كوفي شوب المغتربات-الحلقه 5-علاقتك مع الناس بالغربة من عرب او اجانب*مروا *

تقليص
X
 
  • الوقت
  • عرض
إلغاء تحديد الكل
مشاركات جديدة
  • mayaaa
    النجم الفضي
    • Mar 2012
    • 1780

    كوفي شوب المغتربات-الحلقه 5-علاقتك مع الناس بالغربة من عرب او اجانب*مروا *

    السلام عليكم ورحمة الله وبركاته

    موضوع الكوفي اليوم للاخت مروا علاقتك مع الناس بالغربة من عرب او اجانب
    المايك معك مروا حبيبتي هاتي شو متعبك بالموضوع ؟؟ نقاش هادف ان شاء الله مع ارقى واحلى مغتربات
  • MARWAH
    مشرفة ملتقى المغتربات-متميزة أركان الأطباق
    • Oct 2007
    • 5597

    #2
    احم احم
    الو الو
    بسم الله بسم الله
    سمعانيني المايك عم يشتغل ؟
    اولا تسلميلي مايا بس ملاحظة اسمي مروة بالتاء وليس مروى او مروا
    ثانيا
    علاقاتنا مع الناس في بلادنا بتختلف من العلاقات في الغربة ففي ببلادنا غالبا العلاقات تكون بين الأهل والأقرباء أكثر بالذات للمتزوجات وطبعا بغض النظر عن المزايا والسيئات او المشاكل التي تواجهنا ولكن في النهاية تبقى عائلة
    حتى الاصدقاء الذين نتعرف عليهم في بلادنا نستطيع ان نتحكم ونختار بحسب ما نشعر بالراحة والطمئنينة

    لكن أغلبنا لن أقول كلنا عندما سافرت إلى بلاد الغربة كانت تطمح باقامة علاقات اجتماعية مع الناس وخصوصا المسلمين والعرب من باب ( ما بيحن على العود غير قشره)
    المشكلة اننا أتينا هنا بخبرتنا حول الناس في بلدنا فقط وطباعهم وبعض منا بدون خبرة ولكن كان عندنا حسن ظن قوي بالناس هنا وكنا في البداية نتسرع في التعرف على اول عربية نلتقي بها ونحاول نتبادل الأرقام ونكون الصداقات حتى لا نشعر بالوحدة
    تجربتي الخاصة وأظن أنها تشترك بنقاط كثيرة مع بعض تجاربكم
    كنت في بلدي انسانة اجتماعية وكتاب مفتوح وكانت اغلب صداقاتي صداقات دراسية لذلك كانت صديقاتي تعرفني واعرفهن جيدا نسامح بعض ونلعب وندرس ونساعد بعضنا البعض بكل طيبة وبراءة طفولة واستمرت بعض علاقاتي حتى تخرجت من الجامعة واغلب المشاكل والصدامات لا تتعدى قلتي كذا وازعجتني بكذا يعني برايي مشاكل أطفال وبعد فترة كل شي يصلح ويعود افضل مما كان
    تزوجت وجئت إلى هنا وأنا بحيوية وتفاؤل أن المسلمين في بلاد الغربة يحبون بعضهم أكثر مما لو كانو في بلدهم لان عندهم الم مشترك وهو الم الغربة كنت اذا التقيت بعربية في المول او اي مكان اسلم عليها واحاول ان نبقى على صلة واعطيها رقمي واعرض عليها زيارتي
    في البداية كانت علاقاتي شبه منعدمة فقط اعرف اثنتين او ثلاثة كحد ادنى واستمررت هكذا لسنتين حتى انتقلت لمكان فيه جالية اسلامية وبعض عائلات عربية
    واحدة من صديقاتي كانت على قدر من الاخلاق والالتزام والطيبة ولكن شاء القدر ان ترجع الى بلدها
    بعد ذلك بدأت اتعرف على الناس هنا والتقي بهم في دعوات وعزايم فطور شاي الخ
    وعندما اتكلم كنت اشعر بنظرة غريبة وبعض الملاحظات ما شاء الله انت بريئة مثل طفلة طيبة وهكذا وكنت اخذ هذه الكلمات مدحا وليس ذما لاني ما كنت اعرف معنا لها غير المدح
    بعد مدة بدأ يذوب الثلج ويبان المرج اكتشفت ان كل واحد منهم اللهم ان أسالك نفسي سمعت كلام من غيبة ونميمة على بعض
    الحسد والغيرة منتشر بكثرة والكلام على الاعراض حدث ولا حرج والصدمة الحقيقة ان اغلبهم كان ذو وجهين يالطيف وبعض الامور يوصلونها للشرطة بكل سهولة
    لما شعرت ان بعضهم بدا يستغل طيبتي والبل يوصل لذقني خففت علاقاتي وانطويت على نفسي وأغلقت بابي وفكرت في تربية أولادي والاهتمام ببيتي ونفسي افضل حل لي واخاف من ان التقي باحد جديد
    طيب يا عرب يا حبايبي ليش كل هذا الحقد ليش ما نحب بعض بغربتنا ونحن على بعض ونترك فكرة جيدة عنا امام الاجانب
    احيانا بشعر بغصة بتدبحني وبتمنى لو لاقي مجموعة قريبة مني حبهم ويحبوني واقدر احكي معاهم براحتي بدون خوف
    الاجانب العلاقات معهم محدودةغالبا حتى لو كانو مسلمين باكستان او من جنسيات اخرى بحكم اللغة والتعبيرات والتقاليد واعتبارات اخرى لذلك تبقى العلاقة فيها ود واحترام اكبر وممكن اعجاب بما نفعله لان الكلام والزيارات محدودة
    وطبعا مهما عاشرت من جنسيات اخرى تبقى بنفسي حنين لصديقات عرب
    حسيت حالي عم القي محاضرة يا عم اكتب موضوع تعبير ههههههه
    هذه بعض ما عندي والافكار والحلول نتناقشها معا ان شالله

    تعليق

    • . تيوليب***
      مشرفة النافذة الاجتماعية-نجمة الأطباق الرمضانية
      • Jul 2007
      • 17916

      #3
      هههه يا خراشتي عليك يا مروة ( بالتاء المربوطة )
      ماشاء الله عليك زي العسل
      صحيح يا أختي كلنا قابلنا في الغربة ناس تعشمنا فيهم الصدق والإخلاص بس بعد ما تعاملنا معهم عن قرب انكوينا بنار الحقد والغيرة وكمان الحسد يا لطيف
      وبعد ما اعطينا الناس ثقة مكانتش في محلها رجعنا اتندمنا على سذاجتنا
      شوفي يا مروة رغم إن سني مش صغير بس لسه لغاية قريب بنخدع في الناس وكل ما اقول خلاص حرررررمت وبطلت اعطي ثقتي لكل من هب ودب ارجع اتعرف على واحده واشوف منها مواقف اصيلة بس في نهاية الامر الاقي منها عيوب واشياء مش ممكن يتحملها احد
      بس قررت من بعد قرصات كتير اني احجم العلاقة بيني وبين اي واحده وما تزيد المعرفه عن مجاملات لا تخلو من طلعات مع الصاحبات
      رغم اني برضو بعد ما اكون كونت صورة كويسه عنهم انهم تقيات وملتزمات وحافظات كتاب الله الاقي حديثهم لا يخلوا من النميمة يوم ما اكتشفت نمهم كنا في حديقه مع اولادنا حزنت وما انبسطت ورجعت وانا مقرره ما اطلع معاهم تاني بس دلوقتي بنتقابل عند واحده منهم على درس قراءة قرآن وتفسير وحفظ والوقت الحمد لله بيضيع فيما ينفعنا وما بيلاقوا وقت ينموا على احد
      المهم المشاكل بتظل تيجي للواحده حتى لو اقتصرت علاقتها بالأخريات على المجامله وزيارات الواجب فقط انما مش زي ما تكون العلاقة على البحري وكل يوم زياره او بنشجعهم على جيب سيرة الناس والنميمة معهم
      الله يحفظك ويحفظنا من كل شر وماتنسي تدعي بأن يكفيك الله شر خلقه ويكفيك أذاهم وكل يوم استودعي نفسك وأولادك وزوجك الله الذي لا تضيع ودائعه
      خلينا نشوف رأي بقية الأخوات علشان نستفيد سوا

      ما انسى اشكر مايا على فتح النقاش بارك الله فيها





      تعليق

      • new light
        النجم البرونزي
        • Jan 2011
        • 721

        #4
        مرمورتي ياقلبي شكلك مجربة ومعانيه من الناس اللي هون
        يعني انا كمان مريت بمواقف بحس بغصة بس اتدكرها بس ابدا ما بتوصل للي انت مريتي بيه
        يعني ماعمري صارتلي مشاكل او في حكي انتشر الحمد لله كان الموقف يخلص بلحظتها
        بس انا اصلا بطلت انعجق وادخل في الناس زي الهبلة
        صرت اخااااااف
        وعندك حق انا كمان بضل احن لصديقات عربيات
        لاني مابحس بالراحة التامة مع المسلمين من جنسيات تانية
        وطبعا الحقد والحسد والغيرةوالنميمة بكل مكان
        بس انا اللي بيدايقني اكتر اشي كانه في شويه عنصريه
        يعني بتلاقي قروب الدكاترة لحالهم والمهندسين لحالهم والعرب تبعون الكاونسل الهم مجموعة لوحدهم
        طبعا الا اللي بيكون في البلد من زمان من وقت الدراسة او اللي بيكون ولدان ومتربي هنا متلا فبيكونوا متصاحبين عبعض عادي
        كتير بيقهرني هالموضوع

        تعليق

        • mayaaa
          النجم الفضي
          • Mar 2012
          • 1780

          #5
          مروة بتصدقي ما بعرف وين هي التاء المربوطه عالكيبورد وهيني لقيتها لعيناتش هههههههه قتحتي على حالك باب هل الكل بيقعد يقول مروا بالتاء المربوطه وسبقتني توليب العسوله ........


          شوفي موضوعك مهم وانا كوني من زمان بملتقى المغتربات ومنتدى ثاني مو هاد فبدي اقولك حكينا بهاد الموضوع كثثثثثثثثثثثثير مش شوي نفس المعاناه يعني الكل بيقول انا مسكين وانضحك علي فشكلهم هدول القوايا ماعندهم نت هههههههه

          طبعا انا ما بشكك ابدن بكلام اي وحده بس بدي من خلال تفكيري بالموضوع اكثر من المره لما كنا زمان نطرح هاد الموضوع لقيت عدة نقاط
          اول شي اغلب المغتربات جايين من بيت الاهل عالزواج وغربه فرد مره وحده يعني الخبره بالحياه نادره والضغط بيكون اجا مع بعضه زوج وبيت ومسئوليه وصرتي صاحبت بيت بدال ما تتدربي عند اهلك ببلدك كيف تتعاملي مع الناس باختلافهم اجيتي على مجتمع متعدد ومتنوع الاشكال وبدون مساعده بمعنى وجود الام والحمايه مع البنت بيساعد وبيفتح العيون نوعا ما

          كل وحده مفكره ان الغربه ممكن تتشكل وتصير وطن بتنصدم بالواقع المفروض كلنا نحط بعين الاعتبار وتستعد نفسيا لنقطة اختلاف النفسيات والبشر يعني اهلك وجيرانك وصديقاتك خليني اشبههم شوي الجيولوجيا متل الحجار اللي تشكلت بنفس المكان ( البيئه) يعني لو قلنا احنا بالاردن احجار بركانيه كلنا من نفس البيئه والاختلاف بسيط بالشكل او بالحجم بس كلنا مرينا بنفس الظرزف اللي صقلت شخصياتنا فبتلاقينا نشبه بعض هل لما الواحد بيتغرب بصير مخلوطه حجر بركاني على رملي على ترابي ومن كل شكل ولون كل واحد مر بظروف بتختلف وتشكل بطريقه مختلفه وبيكي انت مش متلي احنا ببلدنا غير بس هل حد فكر انه يتعامل مع الشخص القباله مع الحيطه والحذر بكل كلمه بكل حرف بكل تصرف لأ بتلاقيكم تفتحوا البيت والقلب وتحكوا كلشي ما بتفكروا انه هالانسان بجوز يحسدك على طبع زوجك او على اثاثك او على شكلك او على فلوسك واذا فقيره بيقول شوفوا جوزها بيحبها اهلها بيحبوها حماتها كيف بتعاملها كيب لو خلينا هالامور كلها غامضه وسريه لبين ما نتاكد ان هالشخص اللي لقيناه بالصدفه بيستاهل يعرفني بيستاهل يصير صديقي درستيها اختبرتيها لأ اذن انتي حطيتي حالك بهالموقف وكله منك مو من الناس

          بعرف وحده مشاكلها كثثثثثثثير على انها رائعه بس حماتها مش راضيه زوكها مش راضي اولادها مش مبسوطين ولو تشوفوها دابحه حالها دبح عشان ترضيهم ولا حط راضي حتى اصدقائها بالشغل بيطلبوا منها MORE....WHY???لانها شفافه وسمحتلهم يعملوا فيها هيك اعطتهم اشاره خضرا مفتوحه على طول مافيه لا احمر ولا نيلي كله اوكيه وبس بتضغط على حالها وانا انبري لساني وانا اقول حطي حدود يختي عصبي ازعلي منشان الله....
          انا انقرصت كثير من النسوان وانا بنوته بحكم طبيعة شغلي كنت اول بنوته بالمديريه وتعلمت من اغلاطي معهم لما تزوجت كنت خبيره بالناس والنسوان مو سهل حدى يضحك علي ولا بعطي وجه لحدى ولا بقول عن بنت صديقتي الا بعد سنه عالاقل اتاكد فيها اني بقدر اتعامل معها بامان واكون بعرف طبعها وعاجبني او عالاقل بقدر اسيطر عالمواقف معها يعني بعرف اسوق عليها .........اذا ما عجبتني خلص صراحه حسب الضرر اذا بالمره مافيها فايده بالشلوط يعني بقوللها اسمعي يا بنت الناس رقمي انسيه انتي عملتي كذا كذا انا هاد الاسلوب ما بينفع معي ....اذا هي عاديه بس ماعجبتني بسحب شوي شوي بضل اتحجج بجوزي باولادي طبعا بجوز تقولي حرام اتسلي معها بقولك بيتي اولى بوقتي ونتفرق صاحبات احين ما نتفرق اعداء ....عندي اموت من زهقي ولا اصاحب بنت ما بقدر اتعامل معها بلا وجع قلب مال جوزي بصاحب جوزي والله مره عملتها فيه قاعده وبخاطبه بصبغة انثى ومحنا قاعدات !!!! بروتند

          طولت عليكم انا عارفه بس بدي اقولكم اسلوب الهجوم عالناس بحجة زهقان هاد حكي فاضي العائله اللي اجيتوا منها مو بتعرفوا بعض من سنين ومع ذلك بتفضلي مثلا بنت عمك على بنت عم ثانيه صح؟ وبدك بغربه وتلاقي بيوم وليله البي اف اف تبعتك ولا يمكن لازم نعطي الناس وانفسنا وقت سنين متل ما صاحبنا اصدقاء الدراسه سنين حتى اخذوا لقب صديقي مو بسهوله اي بنت بتكون صديقتك

          انا عندي صديقات مفضلات عربيا وباكستانيات وصراحه اكتشفت المرءه هي مرءه يعني الغيبه هون وعند الباكستانيات والله اشي بيضحك بضل اقول سبحان الله اللي جبل المرءه على حب الكلام والقرقره لما ما بدي اسمع غيبه بس بقعد ادافع عن الطرف المش موجود مابهاجم المستغيب ابدن الناس ما بتحب تحطي ايدك عالجرح رح تنفريهم منك الرسول تقبل المشركين وعلمهم الدين تعليم ما امرهم فيه فانا طريقتي بضل اقول بلكي فلانه مش قصدها بلكي كذا بلكي مزا اللي قبالي صدقيني خلص مره مرتين وبيبطلوا يجيبوا سيرة حد قدامي عشان ما اقعد ادافع او بيكونوا استحوا على دمهم

          طريقة تجنب الناس ما تفيدكم باشي لازم نغلط ونتعلم من غلطنا انا مابزعل لما الاقي بنت مو كويسه او عملت او سموت لان اول اشي انا ماخليتها تضحك علي وانا اللي قررت اتركها مو متل الهبله مشكلتني وكبتني لا بضل مفتحه عيوني ومنتبهه فلازلت ابحث عن ناس محترمين وعندي مجموعه طيبه الحمدلله بس ما اغنتني عن الاهل والبلاد
          شغله تانيه بلاحظ ناس لئيمين معي ماشيين تمام لانه انا عرفت ادير علاقتي فيهم وبكون متفاجئه ايش عملوا او ايش حكوا او او او بس مو معي مع غيرري


          جد اسفه طولت عليكم بس بدي اقولكم اني بفضل اصاحبمن بلديعشان بحب استعمل لهجتي واحكي عن شغلات ببلدنا بحس بترجعني لبلدي خصوصا لما بذكر اماكن ومحلات واخبار البلد وهيك واظن الكل متلي ولسه ما صارلي اعرف اردنيه او فلسطينيه من بلدي طبعا مليان بس انا مختصره ما لقيت اللي ارتاحلها

          تعليق

          • MARWAH
            مشرفة ملتقى المغتربات-متميزة أركان الأطباق
            • Oct 2007
            • 5597

            #6
            تعرفي تيوليب هدول الناس يلي بيحكو باعراض بعض وكلام والله عيب ينقال راحو اجتمعو عند وحدة بدروس قرآن بس أقسم بربي كانت للمنظرة مو أكتر يعني المسكينة يلي تدرسهم عم يضحكو عليها ومن وراها يعملو يلي بدهم ياه او يتغامزو عليها بس قدام الباقيين يلي ما بيروحو يعقدو يقولو يالله ما احلاه وروحانية وعم نستفيد ويبالغو بالكلام من باب المجاكرة مو أكتر
            مع اني اول ما اجيت لهون واتعرفت على الناس عرضت عليهم يعملو دروس قرآن بحكم انو دراستي دراسات إسلامية قعدو وقتها لاء مافي وقت يادوب بيتنا وولاد وماطلو ومن هالقصص بس لما مرة وقفت مع الحق ودافعت عنو عملو هالحركة فكرهم يغيظوني الي هههههههههههههه تقولي رح ازعل والله ما زعلت المهم يستفادو مو المهم مين عم يدرس


            نيو لايت بالفعل حتى أنا ما عدت انعجقت بالناس بس المشكلة صارو يحكو عني اني سلبية ومالي خلطة بحدا يعني ما خلصت من شرهم وبالفعل راس الافعى يلي بتدير كل هالمشاكل قاطعتها نهائيا مع اني ما بحب قاطع حدا بس للضرورة احكام
            والباقي علاقتي فيهم للمناسبات بس ولادة وفاة واجب مو اكتر
            بس والحل يعني معقول نعيش بدون علاقات مثلا ؟

            تعليق

            • MARWAH
              مشرفة ملتقى المغتربات-متميزة أركان الأطباق
              • Oct 2007
              • 5597

              #7
              هههههههههههههه حتى انا بقول هيك اذا كلياتنا مخدوعين بالناس طيب وين الناس الخبيثة والخداعة
              تعرفي مايا حتى انا بحط كتير أعذار للناس لدرجة مرة وحدة كانت معصبة من شي ولما قلتلها بركي فلانة ما قصدت قالتلي شبك انتي ولامرة وقفتي معي دايما يمكن وبركي وتخيلي بطلت تحاكيني سنة كاملة
              طبعا طبائع الناس بتختلف هون وببلدك بس ببلدنا نحنا أقوى كنا بحكم وجود الأهل والاهل بيكفو وبيوفو بس أنا أهلي من النوع الطيب يلي ما عندو خبث على الناس تخيلي أمي كانت تخليني أعتذر من حدا حتى لو مو الحق علي وانا كنت مفكرة انو صح يلي امي بتعملو بس لما كبرت تعلمت انو لاء مش صح بس لسا الطبع عندي اذا بتخانق مع أي حدا أنا بكون الطرف اللي بيطري الجو بعد المشكلة ان كنت مع زوجي اختي رفيقتي اي حدا حتى لو ما اعتذرت بطري الجو وبعدين بعقد ببكي انو ايمتى بدي قسي قلبي شوي وخلي الناس هي تجي تعتذر ولو لمرة وحدة
              بس الغربة بتحسسنا اصلا بحاجة لنستانس بحدا ومن هون بتبدا رحلة الخلطة والمشاكل وصعب نتقبل وضع انو الناس أطباع حتى لو خارجنا تقبل من جوا منبقى تعبانين وما عم نقبل الواقع

              تعليق

              • mayaaa
                النجم الفضي
                • Mar 2012
                • 1780

                #8
                مروه انتي عندك مشكله بشخصيتك من امك الله يحفظها بعرف ناس كثير هيك انا بقوللهم مستضعفين ماما علمتنا نوقف بوجه الناس ونطلع حقنا من حباب عيونهم وبابا علمنا ان ما نخاف الا من اللي خلقنا ولا نخلي حدى يستوطى حيطنا وعملنا ان مو شرط نحترم اللي اكبر منا على حساب حقنا ولما نسامح الناس بسامحهم بقلوبنا مو نخليهم يستقووا علينا ونقول احنا متسامحين لأمناخذ حقنا او منستد ومنسامح باللي ما قدرنا ناخذه اما انسان قوي ومستقوي هاد ايش بده يفسر التسامح ؟ خوف صح؟

                كثير سمعت كلمة انت قويه ومش مقدوره ردي انه اكيد اي حدى بده يستقوى علي وما يقدر ما رح يعجبه
                بس مروه ما تزعلي من امك ترى حظ الطيبين بالاخره كبير ووافر يعني انا مطلعه حقي بالدنيا انتي بتاخذيه بالاخره واللي بالاخره احسن صح والا لأ انا احيانا بقول لوني اخلي حقي بالاخره احسنلي بس مابقدر بضل جلدي يهرشني وجوابي جاهز على طرف لساني وما حد بيطلع معي راس

                ولما بدك تعطي دروس اعمليهم بمركز اسلامي او مسجد وخلي علاقتك بالحضور علاقة رسميه اللي بيحكي عليكي حقك بتوخذيه من عيونه بالاخره ومو غلط لو انه تعطي دروس حسب ما بتشوفي قدامك يعني عن اللي بيضحكوا على الناس ورب كلمة تلقي بالانسان 70 خريف بنار جهنم نصيحتي الك كمان لا تغمقي مع الناس كثير ولا تتعمقي معهم وخلي حوليكي طبقه ماحد يعرف بايش تفكري ولا كيف عيشتك ولا مين بيحبك ولا تجيبي سيرة اشي عشان تحمي حالك ولا تكثري ابتسامات ومزح اتدربي وابدئي من الصفر صدقيني الكل رح يتغير معك عالم ما بتيجي غير بالعين الحمرا ههههههه

                تعليق

                • mayaaa
                  النجم الفضي
                  • Mar 2012
                  • 1780

                  #9
                  بنات اللي عندها موضوع حابه نحكي فيه تراسلني اوكي دوكي؟!!!

                  تعليق

                  • MARWAH
                    مشرفة ملتقى المغتربات-متميزة أركان الأطباق
                    • Oct 2007
                    • 5597

                    #10
                    صح الحق معك مايا بس امي الله يخليلي ياها هيك طبيعتها حتى لو عصبت بتعصب علينا بس ههههههههههه مع الناس بتكتفي انها ما تحكي بالموضوع يلي مضايقها او تلطف الجو
                    هلق انا هون اتخذت اجراءات كتيرة بهالموضوع
                    اولا بيتي وولادي وزوجي رقم واحد فصرت شوف وين في نشاطات خاصة بالاطفال اماكن اجتماعات اخدهم عليه وبالبيت بهتم فيهم وبابوهم

                    تانيا حددت تلفوناتي تقريبا الا مع واحدة تنيتين
                    مشاوير وعزايم وطلعات اذا ما عجبتني ما بروحها ابدا

                    ولما بلتقي بحدا ما عاد عزمت على بيتي ولا عاد فتحت مواضيع ولو عامة بحاول حدد الموضوع مشان ما يتاخد على كلامي كلام تاني ويقولو مروة ( بالتاء ) قالت
                    بس المشكلة الاساسية بتبقى انو لما بحس بفراغ او تعب نفسي وبحس اني بحاجة حدا بكتفي بالبكا لانو مافي مين فضفضلو ولاىفي مين افرح معو ويفرح معي
                    ولاهلي ما بحكيلهم شي عن مشاكلي بقول بيكفي البعد تاعبهم كمان اشغل بالهم صعب

                    انا عارفة الموضوع اغلبو شكاوي بس انا حابة نتناقش بحلول سليمة كمان لتجنب الحاجة للناس

                    تعليق

                    • amani1
                      كبار الشخصيات
                      • May 2007
                      • 6591

                      #11
                      السلام عليكم
                      يسلموا يا مايا ومروه عليالموضوع الحلوه
                      بالنسبه لي انا لما اجيبت كنت هبله وبعدني شوي بس عم بتعدل اول شئ وانا بعمان ما لنا خلطه كتير بالناس يعني ماما مش من النوع بتعمل زيارات كتير وقهوه صباحيه لا كانت تغسل وتطبخ وحالتها حاله وخاصه بعد ما تغرب بابا وبقينا معها كنت بتحمل المسؤوله يعني ماكان عندي عندي صاحبه وحده بس بعمان ما بعرف ليش يمكن هي العقلها ايجي علي عقلي يعني حتي لو بحكي مع وحده بحكي معاها بس اذا ما عجبني ويحسيها بتنم ما برجع بحكي معاها ولا اصلا بزورها
                      المهم لما ايجيت هون اصلا زوجي ما بعرف يختلط مع العرب وما عنده عرب عاس هون تقريبا 28 سنه وما بعرف عرب لانه كان يعرب اجانب بحكم شغله وعلاقته
                      المهم كنت كل ما اشوف وحده لابسه حجاب اركض عليها اسالها انت عربيه وشويت اساله من وين وندردش وين ساكنه ونتبادل تلفونات بس عمري ما حكيت مع حدي
                      اول شئ زوجي من النوع ما بخليني اروح ازور اي حدي عربي بدون ما يتعرف هو بالاول عليه يعني كعائله او اكون التقيت فيها اكثر من مره بالسوق وهو معاي ويشوفها مش قصدي شكلها لا
                      وبعدين لازم تصير زياده عائليه وبصير ينبه عليي لا بدنا حكي ولا نميمه واذا بلشت انت سكري عليها خليها دبلوماسيه
                      وبعدين صار كم موقف سخيف وللاسف الزلام بكونوا نسوان مش زلام يعني شو مارته حكت بروح يعاتب الزلمه طرطور يعني
                      وصيرت اتجنب فيهم ولقيت علاقتي مع الامريكان افضل ميت مره من العرب للاسف
                      وعلي الاقل الامركيان بحاملوا فيكي وما بحكوا كلمه مش كويسه لانه بنضروا ما يجرحوا المشاعر عند الاخرين
                      وكمان شو ما تلبيسي هذه من تجربتي وتجربه زوجي بالشغل لانه بكون بشتغل مع نسوان حتي لو تلبسي كندره بعيد عنكم قديمه من عهد الهجره بصيروا يجاملوكي حلوه ومن وين اشتريها
                      وشو تعملي لهم بقدروا وبكافؤ حتي لو بكرت شكر
                      ان اتطوعت العام واعطوني 50 دولار جيفت كارد والمديره اشترت لي مجموعه كريم للجسم وليفه والكرت احلي من الاغراض تعرفوا ليش لانه كنت كل مره اعمل كيكه او اقراص سبانخ او اتذكرها ببسكوته فقدتها وقالت لي انت دارما بتطعمني هون ما حدي بذكر حدي عاده
                      طيب لو عند العرب كان بلشوا انتقدوا اكلي وبصيروا يعطوا نصائح فاضيه لو انك حطيتي هيك او عملتي هيك
                      وبعدين اعتقد هي النميمه وين ما تكون بس هون لانهم مش عارفين شو يعملوا
                      لو بالبلاد بتكون بلشانه بالطبخ ولانفخ والحياه الصعيه والشغل والتدريس والباصات والتوصيل والحماي وبنت الحماي بس هون كل شئ متوفر ولله الحمد ومش لاقين شو يعملوا وببلشوا بالناس
                      يعني انا روحت العام علي البارك وفت وحده بعرفوها ومعها شله نسوان ماشاء الله عليهم محجبات ولابسات عبايات تحكوا جايين من مكه
                      اول شئ بلشوا يتوتوتوا بين بعض وبعدين نادت عليي وحده مش البعدها بدل ما تسالني انت شو اسمك اام ام شو
                      سالتني قديش عمره زوجي لانه كان معي وعم بلعب الصغار
                      خير بدك تزوجه ؟؟ وقديش عمره يعني اكثر شئ الامريكان بكرهوا ان تسالوا الامور الشخصيه زي العمر والوزن بس سبحان الله دائما بنجيب العادات السئيه معانا من البلاد
                      وحده ايجت عندي قبل 4 سنين هي وحماتها وصارت بدها تسالني عن دار حماي ابصر زوجها شو حكي لها لانه زوجها زي النسوان بحب النميمه واخذ الاخبار
                      انا زوجي بموت من هيك امور وبكرها ولما ننزل علي عمان بصير يتقاتل مع اهله علي هيك عاده
                      عيب تسالوا قديس بتعمل مصاري او قديش عمرك او اي امور شخصيه
                      انا تعرفت الاسبوع الماضي علي نسوان وقلت الله يستر في المدرسه جابوا اولادهم علي المدرسه وحده عراقيه ووحده فلسطينه وانا بساعد في صفهم بس انا بحكي معاهم علي المدرسه وعلي الصغار وانهم يتطوعوا وهيك حكي بس الله يستر واذا تذكري شئ تاني بقولكم
                      بس 99 من التجارب مع العرب بناء علي حكي العرب وخاصه الهم علاقه بالجامع والدورس والتجمعات فاشله وبتنتهي بالمشاكل والمقاتلات وسببها انه الزلمه ما بقدر يوقف مرته وبسمع لها حتي لو غلط وما بتاكد
                      اللهم اغفر لامي وابي وارحمها ووسع قبرهما وتجاوز عن سيئتهما واغسلهم بالثلج والبرد وارفع درجاتهم واجمعهم مع الانبياء والصالحين




                      توكلت على الله العظيم رب العرش العظيم وهو على كل شئ قدير
                      لا إله الا أنت سبحانك إني كنت من الظالمين

                      تعليق

                      • amani1
                        كبار الشخصيات
                        • May 2007
                        • 6591

                        #12
                        ماشاء الله كتبت مجلد
                        اللهم اغفر لامي وابي وارحمها ووسع قبرهما وتجاوز عن سيئتهما واغسلهم بالثلج والبرد وارفع درجاتهم واجمعهم مع الانبياء والصالحين




                        توكلت على الله العظيم رب العرش العظيم وهو على كل شئ قدير
                        لا إله الا أنت سبحانك إني كنت من الظالمين

                        تعليق

                        • *سهام الليل*
                          زهرة لا تنسى - همة نحو القمة
                          • Mar 2007
                          • 4275

                          #13
                          اكتبي امون ما في مشكلة الانسان يتعلم من اخاطئه

                          انا اول ما جيت عملت صداقات ولحد الان مع صديقاتي لكن علاقتي معهم محدودة لما احب اعزهمهم كلهم مع بعض لاني جربت الزيارات الفردية وكانت مضيعة للوقت وفيها غيبة ونميمة ..فاحسن شيء يجوني كلهم في وقت واحد
                          واعمل الواجب مع الي اعرف انهم محتاجين مساعدة ولادة مرض سفر .....
                          لكن اسراري واموري الخاصة تبقى معي ..انا انصدمت صدمات وحوادث عنيفة في حياتي هنا ومجرد التفكير فيها يتعبني ..
                          وحدة من الي تعرفت عليهم جاءت جديدة وما تعرف حد قربتها مني من باب المساعدة فهي بدل ما تقدر ذلك قامت اتتلاعب بثقتي فيها .
                          اول الامور كانت تجيني بدون مواعيد ..وبعدها بدات تتهاون في حجابها ومرة تقول لي التقت مع فلان وعلان وفلان قال لها.... ومن هذا الكلام
                          فحسيت اانه في شيء غير طبيعي في البنت ...
                          فيدات اسحب نفسي ببطئ حتى ما تحس لكن هي ذكية وحست فصارت تجيب في سيرتي لصاحياتي وتحكي عن بعض اسراري ..وحتى ملابسي
                          والقشة الي قصمت ظهر البعير كانت يوم دخلت اولد ابني جات عندي للمشفى بعد الولادة وجلست معي شوي وبعدين راحت . وشوي اتصل زوجي بي فقال لي انوس شابع بكى ورافض اىه يروح لجارتي نهائيا وقال لى اىه جاي معاه للمشفى واىه اجهز هديته على اساس هدية من البيبي لانوس ...وقعدت استنى ولما جاء زوجي قال لي بالله عليك فلانة شو جابها للبيت ,,,قال جاية تسال اذا محتاجة شيء ولا لا ؟؟؟
                          اللئيمة خرجت من عىدي لبيت زوجي عاملة نفسها تسال على ؟؟؟
                          انا رجعت الي لمة الاحباب
                          إذا لم تقدر على قيام الليل، ولا صيام النهار، فاعلم أنك محروم، قد كبلتك الخطايا والذنوب.
                          الحسن البصري





                          تعليق

                          • متسننة
                            النجم الفضي
                            • Jan 2004
                            • 1099

                            #14
                            يالطيف ايش هاذي ياسهام الله لايبلانا ويصلح هالمخلوقة ويهديها

                            تعليق

                            • MARWAH
                              مشرفة ملتقى المغتربات-متميزة أركان الأطباق
                              • Oct 2007
                              • 5597

                              #15
                              تعرفي أماني صح حتى انا حسيت الرجال العرب بالغربة متل النسوان بيضيرو وهنن يلي بيغتابو وبينمو وبيعملو المشاكل مرة زوج وحدة شافني مع ولادي بالسوبر ماركت وبتعرفي الولاد كيف بكونو هنيك على نق واسئلة بس كانو جنبي يعني بعد يومين بسمع من وحدة بتقلي انو ولادي بيوجعو الراس وما بعرف شو وانو فلان شافني وكانو ضايجين بذمتك هي قصة بتنتقل . طيب انا بالسوبر ماركت مو ببيتك ولا فوق راسك وعم حاول اضبط ولادي قد ما بقدر بس عنجد نسونة
                              مرة تانية حبيت افتح صف بالمسجد فقلت لزوجي يحكيلي مع الشيخ من طريق ما دريو النسوان اني سائلة الشيخ مشان الغرفة بتعرفي شو عملو زوج وحدة راح المسجد وقعد يقلو للشيخ بدنا الغرفة ومن هالكلام لندرس ولادنا عربي قام بعد يومين بيجي زوجي لعندي وبيقلي رفضو لانو في شخص تاني اسمو فلان طلبها والشيخ قال هاد مسجد مو بزنس انا انصدمت لاني عارفتهم ما بدهم الغرفة وانهم عم يلعبو وبعد كم يوم وحدة بتقلي اسمعت عم يقولو انو طلبتي الغرفة من الشيخ قام طردك صدقوني غصيت من قهري شوبدهم فيني غيرة وحسد
                              وهي قصتين من القصص وهي انا اقسم بربي بعيدة عنهم لا بزورهم ولا بتصل بحدا الا اذا كان في مباركة او وفاة مو اكتر بس فكرهم كترة حكي وبتعرفي ردة فعلي شو بتكون لا بتخانق مع حدا ولا بسال ليش هيك ساويتو بطنش وباكلها ببدني وبس شوف اي حدا من تبعات الوجهين بس بسلم وبسال كيف الصحة مو اكتر
                              والمشكلة انو حتى الناس الحبابين ما بيعرفو ياخدو موقف وبتلاقوهم واقفين مع الباطل كرمال ما يخسرولهم شي قعدة او زيارة او كاسة شاي هههههههههههه

                              تعليق

                              يعمل...