايه وتمشي بمنزلقه لغايه اللوب الاوسط في اول مروحه

[أم قسمت]

باذن الله حااشتغل علي الباترون ده سطر سطر
لو انتي عايزه تزودي اعملي السطر مرتين او 3مرات علشان يطول الفستان معاكي
انا علشان البنت صغنونه حااعمل الفستان قصير وعلشان كده مش حااكرر سطور
بالعكس ممكن اختصر سطور كمان

[أم قسمت]

السطر 2
في الجيبه
دلوقت انتي قفلتي السطر 1 بمنزلقه ومشيتي بمنزلقه للوب الاوسط في اول مروحه
اعملي عمود-سلسله-عمودين في نفس اللوب

في السطر ده حاتقسمي زي ماقلنا
انا قسمت (مروحتين-سلسله-مروحه -سلسله )وكررت مابين القوسين

(ثم في اللوب التالي اعملي عمودين-سلسله-عمودين )-كده عملتي مروحتين
اعملي( سلسله-ثم-مروحه-ثم سلسله-ثم مروحتين )وكرري حتي نهايه السطر
ملحوظه--انا وجدت نهايه السطر بينتهي بمروحه وفيه مروحتين في البدايه كده الدوره قفلت ب3مراوح مش مشكله كملي
التقسيم باين في الصوره

اقفلي بمنزلقه في ثالث سلسله من ال3سلاسل البدايه
السطر 3-
منزلقه حتي اول لوب في اول مروحه ثم 3سلاسل ثم عمود-سلسله-عمودين
ثم في المروحه التاليه-اعملي (عمودين-سلسله-عمودين)كده عملتي مروحتين
بعد كده تقابلك المروحه اللي لوحدها
<اعملي 3سلاسل -ثم مروحه (عمودين-سلسله-عمودين)ثم 3سلاسل -ثم مروحتين>وكرري مابين العلامتين<>حتي نهايه السطر واقفلي بمنزلقه في ثالث سلسله من سلاسل البدايه
كده




السطر 4


امشي بمنزلقه حتي اللوب الاوسط في اول مروحه واعملي مروحه ثم في المروحه التاليه اعملي مروحه
(ثم سلسله-غرزه حشو في اللوب المكون من 3سلاسل-سلسله-مروحه في المروحه التاليه -سلسله-غرزه حشو في اللوب المكون من 3سلاسل -سلسله -مروحتين )وكرري
في السطر ده
الباترون مرسوم (سلسله-غرزه حشو-سلسله )
انا نفذتها (سلسلتين-غرزه حشو-سلسلتين )حسيت ان كده اصح
وانتي ورغبتك تمشي حسب الباترون او تعملي زيي


السطر 5



السطر 5-كرري السطر 3


السطر 6
في السطر ده حاتبدئي تزودي في المروحه اللي لوحدها

بدايه السطر 3سلاسل-وكملي المروحه زي مااتعودنا ثم اعملي المروحه التاليه -كده عملتي مروحتي البدايه
ثم (سلسله-غرزه حشو في اللوب المكون من 3سلاسل-ثم سلسله ثم مروحه في المروحه التاليه-ثم سلسله-ثم غرزه حشوفي اللوب المكون من 3سلاسل-ثم سلسله -ثم مروحتين)وكرري مابين القوسين حتي نهايه السطر واقفلي بمنزلقه في ثالث سلسله من سلاسل البدايه

كده ابتدي الشغل يبان معاكي
فيه وحده مكونه من مروحتين دي حاتتكرر معاكي من او ل الفستان لاخره
والسلاسل اللي بين الوحده دي والوحده المكونه من مروحه واحده حاتتكرر علي طول علي سطرين
سطر حايكون 3سلاسل وسطر سلسله -غرزه حشو-سلسله
التغيير حايكون في الوحده المكونه من مروحه بس
ودي اللي حااشرح عليها علي طول
وتكونوا عارفين ان باقي الشغل بيتكرر بدون تغيير

[أم قسمت]

بسم الله
السطر 6
في السطر ده حانبدا الزياده في الوحده المكونه من مروحه واحده وبقيه السطر حانعمله زي السطور السابقه
ابدئي بمنزلقه الي اللوب الاوسط في اول مروحه واعملي فيها مروحه ( 3سلاسل البدايه-عمود-سلسله-عمودين)-ثم مروحه اخري(عمودين-سلسله-عمودين)ثم سلسله-غرزه حشو في اللوب المكون من 3سلاسل-ثم سلسله -ثم في الوحده المكونه من مروحه اعملي مروحتين -ثم سلسله-غرزه حشو-سلسله-<ثم مروحتين-ثم سلسله-غرزه حشو-سلسله-ثم في الوحده المكونه من مروحه اعملي مروحتين--ثم سلسله-غرزه حشو-سلسله >وكرري مابين العلامتين<>حتي نهايه السطر واقفلي بمنزلقه
في ثالث سلسله من ال3سلاسل البدايه



السطر7

امشي بمنزلقه حتي اللوب الاوسط في اول مروحه وارتفعي ب3سلاسل ثم اكملي المروحه في نفس اللوب- ثم اعملي مروحه في المروحه التاليه-(ثم 3سلاسل-ثم في الوحده اللي كانت مكونه من مروحه اعملي كالتالي -مروحه في اول مروحه-عمود بين المروحتين-مروحه في ثاني مروحه-ثم 3سلاسل-ثم مروحتين في المروحتين التاليتين)وكرري مابين القوسين حتي نهايه السطر واقفلي كالمعتاد بمنزلقه



عايزين نتفق علي حاجه
الوحده اللي مكونه من مروحه واللي بنزود فيها حااسميها س علشان مانتوهش من بعض اللي عليها سهم بالاحمر
انا باشرح علي شغلي وانا عامله الوحده اللي مافيهاش زياده مروحتين---اللي عاملاها 3 تلتزم بتقسيمها وشوفي شكل الشغل
اللي بين السهمين ده الثابت اللي مش بيتغير
واللي بين الخطين البرتقالي دول المروحتين الثابتين اللي مش بيتغيروا


السطر 8
امشي بمنزلقه لاول لوب وارتفعي ب3سلاسل واكملي المروحه غي اللوب ده ثم مروحه في المروحه التاليه -(ثم سلسله-غرزه حشو-سلسله-
ثم في الوحده س--بتعملي مروحه في المروحه الاولي ثم-سلسله-ثم عمود فوق العمود-ثم سلسله-ثم مروحه فوق المروحه الثانيه
ثم سلسله-غرزه حشو-سلسله-ثم مروحتين فوق المروحتين التاليتين)وكرري مابين القوسين واقفلي كالمعتاد



شوفي شكل الشغل والتوسيع في الوحده س



السطر 9
امشي بمنزلقه حتي اللوب الاوسط في المروحه ثم ارتفعي ب3سلاسل وكملي المروحه في نفس اللوب -ثم مروحه في المروحه التاليه ثم( 3سلاسل -ثم في الوحده س اعملي التالي ---مروحه في اول مروحه-ثم سلسلتين-ثم عمود في العمود -ثم سلسلتين-ثم مروحه في المروحه الثانيه --ثم 3سلاسل-ثم مروحتين)وكرري حتي نهايه السطر واقفلي بمنزلقه كالمعتاد




السطر 10
ا

امشي بمنزلقه حتي اللوب الاوسط في المروحه ثم ارتفعي ب3سلاسل وكملي المروحه في نفس اللوب -ثم مروحه في المروحه
التاليه -(ثم سلسله-غرزه حشو-سلسله-ثم في الوحده س--بتعملي مروحه في المروحه الاولي ثم-سلسله -ثم في اللوب الاول المكون من سلسله اعملي عمود-ثم سلسله-ثم عمود فوق العمود-ثم سلسله-ثم عمود في اللوب الثاني-ثم سلسله ثم مروحه فوق المروحه الثانيه كده خلصت الوحده س
ثم سلسله-غرزه حشو-سلسله-ثم مروحتين )وكرري مابين القوسين واقفلي بمنزلقه كالمعتاد

[أم قسمت]

ملحوظه مهمه
حبايبي انا قلت اني مش حااكرر سطور في الباترون علشان باعمل لمقاس صغير
بس لازم تاخدوا بالكوا ان في الباترون بيتكرر السطر 3يعني 3و4 زي بعض
والسطر 9يعني السطر 10 زي السطر 9
السطر 11يعني السطر 12زي السطر 11
والسطر 13 يعني السطر 14 تكرار للسطر 13
يعني انا وصلت في الشرح كده لغايه السطر 14
ده للي عايزه الفستان اطول وعايزه تكرر سطور وتمشي تبع الباترون بالظبط

اقوم اصلي الفجر بقي

[أم قسمت]

السلام عليكم





السطر 11-
3سلاسل ثم اكملي المروحه واعملي المروحه الثانيه -(ثم 3سلاسل-ثم مروحه في اول مروحه في الوحده س -ثم سلسلتين -ثم غرزه حشو في اول عمود من ال3عمود من السطر الثالث-ثم سلسلتين-ثم عمود في العمود الثاني -ثم سلسلتين-ثم غرزه حشو في ثالث عمود-ثم سلسلتين -ثم مروحه في المروحه الاخيره من الوحده س-ثم 3سلاسل-ثم مروحتين )وكرري حتي نهايه السطر واقفلي بمنزلقه كالمعتاد

================================================== ==================



السطر 12
3سلاسل ثم اكملي المروحه واعملي المروحه الثانيه-(ثم سلسله--ثم غرزه حشو في اللوب المكون من 3سلاسل -ثم سلسله-ثم مروحه في اول مروحه من الوحده س -ثم 5سلاسل-ثم عمود فوق العمود -ثم 5سلاسل-ثم مروحه فوق المروحه الاخيره من الوحده س -ثم سلسله-ثم غرزه حشو في اللوب المكون من 3سلاسل-ثم سلسله-ثم مروحتين )وكرري حتي نهايه السطر واقفلي بمنزلقه كالمعتاد

وده شكل الشغل بعد السطر ده

================================================== ============================



السطر 13
3سلاسل ثم اكملي المروحه واعملي المروحه الثانيه-(ثم 3سلاسل-ثم مروحه في اول مروحه من الوحده س-ثم سلسلتين-ثم عمود في اللوب المكون من 5سلاسل-ثم سلسلتين-ثم عمود في العمود اللي بين اللوبين-ثم سلسلتين-ثم عمود في اللوب التالي -ثم سلسلتين-ثم مروحه في المروحه الاخيره من الوحده س-ثم 3سلاسل-ثم مروحتين)وكرري حتي نهايه السطر واقفلي بمنزلقه كالمعتاد
=======================================

السطر 14
3سلاسل ثم اكملي المروحه واعملي المروحه الثانيه(ثم سلسله--ثم غرزه حشو في اللوب المكون من 3سلاسل -ثم سلسله-ثم
مروحه في اول مروحه من الوحده س-ثم عمود في اول لوب -ثم سلسله-ثم عمود في اول سلسله من سلسلتي اللوب التالي -ثم سلسله-ثم عمودفوق العمود التالي-ثم سلسله-ثم عمود في ثاني سلسله من سلسلتي اللوب التالي -ثم سلسله-ثم عمود في اللوب الاخير -ثم مروحه في المروحه الاخيره من الوحده س- ثم سلسله--ثم غرزه حشو في اللوب المكون من 3سلاسل -ثم سلسله-ثم مروحتين) كرري مابين القوسين حتي اخر السطر واقفلي بمنزلقه كالمعتاد
================================================== =============



السطر 15
3سلاسل ثم اكملي المروحه واعملي المروحه الثانيه-(ثم 3سلاسل-ثم مروحه في اول مروحه من الوحده س-ثم عمود في اول عمود
بعد المروحه-ثم سلسلتين-ثم غرزه حشو في العمود الثاني ثم سلسلتين -ثم عمود فوق العمود الثالث-ثم سلسلتين-ثم غرزه حشو في العمود الرابع -ثم سلسلتين-ثم عمود في اخر عمود -ثم مروحه في اخر مروحه من الوحده س--ثم 3سلاسل ثم مروحتين)وكرري مابين القوسين حتي نهايه السطر واقفلي بمنزلقه كالمعتاد

================================================== ==============




السطر 16

3سلاسل ثم اكملي المروحه واعملي المروحه الثانيه(ثم سلسله--ثم غرزه حشو في اللوب المكون من 3سلاسل -ثم سلسله-ثم
مروحه في اول مروحه من الوحده س-ثم عمود فوق اول عمود -ثم 5سلاسل-ثم عمود فوق العمود الاوسط -ثم 5سلاسل-ثم عمود فوق العمود الاخير -ثم مروحه فوق المروحه الاخيره في الوحده س-ثم سلسله--ثم غرزه حشو في اللوب المكون من 3سلاسل -ثم سلسله -ثم مروحتين )وكرري حتي اخر السطر ثم اقفلي بمنزلقه كالمعتاد
-----------------------------------------------------------------------



السطر 17--اخر سطر
3سلاسل ثم اكملي المروحه واعملي المروحه الثانيه-(ثم 3سلاسل-ثم مروحه في اول مروحه من الوحده س -ثم مروحه في اول لوب مكون من 5سلاسل-ثم مروحه في العمود-ثم مروحه في اللوب الثاني المكون من 5سلاسل ثم مروحه في اخر مروحه من الوحده س -ثم 3سلاسل--ثم مروحتين)وكرري مابين القوسين ثم اقفلي السطر بمنزلقه
السطر 17 حاتكرريه حسب رغبتك لغايه ماتوصلي للطول المطلوب واقفلي واقطعي
كده خلصنا الجيبه

[manaksha]

روعة وسهلة تسلمي

[أم قسمت]

السلام عليكم ورحمه الله

تشكيل الصدر
بصوا بقي ياقمرات
اتشكيل الصدر يعني الحردات --الرقبه --وحرده الباط--وخط الاكتاف
وممكن نقول ان مافيش قاعده ثابته لعمل الحردات دي للاسباب دب
اولا اختلاف الغرز المستخدمه يعني حشو -عمود -نص عمود وهكذا
ثانيا اختلاف المقاسات وبالتالي اختلاف الحرده من مقاس لمقاس
ثالثا اختلاف الخيوط من حيث التخانات
وبعدين ممكن درجه الشد من ايد لايد بتختلف
يعني انتي غرزتك ضيقه وغيرك غرزته واسعه
زيي مثلا اتعودت اشد العمود لفوق
علشان يطول هههههه
الحرده انا حااعملها لسن 6شهور
والخيط تخين ولو فاكره انا بدات علي 71 غرزه
اول خطوه بتقسمي البانده بالنص
نص للضهر ونص للوجه
وبما اني عامله البانده مفتوحه والضهر حايكون مفتوح علشان الزراير
حاتقسمي نص من النصين دول علي 2
كده حايكون التقسيم
ربع لنصف الظهر -نص للامام-ربع لنصف الضهر الثاني
اللي بين السهمين اللي بالاصفر ده الامام


يعني كده 71 حاتتقسم
18-35-18 ولاحظي اني اخدت الغرزه الزياده في الضهر علشان يكون نصفي الضهر متماثلين
بعد كده عايزين نقسم الصدر او الامام
عندنا الامام 35
بتقسم علي 3 بس بنسيب عدد غرز اكبر للرقبه (انا بافضل كده علشان تاخد راحتها )
قسمت 10 و1 وتقولي مثلا انا عايزه عرض الكتف 5غرز5 و10
ال10 للكتف وال15 للرقبه
بتيجي لل10 بتوع الكتف 5غرز (الخيط تخين وانا عايزه الكتف رفيع شويه وكمان اعملي حساب التشطيب النهائي حايكون فيه حرف علي الباط وعلي الرقبه )
ممكن انتي لو عايزه تزودي الكتف قسمي براحتك
المهم غرز الكتف 5غرز وانا عندي للكتف 10 غرز يبقي حااقفل في حرده الباط 5غرز
كده عندك اللي بين السهمين اللي بالفوشيا =الصدر كله
اللي بين السهمين اللي بالاحمر =غرز الرقبه
المسافه اللي بالابيض -=عدد الغرز اللي حاتحرديها او تقفليها
المسافه اللي بالاسود=عدد غرز الكتف

صوره تانيه بتوضح عدد الغرز للكتف


وممكن لتسهيل الشغل
هاتي بلوزه او فستان وقيسي عليه
المهم
انا حااقسم ال5غرز لحرده الباط حااعملهم 2-2-1
يعني 2في سطر و2 في سطر و1 في سطر
طبعا انتي ورغبتك
يعني لو طول الصدر كبير وزعي الغرز علي الحرده بطريقه تاني
وبرضه انتي ورغبتك في التقسيم
يعني عايزه الحرده اعمق--عايزه الحماله اعرض --وهكذا
انا كده عملت سطر بالاحمر فوق البانده
ممكن انتي تعملي سطرين او 3سطور او تبدئي الحرده علي طول
بسم الله
خلصت سطر عماويد
حاترتفعي 3سلاسل وترجعي علي السطر لغايه قبل اول علامه تقابلك بغرزتين (اول غرزتين في حرده الباط )
العمودين اللي بالابيض (هما اللي حاتسيبيهم)

وولفي وارتفعي ب3سلاسل كاول عمود في السطر التالي
السطر ده بتقفلي فيه غرزتين
طريقتي اني باعمل 3عمود باجمعهم في عمود واحد




كده قفلتي عمودين
ممكن تمشي بمنزلقه علي اول غرزتين وبعدين تطلعي ب3سلاسل دي طريقه تانيه للقفل او للحرده
بتكملي السطر لاخره ( وكده قفلنا 4غرز
بتوصلي لاخر السطر وترتفعي ب3سلاسل كاول عمود وترجعي علي ال14عمود الباقيين من ال18 عمود اللي بداتي بيهم

خليكي ماشيه في السطر ده لغايه ماتيجي عند الحرده وبتعملي اخر عمودين مع بعض
- ارتفعي ب3سلاسل كاول عمود واشتغلي السطر (13عمود )
كده خلصتي حرده الباط لنص الضهر الاولاني
بتشتغلي علي ال13عمود دول لغايه ماتوصلي لحرده الرقبه للضهر
حرده الرقبه لنص الضهر
حسب رغبتك في ارتفاع حرده الضهر بتبدئي
عندك عدد غرز الضهر بتشيلي منها عرض الكتف اللي انتي حاسباه من الاول وتبدئي التنقيص علي الغرز الباقيه
وبتعملي التنقيص من عند المرد يعني في الجهه المقابله لحرده الباط
انا عندي عدد الغرز الباقيه بعد حرده الباط 13
منهم 5غرز للكتف يبقي عدد غرز نص الضهر 8 ودي اللي حااعمل الحرده عليهم
انا قفلت علي سطرين
بتيجي عند الارتفاع اللي عايزه تحردي عليه وبتمشي بالسطر لغايه مايتبقي فيه 5غرز
وبتسيبي ال5غرز دي وتلفي
اطلعي ب3سلاسل واقفلي عمودين في اول السطر الجديد



ثم كملي السطر
وفي نهايه السطر التالي من جهه الحرده اقفلي عمود
وكده فاضل معاكي 5غرز ودي عدد غرز الكتف
طبعا انا باشرح علي شغلي
بس انتي حاتتبعي الطريقه مع عدد الغرز بتاعتك
كده حرده الرقبه لنص الضهر خلصت





اعملي الناحيه التانيه من الضهر مثلها
وحايكون شكلهم كده

حرده الصدر للامام
كده انتي عندك الشكل ده


بتسيبي غرزتين من اول السطر لتشكيل حرده الباط للامام وتشبكي الخيط ووجه الشغل في مقابلك وتطلعي ب3سلاسل وتقفلي عمودين



وتمشي بالسطر لغايه قبل العلامه الاخيره بغرزتين وتسيبيهم وكمان تقفلي عمودين في نهايه السطر
وتلفي وتطلعي السطر الجديد وتقفلي عمود في بدايته




ثم
اكملي السطر واقفلي عمود في نهايته
وكده حرده الباط للامام خلصت
حرده الرقبه للامام
حددي ارتفاع الحرده وحطي علامات علشان مش تتلخبطي


بتسيبي عدد غرز في المنتصف وتحردي من كل جانب عدد غرز بحيث انك في الاخر يتبقي معك عدد غرز الكتف
وخدي بالك ان
حرده الصدر يستحسن تكون اعمق من حرده الضهر علشان كده ابدئيها بدري بسطر او سطرين
نظمي الحرده بحيث ان طول الامام يتماثل مع طول الضهر
انا هنا عندي عدد غرز الرقبه 15
سبت 5 في المركز وحردت علي كل جانب 5غرز (2-2-1)
وده شكل الحرده

كده خلصنا الصدر وكده شرح الفستان انتهي
بتشطبيه وتعملي حرف علي الرقبه والباط زي الفستان الاصلي وبغرزه البانده
وتعملي حرف علي ذيل الفستان بغرزه البانده وبلونها
وتعملي الورده اللي علي الصدر

[أم قسمت]

دي شويه باترونات لحرده الصدر للاسترشاد بيها
دي شويه باترونات لحرده الصدر















وده شرح الورده للغاليه جداااا نبض الكروشيه

ماما قسمت صباح الخير مقولتيش شنو رائيك في الورده

انا عملت 11 س ثم مشت عليها بغرزة حشو في اول س سويت 3 حشو في نفس س لدوران وكملت من خلف الاسلاسل بحشو ثم رجعت _ وفي 4 الغرز الاولي سويت حشو ثم نصف عمود ولما وصلت في الغرزة مقبل الزيادة الولي بغرزتين في كل غرزة سويت 2 لدوران براحة تقريبا في 7 الغرز الوسطي يعني صارو 14 ثم نكمل ولما نوصل لل4 لالخيرة نسوي حشو _ الدور الي بعدة في 4الاولي نسوي منزلقه تم نكمل حشو في الوسط نمشي عادي بدون زيادة ولما نوصل لل4 الاخيرة نسوي منزلقه هدة ورقه تمت نسوي خمسه منهم وفي الاخيرة منقطعش الخيط نخلي مسافة حتي نخيط بيه ثم نجمع كل الورقات بالخياطه ونضع الخرزة في الوسط ونتبتها ثم نشبك ورقات من الجنب شويه بالخياطه حتي تبرز الورده لفوق شويه وتعطي منظر حلو
وده تطبيقها الجميل

[أم قسمت]

يابنات انا نسيت اكتب انك بتعملي سطر اعمده في بدايه الصدر قبل الحرده
ممكن تستغني عنه بس بيساعدك في تقسيم الحرده
وهو باين في الصور
وبرضه حسب رغبتك وحسب المقاس اللي انتي بتعمليه يعني حسب طول الحرده معاكي

[hagar2010]

جزاكى الله خيرا ياأم قسمت انا كنت دايخه على طريقة عمل الفستان ده ربنا يكرمك يارب ويجعله فى ميزان حسناتك
لان فعلا انا شغاله فيه دلوقتى وقلت هعمل زوم على الصوره واعد الغرز من الصوره
بس انا عندى استفسار مفيش طريقه احفظ بيها الموضوع علشان اول ما ادخل المنتدى الاقى الموضوع ميتوهشى منى

[آزال العريقة]

ما شاء الله فستان جميل و الشرح رائع .
جزاكِ الله خير ..
ودي و احترامي ..

[yousra]

تسلم ايدك

[om mariem]

الفستان جميل وشغلك كلة تحفة وابداع بارك اللة فيكى