⊙︿⊙ كيف وأين تقضي شهر رمضان المبارك ⊙︿⊙ردود متميّزة [الأرشيف] - منتديات لكِ النسائية

View Full Version : ⊙︿⊙ كيف وأين تقضي شهر رمضان المبارك ⊙︿⊙ردود متميّزة

cutee

06-06-2012, 06:58 AM

http://www.lakii.com/img/free/Dec11/ZBKTPQDqzvi.gif (http://www.lakii.com/vb/uploader/freeupload.php)

ازيكم يا حلوين
رمضان شهر مبارك ، شهر التوبة والغفران
ونحن بالغربة كل واحد تختلف عليها كيفية قضاء هذا الشهر الفضيل
فلنجعل هذا الموضوع يقرّب بيننا ويجمعنا على عبادات وطاعة الله ، ونحكي فيه على :
أين تقضين رمضان في الغربة ؟
ولا تقضيه في بلدك؟

وكيف تكون تحضيراتك الماديّة والمعنويّة لهذا الشهر الكريم
http://amiraa.com/bsh/uploads/images/amiraa3cb885d52f.gif

* شهدوده *

06-06-2012, 10:32 AM

السلام عليكم
موضوع مهم جدا ورائع
ورمضان على الأبواب ، اللهم بلغنا رمضان

فلنحكي على تحضيرات رمضان بالغربة ، ومكان قضائه ؟

جزاكي الله خيرا ياغالية على فتح هذا الموضوع المميز ،، ننتظر أحلى التفاعلات مع أحلى وأغلى المغتربات

منوره البيت

cutee

06-06-2012, 01:18 PM

شكرًا لكي غاليتي شهد
اتمنى من العضوات اللي هيقضوا رمضان في الغربة يتفاعلوا معنا
انا ممكن اقضي رمضان لاول مرة في الغربة
ونفسيتي تعبانة

*سهام الليل*

06-06-2012, 02:07 PM

بالعكس اخت كيوت رمضانات الغربة هي اجمل واروع الرمضانات الي صمتها في الغربة
لي رجعة ان شاء الله

cutee

06-06-2012, 04:00 PM

بالعكس اخت كيوت رمضانات الغربة هي اجمل واروع الرمضانات الي صمتها في الغربة
لي رجعة ان شاء الله

كيف أختي سهام الليل
ممكن تحكيلي اكتر
يمكن ترفعي من معنوياتي
وانتي هالسنة وين رح تكوني برمضان

mayaaa

06-06-2012, 04:42 PM

حبيبتي عادي هلأ ايش اللي بيحسس الواحد برمضان ؟ بالنسبه الي التراويح!! هل اذا رحت المسجد وصليت تراويح بحس انه رمضان غير هيك سواء هون او بالاردن رمضان متله متل باقي ايام السنه اللهم منجتهد بالعباده
انا مابحضر اكل ولا بفرز ولا بعمل تشكيلات ولا من هالحكي بالعكس بدال ما كنت احط وجبتين بتتحول لوجبه وحده
كثير مر علي رمضان نسهر طول الليل وهاي العاده بكرهها بس زوجي بيشجعني منقرا قران بس بحب بتمنى اخلي ظامي عادي عشان الصغار حرام بيصحوا الصبح لحالهم وانا بتاخر بالنوم عشان سهرانه وبضل نعسانه مو قادره على شغل البيت فبدي احاول السنه ما اتاخر بالسهر
السعاده مش مربوطه بجغرافيا ومواقيت سنويه وايام وظروف السعاده احنا منصنعها حتى لو لوحدنا ياما رمضانات قضت وانا افطر لوحدي وانام وزوجي لسه ما اجا من الشغل واعياد اقضيها متلها متل باقي الايام لحالي والحمدلله اجا اعياد ثانيه حلوه وبتجنن اهم شي ما يقضى الشهر بدون تعبد هون الخساره الحقيقيه...........
بسطي الامور لا تعقديها الايام جايه وكلشي بيتعوض وحتى لو متنا العوض بالجنه ان شاء الله..

cutee

06-06-2012, 09:22 PM

rama1100

06-06-2012, 10:08 PM

شكرًا لكي غاليتي شهد
اتمنى من العضوات اللي هيقضوا رمضان في الغربة يتفاعلوا معنا
انا ممكن اقضي رمضان لاول مرة في الغربة
ونفسيتي تعبانة
حبيبتي لايضيق صدرك ولاشي
صحيح في البدايه راح تتعبي لكن لاتتركي الحزن والتفكير يسيطر عليك..كلنا كان بداية الصيام في الغربه شي متعب لكن مع مرور الأيام بدأ كل شي جميل..
حملي برنامج الاذان في كمبيوترك.. او اشتري ساعة الفجر وماراح تفقدي صوت الاذان ابدا.. كلنا في الغربه مستحيل نسمع صوت الاذان من الجوامع والمساجد.. لكن نحن يجب علينا خلق هذا الجو في منازلنا..
رمضان في الغربه يتميز بطول الوقت بحكم قلة الزيارات والطبخات.. لكن اجعلي هالميزه شي جميل واستفيدي منها في القراءه والعباده..
اي شي متعوده تسوينه في رمضان في بلادك ومع اهلك سويه في الغربه.. لازم تعيش الجو وتسوي لقيمات وسمبوسه ولاتنسي (الفيمتو)
صلي التراويح جماعه مع زوجك واذا عندك اطفال دعيهم يشاركونك..

mayaaa

06-06-2012, 10:17 PM

http://www.lakii.com/img/all/Apr12/31oGP704271403.gif

حبيبتي متل ماحكت راما
صلي ببيتك واعملي زينه لاولادك عشان يحسوا برمضان انا عندي من الزينه تبعت الكرسمس الاضويه الضغيره بعلقها وبعلق بوالين وزينه وعبارة رمضان سعيد عشان اولادي بيحبوا الديكور وعشان يحسوا انه فيه مناسبه ولما يجي العيد عندي حبل اضويه نوع تاني بنزل الاول وبغير الديكور وبحط عبارة عيد سعيد
اذا الك صديقات مسلمات صلوا تراويح سوا ببيتك اعملي غرفه متل مسجد وصلوا فيها جماعه ممكن تعملي افطار او تستاجروا مكان وتصلوا فيه وتفطروا سوا لو بالمره مافيه انتي وزوجك زيني بالشموع وهيك اعملي جو وعيشي ايامك بتيجي ايام بترجعي بلدك وبترجعي لنظامك السابق وبتتمني يوم من الغربه هل انتي لوحدك ماعندك شي يمنعك عن التعبد بالعاده رمضان ببلداننا مناسبه اجتماعيه بتلهي الناس عن العباده

لا تعتبري الغربة شي يحد من سعادتك لا تربطي سعادتك بشي حاولي تكوني بسيطه حتى لو جردوكي من كل شي الاذان نزلي برنامج المؤذن واسمعي الاذان ببيتك وحتى التراويح حطي التراويح تبعت السعوديه حتى لو فات موعدها واعاده بس حلو بتسمعي قراءة القران والتراويح عالكمبيوتر يعني بالانجليزي move on
الحياه ما بتتوقف بتستمر فيه مسلمين كثير بالصين عايشين حياتهم هيك غرباء ببلدهم عالاقل انا وانتي وغيرنا تجربه مهما استمرت بتضل مؤقته وبرغبتنا مو مغصوبين عليها
ان شاء الله احنا منعمل افكار ومنساعد بعض على صيام رمضان

rama1100

06-06-2012, 10:20 PM

http://www.lakii.com/img/all/Apr12/31oGP704271403.gif

انا صمت اربع رمضانات في امريكا وهالسنه بإذن الله راح اصوم مع اهلي..
لكن احكي لك عن جدولي في السنين الماضيه..
عندنا في مدينتنا المسجد كل يوم يعمل فطور للصايمين..اللي مثلا تعبانه او عندها كلاسات ترتاح تروح للمسجد وتحصل فطور جاهز
ايام الاسبوع كنت اسوي انواع الاصناف وارسل لجيراني أو اصحاب زوجي بالأخص الشباب العزابيه الواحد يكسب فيهم اجر
في الويكند يوم الجمعه افطر مع صاحباتي ونسهر مع بعض كل وحده تجيب معها طبق وبنفس الوقت ازواجنا مع بعض نرسل لهم فطور.. نفطر ونروح مع بعض نصلي التراويح..إذا عندك صاحبات وجيران لازم تسوا لكم جدول وتجتمعوا في رمضان.. يوم السبت تقريبا اكثر البنات يجتمعوا في المسجد ويكون اجتماع كبير ويعيش الواحد جو بأنه بين اهله واحبابه..نفطر ونتعشا وبعده نصلي التراويح ونكمل سهرتنا.. ايام العشر الاواخر فيه ناس ماشاء الله عليهم يعتكفوا في المسجد وبعض البنات والشباب مايقصروا يجهزوا سحور للكل..
بالنسبه لصلاة التراويح كنت احاول اصليها كل يوم وإذا ماقدرت اروح للمسجد صليتها في البيت..
واخر الشهر احلئ شي التجهيز للعيد وللحلويات والعيديات..مثل ماقلت لك عيشي الفرحه والوناسه حتى لو كنتي في المريخ :)

نصيحتي لك ولكل اخواتي المغتربات الجدد عيشوا رمضان بكل لحظاته ولاتحزنوا وتشلوا هم..سبحان الله شهر رمضان جميل بكل اوقاته وأزمانه..

*سهام الليل*

06-06-2012, 10:33 PM

http://www.lakii.com/img/all/Apr12/31oGP704271403.gif

اخت كيوت اول ما جيت للغربة انصدمت بجو رمضان الكئيب هنا انا كنت متعودة علي الاجواء الرمضانية التقليدية والتي هي في الاصل مضيعة للوقت وهدر له كنا نسهر مع الاحباب بعد صلاة التراويح ونتفنن في اعداد الاصناف الكثيرة والوقت كله ضايع في المطبخ
لكن رمضان الغربة غير انا انصحك
ان تحملي برنامج الاذان تلاقيه في موقع مشهور اسمه اسلاميك فايندر ورح تسمعي الاذان خمس مرات يوميا
اشتري لاقط للقنوات الدينية اسمه زاب تيفي متوفر علي النت واختاري القنوات الي تعجبك وما تضرك
اشتري ملابس للصلاة جديدة واذا ما عندك خصصي عباءة للصلاة
خصصي ركن في بيتك بعيد عن عبث اطفالك فرشيه وعطريه وضعي فيه مصحفك وسجادة الصلاة
وكلما لقيتي وقت اجري لهذا الركن وقري القران
انا في البداية كنت اتفنن في تحضير الماكولات ووقتي كله رايح لكن الحمد لله الان اطبخ الشوربة ليومين اوثلاث واجهز السلطة اقطعها واضعها في اكياس في الثلاجة ووقت الحاجة اخذ ما احتاج وممكن مثلا يبقي الخس ثلاث ايام طازج في الثلاجة
اخبز ليومين او ثلاث الخبز والفطائر كذلك وافرز الزائد و
ولا يزيد عدد اطباقي اكثر من ثلاث الحمد لله
اصلي التراويح وحدي ولا اذهب الي المسجد الحمد لله مع اني افتقدته لكن مع الاطفال مستحيل طبعا
بعد التراويح مباشرة انام ولا اسهر الا وقت تنظيف المطبخ وترتيبه
اقوم قبل الفجر احضر السحور وهو واحد طيلة ايام رمضان نحن الجزائريون نتسحر بالكسكس واللبن والتمر واصلي الفجر ولا ارجع انام الحمد لله واقوم ببيتي واطفالي واكثر من قراءة القران لانه شهر القران
الوقت يا اختي ثمين وهذا الاحساس يحسوه اغلب الي تغربوا شوي شوي رح تتعودي علي حياتك الجديدة
وانا اصدقك القول عندما اذهب الى اهلي ومع شوقي لهم لكن سرعان ما افتقد بيتي وهدوءه وحتي اوقات خلوتي مع ربي
الله يسر لك امورك ويبارك فيك

tuta.

07-06-2012, 06:47 AM

http://www.lakii.com/img/all/Apr12/31oGP704271403.gif

رمضان..... و الله هاكلة هم رمضان هالسنة....

برمضان اتعودنا على اللمة و الجمعة لو مش كل يوم على الاقل 3 مرات بالاسبوع, والدي الله يخليه بيحب الجمعة و برمضان بيته مفتوح لينا ليل نهار يعني ان رحنا و قضينا عنده 24 ساعة ما بيملوا و لا بنسمع كلمه اوف.
شوفي يا ستي, صحيح انا مغتربة لكن يمكن رمضاني بيكون غير عن بقية البنات و السبب انه اهلي كلهم متواجدين عندي... لهيك ما بحس بغربة و لا بوحشة و ما في احلى من ايامه.. يبدأ يومنا بالسحور خصوصا لابني و هالسنة حنبلش نعود بنتي تصوم نص نهار على الاقل الله يكون بعونها.. عن نفسي ما بتسحر و زوجي بالنادر اقدر اصحيه اذا كان بالبيت و اذا كان براة البيت بتصل فيه اذكره بالسحور بكون بعثت معاه بواقي من فطور اليوم السابق او خبز و مرتديلا و جبنة و بندورة و خيار و كم حبة فواكه يتسحر عليها, و ابني بالبيت بعمله سندويشة او بحط له شوية حواضر حمص على مرتديلا على جبنة على لبنة ايا شي متوفر عندي بالثلاجة و اغلب الاوقات قبل ما ينام بسأله شو بيحب يتسحر و بناء عليه بجهز له.. عن نفسي ما بتسحر بتاتا ما بقدر حتى لو كنت حابة اتسحر لاني بشرب دواء للغدة و ممنوع الاكل قبل بساعة و بعد بساعة, لهيك باكل لقمة قبل ما انام او بتركها على الله...

رمضان ارتبينا و اتعلمنا انه فرض من الله سبحانه و تعالى لنفضي انفسنا فيه و نتعبد و بنفس الوقت نحس مع الناس الجوعانة اللي ما بتلقى لقمة تعشي اولادها سواء برمضان او بغيره.. لهيك i make it a point اني افضي نفسي في النهار على الاقل ساعة اعطي دروس و اشرح لاولادي و لاولاد اخواني اذا كانوا موجودين كيف ممكن نتقرب لله في حياتنا اكثر من قبل برمضان و نخلي اسلوب التقرب لله تعالى معانا مدى الحياة مش برمضان فقط لا يمتد لبعد رمضان.. ان حدى اتذمر و بلش يسأل يقول ايمتى الاكل بجاوب: احمد ربك راح تاكل كمان كم ساعة في غيرك مش راح ياكل بتاتا, في اطفال راح تفطر كاسة مي, في ناس حتموت من الجوع.. لهيك ان جيتوا لابني اسم الله عليه من بلش يصوم و هو 6 سنوات لحد هلأ ما عاد يتذمر و يسأل ايمتى الافطار, لا بالعكس بتلاقوه بيشغل نفسه باللعب او الرسم, يا ما احلى رسوماته برمضان بيرسم رمضان كريم و هلال و بيحاول يعمل جامع و بيرسم هابي عيد بيكثر منها بتلاقوا الثلاجة عندي مليانة رسومات و زخارف للعيد...
يومنا بيكون عادي, ان ما صح لي اقرأ قرآن بشغل السور على الاب توب اسهل لي خصوصا انه اولادي بيسمعوه و السنة الماضية كانوا يمسكوا كلمة و يسألوا شو معناها, ما كنت اتركهم, كنت اروح ادور في تفسير ابن كثير عند ابوي و ابحث على سبب نزول الآيات المعنية و اشرح لهم, بشكل تشويقي كانه قصه لحتى ما يملوا و يعرفوا انه نزول الآيات و السور كان لسبب و حكمة و بيان و غيره.. هلأ ما في عندي ابن كثير بس انزل البلاد ان شاء الله بجيب واحد معي.. >>>>> السنة الماضية قضيت نص رمضان بالبلاد انا و اولادي مع امي و ابوي و كان رائع, فيه علمت ابني مع انه كان بيعرف اداء الصلاة كأداء و نسخ عنا لكن علمته كيف يأم فينا و يقراء السور بنفسه و الادعية..

الصلاة اتعودنا بالبيت نصليها جماعة, و التراويح لما اكون ببيتي بصليها لوحدي (ابني لسه ما بلش فيها ان شاء الله هالسنة بنبلش) و اذا كنا عند اهلي بنروح على المسجد افواج افواج, شي بيروح بالصلاة الاولى و الباقي بيضل ينظف و لما يرجع الفوج الاولاني بيروح الفوج الثاني للصلاة الثانية..

الاكل, ان طبخت لبيتي بس بطبخ على القد فقط, ما بكثر اللي ان تبقى شي من الاكل يكون وجبة وحدة بياخذها زوجي, طبق رئيسي واحد فقط, طبق شوربة و ان كان معي وقت بعمل نص عجنة معجنات او نص كيس egg rolls لحتى ما يضل شي ورانا.. لما اسكب لاولادي الاكل i make sure انه ياكلوا اكلهم كله, و بضل اذكرهم انه شايفين هاللقمتين اللي تركتوهم؟ في ولد بالعالم بيتمناها, نعمة الله ما بتنرمى بناكل على قد ما بنعرف انه راح ناكل و بس ما بنكثر لحتى ما نرمي شي <<<<< بكره الاسراف بشكل عام و برمضان خصوصا!!!! مرة قبل رمضانين اي ثينك جا على بال الاولاد ياكلوا شاورما, عملت شاورما و زوجي طلب اعمل سندويشتين زيادة على اساس يعطيهم للجيران قبل موعد الافطار, نزل زوجي و دق الباب و قال اتفضلوا اتفاجأ بالجواب: لأيش هاد؟؟؟؟؟ رجع زوجي بيشد بشعر راسه!!! من يومها ما بنعطي الجيران و بنحاول نبعد عنهم -اسباب اخرى في غنى عنها هلأ-

لما كنت بالبلاد مع اولادي, كنت آخذ ابني للدكان قبل الافطار بساعتين ثلاثة اتركه يختار شغلة مثل كيس شيبس او شوكولا او حتى عصير ايا شي يجي بباله و لما يختار اطلب منه يجيب مثل اللي جابه و يلاقي ايا طفل بيعجبه بالشارع و احنا راجعين البيت و يعطيه الكيس و يقول: رمضان كريم لحتى يتعود على انه يعطي المحتاج من اللذي رزقه الله... بس رجعنا امريكا طبعا ما كان فينا نعمل نفس الشي, فكان بالتراويح قبل ما نروح يجهز دولار الى 5 على حسب ما هو موجود معه من ماله الخاص و يحطهم بسلة الصدقة اللي بتكون موجوده دائما. الله يتقبل منه <<< المفروض ما اذكر هيك شغلات بس بعطيكم افكار لحتى تعملوها مع اولادكم و تربوا فيهم روح العطاء و المشاركة و التخلي على الانانية.

مش عارفة ان تبقى شي اذكره... اممم بحاول اختم القرآن و ان ما قدرت في خلال رمضان لاني بطيئة بقرائة العربي بكمل بعد رمضان.
العيد بنحاول نزرع في اولانا التشويق و الانتظار بنبلش بنص رمضان بالعد التنازلي للعيد باقي كذا يوم, و بنروح قبل العيد باسبوع بنجيب ملابس جديدة للعيد, بنزين البيت ببلالين و رسومات ابني, بجهز كعك العيد, بعمل كذا نوع معمول بجوز على معمول عجوة على معمول فستق حلبي على غريبة على كرات تمر بجوز هند.. السنة الماضية و اللي قبلها عملنا خروف العيد اللي هو عبارة عن كرتونة فاضية و بنزينها بقطن على شكل خروف و بنحشيها سكاكر مسكرة و بيوم العيد بيحملها زوجي و احد اخواني و بيبلشوا فيها الاولاد ضرب ليتنزل كل السكاكر <<< الفكرة مأخوذة من موضوع الاخت بوادي امريكا بالعنابي و ان شاء الله تحطه لينا هون مرة ثانية يكون مرجع الله يجزاها كل خير.
شو كمان... اوه يوم العيد بنروح للصلاة و بنرجع البيت نفطر سوى و بنفاجيء الاولاد بهدايا العيد ما احلى فرحتهم و هم بيشيلوا الغلافات عنها و بعدها بنحمل حالنا و بنروح لعند اهلي -عارفة المفروض اهلي اللي يجونا لكن والدي ما بيقدر يطلع دراج- و ثاني يوم بطلع انا و الاولاد في حين زوجي بيجتمع مع كم شب من عيلته و بيلفوا على اقاربهم خصوصا الولايا بنات العم و بنات الخالات و بنات الاخوال و الخالات برضه ان كانوا بامريكا.
هاد رمضاننا و عيدنا...
لكن هالسنة ما حيكون ليه طعم, اولها والدي و امي نازلين بالبلاد و يمكن ما يرجعوا الا بالشتوية.. و ثانيها لاني حامل و من تجربتي بحملي بابني ما قدرت اصوم من كثر الاستفراغ و الم المعدة, الله يسهلي رمضان هالسنة و اقدر اصومه كامل ان شاء الله.... و ثالثها: نهارنا طويل, حاليا صلاة المغرب على الساعة 8 ونص مساء و الفجر على الساعة 3 و نص صباحا, و بيقولوا ما بعرف اذا حيكون صحيح انه افطارنا راح يصير على الساعة 9 يمكن و صلاة الفجر يمكن على ال3 و الله اعلم الله يسهل علينا و عليكم و على الامة الاسلامية و يتقبل منا اجمعين.

<<<معلومة خارجة عن الموضوع<<<< عن المرحوم الشيخ المفتي الشعراوي سؤال انسأل في خطبة احدى الجمع من اكثر من 18 سنة يمكن 19 سنة, السؤال كان: الاسبوع الماضي كنت تعبان و دخلت المستشفى و افطرت 3 ايام غصبا عني, هل بعد رمضان يجب علي ان اصومهم مع بعض؟؟؟؟
جوابه رحمه الله: "افطرهن متجمعات, صمهن متفرقات".

(كثرت حكي و بس ما راجعت اللي كتبته لاني تعبانة مش صاحية على حالي فاعتذر على الاخطاء ان وجدت)

tuta.

07-06-2012, 06:57 AM

اوه نسيت اقول, بشوف الناس على النت و برضه بالبلاد و هون منهم امي, بيقعدوا طول النهار بالمطبخ بيطبخوا كذا طبخة و ما بعرف ايش, بالنسبة لي بحاول انهي الافطار في فترة ساعة لساعة و نص, المهم ما اقعد بالمطبخ كثير يلا يدوب ان طارت نص ساعة تحضير و الباقي على النار او بالفرن, و بخلي آخر نص ساعة قبل الافطار للدعاء قبل غروب الشمس و بس خلاص لما تغرب تجهيز الطاولة ما بياخذ مني 5 دقائق يمكن اقل -الاولاد بيساعدوني.
و مسلسلات ما مسلسلات الحمد لله ما عندي عربي بالبيت و ما بتابع, (السنة الماضية تابعت 3 مسلسلات بعد صلاة التراويح بس و الله مضيعة للوقت و لما جيت امريكا قاطعتهم حتى لما اروح عند اهلي و يحطوا مسلسل حتى في ساعة الافطار و يبلشوا يتفرجوا و هم بياكلوا ما بهتم و لا بعطي انتباه للتي في حتى بشيل نظاراتي لحتى ما اركز فيه الحمد لله.

سومرية

07-06-2012, 03:02 PM

وعليكم السلام ورحمة الله وبركاته

موضوعك رااائع غاليتي :)
فشهر رمضان مقبل وبات على الأبواب
أسأل الله أن يبلغنا جميعاً شعبان وأن يلحقنا برمضان
ويرزقنا فيهما عتقا من النيران
بارك الله فيكِ وفي كل من شاركت في الموضوع
جعل الله ماقدمتم في ميزان حسناتكم

بوادي اميريكا

07-06-2012, 05:29 PM

في بدايه اغترابي ما حبيت رمضان ..
لكن بعد كم سنه اكتشفت بانه رائع بمعني الكلمه ..
لمست الجانب الروحي فيه اكثر
والتقرب الي الله
فهو شهر يخلو العبد مع ربه ...والغربه خير مكان له
وهذه السنه متحمسه بقنع بزوجي نطلع للبر يومين في رمضان حتي نختلي مع الله بدون ضحه و حيطان ..وجوالات ..
فقط مع الطبيعه الخلابه التي صنعها الله .فنمتع انظارنا ..ونصلي تحت السماء الزرقاء ..ونقيم الليل تحت النجوم ..
اشعر وكأن العبد حتي اقرب لربه بين احضان ما ابدع الله
لا نقلق في ناس و عزايم و عيد ..ومعزومه ..وانعزم ..
احس رمضان في بلادنا معناه دنيوي اكثر من روحي ..علما المفروض العكس
لكن بعد مرور 18سنه علي وانا ااقضيها هنا
شعرت بلذه رمضان
والاحلي اولادي
والله لعظيم من الشهر الماضي بيسألو كل اسبوع
كم باقي لرمضان ..وكأنه شخص غالي و عزيز سيحضر ..
ويخططون و يتحدثون عن احلي لحظات بالسحور و الفطور ..والصلاه ..
سبحان اللهله بهجه..حتي عند الاطفال
بما انه اجازه السنه راح حاول اخد لادي للترواويح يوميا
لان ما بقلق عليهمن تاني يوم مدارس..
السنه الماضيه كان صعب جدا لان مدارس ..وبناموا فورا بعد المغرب
التحضير ...
صراحه احاول اعبي الفريزر باكلات ومعجنات يمكن تفريزها
طمعا بان اكسب كل لحظه مع الله في الشهر الفضيل ..الطمع وما يسوي ..هههههه
لو علي ما ابي حتي احضر فطور ..يا ريت يفطرون تمر و ماء ..ويمشون ..خخخخخخخخ
اللهم بلغنا رمضان

mayaaa

07-06-2012, 10:55 PM

tuta.

08-06-2012, 07:36 AM

طيب هلأ خلص كيوتي ولا عاد تشتكي خخخخخخخخخ صح كيوتي ؟ لاحظت توتا بتصومي ابنك وبتسحريه و بوادي اولادك كمان بيصوموا باي سن بيدؤوا يصوموا هل لما كنت صغيره اول ابتدائي سبع سنوات كنت اصوم رمضان كامل بايام الصيف كان عنا اسكيدينيا (نوع فواكه) ومره استوت برمضان ياربي لون الحبه اورانج غشيت برمضان تا قلت بس .........بس كنت متخبيه يعني حاسه انه حرام اني اكلت وبس يمكن بعدها كنت اصوم كامل .بنتي عمرها سبع سنوات حابه تصوم وميته عشان تصوم بس ياترى هل بتقدر تصوم وماتاكل هالاطايب اللي بالبيت وخصوصا اختها عمرها اقل من سته بعرفها لو ايش ماصامت كيف بتشجعوهم بتشتروهم اشياء زاكيه مثلا يخبوها والا فلوس ؟
نكته:بنتي مبارح بتقولي بدها تعمل ليمينيد ستاند عشان يجيها دخل خخخخخخخ فاقترحت تشتغل عندي بالبيت ورح اعطيها دلر باليوم وطبعا عملولي غرفتهم وغرفتي واخذوا دلرين وبعدين لاعبوا اخوهم والا الصغيره بتقولي رح يكلفك الموضوع كوارتر لاحول ولا قوة الا بالله طبعا دفعت
بينفع ادفع دلر عن كل يوم بيصوموه مثلا ؟جربتوا والا مللو لان صراحه ما بيعرفوا قيمة المصاري بلاقيها مرميه بالارض احيانا ......هاتوا افكاركم

http://www.lakii.com/img/all/Apr12/31oGP704271403.gif

الله يخلي لك بناتك بسم الله ما شاء الله بيزنيس ومن من هلأ...
بتعرفي شفت سؤالك العصر على جوالي و ما فضيت غير هلأ و تعبانة هلكانة كمان بس داخلة مخصوص عشان ارد عليكي (كنت متوقعة الاقي بوادي او غيرها يفيدوكي و يريحوني ههههه)
المهم انتي طرحتي سؤالين مهمين جدا للطفل: اول شي كيف تعودي اولادك على الصوم.
و ثاني شي كيف تعلميهم قيمة الفلوس.

شوفي احنا اهلي علمونا و على ما علمونا ربينا اولادنا, كانوا يبدوا معانا على ال5 سنوات, نقعد بدون افطار للظهر و بعدها يكون افطار و غداء بوقت واحد و يقولوا ما شاء الله صمتوا (ما بنكر انه الفضل الاكبر في هالطريقة راجع للوالدة الله يخليها لانه بتعرفوا الرجال بيكون بالشغل طول النهار و متغييب عن البيت المهم) السنة اللي بعدها كانت تزيد مدة الصوم لينا و لحتى وصلنا ناس منا على ال7 سنوات و ناس منا على ال8 و شوي نصوم نهار كامل بدون تذمر الحمد لله. اللي كان يشجعنا اكثر انه كنا كثار -ما شاء الله- و كانوا اولادي خالي 6 فوقنا و نشجع بعض انا صايم و انا صايم و يا صايم يا ذهبة و يا مفطر يا خشبة, بتعرفي روح المنافسة كانت دايما شغالة بيناتنا الاخوة و اولاد الخال حتى و الشاطر اللي يصوم اكثر, و كان الوالد الله يخليه يعطينا شيكل كل يوم نروح للدكان نشتري فيه شغلتين ثلاثة -ايامها كان الشيكل بيشتري زلمة مش هلأ ما بيسوى نكله- و ساعة الافطار لانه كثار ما كان في طاولة توسعنا فكنا نفرش على الارض و اللي كان يساعدنا احنا البنات انه بنساعد امي بالتجهيز اللي بتقطع سلطة و اللي بتجهز صحون و اللي بترتب الكاسات و لما نقعد تعالي شوفينا كل واحد فينا قاعد و وراه كيس الشيبس و حبة الشوكولا مخبينها اول ما نشرب الشوربة على طول نفتح الشيبس قبل الاكل هههههه و كمان قعد الافطار كمكافئة كان الوالد يجيب لنا فتاش نلعب فيه بباب البيت, شي كنا ننتظره من الصبح و نقعد طول الليل نحكي فيه و كيف فلان عمل حركة حلوة بالفتاش و كيف فلانة ما ضبطت معاها خسارة خلاص بكرة بيضبط ان شاء الله.
و هيك عملنا مع اولادنا, ابني بدينا معاه من 5 سنين بس ما كنت اخليه صايم من الصبح للظهر مثل امي, لا كنت اعكس الآية معاه, كان يفطر و يتغدى و بعد ال2 ممنوع الاكل و الشرب لموعد الافطار و السنة اللي بعدها ممنوع بعد ال12 الظهر و لما كان 6 طلبنا منه يتشجع و يصوم آخر 5 ايام من رمضان نهار كامل و ما شاء الله ربي حطي فيه القدرة و صامهم بالكامل فكان حلو لما كمل ال7 بلش صيام رمضان كامل.
بنتي السنة الماضية نفس الشي ممنوع الاكل و الشرب بعد ال3 -لانه الافطار كان بعد ال7 ونص, حرام ما بتتحمل- و هالسنة راح نشجعها ان شاء الله تقعد لحد ال12 الظهر بس مش حأكون عنيفة معاها و اغصبها بتكره الصيام خصوصا انه النهار طويل فان طلبت تشرب او تاخذ سناك بعطيها و السنة الجاية بشدد اكثر ان شاء الله.
غش برمضان يمكن غشيت مثلك و انا 7 كنت بالمدرسة اتسلل لحنفية الماء و اشرب بس وقفت بعد كذا مرة و السبب و الله فاكرة عمري ما راح انسى, اني كنت اتسلل و ما حدى من الناس يشوفني و اخذنا بدرس الدين شغلة عمري في حياتي ما بنساها اللي هي بما معناه: انه اذا الناس ما شافتك الله موجود و بيشوفك, يوم سمعتها قعدت ابكي و وعدت ربي اني ما عمري راح اغش بصيامي ابدا.
اولادي نفس الشي بضل اذكرهم فيها لحتى تضل قدام عيونهم, بنتي اليوم بالسيارة قاعدين بنحكي عن رمضان و انها صارت كبيرة و راح تصوم زي السنة الماضية و اكثر فكرت شوي و قالت ما بدي اصوم ما بقدر ما آكل -هي من النوع اللي بيحب الاكل- جاوبها اخوها و قال: اذا بتصومي الله بيحبك اكثر و بتروحي الجنة, جاوبت ماما افتحي الشباك بدي احكي مع الله و اقله اني راح اصوم عشان يدخلني الجنة جاوبتها: احكي في عقلك و سرك حتى لو وشوشة لانه الله بيسمع منك كل شي.
كل شي كل شي؟؟؟؟
كل شي بتفكري فيه.

للتشجيع: برضه مثل ما كنا و احنا صغار, اولادنا نفس الشي بينهم روح المنافسة و انا صايم و انا صايم و اللي مش صايم يا ويله ما بيخلص من المعايرة انا صايم و الله بيحبني انت مش صايم و الله مش راح يحبك و هيك شي.
و شغلة ثانية بعملها مع اولادي خصوصا ابني لانه بيصوم نهار كامل انه بخليه كل يوم يختار ايا شي جاي على باله و حابب ياكله, مثلا اشتهى علكة بيخبيها لبعد الافطار, اشتهى شيبس بيخبيه نفس الشي و هلم جرى... اما فلوس اعطيهم اجر على الصيام لا ابدا ما عمرنا عملناها, ما بعرف يمكن خوف انه الصيام يكون بآجر مادي مش أجر من عند الله.

بالنسبة لسؤالك كيف تخليهم يحسوا بقيمة الفلوس سواء كانت دولار او حتى كوارتر, اول شي خصصي مصروف اسبوعي لكل وحدة فيهم, مثلا 5 دولار او 10 او 20 على حسب ميزانيتك, و ضلي اكدي عليهم انه فلوسهم يخبوها لحين تنزلوا على ولمرت او تويز ار اس او المول و يشتروا فيها ايا شي بيجي على بالهم ان شاء الله شغلة فارطة و عمرك ما راح تشتريها المهم يعرفوا انه شروها بفلوسهم و هم بتلاقيهم شوي شوي بلشوا يميزوا بين الشغلة الهامة و الشغلة اللي بتروح الفلوس فيها على الفاضي. انا هيك بعمل مع اولادي, لوصلنا لدرجة انه اللي معتاز شورتس مثلا بيشتري بفلوسه و اللي معتاز فانيلات بيشتري بفلوسه, بطلنا نروح للسكاكر و الالعاب الا بالنادر يمكن مرة كل اكم من شهر مع ابني و بنتي لسه ان وقع بايدها كوارة بتخبيها لتجيب فيها علكة و ان وقع بايدها دولار بتخبيه تجيب فيه ليب جلوس او ليب بالم, مهم عندها الليب جلوس بنت اللذين!!!!!!!!
الله يحفظ اولادك و اولاد المسلمين.. <<<<عارفة بتقولوا خلصينا ما اكثر برمك خخخخخ

mayaaa

09-06-2012, 05:29 PM

هههههههههه ليب جلوس توتا انا قايله لبناتي بس يصيروا 30 سنه بيحطوا ليب قلوس وانتي شاريتلها شكلي رح اشتريلهم حزانا

رح اعمل متلك بسحرهم بيكيفوا لما يصحوا بالليل ورح اخليهم يصوموا قد ما يقدروا انا كيف كنت اعمل اقوللهم صوموا بين الوجبات يعني لما يجوعوا يجوا يقولولي ماما جيعانه بقوللها كولي شوي وكملي صيام واخر ساعه يقعدوا مع ابوهم يستنوا الاذان ينقالك صايمين ما اكلوا من ساعه
بس رح اعمل مثلك اصير بالتدريج اصومهم قبل الاذان عشان يفرحوا بالفطور فكرتك حلوه عجبتني ......وكل يوم ازيدلهم الوقت الصغيره عندي مثل بنتك ما بتاكل كثير بس بتموت عالاكل بتضل تطلب مني اعمليلي حطيلي برجع بلاقيها مش ماكله بس بتذوق وتغلبني الكبيره لأ كثير بتقعد بلا اكل وبتصبر ...........اما الفلوس والله نكته مبارح بتزن الصغيره ايش اشتغلك ايش اعملك بقوللها تحلي عني وتوخذي كواره قالت موافقه والله ممتاز اكتر من ساعتين ماحكت معي ولا سالتني ولا سؤال بعدين قالتلي خلصت الكواره وبلشت بربره دبل...........والا بقوللها ايش بدك تشتري بمصاريكي بتقولي ولا اشي بدي اصير ادلت ADULT ومعي مصاري بابا بيشتريلي منه .

mayaaa

09-06-2012, 05:36 PM

بوادي مش متخيله حالي اعيش بالعراء ما بستغنى عن البلمنج نهائي اهم شي يكون فيه حمامات ومغاسل نظيفه وواسعه ما يكون فيه غباير يعني ممكن ممكن اعيش بالاجواء الكاريبيه باوتيل خمسطعشر نجمه وعادي بنام بره قدام الاوتيل>>>>>>>>بس بلاش
غير هيك داري بتوسعني ماليش بهالسوالف بضل اتخيل حشرات بملابسي

بوادي اميريكا

09-06-2012, 07:19 PM

مايا كتبت د و طار ...
برجع مره تانيه ..
بس انا ما بشجع لا بفلوس و لا باي شي اشتريه لهم و لا بالحلو..
تشجيعي مقتصر علي الترهيب و الترغيب
هذه القاعده عندي..
ولادي ابدا ما بيغريهن هي الاشياء
بغريهن اني اوعدعن احكي قصه من القران او العب مونوبولي ولا لعبه معهن..او نعمل عمل فني
وخياراتي دوما بحاول اخليها مرتبطه بنفس الحدث
لي عوده باذن الله بالافكار التي اتبعتها معهم
وبديت متل ما قالت توته درجات المأذنه
من عمر 4-5 سنوات

cutee

19-06-2012, 08:55 PM

شكرًا غالياتي على ردودكن
بس سؤال مثلا كيف فيكي تنوعي بالاطباق
اذا ماكان كلشي متوفر عندك
ياخبيرات عطوني افكار

* شهدوده *

02-07-2012, 02:58 PM

http://oi55.tinypic.com/4lilc1.jpg