مين عنده حل لمشكلة مص الأصابع

[زقزوقة و زقزوق]

السلام عليكم و رحمة الله و بركاته

من فضلكم ياريت تساعدوني في مشكلة ابني دي، و هي :

مشكلة مص الأصابع

ابني الصغير عنده سنتين و نص و لغاية دلوقتي بيمص صباعه ، و لازم قبل ما ينام علطول يحط صباعه في فمه

و بصراحة مش عارفة أعمل معاه ايه عشان أخليه يبطل العادة دي ؟؟؟؟؟؟؟

ياريت تفيدوني بخبراتكم

و ما تبخلوش علية بالمساعدة

[ام يوسف77]

السلام عليكم ورحمة الله

والله يا زقوقة انتى بنت حلال انا لسه امبارح كنت عند الدكتور بأسأله فى نفس الموضوع لان بنتى ده عادة مص صباعها وجربت معاها كل شئ من اول انى اوبخها واضربها على ايديها لما الاقيها بتمصه ولما غلبت ومفيش فايدة رحت الصيدلية وقلتله على المشكلة ووصفلى دهان اسمه stop مخصوص للعادات دى زى مص الاصابع وقرقضة الاظافر وهو شكله زى المانيكير ولونه شفاف بس طعمه استغفر الله زى الصبار كده فى مرارته .... ولكن على مين .... بنتى منفعش معاها الدهان ده وبقت متعودة على طعمه ..... وتركتها فترة وانا عندى خيبة امل منها ولكنى لاحظت ان فكها العلوى ابتدى ياخد شكل غريب وكمان شهيتها فى الاكل معدومة بسبب صباعها ده .....

علشان كده رحت للدكتور وحكيتله الموضوع من بدايته وقاللى احسن طريقة لوقف العادة دى هى الذهاب لدكتور اسنان تخصص اطفال وتركيب جهاز يوضع فى الفم وبيخلى الطفل ميعرفش يمص صباعه ابدا وقاللى تركبيه فى البداية وقت النوم فقط ... وطبيعى ان الطفل لو اقلع عن العادة دى ساعة النوم هيبقى من السهل نخليه ينساها وهو صاحى ... والجهاز غير مضر للطفل ولا يسبب له اى مضايقة ....

وان شاء الله ناوية اركبه لانى جربت معاها كل الاشياء اللى تتوقعيها ومفيش فايدة والحمد لله

[possy26]

زقزوقة معلش هى فعلا عادة تجنن بس جربى الجهاز اللى قالتلك علية ام يوسف انا سمعت عنة كتير واعرف انة كوسي وربنا معاكى

[أم جورى]

بصراحة يا زوزو دى مشكلة جامدة وعاوزة اقولك لازم تشوفى حل من دلوقتى وجربى موضوع الجهاز ده لان مص الأصابع ده هيبقى ادمان

لأن بنت عمى فضلت كدة لغاية اعدادى وحياة ربنا ولا نفع معاها صبار ولا شطة ولا الهوى ومامتها كانت بتربط ايديها علشان تبطل

فمن الاحسن انك تلحقى دلوقتى الموضوع

[ام يس2006]

السلام عليكم

سيكون لى الشرف لو تفضلتم بقبولى معكم ان شاء الله

انا ايضا اعانى مع ابنى و ابنتى نفس المشكله

لقد حاولت معهم كثيرا بلا فائدة و لكن فكرة المرهم او الجهاز ارجو ان شاء الله ان تكون مجدية و تخلصنا تماما من هذه المشكلة

[adam_mh]

السلام عليكم بجارتي اللي مجنناني

اذيك زقزوقه ايه زقزوق الصغير تعابك ليه كده معليش ربنا معاكي انا والله الحمد لله مصدفتش المشكله ديه بس الأخوات الحمد لله فدوكي وشوفي ايه حكايه الجهاز ده ويارب يكون خير لابنك
وانا كنت بعتلك رد علي الحضانه ماختيش بالك ولا ايه

[UM FARIDA]

ادخلي هنا يا زقازيقو http://www.lakii.com/vb/showthread.php?t=556579

[kouky5]

معلش يا زقزوقة هي عادة تجنن ..انا معرفش حل بس ان شاء الله الحلول بتاعة البنات تجيب نتيجة

[ام يوسف77]

مص الأصابع «Thumb sucking» ظاهرة شائعة بين الأطفال صغار السن وتبدأ عادة من الشهور الأولى من عمر الطفل بل قد تكون قبل الولادة والطفل في بطن أمه، والأطفال الصغار قد يعوضون حاجتهم لعملية المص بالأكل والشرب والآخرون يلجؤون لمص الإصبع أو أشياء أخرى مثل التاتينة «البزازة».
والحاجة لعملية المص تقل غالباً بعد عمر 6 شهور لكن بعض ا لأطفال يستمرون في مص أصابعهم أو إبهامهم للتهدئة أو الإحساس بالراحة أو بحكم العادة وغالباً ما يمص الطفل أصابعه عندما يشعر بالقلق أو الضجر أو حتى للشعور بالهدوء أو بالنعاس ويزداد مص الأصابع عندما يكون الطفل مريضاً أو خائفاً أو جائعاً.
وحوالي 45% من الأطفال يمصون أصابعهم تحت عمر 4 سنوات وغالبا ما يتوقف الطفل عنها عند عمر 3 6 سنوات وقليل جدا من يستمر في هذه العملية حتى بعد عمر 6 سنوات والأطفال تحت عمر أربع سنوات لا يحتاجون علاجاً، أما فوق عمر أربع سنوات وما زالوا مستمرين في مص أصابعهم فقد يتعرضون إلى تشوهات في الأسنان أو مشاكل النطق ويحتاجون المساعدة لوقف هذه العادة.
وعموماً فعملية مص الأصابع لا تعني أن الطفل يعاني من مشكلة عقلية أو عاطفية.
وقد يستعمل الطفل أصابعه الأخرى بدلا من إبهامه في عملية المص أو يمسك قطعة من الملابس أثناء عملية المص أو قد يجذب أذنه أو يلف شعره بأصابعه أثناء ذلك.
مشاكل النطق
ويؤدي الاستمرار في عملية مص الأصابع إلى مشاكل في النطق والكلام مثل صعوبة نطق بعض الحروف المعينة كحرفي ت د والتلعثم في الكلام ودفع اللسان للأمام عند النطق وهم يحتاجون إلى فحص الأسنان والفك والى تقويم عملية الكلام والتخاطب وعندما تكون عادة مص الإصبع شديدة وعنيفة يحتاج الطفل إلى العلاج النفسي.
أما عن العلاج: الأطفال الذين يتوقفون عن هذه العادة عند عمر 3 6 سنوات غالباً لا يحتاجون علاجاً. لكن هؤلاء يحتاجون علاجاً في الأحوال التالية:
عندما يمص الطفل إصبعه وفي نفس الوقت يشد في شعره وخاصة عند عمر 12 24 شهراً.
أو يستمر في المص بعد عمر أربع سنوات، كذلك عندما يسأل المساعدة لوقف هذه العملية.
أو عند حدوث تشوهات بالأسنان أو مشاكل بالنطق والتخاطب.
عندما يشعر الطفل بالخجل والإحراج من الآخرين.


شروط العلاج
والعلاج لوقف عملية مص الأصابع عند هؤلاء الأطفال يكون جيدا اذا كان الطفل متعاوناً ويعتقد البعض ان العلاج يكون غير مفيد عندما لا يتعاون الطفل ولكن الآخرين يرون انه يجب العلاج سواء كان الطفل متعاوناً أم لا وفي كل الأحوال يجب تأجيل عملية العلاج اذا كان الطفل يتعرض لضغوط عصبية مثل وقوع حادث أو الانتقال إلى مكان جديد أو كانت أسرته تعاني مشاكل.
ويستطيع الوالدان علاج طفلهما من هذه العادة باتباع الخطوات الآتية:
إعطاء الطفل مزيدا من الانتباه والاهتمام ومحاولة صرف انتباهه عن عملية المص وذلك بإشراكه في كثير من الأنشطة.
أن تطلب الأم من الطفل عدم مص الإصبع إلا في غرفة النوم مثلا.
وضع الأشياء التي تصاحب عملية المص بعيداً عن الطفل.
عندما يكون الطفل عند عمر 5 سنوات يجب الحديث معه عن هذه العادة وآثارها السيئة.
وضع قفاز على يد الطفل أو لف إبهامه بشريط لاصق أو قطعة قماش مع القول ان هذه الأشياء ليست عقاباً ولكن لتذكيره حتى لا يمص إصبعه.
استعمال غطاء معين من بعض المواد ذات الطعم المر على أظافر إبهام وأصابع الطفل للمساعدة في البعد عن عملية المص وأيضا يمكن استعمال معجون الأظافر كل صباح وقبل النوم لاكتشاف هل الطفل يمص أصابعه أم لا .. وهذه الطرق تكون ناجحة عندما يصاحبها نظام للمكافأة اذا توقف عن مص أصابعه.


إرشادات
وعلى الوالدين خاصة الأم أثناء محاولة استخدام العلاج اتباع الآتي:
لا تحاولي إخراج إبهام طفلك من فمه وهو مستيقظ بل نفعل ذلك وهو نائم.
لا تعاقبي طفلك لمص إصبعه وابقي طبيعية وهادئة عند مناقشة هذا الموضوع.
اجعلي الآخرين يلاطفون طفلك..
وفي حالة فشل الأساليب السابقة في العلاج فيجب اللجوء إلى الطبيب المختص لاستخدام الوسائل الأخرى للعلاج والتي تتمثل في:
العلاج السلوكي «Behavioral therapy» ويساعد الطفل في أن يتجنب مص أصابعه من خلال تقنيات مختلفة لتغيير بعض سلوكياته.
جهاز الإبهام «Thumb devices»:
وهو مصنوع من البلاستيك ويلبس في الإبهام ويثبت في مكانه بشريط لاصق حول الرسغ وهذا الجهاز يمنع الطفل من مص إصبعه ويلبس طوال اليوم ويتم رفعه عندما تمر 24 ساعة بدون محاولة الطفل مص إصبعه ويتم وضعه ثانية عندما يحاول الطفل تكرار المص.
أجهزة للفم «Oral devices»:
وتركب بواسطة طبيب الأسنان مثل قنطرة توضع في فم الطفل وتلتصق بسقف الفم فتمنع الطفل من الاستمتاع بعملية المص ويمكن أن توضع لمدة شهور حتى يتوقف الطفل عن ذلك.
وأخيرا فان التعاون بين الأبوين والطفل ومساعدته للخروج من هذه المشكلة واحتضانه ومكافأته للتوقف عن مص الأصابع وعدم إحراجه أو إهانته وابتكار الأساليب لصرف نظر الطفل عن هذه العادة غاليا ما تنجح خاصة قبل التحاقه بالمدرسة.

[زقزوقة و زقزوق]

جزاكم الله جميعا خيرا

و ألف شكر لكل اللي رد علية

و يارب الموضوع ده يفيدنا جميعا ، خصوصا الأمهات اللي عندهم نفس مشكلتي

[ورد على ورد]

جربتي ان تجعليه يغسل يده كل ما وضعها في فمه هذه الطريقة استخدمتها من قبل عندي وفلحت تكرار طلب الغسل ليده يكّره في هذه العادة وادعو لاولادكم في جوف الليل ليحفظهم من كل ضُر

[انسانه تحب الله]

موضوع حيوى فعلا وكل الحلول المقترحه باذن الله تفيدنا وشكرا يا زقازيقو انك فتحت الموضوع ده وعلينا كلنا اننا ندعى ان ولادنا يبطلو العادات السيئه دى

[حبيبه قلبه انا]

السلام عليكم ورحمه الله
ازيكم ياامهات عاملين ايه واطفالكم مجنينكم زى والا ايه انا حبيت اشاركم بتجربتى مع يوسف ابنى
هو عنده 4سنين ولما كان عنده3شهور بدا يمص صباعه وتعبت معاه لحد ما وصل لسنتين وبعدين مره كنت بدور على حل للموضوع ده وقريت فى موضوع على النت واحده بتحكى مشكلتهامع ابنها وانها جربت معاه حاجه ونجحت كده فقلت اجرب والحمد لله نجحت جدا طبعا كلكم عايزين تعرفوا هى ايه صح
عارفين البلاستر الطبى بتاع الجروح تجيبيه من الصيدليه وتلفيه على صباعه بس خلى بالك ماتشديه اوى عشان صباعه الدم مايتحبسش فيه طبعا هو هيحاول يفكه لكن مش هيعرق لانه بيلزق جامد وصعب يتفك وكل مايتوسخ غيريه وهو نايم وان شاء الله قبل اسوبع هتلاقيه نسى العاده دى خالص وبس
ياريت بقه اللى تجرب وربنا يكرمها وتنفع معاها تدعى لى ان ربنا يقومنى بالسلامه ويرزقنى بنوته حلوه ويبارك لى فى يوسف ويجعله ابن بار بيا وبابوه
والسلام عليكم ورحمه الله

[kouky5]

حبيبه قلبه انا
بارك الله فيكي وربنا يحفظ لك ابنك ويجعله ابنا بارا لكي ولابيه ..ويرزقك ببنوتة جميلة

[زقزوقة و زقزوق]

جزاكم الله ألف خير

على تقديم النصايح دي لية

بس تصدقوا اني لسة بعاني من المشكلة دي ، بس الحمد لله أقل من الأول

بعد ما حاولت أعمل ببعض نصايحكوا

ياريت كل اللي كان ليه تجربة في الموضوع ده يحكيلنا

عشان كلنا نستفيد

و ربنا يعينا جميعا في تربية أولادنا