كل الفسلطينيات اللي من برا وجوا يدخلوا واللي حابه تدخل اهلا وسهلا يامرحبا فيها [الأرشيف] - منتديات لكِ النسائية

أفنـ أم عمر ـان

10-10-2003, 11:51 AM

فعلا الجملة اللي كاتبتها أديان حتى في مكان اسم البلد كتير معبرة :(

على فكرة أديان أنا بعرف ناس كثير من القباب قضاء الرملة بس قريتك أول مرة بسمع فيها , الله يحييك .

new moon
آمين يا رب , الله يجمعنا جميعا في سحات الأقصى الحبيب :(

إيمانو , أحيان بحس بصعوبة زيارة فلسطين حتى لو أتيحت الفرصة بجواز أجنبي أو غيره ! متخيله تدخلي بلدك سياحه وتطلعي ! آآآه يا قلبي

ملاحظين إني مسكت المايك عن هنلي وأنا اللي بديت أهني وأبارك وأحيي !!!

Dandosh

10-10-2003, 12:20 PM

مو كل الفلسطينيين هيك يا أم عمر :)
الموجود بيسد :)

shahdmylife

10-10-2003, 01:27 PM

أنا إجيتW:
أنا يا جماعة الخير من الشجرة قضا طبرية..بس حالي حالكم عمري ما زرة فلسطين.

Dandosh

10-10-2003, 04:01 PM

هلااااااااااااااااااااااا بأم شهد :)

join the club :)

بركي بنروح كلنا رحلة جماعية لفلسطين :)

غريبة الروح

10-10-2003, 04:05 PM

أنا معاكم..لي حبايب هناك بالبلدة القديمه ..بنابلس..
sid

Em zaid

10-10-2003, 07:09 PM

انا من قضاء جنين لكن انا زرت فلسطين انا مواطنه اخر مرة زرتها من 4 سنوات
و رحنا على القدس وصلينل بامسجد الاقصى
عقبالكم كلكم اتروحوا ان شاء الله

ام مودي

10-10-2003, 07:46 PM

اهلا و سهلا باهل فلسطين...ريحة الحبايب..انا مش فلسطينية..بس ما حدا بيصدق شكلي و كلامي فلسطيني..(بنفع؟)...بس زوجي فلسطيني من غزة ..
لا جد يا جماعة اهل فلسطين غاليين علي ..و من صغري كل صحباتي من فلسطين و دايما الناس بيفكروني فلسطينية و بتذكر انا و صغيرة دايما كنت اروح عالمنظمة الفلسطينية بالكويت مع صحبااتي..ياااا سلااام على هالايام و كنا نتعلم الدبكة الفلسطينية و الاغاني الوطنية ..و المشية العسكرية..ياااا سلاااام ..اييييييييااااااااممممممممممم

قلت قصة حياتي..انا اليوم صايرة رغاية كتييير و ما في حدا احكي معو و صابرينا كابس عليها النوم...ما بدها تصحى..معطيتني اجازة بعد ما سهرتني مبارح..
تحيااتي:D

sima

10-10-2003, 11:58 PM

انا من قاقون قضاء طولكرم
زرت فلسطين مره واحده
اديان توقيعك بجنن:-M

بنت بلدها

11-10-2003, 08:58 AM

يا رب

صراحه

الله يفرج همكم ويجمع شملكم

والله الواحد يخجل من نفسه

يعني بعد قلت حياء وقلت هم وقلت دين

بس الله المستعان

جزاكم الله خير

هنلي

11-10-2003, 02:06 PM

احم احم هيوني هيوني
ماتخافوش زي القطط بسبع ارواح
بس زي ماتقولوا يوم الخميس والجمعه بيكون زيارات لعند الجدات وبنتجمع انا وخالاتي
العصر وبعد المغرب انا وعماتي ويوم الجمعه انا ودار حماي واخوات زوجي
بس هيني
وياريت نتجمع انشاء الله كلنا في الجنة
قولوا آآآآآآآآآآآآآآآآآآآآآمين

Dandoon

12-10-2003, 08:24 AM

اجو الفلاحيـــــــــــــــين :)

ما شاء الله قاعدين حضراتكم و مبسوطين و بتطقو حنك وانا ولا كأني هون ::: العتب على اختي الحلوة اللي ما رفعت سماعة التلفون تحكيلي ..........

كتير حلوة جمعتكم ان شاء الله يجمعنا في الجنه بظله ( قولي آمين انت و اياها )
و انبسطت لما عرفت الصبايا من وين ( طبعا بلا صغرة ) :) :)

وانا بلا صغرة زي ما حكيتلكم من شويكة قضاء طولكرم و عايشة بالاردن من 18 سنة ....

Salma

12-10-2003, 12:01 PM

شو يا دندون طلعنا قرايب بلا صغرة

سلام لكل الجماعة الي بتشاركنا بالموضوع

انا يا جماهة الخير من طولكرم

اخر ملاة زرت فلسطين من ثلاث سنين

Dandoon

12-10-2003, 12:07 PM

اهلا و سهلا يا سلمى ...

من وين بطولكرم ؟؟
و وين عايشة هلأ؟؟

Salma

12-10-2003, 12:10 PM

سلام دندون

انا من الصوانة بجنب ام فوزة

انت من الشمال انا من الجنوب

من بيت مين بلا زغرة

Dandoon

12-10-2003, 12:12 PM

و الله معلوماتك حلوة لاني اول مرة بعرف انه شويكة في الشمال :)
من بيت المغربي .... بلا صغرة :) :) :)
انت؟؟

Salma

12-10-2003, 12:16 PM

يا هلا و مرحبة تشرفنا

مين ابتعرفة من طولكرم تاقولك

Dandoon

12-10-2003, 12:18 PM

اهلا فيك ..
كل اللي بنعرفهم قرايب ...
بس ما حكيتيلي :: عايشة بعمان زي الاغلبية و لا وين؟؟

Salma

12-10-2003, 12:41 PM

انت من وين في الاردن

انا عايش في الدنمارك

Dandoon

12-10-2003, 12:43 PM

يا سلام :) :)
برد عندكم
انا في عمان ... ابو نصير اذا بتعرفيها

Salma

12-10-2003, 12:47 PM

:D :D

سلام

بنت خال ابوي ساكنة في ابو ان نصير
اصلها من كفر عبوش

دار ابو بكر

هون في الدنمارك قي برد

هنلي

12-10-2003, 02:52 PM

ااااااااااايييييييييييه
هيكم سالكين وبتتخرفوا زي ما بقولوا عنا انتي من وين وانا من وين
انا الي صديقات كثير من طولكرم في من نفس المدينه قرايب الي وفي في رمانه او كفر رمانه زي ما بقولوا
وفي الي صاحبه من كفر عبوش وعلى فكره كفر عبوش اقرب على قلقيليه من طولكرم
يا الله اهلا وسهلا فيكم وبديش اقطع عليكم

Dandosh

12-10-2003, 03:26 PM

أفنـ أم عمر ـان

12-10-2003, 03:59 PM

لااااااااااااا دندوش !! هذا إحنا جيران كمان ! انا بشفا بدران بيتي

عن جد مقهورة ! لو بعرف كان زبطنا لقاء لما نزلت على الأردن :(

Em zaid

12-10-2003, 06:26 PM

ام عمر انا اهل امي واخوانها في شفا بدران من شهر كنت في عمان

أفنـ أم عمر ـان

12-10-2003, 07:31 PM

لا معناته كلنا جيران طلعنا بالمنتدى :D

بس على فكرة أنا تزوجت وتغربت على طول , يعني ما بعرف حدا ولا بعرف أي شي بشفا بدران , بيتي ما بقعد فيه إلا بهالإجازة السريعة اللي بننزلها...

بس خلص هانت بعد كم سنة بنلتقي إن شاء الله..لما الله يتوب علينا من هالغربة :(

هنلي

12-10-2003, 09:20 PM

اختي افنان ام عمر اذا بتقولي انتي زوجك من عنا واذا كان ساكن في الاردن اكيد جوزي بيعرفه
لانه جوزي درس في عمان وبيعرف معظم طلاب قلقيليه والفلسطينيه اللي كانوا معه
احكيلي اسم او عيله زوجك ورح اسال جوزي واذا بدك وديها على الرسائل الخاصه في المنتدى

الحلم الجميل

13-10-2003, 06:06 AM

السلام عليكم
انا البابا من فلسطين من عكا
بس ولامره رحت على فلسطين و البابا ولد و عاش بلبنان
يعني فلسطينيه بالاسم فقط
وكل المناطق الي حيكتوا عليها ولامره سمعت فيهم
كنت عم احاول الاقي حدا بعرفوا :)

Dandoon

13-10-2003, 07:58 AM

صباح الخير يا حلوييييين :)

فنو ... انا اللي ساكنة بأبو نصير مش دندوش .. المرة الجاي بتخبرينا لانه عالطالعة و النازلة بنمر بشفا بدران يعني كإنها مدينة وحدة .. و الله خسارة ما كنا نعرف من قبل :(

Dandosh

13-10-2003, 08:48 AM

عن جد شي بيقهر نكون كلنا بنفس البلد و ما حد يشوف حدا "بس أنا بشوف دندون" ..

:)

باليرينا

13-10-2003, 09:30 AM

السلام عليكم ورحمة الله وبركاته
أنا كمان من فلسطين من خان يونس ولكن مولودة وعايشة طول عمري في الامارات اَخر مره
زرت فيها فلسطين من عشرين سنه تقريبا كان عمري 13 سنه بس أنا مش كبيره كتير احسبوها
انتوا;)
بصراحه يا هنلي موضوعاتك بتعجبني خصوصا وصفاتك ،وكمان كل الاخوات في المنتدى
حبيتهم ، صحيح يمكن مشاركاتي قليلة لكن صار عندي ادمان على المنتدى ، في اليوم الواحد
بفتح الكمبيوتر 3-4 مرات ومن الصبح بدري أوصل الاولاد على المدرسة وبرجع أعمل كاسة الشاي و على الكمبيوتر:D ، وفجأة بلاقي الساعه صارت 11 وأنا لسه مش عارفة ايش بدي أطبخ
حكيت كتير صح!!!!!!!!!!! بس صراحه حبيتكم كلكم وحبيت المنتدى الرائعW:

Dandoon

13-10-2003, 09:32 AM

اهلا و سهلا فيك يا ام عدنان و بكل اهل خان يونس :)

اقتراح:::: اطبخي اليوم مقلوبة نفسي كتير فيها :) :)

باليرينا

13-10-2003, 09:38 AM

أهلين دندون تعلي بكره بطبخ لك مقلوبة لأنو اليوم عندي بوفيه مفتوح راح أطلع كل الأكل اللي في الثلاجة وكل واحد ياكل اللي بدو اياه
بس ما قلتيلي بتحبي المقلوبه بالباذنجان ولاّ بالقرنبيط

Dandoon

13-10-2003, 09:40 AM

اللي بيطلع معك .. انا المقلوبة و بكل فخر باكلها بكل اشكالها : باذنجان، زهرة، بطاطا، بندورة، ملوخية .. ما في مشاكل الحمدلله :)

باليرينا

13-10-2003, 09:56 AM

يا سلام عليكي يا دندون هنيّه ما شاء الله عليكي وما بتغلبي
بتعرفي انو أول أكله شفتها في المنتدى الأكله اللي من اختراعك الخضار السوتيه طبعتها و خبيت الورقه علشان لما أعمل عزيمه راح أعملها ، وأنا من يوم ما اندليت على هالمنتدى وأنا بطبخ منه ولمّا يسألوني عن الطريقة بقلهم هادي أكلة انترنتية و صار الكل بدو يعرف من أي موقع بجيب أكلاتي :[MM

Dandoon

13-10-2003, 10:00 AM

صحتين و هنا على قلبك و قلب حبايبك ..
للامانة العلمية : مش انا اللي حاطة موضوع الخضار السوتيه .. في دندون تانية هي اسمها بالعربي و انا بالانجليزي ... لذا اقتضى التنويه :)

هنلي

13-10-2003, 10:01 AM

اختي الحلم الجميل هذا انتي زي وحده صديقتي لما كنت زمان في السعوديه - انا مولوده في السعوديه وعشت فيها 14 سنه - كانت صديقتي اصلها فلسطينيه بس ساكنين اهلها في لبنان
لاتكوني انتي هي من عائله كنعان
وعلى فكره في مناطق كثير في فلسطين ممكن الفلسطينين نفسهم ما يكونوا يعرفوها ممكن لانه اليهود الله يوخدهم محتلينها او مغيريين اسمها

وعلى فكره للبنات اللي ساكنين في الاردن وخاصه في عمان خالتي سانه بعمان في الصويفيه
وعمات ماما وعمتي انا واخو زوجي في العقبه وفي النا كمان في اربد
واذا بدكم نتعارف كمان وكمان اللي جوزها درس في جامعه الزيتونة والا جامعه فيلاديلفيا
في السنوات 95 لحد 98 اكيد جوزي بيعرفه لانه سكن هناك 10 سنين وكل الفلسطينيه كان يعرفهم وخاصه في عمان
يالله خلينا نتعرف على بعضنا اكثر واكثر

وعلى فكره يا ام عدنان اول اشي اهلا فيكي اخو زوجي كمان ساكن في دبي وزوجته من قبرص
ودايما بتحكيلي تعالوا عنا على دبي - والله حابه اجي - هههههههه
وشكرا كثير الكم

Dandoon

13-10-2003, 10:07 AM

والله يا هنلي ما انت قليلة :)
في كل مكان الك قرايب ما شاء الله ..
انا زوجي درس في التطبيقية مش الزيتونة فما اظن بعرفه .. و شغلي في الصويفية عند بيت خالتك :)
و متلك اخوان زوجي عايشين في الامارات و دايما بحكولنا تعالوا .. بس الشغلة بدها ( فلوس وايد وايد ) عشان هيك صرفنا النظر حاليا ..
على فكرة ، مش كنت بدك تروحي عمرة ؟؟ رحت ولا لسا ؟؟

هنلي

13-10-2003, 10:33 AM

لا وانتي الصادقه لا عمره ولا اشي طلعت عدم الممانعه لجوزي - هذه ورقه لازمه من عند اليهود - طلعت لجوزي وانا لا بتتاخر لبعد 4 ايام ولانه جوزي طالع مع جروب سياحي فاقنعوه انه يروح لوحده وفي المره الجايه انا بروح وعلى فكره سفر جوزي بكره الثلاثاء بس يمكن يرجعوه اليهود لانه ممنوع النمله تطلع من البلد عنا لانهم مشددين على كل المناطق عاد هو وحظه - عادر صرت زي مراسلين الجزيره ههههههههه
اه وانا بدي اغيب عنكم اذا راح لمده اسبوعين عند دار اهلي

Dandoon

13-10-2003, 10:37 AM

يالله ان شاء الله يروح و يرجع بالسلامة .. بس انت ما تقطعينا بتضلي تشقري علينا ...
ان شاء الله انا وزوجي رايحين الاربعاء اللي جاي ( الاسبوع الجاي ) عمرة اذا الله يسر .. وبدعيلكم ان شاء الله يهد اليهود كلهم و يهد الجدار الفاصل ( جيفارا البديري ) :)

Salma

13-10-2003, 03:24 PM

سلام يا جماعة

وينك هنلي ون عايشين اهلك في طولكرم

دندون: عمي ساكن بالصويفية عند الواحة الدوار السابع
تخصص اجهزة السمعية لابد انك سامعة في

أفنـ أم عمر ـان

13-10-2003, 05:03 PM

والله يا هنلي زوجي خريج الجامعة الأردنية , بعيده عن الزيتونة وفلادلفيا :)

بعدين زوجي اللي من قلقيلية أنا لأ , وما بعرف كتير عن اهل قلقيلية , لإني على طول تغربت ,وما بعرف كتير قرايب زوجي ,

ومعظم قرايبه في قلقيلية هو نفسه ما بعرفهم , لإنه عمره ما دخل فلسطين , بس حماي معروف لو تسألي عنه أي حدا من الكبار بقلقيلية بعرفه .... هو أول واحد حصل على الدكتوراه في الهندسة بكل فلسطين كان معروف إنه عبقري قلقيلية بلا منازع :D

أفنـ أم عمر ـان

13-10-2003, 05:05 PM

والله أحسن جيرة يا دندون ..... إن شاء الله إذا ربنا كتبلنا بنتقابل , أنا بحب أصاحب الناس الطيبة أمثالك إنت ودندوش ... بشرفني والله

Dandosh

13-10-2003, 08:58 PM

هاد بيطلع أبو عمر زميلنا بالدراسة انا ودندون .. لأنا كنا بالأردنية ... :)

بس وين احنا دخلنا سنة 96 أكيد هو قبلنا .. :)

أفنـ أم عمر ـان

13-10-2003, 10:45 PM

زوجي خريج 96 أو 97 بتصدقي مش عارفه متى بالزبط ومش عارفه أحسبها عقلي مقفل <<<< يا دي الكسوف!

وهو خريج كلية الهندسة, حدا فيكم دارس هندسة؟ (دندوش لغات ضل دندون شو تخصصها؟)

بس على جميع الأحوال ما حتعرفوه (لإنه يؤبر ألبي :D ) كان من البيت للجامعة ومن الجامعة للبيت كخخخخخخخخخخخ ,

الله يحفظ عليه إيمانه ويثبته

أزاهير الشوق

14-10-2003, 02:04 AM

حبيت اسلم عليكم..

ما شاء الله ..اهل فلسطين- الله ينصرها- كثير في المنتدى .. الله يفرحكم باهلكم و ارضكم و يفك اسر الاقصى يا رب...
كيف حال اهاليكم اللي داخل فلسطين...توصلكم اخبارهم...
مما يؤلم و الله اشد الالم ...الاذاعات العربية و تلفزيوناتها...ما عادت تقول فلسطين المحتلة..و يتحدثوا عن العو الصهيوني ككيان -اسرائيل-...الله المستعان

هنلي

14-10-2003, 06:43 AM

والله يا اخت الجهادية حطيتي ايدك على الجرح كلهم بيقولوا اسرائيل حتى على الخارطه محيينين يحطوا اسمنا عليها
بس اهلا وسهلا فيكي اختي
اختي افنان سالت جوزي عن اللي قلتيه بس ما عرف يمكن هو معروف بس استني رح ارسل لك رساله على ملفك الخاص - يعني افتحي ملفك هسه بتلاقي رسالتي وردي عليها
يمكن انا اتاخر في الرد

هنلي

14-10-2003, 07:24 AM

اه اسفه كثير اخت افنان ما قدرت اوديلك رساله لانه اول مره بودي اكتشفت انها بس للمشرفين فقط

طيب ممكن تحكيلي اسم عائلتكم لانه صابني الفضول كثير انا جوزي من عائله صبري وانتي جوزك من وين بلا صغره ردي علي

Dandoon

14-10-2003, 08:23 AM

اختي الجهادية حياك الله بين اخواتك .. احنا و الله كلنا عايشين برا فلسطين و ما في حد جوا الا هنلي :)

فنو يا فنو :) والله انا اللي بشرفني اتعرف عليك يا قمر ... انا دارسة محاسبة يعني بعيد عن بلاد الهندسة و اصلا اصلا اصلا ... اكيد ما كنت رح اعرفه انا شو بعرفني بشباب :)
بتصدقي كان معانا بنت في المدرسة اسمها افنان و تزوجت و تغربت و طريقتها في الحكي متلك تمام ... اول شي ما بعرف ليش شكيت تكون انت بس هلأ متأكدة انه لأ :)

الحلم الجميل

14-10-2003, 08:24 AM

أرسلت بداية بواسطة Dandosh
"بس أنا بشوف دندون" ..

:)
الله يبسطك يا دندوش ضحكتيني :D

تعرفي هنلي لما قلت عن صاحبتك وقع قلبي لان انا كمانعشت حياتي كلها بالسعوديه
بس للاسف مش انا :(
بس والله بيت كنعان كاني سامعه فيهم :rolleyes:
بنات ( و اسمحوالي اقولكم بنات لان ما لاحظته اننا بنفس العمر رغم انكم متزوجات و انا لا بس اعرف اعماركم مثل عمري :))
بما ان اغلبكم يسكن في الاردن و من اصل فسلطيني فاكيد تعرفوا بنت عمه البابا
ما ادري بصراحه اذا الحكومه يعني (والدي) يسمح لي بنشر الاخبار السريه يعني (العائليه) :D
هي كانت تعيش في جده بالسعوديه و قبل حوالي الثلاثه عشر سنه نقلوا على الاردن...الذي لديه اي معلمات عنهم فليرسل سلامي لهم من كندا :p

الحلم الجميل

14-10-2003, 08:29 AM

اخواتي ممكن اطلب منكم طلب
الي بتساعدني فيه صدقوني ما بنسى جميلها طول عمري
انا كان لي صديقه فسلطينيه من الادرن وكانت تعيش في السعوديه
هذا الحكي سنه تسعه و سبعين وانا رحت على كندا و هي بقت في السعوديه
وبعدين قالت لي انها راحت تدرس في العراق
والحين اخبارها منقطعه عني
الي تقدر تعرف لي عنها اي شئ....في اخر رساله وصلت قالت لي ان اختها تشتغل طبيبه في مستشفى في الادرن و كان تخصص اختها على ما اذكر نسائي
وما ادري الحين اذا هي بالسعوديه او راحت الادرن بسبب حرب العراق
اسمها نهيل و اسم اختها الدكتوره ميساء
امانه بنات الي تقدر تساعدني sid

Dandoon

14-10-2003, 08:33 AM

طيب ياالحلم الجميل اكيد اذا عرفنا الاسم الكامل بكون احسن ..
مش هي دكتورة ؟؟ نسائية ؟؟
خلص شو اسم الدكتورة و بنشوف اذا قدرنا نعمل شي :)

Dandosh

14-10-2003, 08:34 AM

دندون انا كمان فكرتها أفنان اللي كانت معنا بالمدرسة .. حتى هديك كانت تحب اسم عمر كتير صح؟؟

الحلم الجميل الله يسعدك:)
كيف حنرسل لهم سلامك و احنا لا بنعرف اساميهم ولا عناوينهم "الله يهداج" :):)

Dandoon

14-10-2003, 08:35 AM

اه انا عشان هيك فكرتها هي :)

و شوي شوي عالبنت انا جاوبتها و خلصنا :) :)

Dandosh

14-10-2003, 08:37 AM

ما هو انا مو عارفة انك بنفس اللحظة عم تكتبيلها !!

الحلم الجميل

14-10-2003, 08:39 AM

اسم اخت صديقتي
ميساء ربحي الحاج ابراهيم
او ميساء ربحي ابراهيم الحاج
بس اظن ان الاولى هي الصح

داندوش انا كنت امزح بموضوع بنت عمه البابا :)
هي بنت عمه البابا يعني اكيد نعرفها و نتكلم معها و في اتصالات بس كنت عم امزح يعني ممكن تكون بنتها واحده فيكم او اوحده من قريباتها
وبالنسبي لصديقتي فكتبت اسمها فوق
ياريت تقدروا تساعدوني فيه :(

هنلي

14-10-2003, 09:48 AM

احم احم هيني جيت جوزي سافر وهيني قاعده على قلوبكم هههههههههههه
سافر وتركني راح على العمره لانه جواز السفر تبعي لسه ما طلع اخ والله اني مقهوره كثير
بس يالله كتبتله ليييييييسته اغراض من هناك هههههه
على فكره شكلنا رح نقلب المنتدى زي البرامج اللي في التلفزيون اللي بيجمعوا الاصدقاء والقرايب والحبايب مع بعض لاني حاسه انه في بينكم بنات يمكن حكيت معهم او عشت معهم هيك مش عارفه لانه اصلا انا مولوده في السعوديه وبالزبط كنت في الطائف عشت هناك 13 سنه
وبعديها نزلنا على الضفه وبقينا هناك لحد الان
وكنا كل سنه ننزل على الضفه فاكيد كنت اشوف احداكن وانا مش عارفه اما امر عنها او اسالها عن شغله صح هيك انا بتصور الدنيا كانها مدينه صغيره صح بتشاركوني الراي

Dandoon

14-10-2003, 10:24 AM

انا بشاركك الرأي انه الدنيا صغييييييييرة كتير ..
بس للاسف اكيد انا ما عمركشفتيني و لا التقينا لاني ما دخلت الضفة ولا السعودية :(
انولدنا انا و دندوش في الكويت و في ال 85 جينا عالاردن و ضلينا فيها لهلأ ....

صحيح ان شاء الله يروح و يرجع ابو تالا بالسلامة :)

هنلي

14-10-2003, 10:52 AM

على فكره الي صديقه من جنين اسمها اسيا مولوده في الكويت بس اجت على الضفه
وكمان عمت ماما كانت ساكنه هناك بس هي هسه في الاردن
الا في نقطه مشتركه هههههه اكيد بعرفك هههههه
والله يخليكي

أفنـ أم عمر ـان

14-10-2003, 02:17 PM

هنلي كيد زوجك ما حيعرف حماي , الجيل الكبار اللي بعرفوه , لإنه من طلع يكمل دراسته على بريطانيا ومنها للأردن , ثم الكويت ثم الأردن أخيرا ....و ما رجع على قلقيلية وراحت عليه وما بقدر يدخل.

أفنـ أم عمر ـان

14-10-2003, 02:18 PM

دندون ودندوش , أثرتوا فضولي لاكون أنا أفنان اللي بمدرستكم ههههههههههههه
ليش بطلتوا شو شفتوا مني لما حزرتوا إنه مو أنا :D

والله بمدرستي الثانوية كتير كان في توائم .... درست بالشاملة ...

Dandoon

14-10-2003, 02:24 PM

لا ولا شي بس لانك من بيت دجن وهي من نابلس ..
واحنا ما درسنا بالشاملة درسنا بمدرسة الخنساء -صويلح :)

Dandosh

14-10-2003, 02:27 PM

أحلى دندون.. و الله أنا استبعدت الاحتمال لسبب تاني خالص :)

ام عمر ما شاء الله عليها فهمانة وآراءها منطقية و كلامها موزون و ................. لو أضل أعد ما بخلص ,,

بس الله يسعدها أفنان التانية طيوبة بس ما عندها أي من هالمؤهلات الحلوة :)

Dandoon

14-10-2003, 02:28 PM

انا قلت يمكن تكون عقلت عالجيزة :)

أفنـ أم عمر ـان

14-10-2003, 02:34 PM

هههههههههههههههههههههههههههههه الله يسعدكم ضحكتوني ....

شكرا على الكلام الحلو يا جماعة , خجلتونيhttp://smilies.sofrayt.com/%5E/f/wiggle.gif

Dandosh

14-10-2003, 02:52 PM

ليش قصدك الجيزة بتعقل ....

و ليش ماما بتحكي اني انجنيت :)

Dandoon

14-10-2003, 02:55 PM

ماما ؟؟ الله يعينها هي فكرت حالها رح تخلص اتاري ... ... ... اول الرقص حيجلان :)

أفنـ أم عمر ـان

14-10-2003, 03:03 PM

ههههههههههههههه بدى المستخبي يبان :D >>>> أكشف اكششششششششف !

دندوش اعترفي شو صر فيك بعد الجيزة ؟

Dandosh

14-10-2003, 03:15 PM

انهبلت :)

ما هو انا كان عندي القابلية .. وزوجي ما شاء الله عليه شجعني !!

أفنـ أم عمر ـان

14-10-2003, 03:30 PM

إنت البركة يا دندوشتنا ولو !

هنلي .... عندي سؤال ملح من أول ما فتحنا الموضوع ....

بتعرفي إحنا ما بنعرف عن اللي بصير جوا فلسطين إلا من الاخبار

صدقيني بشعر بكآبة شديدية كل ما بتزكر الواقع المر اللي بعيشه الأطفال والنساء في داخل فلسطين ... الفوضى والقصف , حظر التجول , اوالأشغال اللي تعطلت و و و و وو و

بدي اسألك , كيف وضع الناس في الداخل ؟
هل الناس بتعاني من فقر شديد وفعلا مو لاقيين ياكلوا ؟ هل هذا في مناطق محدده بتسمعوا إنها معدمه ولاّ الخير موجود والناس مدبرة حالها بعون الله ؟
ما شاء الله النساء الفلسطينيات طول عمرهم على قد حالهم مدبرات وشاطرات , نفسي أسمع كلام يطمني ...

هنلي هل فعلا التبرعات اللي بندفعها برى بتوصل؟ والناس بتستفيد فعلا ؟

أفنـ أم عمر ـان

14-10-2003, 03:31 PM

يا رب هنلي تقدر تجاوبني بسرعه

هي حكت بدها تغيب ولاّ كيف؟

Dandoon

14-10-2003, 03:34 PM

قالت انه عشان جوزها سافر عالعمرة بدها تروح عند اهلها 12 يوم.. بس اهلها في نفس البلد يعني المفروض تطل علينا . لأنه جد نفسي اعرف كيف الناس عايشين

أفنـ أم عمر ـان

14-10-2003, 04:32 PM

12 يوم !! الله يسهل عليها يا رب

طيب في موضوع تاني للاخوات الموجودين ... حابة نحكي فيه

بتعرفوا نحنا الفلسطينيين ولله الحمد نفسنا طيبة كتير ومن النوع الإجتماعيين , بس نسمع كلام أهلنا وأجدادنا كيف كانوا العيلة إيد واحده , والجيران كإنهم بيت واحد ,
وبس نسمع تكاتف أهلنا بفلسطين , وكيف انهم أهل مع بعض , بيت الواحد لو انهد-الله يهدهم اليهود- بهبوا كل رجال القرية وبعيدوا بناؤه ,
الجيران بتكاتفوا على اللقمة وشربة المي .
هيك طبع الفلسطينيين حتى قبل الاحتلال -ستي الله يرحمها كانت تخرفنا , وهي على فكرة لحقت عهد ما قبل الانتداب حتى , عمرت الله يرحمها للمية أو أكتر-
وحماتي مرة خرفتني كيف كانوا يتقاسموا مع جيرانهم كل شي , حتى لو لقط شوية بامية من الأرض يتذكر فيها جيرانه , البيض , الجاج كله كإنه ملك للجميع.
بس نسمع ونسمع كل هذا , بنحس إنه في شي تغير ! عنا إحنا اللي في المنفى ...

صحيح كل المجتمعات بتشكي من الفرقة والمشاكل الاجتماعية , لكن خلينا نركز على وضعنا إحنا , لإنه لولا الضغوط اللي انحطينا تحتها كنا حنبقى زي اهلنا بفلسطين هلأ ما تغير علينا شي.

اجدادنا وآباءنا ذاقوا مرارة التهجير , والمخيمات , عانوا باللي الله أعلم فيه ,وحتما كلكم سمعتوا من اهلكم قصص وحكايااااااااااااااااات من المعاناة اللي شافوها.

اهلنا بنوا أنفسهم من الصفر بعد ما فقدوا أموال أهلهم وأراضيهم وبياراتهم , هذا كله معاناة وتعب وضنك.
إنسان وضع تحت كل هالضغوط من الطبيعي نفسيته تتغير , يتعب , يمل , يفقد كتييييييير من مثالياته , وممكن كمان اخلاقياته تتغير ... لإنه فرق كبير بين إنسان مرتاح , وإنسان ذاق الويلات ونفسيته مضغوطة.

كتير بفكر وبحكي كل مالنا بنتغير وبنبعد عن عاداتنا وطباعنا كفلسطينيين , صار الواحد جاره جنبه يمكن ما يعرف عنه شي (الله يرحم أيام ما كانوا يدخلوا على بيوت بعض بدون ما يدقوا الباب حتى :))
إجمالا بلاحظ إنه الاعصاب مشدودة وإنه الناس مش طايقه بعض , وكل واحد بخانق دبّان وجهه :D

بس جيلنا إحنا ما إله عذر , لإنا تربينا على الرفاهية وما نقص علينا شي ولا شفنا أي معاناة(أهلنا اللي عانوا فعلا) , فهل انتقللنا الضغط النفسي بالتوارث !؟ ممكن وأكيد بنتأثر بجيل الآباء

لكن خلونا مع بعض , نحاول نستعيد الأخلاق والسلوكيات والعادات الفلسطينية المفقوده -واللي بتتناسب حتما مع الشرع- , نذكرها , نعددها , ونحاول نرجع نتمسك فيها ونمررها لأولادنا , لإنها كلها خير وبركة.

إيمان علي

14-10-2003, 09:14 PM

ما شاء الله عنكم... كل هذا حنك طقتوه؟ :D :D
وأنا نسيت الموضوع برمته!! رجعت لقيتكم بسادس صفحة.. بسم الله عليكم :D

البراءه 80

14-10-2003, 11:25 PM

السلام عليكم ورحمة الله وبركاته
ما شاء الله متجمعييين بصراحه صارلي فتره ما شاركت بسلما شفت جمعتكم اتشجهت

انا فلسطنيه من غزه عشت في غزه 19 سنه
و4سنوات في كندا واهلي كلهم بغزه وان شاء الله تهدي الاوضاع وازورهم
:-M

Dandoon

15-10-2003, 07:58 AM

):K ):K ):K ):K
والله يا فنو كلامك اكتر من رائع .... دايما بفكر لما اسمع سيدي و عمي و الكبار في العيلة :: معقول كل هاد الخير موجود في نفوس ناس ارضهم و بيوتهم و بلدهم محتلة ؟

دايما عمي بحكيلنا انهم كانوا يناموا و الباب مفتوح لانه ما حد رح يدخل,, و اللي بده يدخل بكون جاي يتقاسم معاهم طبخة او زرع او اي شي حصل عليه و هم ما عندهم منه .. و كانوا النسوان يخبزوا مع بعض كلهم للتوفير و يتقاسمو الخبز ... و مع كل الرفاهية اللي عايشين فيها ( طبعا مقارنة بزمان ) بضل عمي يترحم على ايام البلد و ناس البلد .. طبعا احنا ما رح نفهم عليهم لاننا ما شفنا هديك الايام ولا عشناها .. و كل ما نحكيله هينا عايشين و الحمدلله ، بتنهد و بحكي ( الحمدلله ، بس هي هاي عيشة وهديك عيشة؟ احنا هلأ عنا كل شي .. بس ما عنا الحنية و الشهامة و الرحمة اللي كانت زمان ) انتهى الاقتباس :)

الواحد لو بده يضل يحكي ما رح يخلص .. و انا عندي تسوية بنك معقدة لازم اسلمها كمان ساعة .. فخليني اروح و ان شاء الله للحديث بقايا :)

اممهند

15-10-2003, 08:12 PM

يا اهلا وسهلا باهل قلقيليه
انا جارتكم من نابلس من بيت عاشور اذا سمعت باسم عائلتي
بس بعرف جماعه من عندكم من عائلة غانم بتعرفيهم
زرت نابلس اخر مره في سنة 1981 وكثير مشتاقه ارجع ازورها مره ثانيه
W:

أفنـ أم عمر ـان

15-10-2003, 09:55 PM

بيت عاشور كتير معروفين -إلي على الأقل:)- حياك الله

هنلي بتجاوبك عن بيت غانم , أنا ما بعرف كتير

أفنـ أم عمر ـان

15-10-2003, 09:58 PM

شو صار بتسوية البنك يا دندون :)؟

طيب يعني شو الحل ؟
كيف نرجع ونرجّع ولادنا زي زمان ؟
البساطة في التعامل والشهاااااااااااااااااامة متل ما قلتِ :(

كنت بدي أكتب نبدا كل واحد من جهته, يتعامل بطيبة وتسامح , البعض على طول بتتخيلي نفسك ممكن تعامليهم بهالطريقة , لكن بعض النماذج اللي اجت في بالي : يا لطيف ! بساطة مين والله بياكولني:eek:

Dandoon

16-10-2003, 07:59 AM

:D :D :D :D
ضحكتيني يا فنو الله يسعدك :)

بدك الصراحة ... متل ما انا شايفة ::: الناس لسا فيهم خير صدقيني.. بالنسبة الي تربيت انا و اخوتي على هاي الاخلاق قبل كل شي ، اهلنا عودونا التسامح و شجعونا على مشاركة كل شي ممكن مشاركته مع الناس ، وعلى التعاون معاهم و مساعدتهم في اي شي ممكن يحتاجوه و احنا بنقدر عليه ( سواء زميلات في المدرسة او الجامعة او جيران او اقارب ) و هاد طبعا بحدود اللي بنقدر عليه .. و نفس الاشي بالنسبة لكتير ناس بنعرفهم ، متربيين على نفس الاخلاق و العادات

و ان شاء الله لما ييجيني اولاد اكيد حاقطع عنهم المصروف .... قصدي رح اربيهم بنفس الطريقة ..

و هيك ان شاء الله بضل شعبنا محتفظ لو بجزء من عاداته و اخلاقه الرائعة رغم كل الظروف :)

تسوية البنك ؟؟؟ عيب يا بنتي ما اخدت معاي ربع ساعة بس شو المشكلة ؟؟ انه عندي Filing كتير و لازم اشطب كل الشغل هاليومين لانه خلص .. اجازتي بتبلش الاربعاء ان شاء الله :) :)

صحيح فنو ... كيف الحمل معاك؟؟ بأي شهر صرت ؟؟

ضحكة الدنيا

16-10-2003, 10:32 AM

مرحبا...........
انا فلسطينية من غزة، وهما بس مرتين الي تنفست فيهم هوا بلادي

Dandoon

16-10-2003, 10:34 AM

اهلا و سهلا فيك يا ضحكة الدنيا ...

و الله نيالك .. احنا على بعد كيلومترات منها و مو قادرين نتنفس هالهوا :(

أفنـ أم عمر ـان

16-10-2003, 10:53 AM

ضحكة الدنيا حياك الله ... محظوظة والله حتى لو مرتين بس.
--------------------
دندون ...بدك تقطعي عنهم المصروف :D !!

طبعا هاي نعمة كبيرة إنه ربنا ييسر حول الإنسان ناس من أخلاقه وتعامله ,

بتعرفي انا متى بديت أعاني ؟؟ بالغربة !!!
ما بعرف يمكن وضع الناس هون خاص , كله ناسي مبادؤه !! كله بظهر أبشع ما عنده ومو سائل على باله ما حد شايف !!!

طبعا انا من بيت أهلي والناس والمعارف اللي متعودين نعاملهم بنفس أخلاقياتنا عدل على الغربة , يعني صدمة مركبة!!!
فعليا ما دخلت مجتمعنا تمام كشخصية مستقلة :) , لإني ما اشتغلت بعد الجامعة , وبالجامعة مهما شاف الواحد ناس بضل بلشان بحاله ومو فاضي.

بس كمان في بيت حماي, على طيبتهم , ما لقيت اللي كان نفسي فيه, يعني علاقة متينة ووطيده مع سلفاتي مثلا,
الكل بحاله , وما حد بتفاعل ! بحسه طبع في الناس صاير, وفوق هيك بتحسي الناس كلها طفشانه وما حد معطي العلاقات الإنسانية أولوية بحياته ! ما بعرف شو السبب؟!

بس انا معك إنه الخير موجود , والنفوس بتضل مجبولة على الطيبة مهما اندعكت بهالدنيا وقسيت.

انا هلأ تقريبا تميت الشهر الخامس وبدخل بالسادس , يا ترى كم بيني وبين دندوش شهرين يمكن ؟

ونفسي أقولك : الله يعينكم إنتو يا المحاسبين اللي إديكم بتتلوث غصب عنكم بشغل البنوك ! بحزن عليكم عن جد. بسمع كلام اخي يعني ما في مفر من البنوك ومعاملاتها لو وين ما هربتوا :(
وبعدين شو إجازة ما إجازة !؟ بفهم من هيك إنك بتنقطعي عن المنتدى ؟

Dandoon

16-10-2003, 11:05 AM

بالسلامة ان شاء الله يا فنو :) بينك و بين دندوش شهرين لانها بلشت بالتامن من يومين ..

و الله بالنسبة لشغل المحاسبة .. انا شغلي مش في بنك ، يمكن لو بنك ارحم يكون في اقسام ما الها بالربا .. بس شغلي في مؤسسة استثمارية واغلب استثماراتها ودائع بالبنك ، يعني الايراد الرئيسي الفوائد ( الربا ) و المصيييييييييييبة لما يكون بنك غلطان معنا بكم دينار ، لازم اتصل فيهم و اطالبهم ( وين المصاااري ؟؟؟؟ ) .. مصيبة والله .. بس انا سمعت فتوى للقرضاوي انه لما يكون اقتصاد البلد قائم على تعاملات البنوك و غيرها ، فالاولى عمل المسلمين فيه ... الله المستعان ...

اما بالنسبة للاجازة .... طبعا هاي سر بيني و بينك يا فنو ياختي ( عرفت اختار الطريقة عشان يضل بيني و بينك بس ) .. محسوبتك ان شاء الله ناوية تروح عمرة يوم الاربعاء الجاي بعد ما ربنا اكرمني و لقيت محرم ( زوجي ) ، لاني كنت كل ما اقدم يحكولي لازم محرم و ما بنفع عصبة نساء ( قلتلهم بجيب معي باكيت محارم اذا بدكم ، ما رضيو ) فاضطريت اتجوز عشان اروح عمرة قانونية :) و الحمدلله وافقولي على اجازة من الشغل بس اللي مقطع قلبي فراق المنتدى صدقي ما انا عارفة كيف .. بس اكيد لما اروح مكة و المدينة ( قشعر جسمي بس تذكرت)، اكيد رح انسى كل الدنيا ....

شو بتحبي ادعيلك؟؟ ( تواصي )

أفنـ أم عمر ـان

16-10-2003, 11:15 AM

ياي , نيااااااااااااااالك , الله يتقبل منك عمرتك ,

بتصدقي انا متلك عمري ما اعتمرت !!!!!

وأنا عند أهلي كل سنة سبحاااااااااااااااااااااان الله تطلعلهم شغلة وتتأجل العمرة (على حظي), مجرد ما تزوجت اعتمروا على طول !! (هم مش سائليين فيي أصلا كانوا يروحوا فرادى وجماعات واللي حج أكتر من مرة واللي واللي ..بس انا المسكينة)

وبعد ما لقيت محرم على قولتك :D صرنا في بلاد الواق واق , هو كل سنة بقولي يلاّ , بس بالله شو هالعمرة مع طفل صغير ,وبعد ما يكبر الصغير بيجي أخوه :(:(

يعني الوحده فعلا تعتمر قبل الصغار وتعبهم وبلشتهم , عشان تستمتع بالعبادة وتحس بطعمها.

ادعيلي لو تكرمتي : ربنا يجعل عمر وباقي ذريتي كلها (وانا وزوجي ...يلا مهو العرض قائم) من الصالحين الحافظين لكتاب الله العاملين بما فيه, ويجعل خلقهم القرآن.

بس :)

رنين القوافي

17-10-2003, 12:19 AM

سلامي لاهل فلسطين الحبيبة وين ما كانوا...و الله ينصرهم على المحتلين و من والاهم,,

um samer

18-10-2003, 02:39 AM

إيمان علي

18-10-2003, 06:02 AM

أما انتو شلة.... فنو ودندون ودندوش... عصابة الله وكيلكم.. بس القراءة وراكم ممممممممممتعة :D
فنونة، تروحي معي على الحج؟ يارب اطعمني إياها السنة... دعواتكم :)

Dandosh

18-10-2003, 07:45 AM

لا هيك كتير!
دندون عالعمرة و انتي و أفنان عالحج و انا ؟؟؟؟؟؟؟؟؟؟

دبروني معاكم ما دخلني.. ببطل ألعب .. :)

أحلى فراولة

18-10-2003, 02:44 PM

السلام عليكم ورحمة الله وبركاته

شو جماعتنا كلهم متلمين هون وأنا مش عارفة طيب احكوا اتكلموا لا تخلوني اردحلكم باللهجة الفلسطينية الكحت ،،;)

بس عن نفسي انا من منطقة اسمها عبسان الكبيرة في خان يونس وخان يونس في غزة بس عايشة بالكويت ولله الحمد كل سنة بنروح على فلسطين وعندي 4 خوات متزوجات هناك بس للاسف من يوم صارت الانتفاضة الأخيرة واحنا ما سافرنا هناك يعني من شي 3 سنوات ونص ما بدي اطول عليكم بس حيالله بكل خواتي وعزيزاتي من فلسطين ،،

بس بالنسبة لمنطقتنا فما فيها حد الا وبنعرفه فاي حدا من هناك يتكلم ياجماعة :D

وتحياتي لكم
W: W: W:

هنلي

18-10-2003, 05:33 PM

في حكي كثير حلو كاتبينه اشي قراته واشي ما لحقت لاني جايه اطل على داري
بس اني يا افنان ام عمر جوزك من دار عاشور هذا قرابينا امي بنت خالها متزوجه من دار عاشور واسم جوزها ابوا اياد عاشور وهو معروف كثير في البلد اكيد لو تسالي جوزك رح يعرفه
اسمه كامل العاشور اسالي ورح تعرفي
وبالنسبه للاوضاع هي مليحه والحمد لله اليهود بيعملوا منع تجول مثلا الساعه 7 الصبح بس بعديها بيروحوا وبنطلع احنا عادي على 10 الصبح طبعا بس ما بيئذونا طبعا
اما الاوضاع الماديه عاديه والحمد لله والمساعدات ياحيره علينا بتروح للكبار وبس بيسرقوهن

Dandosh

19-10-2003, 09:10 AM

هلا هنلي نورت :)

شروق الأمل

19-10-2003, 06:56 PM

عن جد إنكم روعه .... :)
هدا إنتوا ماخلتوا حدا لا من الشرق ولا من الغرب
أما أنا ياحلوات فمن الوسط الشمالي " قال فاهمه جغرافيا " ..... :D
أنا والعياذ بالله من كلمة أنا من جنين و عايشه في أمريكا صار لي عشر سنين
و أهلي في عمان ..... آخر مره نزلت على البلاد من أربع سنين
الله يفتحها علينا وتقرب هالنزله والله الغربه صعبه يابنات " راح تقولوا شو هدا يا شروق قلبتيها دراما " ...... :(
بس قولولي في حدا من جهتي ...... :confused:

Dandosh

20-10-2003, 08:08 AM

يااا هلا بأهل جنين منورة والله :)

والله على علمي ما في حد من جهتك بالزبط.. بس علمي انه كلنا من نفس الجهة :)

ربنا يهونها عليك وعالجميع وخاصة اللي بالغربة ..

بتذكر ناس كانوا جيران صاحبتي (شو هالقرابة) كان عندهم بنتين شروق و أمل و عندهم محل أسمه شروق الأمل :) حتى بنتهم تزوجت وسافرت لا تكوني انت :):)

Dandoon

20-10-2003, 09:26 AM

اهلا و سهلا يا شروق الامل >>>>>> دودو يا حلوة هديك ما الها عشر سنين مسافرة معقول ؟؟

بعدين طولكرم كتير قريبة على جنين ، و مع نابلس بشكلو منطقة "المثلث" ..
يعني بتقدري تقولي من نفس الجهة :)

Dandosh

20-10-2003, 10:36 AM

شو بيعرفني :) .. السن له حكمه يا بنتي

بس انا بتذكر انها تزوجت صغييرة ....

LeEn

20-10-2003, 12:44 PM

أنا من عروس الشمال
بيقولوا انها أحلى مدينة حتى كفوري لما غنى للبلدان والعواصم اختارها مع انها مش عاصمة

حيفا طبعا
أنا من شفا عمرو

كنت حابة أنزللك صور منها بس للأسفا كانوا كبار
الي عندها ما تبخل على البنات

<==========اجاها دور غرور

الحلم الجميل والدتك من وين؟؟؟شكلها من نفس بلد والدتي

أعتقد!

أفنـ أم عمر ـان

20-10-2003, 05:53 PM

هاي الجملة "حتى كفوري لما غنى للبلدان والعواصم "
قعدت أحلل فيها مش فاهماها !! على بالي من ضمن هالكلمات اسم بلدك !؟

بعدين استنتجت إنها بتحكي عن واحد اسمه كفوري (أمّا إسم:D متوافق مع مهنته !)

الله يسامحك يا LeEn حيفا الحبيبة أجل واسما إنه يشهدلها هالأشكال ....

انا إلي صاحبات من قضاء حيفا, كل أهل حيفا طيوبين وحبوبين.

LeEn

21-10-2003, 08:34 AM

تسلمي يا أم عمر من طيب أصلك :)

Salma

21-10-2003, 10:55 AM

سلام يا جماعة كيفكم
نسيتوني
انا من طولكرم بس مولودة يالدنمارك
زرت فلسطين عددت مرات بس صارلي تلات سنين ما امسافرة
يمكن بصير نصيب هالصيف

تياتي لجميع اهل فلسطين
W: W: W:

LeEn

21-10-2003, 02:53 PM

كيف تعلمتي تحكي وتكتبي عربي سلمى؟؟

اممهند

21-10-2003, 04:27 PM

معلش اخت هنلي واخت افنان اغلبكم واسالكم عن اقاربكم الي من بيت عاشور
من اي عاشور هما واذا كانوا من نابلس معناها هم من اقاربي عمي الي في نابلس
اسمه اسعد عاشور ( ابو سليمان )

شروق الأمل

21-10-2003, 06:12 PM

و الله أهلا و سهلا فيكم الكل خير و بركه

حبيبي دندون و دندوش ....

يسعدكم الله ماألذكم بتتاكلوا هيك من غير ولا شي "وحده جوعانه" ... :D

وبعدين تعوا إنتوا خربطتوني مو أنا يلي عم بتدوروا عليها "دوروا في مكان تاني" ... :S:

الدرر

21-10-2003, 09:15 PM

انتو هون وما حدا بيعزم ?? (كلعاط ) اللي بيعر ف معناها مايحكي..

محسوبتكم اكيد عرفتوا من وين ... زوروني في وحي القلم..

وانا جيت من هناك قبل شهر تقريبا..

مع الأسف الحال الى اسوأ لكن ماشاء الله اهلنا قدها وقدود..

الدرر

21-10-2003, 09:18 PM

تعالوا هون مين ناوي على الحج السنه?

زهرة القدس

21-10-2003, 09:37 PM

ما شاء اللة طلع المنتدى كلو فاسطينية شو رايكم نقترح
على المشرفين يخصصوا ألنا منتدى :D
وأنا ايضافلسطنية من قرية أسمها كويكات قضاء عكا ولاسف لم تكتحل عيوني بمراها
وصحيح ألي حكتيه يا ام عمر كانت ستي اللة يرحمها تحكيلنا و احناقاعدين حول
الكانون بلشتوية عن قريتنا وعن الكرم الفلسطيني

أنسام

21-10-2003, 11:36 PM

اهلا وسهلا باهل فلسطين منورين اهلين بريحة الوطن الغالي.وانا ايضا من فلسـطبن بس عمري ما زرتها اهلي عايشين بالاردن وانا بامريكا يعني كلها غربه بغربه يالله ايش بدنا نعمل . صحيح نسيت احكيلكو اني من غزة................شكرا شكرا لاداعي لتصفيق وبــاي

Salma

22-10-2003, 10:59 AM

سلام LEen

بمدرسة خصوصية

أفنـ أم عمر ـان

22-10-2003, 11:43 AM

والله أنا ما بعرف بعائلة عاشور الشيء الكثير ...سامحوني ...

الدرر ....ضحكتيني , الله يبسطك دنيا وآخرة :D

حياك الله انسام , وكل اللي نورونا بهالموضوع الحلو .

Dandosh

22-10-2003, 01:15 PM

ما شاء الله .. كلنا من فلسطين ؟
الدرر صدمتيني كل فكري انك من بلد تااااالت :):)

إيمان ان شاء الله على علمي ناوية تحج الله يسهل لها و عقبالنا :)

شروق الأمل متأسفين عالخربطة يا ستي و هي رايحين ندور بمكان تاني .. بس وين بدنا ندور؟؟

سلمى ما شاء الله عليك انا متابعتك من زمااااان و لغتك ماشاء الله ممتازة بالعربي

زهرة القدس و أنسام و الكل منور ....
تحكوا صاحبة الموضوع عم بأهل و بسهل :)

هنلي

22-10-2003, 03:55 PM

مراحب اخواتي
قلت اطل عليكم شويه لاني جايه اطل على بيتي بس حبيت اقول
للاخت اللي بسال عن دار عاشور انه اللي بنعرفهم من قلقيليه بس يمكن بيقربوا للي في نابلس
واعجبتني كلعاط للاخت الدرر هههههههههههههههههههههههههه
ضحكت عليها كثير
وسلامي
انا راجعتلكم يوم الاحد او الاثنين بالكثير
وكل سنه وانتوا سالمين بحلول الشهر الفضيل
وشكرا

يافا

23-10-2003, 06:01 PM

W:
مرحبا أخواتي شايفه كل أهل البلد هون .
معليش لكن في البدايه بدي اشكر المشرفات هاي اول مشاركه الي في المنتدى من زمن و انا كل فتره اجي على المنتدى و ما تضبط معي المشاركات في الاخر راسلت الاداره و ما قصرو .

و النصيب اول طله تكون هون .
على العموم انا جيت ارفق بعض الصور التي أصابتني بالقهر الشديد ان هذه هي بلدي و تراب وطني و لا يحق لي او لأولادي دخولها أو استنشاق عبيرها .
يمكن اللي طلبت صور طلبت من يافا لكن هاذا اللي توفر الان و ياريت اللي عايشه في فلسطين و بتعرف هاي المواقع تحكيلنا عنها .

انا متأكده انها مواقع بحته لليهود اختلسوها منا و سكنوها . و لكن للمعرفه لانها أعجبتني ولا أعرف عنها شيئا

الصور لمدينه حيفا : اللهم ردها الينا .... و طهرها من اليهود . اللهم آمين .

يافا

23-10-2003, 06:05 PM

و هذه صوره اخرى

يافا

23-10-2003, 06:09 PM

و هذه صوره على فكره الصور اخذها من منتدى الساخر

يافا

23-10-2003, 06:11 PM

وهذه اخر صوره

ضحكة الدنيا

23-10-2003, 06:21 PM

انا من قطاع غزة بس تنفست هوا بلادي مرتين مرة وعمري 5 شهور ومرة5 سنين يعني في
صف تمهيدي وادعولي يمكن هالسنة نروح لغزة ( يمكن يعني احتمال بعيد لكنو حي بقلبي)
بااااااااااااااااااااي

اممهند

23-10-2003, 07:41 PM

اهلين باهل يافا نور المنتدى بك
زوجي من يافا من بلد اسمها السافريه
اكيد سمعتي فيها

أفنـ أم عمر ـان

23-10-2003, 09:39 PM

السافرية جنب بيت دجن /قضاء يافا
يعني كإنا بلد واحده .

الدرر

23-10-2003, 11:51 PM

أرسلت بداية بواسطة Dandosh

الدرر صدمتيني كل فكري انك من بلد تااااالت :):)

من وين يعني باغيس

انا من المدينه المخفيه ;)

الدرر

23-10-2003, 11:52 PM

دندون.. ودندوش ..ودندن dandoon,dandoosh

كلكم بتدندوا !!!!!!!!!!!!

لخمتوني:eek:

Dandosh

24-10-2003, 12:46 PM

سلامتك من اللخمة :)
دندوش انا ودندون أختي (هلا بالعمرة ربنا يتقبل منها و يرجعها بالسلامة هي و الهدايا :))

انا فكرتك من بيت باغيس قضاء جنيف :)

LeEn

28-10-2003, 12:40 PM

تسلمي يا يافا على صور حيفا
في صور كانت للبحر الأبيض المتوووووووووووووووووووووووووسط
بتجنن

الحلم الجميل

30-10-2003, 06:18 AM

السلام عليكم يا بنات
شو صار معكم؟ لاقيتوالي صاحبتي؟
الله يخليكم يا بنات قلبي مثل النار عليها لان اخر معلوماتي عنها انها تدرس في العراق sid
و ماشاء الله الفلسطينيات المقيمات بالاردن كثار و هي كمان فلسطينيه من الاردن
قلت لكم ان اختها دكتوره و كنت اليوم عم ادور برسائلها القديمه فلاقيتها انه ادكتوره بمستشفى الخالدي طبيبه عامه
المستشفى ان شاء الله يكون معروف
واذا في اي واحده فاضيه لو بس دقيقه تتصل و تسال على دكتوره باسم ميساء ربحي الحاج ابراهيم

واختها الثانيه اسمها دارين تدرس صيدله في جامعه الاسراء وعندا صديقه مصريه اسمها شيرين
يعني هذه مصريه فبتكون مميزه بالمجتمع الاردني :)

امانه بنات يعني مش لاني عضوه غير نشيطه معكم فطنشوني :(
نحن اولاد بلد واحد يعني الي تقدر تجبلي اي معلومه عنها ماتتخيل كم لدعوات الي مندعيها لها
لي ست سنوات ماشفتها sid

زهرة القدس انا كمان من عكا بس مابعرف وين بالضبط :)

الحلم الجميل

30-10-2003, 06:40 PM

هنلي وين عشتي بالسعوديه؟ و باي سنين؟

LeEn
سوري بس ماشفت ردك و سؤالك
بالنسبه للماما فانا ماحكيت عنها فكيف تتوقعي انك تعرفيها :rolleyes:
على كل حال الماما متجنسه لبناني فمنقول انها لبنانيه
فمشان هيك مابعرف هي من وين بالضبط من يافا او حيفا بصراحه مش عارفه و دايما بنسى لان الاسمين يشبهوا بعض :D
بس هي ولدت و عاشت بلبنان و بعدين راحت عالسعوديه
اذا شكوك حولها زادت فبسالها لما ترجع هي من وين :)
و ناسه والله اذا بلاقي احد يعرفني :D
على فكره يا لين اذا انا مش غلطانه فانت عايشه بامريكا او كندا...صح؟

LeEn

03-11-2003, 10:10 AM

لا غلط هاهاها
في الامارات

هنلي

03-11-2003, 01:07 PM

كنت في زمناتي في السعوديه مولوده سنه 1980 وبقيت فيها لحد 1994 يعني 14 سنه
وكنا اول اشي في رابغ بعديها انتقلنا الى الطائف

Dandoon

04-11-2003, 11:08 AM

سلاااااااااااااااااااااااااااااااااااااااااااااااا اااااااااااااااااااام....

كيفكم يا حلوين :)

انا رجعت بالسلامة الحمدلله و الله اشتقتلكم موووت :):)

Dandosh

04-11-2003, 11:22 AM

هلا دندوني ..:)
منورة

هنلي

04-11-2003, 12:42 PM

الحمد لله على السلامه يا اختي انا ذاكره انك في العمره كنتي
طيب وين الخواتم والاساور والعقود والحناء يلا بدددددددددي
هههههههه

Dandoon

04-11-2003, 12:49 PM

على حسابك يا قمر .. اذا بدك حنة جد ببعتلك بس تدللي :)

و الله تذكرتك و انا هناك لانا تعرفنا على ناس بجننو من قلقيلية من بيت العبد حسن ( بس عايشين في الاردن ) ..

شو اخبار رمضان معك؟؟؟
اكيد غاطسة في المطبخ.. حلويات و معجنات و الذي منه .. ( نيالهم ابو تلال و الجيران) :)

باليرينا

04-11-2003, 04:08 PM

حمد لله على السلامه دندون كيف كانت عمرتك ان شاء الله تكونوا انبسطوا

Dandoon

05-11-2003, 09:58 AM

الله يسللللللللمك ام عدنان..
الحمدلله كانت رائعة و انبسطنا كتير .. فيها شوية تعب بس الحمدلله ربنا يسرها

وعود الخير

05-11-2003, 11:13 AM

مرحبا ربنا يعطيكم الف عافية والله وتجمعنا رغم أنف شارون
انا اسمي عطاف ابو الرُب ومن اسمي مببين انا من وين أنا اصلام من قباطية مدينة جنين الابطال جنين القسام وبكل فخر، اعيش حاليا في غزة لان متزوجة من غزاوي يعني وحدة رغم اسرائيل ، ربنا يجازيكي كل خير يا هنلي مش بكفي حلوياتك والله ان مشتاقة لجنين وللضفة نفسي اشم هواها. ونفسي اشم هوا الكويت اللي عشت فيه وتربيت ومنه لله الظالم صدام اللي كان السبب في خروجنا والف تحية لكل الاخوات الكويتيات المشاركات في المنتدى.

Dandosh

05-11-2003, 03:38 PM

يااااااااااااا أهلا وسهلا بعطاف و كل أهل غزة وجنين وفلسطين والكويت :-)

ضل حدا؟؟

emaratia

06-11-2003, 09:23 AM

السلام عليكم ورحمة الله وبركاته ...

اولا ما اعرف هل يرحب فيني في موضوع خاص في الفلسطينيات والا لا .. وكلنا اخوات في الله وفي الاسلام .. وانا احبكم وايد .. انا زوجي غزاوي ...!! ولي طلب عندكم يا بنات غزه علموني عاداتكم وتقاليدكم واكلكلم .. وخاصة الطبيخ منه .. واذا تعرفون مواقع الطبخ الفلسطيني اكتبوها لي .. وشكرا

وعود الخير

06-11-2003, 10:00 AM

أهلا وسهلا بك يا أخت emaratia وتكرم عينك بس اطلبي، صحيح انا مش من غزة بس الحال من بعضه جوزي غزاوي واقيم الآن في غزة وحبيباتي وصاحباتي الغزاويات كثار اطلبي اللي بدك إياه ومن عيوني.
والاخت دندوش شكرا لك على الترحيب.

Dandosh

06-11-2003, 10:11 AM

اهلا أماراتية طبعا 10000000000 أهلا وسهلا بتنوري الموضوع :-)

انا مو من غزة بس بعرف انهم كتير بيحبوا المخللات و الفلفل والأكل الحار :)

يا مرحبتين عطاف :)

هنلي

06-11-2003, 10:50 AM

مرحبا اختي عطاف على فكره في الي صديقه كثير كثير بحبها اسمها ابتسام ابو الرب
من جنين شو بتقربلك
وفي صديقات كثير من غزه بحكم دراستي في كليه تجمع كل انحاء فلسطين البنات طبعا
وعلى فكره كمان الزعتر اللي في غزه - هسه بتقولي عني ام بطن وجايه توكل - زاكي كثير
واه وسهلا بالاخت اماراتيه وكلنا وطن وشعب واحد يا اختي وكمان الي صديقه غاليه على في الامارات ابصر شو اخبارها
والاكل الفلسطيني في اكلات كثير بيتشابهن مع باقي الدول بس يمكن باختلاف البهار وطريقه الطبخ والنفس الحلو يا حلوه
وهي موقع للطبخ وللفلسطينيين
http://www.palestine-info.info/arabic/hertiage/food/foods2.htm#6

وعود الخير

09-11-2003, 11:41 AM

أهلين هنلي
والله منورة، يا ستي يا ريت الطاريق سالكة وانا ابعث لك شوال زعتر، بس مش غريبة انت نفسك في زعتر غزة وانا دائما بوصي على زعتر الضفة.
وبالنسبة للأخت ابتسام ابو الرب أكيد من العيلة. ويمكن انت عارفة ان العيلة والحمد لله كبيرة ولازم اعرف اسم الأب والجد ومن أي قرية هي.
وطبعا كلنا فلسطينين وكلنا اهل ومرة ثانية ربنا يبارك فيك على هالفكرة الحلوة زي حلوياتك ياعسل

هنلي

09-11-2003, 03:40 PM

والله اخت عطاف اني مش عارفه من وين بالزبط هي ابتسام بالزبط لانها درست معايه اسبوعين ثلاثه بعدين انخطبت وتركت الدراسه بس يمكن اسم والدها محمود او ابراهيم والله مني عارفه بالزبط
بس زعتركم اشي اشي مافي اذا منه وهي احنا بنحب زعتر غزه واللي من غزه بيحبوا زعتر الضفه
وعلى فكره في كمان الي صديقه الروح بالروح وانا دايما على اتصال فيها وهي من جنين من عرابه مش عارفه يا اختي ليش انا بحب اهل جنين معظم صديقاتي منها

على فكره انتي من اي منطقه بالزبط من غزه لانه في الي صديقات كثير منها ايام الدراسه
وشكله عمري من عمرك انا 23 وانتي قديش عمرك

وعود الخير

10-11-2003, 09:38 AM

عزيزتي هنلي
لشو هالاحراج خلاص قلت لك بابعثلك زعتر بس استرينا.
المهم انت بدك زعتر والا دقة في فرق بين الاثنين الزعتر لون اخضر وناعم والدقة مشططة من كتر الفلفل اللي بحطوه فيها.
هنلي كلمة سر بيني وبينك زيدي عشرين سنة على عمرك ربنا يسعدك. يعني بطلع في عمر امك.
شو رايك نبقى صحاب والا خلاص مفارق من غير شر.

LeEn

10-11-2003, 10:47 AM

انا بدي زيت زيتون :)

حمدالله على السلامة دندون عمرة مقبولة

emaratia

10-11-2003, 11:50 AM

اخواتي والله احببتكن جميعا ... طيب قولولي الغزاويين ايش بيحبوا و شو عاداتهم وتقاليدهم وكيف بتهتموا بجمالكم

Dandoon

10-11-2003, 12:30 PM

الله يسلمك لين حبيبتي الله يتقبل منا و منك يا رب :)

اماراتية :) ان شاء الله بنات غزة بفيدوك .. كلنا حبيناك يا قمر :)

عطاف و هنلي ... شوووو قصة الزعتر المتبادل من ورانا ؟؟؟؟؟ اللي بيحضر السوق بيتسوق يا جماعة :)

مـiـى

10-11-2003, 09:26 PM

السلام عليكم يا بنوتات يا حلواتW:

أنا مو من فلسطين بس عم أقرأ الموضوع أول بأول .......

حبيت أتحارشكم :D

شو بتقبلوني رفيقتكم كلكم و إلا لأsid

بحبكم في الله و الله ينصرنا على أعدائنا أجمعين

W: W: W:

أفنـ أم عمر ـان

10-11-2003, 09:31 PM

Dandoon عمره مقبولة يا رب

إنت هون وأن امو عارفه , فكرتك لس ما رجعت للمنتدى ...

كيف عمرتك كانت .... آآآآآآآآآآآآه شو نفسي أكون هناك ... كل ما بشوف صلاة التراويح من الحرم , بتحسر انا وزوجي على قعدتنا آخر الدنيا بعاد ...

الحلم الجميل

10-11-2003, 10:06 PM

لا والله يا هنلي بعيده كثير عني :rolleyes:

حمد الله عالسلامه يا دندون
ماشاء الله في كثير ناس عم بيروحوا للعمره هالسنه
بيقولوا عدد الناس هناك كانه وقت الحج
الله يتقبل منك يارب :)

LeEn

11-11-2003, 10:21 AM

اهلا فيك بيبي مذر
وآميييييين

Dandoon

11-11-2003, 10:28 AM

Baby mother : يا ريتو 100 اهلا و سهلا :) بتنورينا و بتشرفينا

فنو يا فنو ........ انا الي من يوم الثلاثاء الماضي .. اسبوووووع يا بنتي و مش ملاحظة اني رجعت ؟؟ :) الله يتقبل منا و منكم صالح الاعمال و ان شاء الله عقبالكم السنة الجاي مع عمر و اخوه ...

الحلم الجميل : الله يسلمك حبيبتي .. انا لاني اول مرة بروح .. حسيت انهم متل يوم الحشر مش بس الحج .. الله وكيلك ا ن ف ع ص ت :)

وعود الخير

11-11-2003, 10:51 AM

السلام عليكم ورحمة الله وبركاته
مرحبا يا حلوات،
اختي babymother اهلا وسهلا فيكي وفلسطين بلد العرب اجمعين.
اختى dandoon منورة وبتأمري بس انت وين في الاردن وانا باعثلك لعندك. انا كنت ساكتة في الجبل الأخضر- عمان وأهلي في البيادر واخوي في السلط بس أنت تأمري.
عزيزتي هنلي: W:
اشتقلت لك وينك، والا لما عرفت عمري هربت؟؟؟؟؟؟؟؟؟؟
كيف الوضع عندكم في قلقيلية هذه الأيام ، ديري بالك وربنا يسترها معكم.

Dandoon

11-11-2003, 10:55 AM

وعود ؟؟ عطاف؟؟؟

يا بنتي لخبطتيني انا الي ساعة بحلل مين هاي و شو قصدها ببعتلك .. اتاريك مغيرة اسمك يا حلوة :) :)

تسلمي يا رب ما بتقصري انا بمزح و الله الحمدلله ارخص اشي عنا في الاردن الزعتر :) شايلينك لشغلة اكبر :)

وعود الخير

11-11-2003, 12:25 PM

حقك علي يا dandoon ، كان لازم اخبرك اني غيرت إسمي، وبعدين شو قصة بنتي مين اللي بنت مين بالضبط ؟؟؟؟

هنلي

11-11-2003, 06:49 PM

مرحبا اخت عطاف كيف حالك ومبروك الاسم الجديد وهيني هون ما هربت وبستنى الدقه الحراقه بس ما تكتري الشطه فيها
على فكره في نكته عن الدقه
قال مره اجانب رايحين لغزه شافوا ولد بيوكل في دقه فقالوا شو هذا شو بيوكل
فقال واحد هذا شعبنا بيوكل الرمل ورح يوكل اليهود كمان

مـiـى

12-11-2003, 01:38 AM

دندون الحمد لله على السلامة و الله يتقبل منك يا رب

نيالكم إنتو بالأردن

جنب الحبايب:(

أخي عم يدرس عندكم

ديرو بالكم عليه:D

Dandoon

12-11-2003, 09:53 AM

الله يسلمك يا قمر و الله يتقبل منا و منكم الطاعات ان شاء الله ..

طيب ما دام انت بسوريا .. تعالي انت اسهل :) كلها ساعتين و بتشوفي الحبايب .. و منها بنشوفك :)

وعود الخير

12-11-2003, 10:22 AM

أهلين هنلي
لا يكون اليهود صادروا الدقة ياللي في الطريق وافتكروها رمل، اصلهم بيسرقوا رمل غزة. وربنا كريم مش بس ناكلهم نطحنهم طحن.
شو اخبارك وكيف استعدادك لكعلك العيد.

مـiـى

12-11-2003, 01:20 PM

يا ريت يا دندون

بس أنا مو بالشام أنا من حلب يعنيييييييي كتير بعيدة.......

بالمرة سلام يا هنلي إذا مريتي

ترى أنا بحبك كتير و كنت رايدة أعرف لشو نقيتي اسمك ;)

بس أنا عرفت من موضوع أختنا سنبلة

بس بيني و بينك أنا ما صدقت أن عمرك 23 سنة و عم يطلع معك كل هل الحلو

مممممممممم

W: W: W:

واحده غلبانه

12-11-2003, 01:31 PM

انا مش فلسطينيه لكن جارتكو مصريه

طلعت من عضام الرقبه يعني بس بحب الفلسطينين كتير وجيراني فلسطينين وبنتهم كانت اعز اعز صاحباتي وساكنين وقنا بس هي اتجوزت وهاجرت امريكا وانا زعلت جدا عليها لما سافرت

سيبوني اعيط شويه وارجع لكم

ربنا ينصرنا جميعا علي اليهود الله يقطعهم من الدنيا اه علي فكره جارتي كانت من قريه (ضيعه)اسمها ام خالد بس منين مش عارفه بس امها لسه جارتنا حاسالهلكم لما ارجع مصر واقولكم

رغايه انا صح

Dandoon

12-11-2003, 01:37 PM

اهلا يا غلبانة ...
ربنا ما يجيب غلب يا بنتي :)
اول حاجة اهلا و سهلا بيك و بكل المصريين حبايبنا .. انا بصراحة و بدون مجاملة بحبهم جدا .. كلهم طيبة و خفة دم ما شاء الله :)

في قرية اسمها ام خالد ..او بالاحرى كان في قرية كدة بس دلوقت بقت مستوطنة يهودية و الله اعلم هي ناتانيا .. >>>>>> هنلي و عطاف.. اذا غلطانة صلحولي

و ما تعيطيش يا حبيبتي احنا هنا كلنا اخواتك و صاحباتك .. حتى بصي .. اديني بكلمك بالمصري اهه علشان ما تستغربيش :) :)

أم الأولاد

12-11-2003, 06:01 PM

السلام عليكم...........انا عضوة جديده لكن هذا الموضوع شد انتباهي وانتباه بناتي
لانه هذه الفتره بناتي يعملون برنامج في المدرسه للتعريف عن فلسطين ..............
علي فكره انا من قلقيليه وزوجي من طولكرم واخر مره زرت فيها فلسطين عام 84
ولو سمحتوا التي تعرف اي موقع عن البلدات الفلسطينيه تبعثه لي ولكم جزيل الشكر
.............تري انا في كندا والله ملل ادعوا لي ربنا يقضي لنا حاجتنا ويجمعناباهلنا

Dandoon

13-11-2003, 10:01 AM

اهلا و سهلا و مرحبا بام الاولاد .. تفضلي يا ستي ان شاء الله يفيدوك
http://www.pnic.gov.ps/arabic/palestine/kora.html (http://)

http://www.aqsa-mubarak.org/?cat_id=94

ان شاء الله اذا لقيت كمان ببعتلك اياهم :)

واحده غلبانه

13-11-2003, 11:45 AM

اختي دندون الجميله احبك الله انتو كمان دمكو زي العسل (الفلسطينيين)وانا اكدر اكلمك فلسطيني واساويلك مسخن ومقلوبه ونابلسيه كمان اتعلمتها من جارتي بس اوصلهم لك ازاي؟؟؟؟؟

Dandoon

13-11-2003, 11:50 AM

اعتبريهم وصلوا يا عسل :)

فلسطينية

13-11-2003, 02:22 PM

السلام عليكم ورحمة الله وبركاتة
انتو كلكم موجودين الا انا مش معكم ليش ما خبرتونيsid
صار الي ساعة بقرا بالموضوع من اولة لاخرة:)
اضحكت كتير على كلامكم
وزعلت كتير على غربتكمq)
بتمنوا تشاركوني صلاتي بالمسجد الاقصى قريب ان شاء الله

انا ساكنة بالداخل بالتحديد بالقدس الحبيبة قريبة جدا من الاقصى (ربع ساعة بالسيارة)
بس ما بروح اصلي التراويحsid لانة زوجي ممنوع يدخل على القدس وانا لوحدي ما بقدر
بجد انبسطت كتير على هالموضوع بتمنى اتعرف عليكم كلكم شخصيا لاني كتير بحب هالمنتدى وبحب زهراتة الي مزيناتة
دندون عمرة مباركة ان شاء الله اول شي تاني شي بتمنى بس انزل على الاردن اشوفكم انت ودندوش(انا بنزل بالصيف ان شاء الله على بيت بنت حماي)
ام عمر تشرفت كتير بمعرفتك
اما بالنسبة للاخت يافا الي سئلت عن الصور فهذة الصور لحديقةفي جبل الكرمل(قريبة من حيفا) اسمها حديقة البهائين
اضحكت كتير على كلمة (كلعاط):D
وفي النهاية الكم مني هذة الكلمات التراثيةمن غناء بلدنا
وانا طالع عالدرج يا دموعي ملين الدرج
والحمد لله يا ربي ما بعد الضيق الا الفرج;)

Dandoon

13-11-2003, 02:49 PM

يا ريتو 100000000 هلا و مرحبا باهل القدس حبايبنا ..

ان شاء الله كلنا بنجتمع عندكم وبتضيفينا :) و لما تيجي على عمان خبرينا ..ترى انا و دندوش ما بنصدق .. بنوصلك وين ما كنت :) :)

و ان شاء الله ما بعد الضيق الا الفرج الله يفرجها علينا و على جميع المسلميت آآآآمين

مـiـى

13-11-2003, 03:05 PM

شو هي كلعاط؟؟؟؟؟؟؟؟؟

حدى منكم يحكيلنا قصتها مشان نفهم لشو عم تضحكوا:D

الحلم الجميل

14-11-2003, 06:19 AM

بناااااااات
خايفه تطردوني من المنتدى :rolleyes:
بس انا بصراحه ناويه اقلب المنتدى الى برنامج لقاء الاحبه :D
شوفوا مادمت فلسطينين و بعضكم عايش بفلسطين او يزورها
تعرفوا احد من عائله عصفور؟
دكتور سعيد عصفور من غزه كانوا بالسعوديه بجده و راحوا على فلسطين سنه التسعين تقريبا
تعرفوا يا بنات الي تساعدني امي بتعي لها ليل نهار لانها كانت صاحبتها كثيرررررر و دائما تذكرها بالخير
يالا عاد والله :)
لو تتغربوا و تحسوا بالي احسه ما كنتوا تردتوا بمساعدتي sid

Dandosh

14-11-2003, 12:22 PM

baby mother :)

"كلعاط" معناها قريب لكلمة "الضرّاب السخن" اللي بتحكوها انتو.. بس الكلمتين ما بعرف بالزبط معناهم.. ما لقيتها ولا في اي معجم :D
بس يعني بيعبروا عن القرف والواحد مش طايق حاله ولا اللي جنبه .. :)

عاد ما اشطرني انا بالشرح ..:)

- asma -

14-11-2003, 12:48 PM

ماشاء الله عليكم :D

طيب مافي أحد من خان يونس؟؟

انا عندي بيت (الأسطل) دولي معروفين :D
عندهم جهاد الأسطل وزياد و فتحية.. فتحية هدي عايشة في مكة بس أخوانها وامها في
خانيونس

اللي تعرفهم ترد عليييييييييييييييييييييييييييييي :rolleyes:

فلسطينية

15-11-2003, 11:43 PM

دندون
وفيك اكتر تشرفت بمعرفتكم يا رب اعرفكم اكتر واكتر
ويا مية اهلا وسهلا والله من عيوني احلى ضيافة للغالين:)
ان شاء الله بس انزل على الاردن بالصيف اكيد بخبركم علشان اشوفكم وراح انا اوصللكم مو انتو حتى لو كنتوا بالعقبة;)

دندوش
الزمخشري مش متلك:p
شو هالشرح والله شاطرة كتير بالشرح

Dandoon

16-11-2003, 12:00 PM

صدى :) :) :)
نور الموضوع والله :) للاسف لهلأ ما في حد من خانيونس .. اذا تذكرت حد بعرفه رح احكيلك ..

فلسطينية ... :) :)

الحلم الجميل : بتتذكري و احنا صغار كان في برنامج عالراديو اسمه " رسايل شوك " = " رسائل شوق " ؟؟؟؟ ذكرتيني فيه الله يسعدك :)

دندوووووووشي :::::: ردي على التليفون و الله قلقانة عليك :( لا بتردي عالموبايل و لا عالبيت ولا الشغل .. وينك ؟؟؟

Dandoon

16-11-2003, 12:01 PM

وعود الخير و هنلي :::::::

سبحان الله اول امبارح زرنا خالة زوجي و هي الها اسبوع راجعة من الضفة .. و جايبتلنا معاها ززززززعععععتتتتتتتتتررررررر :) :) :)

وعود الخير

16-11-2003, 01:48 PM

Dandoon
بالاصالة عن نفسي وبالانابة عن هنلي بأقول لك صحتين وعافية ، بس ما تنسي اختك ياللي في غزة يعني شوية زعتر عالماشي. ماشي وسلام لدندوش اكيد طلعلها نصيب في الزعتر.
صحتين وعافية أو صحنين وعافية.

Dandoon

16-11-2003, 02:01 PM

الله يعافيك حبيبتي وعود على حسابك كل الزعتر..
بس دندوش ما نابها منهم شي اصلا كلهم نتفة :) و انا ما شفتها من الاربعاء الماضي كنا معزومين عند اهلي و بعدها لا حس و لا خبر :) شكلها بلشت تتعب اخر الحمل الله يسهل عليها يا رب ..

Dandosh

16-11-2003, 02:48 PM

هيني :)
دندوني انا من يوم الخميس مريضة صايبتني حرااااااااارة والتهاب بالقصبات الهوائية بس شي مرتب .. ماخدة اجازة من يوم الخميس الظهر و ناااايمة مو قادرة احكي ولا اتحرك.. و اليوم التليفون صبح خربان هلا بس لرجع :)... و الموبايل مع المحروس ..
اطمني لساتني عايشة بس ويييييييييييييييييييييييييين الزعتررررررررررررررررررررررر؟

فلسطينية ...

الزمخشري مين؟ شو كان يبيع زعتر هو التاني ؟؟

Dandoon

16-11-2003, 02:50 PM

سلاماااااااااااااااااااااااااااااااااااااااااااااا ات ...
والله حقك علي بس عشان مبارح طول الوقت في اربد و مرج الحمام و بعد الفطور لفة تانية ...
الف سلامة يا دودو :)

على فكرة الزعتر مضر جدا جدا للي عندهم سخونة .. و بالذات اذا كانو حوامل ،، يا لطييييف :)

Dandosh

16-11-2003, 02:55 PM

يا ويلي شو نصابة :)

على مين طالعة هيك ..

الله يسلمك حبيبتي .. عموما الزعتر ما بيخرب من هون لشهر ;) و بعدين انت عارفة ابو الشباب بيحب الزعتر .. فاااااا .... احملي حالك و اعتبريهم طلة :D

jordan-explorer

16-11-2003, 03:39 PM

بسم الله الرحمن الرحيم
الى كل الحبايب لكم منى اجمل التهانى برمضان الكريم
ئنا من قضاء القدس من بلدة ئسمها رئس ابو عمار من يعرفها لها عندى هدية روعة
ومقيم فى الاردن منذ عام( 1984) وقبلها كنت مقيمة فى السعودية فى جدة فى الرويس )"
وحاليا ئسكن الاردن (فى عمان () --------
الصداقة الحقيقية هي ان تكون صادقا مع نفسك ومع الاخرين .. لان كلمة الصداقة تعني الاخلاص والمحبة وان يضع الانسان مخافة الله امامه في علاقته بصديقة فيصونه ولا يخونه.. ويحفظه ولا يفرط به.. جعل الله لكم خل وفي في يوم اصبح الانسان الجيد عملة صعبة.... ... تحياتي

باليرينا

16-11-2003, 06:26 PM

مرحبا صبايا كيفكم صار لي خمس أيام والانترنت خربان عندي مش عافه كيف مرت هالأيام
ولكن الحمد لله صلحتو أخيرا و رجعت لمنتداي الغالي ،
عزيزتي صدى أنا من خان يونس ولكن مولوده بالامارات و أسمع عن بيت الأسطل ولكن ما بعرف أحد منهم
بنات غزه !!!!أنا طول عمري باكل الدقه و بعرفها ولكن ما بعرف مكوناتها بقدر حد يقولي مكوناتها
فضول مش أكتر!!!!!

وعود الخير

17-11-2003, 11:33 AM

دندوش ربنا يقومك بالسلامة انشاء الله،
دندون شكرررررررررررررررا الزعتر كان كثيييييييييير طيب، يسلموا ايديكي وايدين خالتك.
ام عدنان
انشاء الله عن قريب سوف ابعث لك مكونات الدقة.
اللي بعرفه انه قمح وكزبرة وملح وسماق وشطة حمرا لزوم أهل غزة، والباقي باكتبه لما أسأل.
سلام،

فلسطينية

17-11-2003, 07:18 PM

ههههههههههههههههه دندوش شكلك بتحبي الزعتر كتير علشان هيك خليتي الزمخشري بياع زعتر:D :D
على كل حال الف سلامة الك وان شاء الله بتقومي بالسلامة:)
اما بالنسبة لدندون خليها براحتها ما بدها تطعمك زعتر هي حرة
ولا يهمك انا بجيبلك ازكى زعتر بفلسطين;)

LeEn

18-11-2003, 11:40 AM

بنات الي في الاردن
قال في حلو اسمو الدحدح؟؟
عبارة عن سميد وشوكلاتة؟؟؟

مين الشاطرة تجيبلي الوصفة :)

Dandoon

18-11-2003, 11:47 AM

دندوش..
مش هاد اللي مرة جبتوه انت و ناصر ؟؟
انا بتذكر اسم غريب يمكن هو .. جاوبي السؤال اعلاه :)

Dandosh

18-11-2003, 02:26 PM

تسلمي فلسطينية :).. و دندون مو حرة شو ما تطعميني زعتر اذا مو عشان اختها عشان بنت اختها (بلشت المسكنة)...

لين حبيبتي الصراحة انا شفته الدحدح و كتير ناس وصفولي ياه بس مو قادرة استسيغ طعمه... يمكن لانهم غالبا بيبيعوه بالشوارع و منظره ما بيفتح النفس ..
ما بعرف من وين ممكن اجيب لك الوصفة بس اذا لقيتها ولا يهمك من عيوني .. :)

دندون اه حبيبتي اللي جبناه دحدح بس مو من تبع الشارع :).. بس ما بعرف ليش ما حبيته ..
و الجواب أعلاه يتبع للسؤال أعلاه

مرارة البحر

19-11-2003, 12:43 AM

:):)
ربي يسعدكم كلكم...قريت الصفحات كلللللللللللللللها..مرة بضحك ومرة بتدمع عيوني:(
أي أحد فيكم يبغى خدمات من جدة أنا جاهزة:D

بس تتوصولي بتنكة زيت زيتون وخيشة زعتر:D
تعرفوا..زيت الزيتون ماناخذه إلا من فلسطين..في ناس بيجيبولنا ربي يسعدهم:)

أبغى أسألكم في ناس هنا في جدة من بيت جهاد<<مش متأكدة يمكن يكون اسم الأب!
المهم أمهم من بيت أبو غريب من الأردن..زميلتي منهم..اسمها رشا..ما صارلهم 4سنوات هنا جايين من غزة..
أحد فيكم يعرفهم؟؟<<<بس عشان أطمنكم على بعض:D

كمان ناس لسه قريب جايين من فلسطين بس ما بعرف بيت مين<<هم اللي بيجيبولنا زيت الزيتون
ساكنين في رابغ..ولدهم الكبير اسمه يوسف..أحد يعرفهم؟؟
أمهم السنة طلعت فلسطين..ورجعت الحمد لله

يااااااااااااااااارب تجمعنا كلنا في ساحة الأقصى مطهرة من اليهود

LeEn

19-11-2003, 09:01 AM

ندنون وانت شو رأيك عجبك؟؟

الف شكر دندوش، انا قرأت بأحد المنديات وحدة طباخة بتقول اكلتوا بالاردن وعجبها فقلت على هيك بيكون طيب.

آمين نيو مون

Dandoon

19-11-2003, 10:05 AM

بصراحة.. ما عجبني كتير ،،،،، بس يسلمو ايديهم طبعا الجماعة مغلبين حالهم و ناتعين الصفط من اخر الدنيا>>>>>>>>>>>> اجا العقل الفلاحي :)

نيو مون :) اهلا و سهلا يا قمر .. للاسف .. ما عرفت حد من اللي قلت عنهم ..
يحول السؤال للارشيف .. قصدي للاخوات من غزة :)

هنلي

19-11-2003, 05:21 PM

ميه مسى على الناس الحلوه الكويسه
كيف الحال والاحوال واهلا وسهلا بالجميع
وسلامتها دندووووش الف سلامه وكيف حال العيل الزغنن اكيد بيرافس بيقول يلا بدي اطلع
واجنن ماما هههههههههه
وينك يا نيوو مون انا مولوده في رابغ سنه 1980 وفي عيله كمان كان معانا من دار الشوبكي
وكمان في عندكم في جده قريب لزوجي بيشتغل مدير مبيعات زي هيك شي من دار صبري
وفي في مكه قرايب لنا من دار ملحم

وبالنسبه للحلو الصراحه مش عارفه بالزبط بس يمكن احنا بنسميه بلوظه - بلوزه - بالشد على اللام
وهو سهل كثير عباره عن سميد 3 كوب مع كوب سكر مع كوب او كوب ونص ماء
وممكن تضيفي شوكولا او صبغات عذائيه اي لون وممكن تعمليها طبقات الوان
بس حركيهن على النار لحد ما يتماسك وضعيها في صينيه في الثلاجه لحد ا تبرد وممكن تزينيها بالمكسرات

وشكرا

LeEn

20-11-2003, 01:25 AM

الف شكر دندون وهنلي وانا نقلت جواب الاخت هنلي للأخت الس سألت عن الحلو
وان شاء الله يطلع هو

زهرة القدس

21-11-2003, 02:50 PM

كنت مفكري حالى زكيه بس طلعت زهره ههههههههه كل فكري انو الدقه هي الزعتر بس بلهجه المصريه شفتو الزكاء :D
بدي منكن يا حلوات الي بتعرف طريقة كبس الفلفل لاخضر الحار بلزيت لانو صديق جوزي فلسطيني من الاردن اعطاه مره مرطبان بس خلص وهلق جبلي فلفل وبده اياني اعملو اياه

Dandosh

21-11-2003, 09:56 PM

الله يسلمك يا هنلي :) البيبي مو بس بترفس .. بترقص و عاملة ببطني سيرك :)
بالنسبة للدحدح و الله ما بعرف هو لا لا نفس البلوظة بس ان شاء الله لين بتتاكد من صاحبتها ..

لينو خبرينا النتيجة ..:)

زهرة .... عادي انا بفكر الدقة هي الزعتر .. لحد قبل كم شهر بس زوجي حكالي .. هو كان مفكرني زكية .. طلعت مو زكية و لا حتى زهرة .. يا دوب قرنبيطة :)

زهرة القدس

22-11-2003, 12:50 PM

الحمدلله ماطلعت لحالي في من زكانا كثير :D
بس عن جد دندوش ودندون دمكم شربات :p

Dandoon

23-11-2003, 10:13 AM

ليش شو بتفرق الدقة عن الزعتر ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

زهورة .. الفلفل حبيبتي انا بفرمه و بفرم معاه شوية ثوم وبغمرة بزيت زيتون و بملحه .. و يا دار ما دخلك شر .... بس ما تعتمدي هاي الفكرة اختراعي بس بتعجب ابو الشباب كتير :)

LeEn

23-11-2003, 10:27 AM

قولولي شو عوايدكم بالعيد

مرة رحنا عند بيت عمي الله يرحموا وكانو اهل مرات عمي كمان من حيفا هناك وكانوا شاويين لحمة كانت الساعة 11 الصبح!! فبابا قلهم كل الناس راح تعرف انك من شفا عمرو

ما عرفت الكل بيشوي متلنا ولا لع

Dandosh

23-11-2003, 10:32 AM

انا بتذكر انو أيام ما كنا بالكويت كانت ستي الله يرحمها يوم العيد الصبح لازم تعمل صينية لحمة مشوية ! كنت استغرب انه على الفطور العالم رح تاكل لحمة بس حكولي هيك العيد :)
وخاصة عيد الأضحى لازم يكون كل الاكل لحمة وزفر... :)

لكن و احنا هون ماما ما عملت هالعملة مرة او مرتين .. وعادات العيد جدا مملة .. حتى بحس الناي اللي عايشين في بلاد أجنبية بيحسوا بالعيد أكتر منا ..

Dandosh

23-11-2003, 10:34 AM

دندوني :)
الدقة ازكى من الزعتر هاد اللي بعرفه .. بس ما بعرف ايش الفرق !
الله العليم انه الدقة اصلا ما فيها زعتر ... يمكن :)

LeEn

23-11-2003, 10:39 AM

بس احنا لما رحنا كان عيد الفطر

عملتو معمول
احنا ما بنعرف حد ويا ويلها ماما لو عملت احنا ناقصين
بيعجبني الكعك المصري والسوداني روووووووووووووووووعة

Dandosh

23-11-2003, 10:51 AM

ما بتفرق عيد الفطر و لا الأضحى لازم الفطور لحمة مشوية عند ستي الله يرحمها و كل الكبار بالسن هيك أعتقد.. بس الحمد لله ماما ما الها خلق على هيك شغلات :)
حماتي مثلا بتعمل هيك! العيد الماضي افطارهم كان ضلعة مشوية على ما اعتقد أو شي من هالنوع :)

انا ما بعمل معمول ناقصني :) اللي بيسمع بيفكر من كتر الضيوف .. بشتري جاهز مع انه شغل البيت أزكى.. بس ما شاء الله ماما و حماتي بيعملوا و انا متل العادة "سلبطة" :):)

Dandoon

23-11-2003, 10:58 AM

دندوشي مبارح رحت عند اهلك بالليل ( على بالي انهم خلصو المعمول قلت باخد شوي) ..
بس انقلب السحر على الساحر على رأي بلبل و لقيتهم لسا هلا مبلشين و ضليت اسوي معهم لحد ما استويت :)
بس شو ... يم يم عالاااااخر

Dandosh

23-11-2003, 11:26 AM

يمييييي..
انا أشطر منك ;)

رايحة اليوم بعد الدوام :):)

LeEn

23-11-2003, 12:35 PM

انا اشطر منكما
بستناه يجي لعندي

Dandosh

23-11-2003, 12:42 PM

:)
قوية يا لينو ;)

أفنـ أم عمر ـان

23-11-2003, 02:06 PM

شو واصلين بالخرّاف للمعمول وأنا ما معي خبر !

Dandoon

23-11-2003, 02:10 PM

:) حلوة الخراف يا فنو :)

يا ستي انت اللي الك فترة قاطعتينا و ما عم تحني علينا ...شو الاخبار؟؟
عمورة كيفه ؟ و اخوه او اخته ( <<< سؤال ملقوف : عرفتي ولد ولا بنت؟)
و كيف اجواء العيد عندكم.؟ يلل تحملي كتر الاسئلة عشان الغيبة :)

هنلي

24-11-2003, 12:10 AM

احنا العيد عنا في ناس بتوكل لحمه مشويه والمعظم هيك
وفي اشي بيعمل لحمه مطبوخه وبيخلوا الشوربه تتعقد على النار
وفي اشي بيعملوا فسيخ سمك مملح

وكل واحد وعاداته
اما المعمول الله يخلللي ستي ام امي بتعمل لخالاتي كلهن وهي 8 وبطلعللي نصيب
لاني الكبيره في بنات واولاد خالاتي واول وحده وممدلله

هههههه
بس بعرف اعمل معمول يعني ما تقولوا مايله
في حكي كثير عندي بس قاعده بجهز للعيد
وكل عام وانتوا بخير
وان شاء الله نتجمع مع بعض يارب على ارض الوطن

emaratia

24-11-2003, 07:15 AM

عزيزاتي كل عام وانتن بخير

واخواتي اللي في الاردن تعرفوا حدا من دار الدباس رجاء ردوا على

وعود الخير

25-11-2003, 06:17 AM

كل عام وانت بخير يا صبايا هاي أنا ول يقطع شركم نسيتوني على طول.
ربنا يجزيك خير يا دندون رجعتيني لايام زمان انت وين كنت ساكنة في الكويت ردي علي بسرع’ لحمة مشوية انا من يوم تزوجت نسيت هاي العادة ما انت عارفة جوزي غزاوي وبياكل فسيخ اول يوم.
الدقة يا عيوني يا دندوش فعلا ما فيها زعتر شو ها الذكاء ، الدقة الغزاوية مكونة قمح وسماق وفلفل شطة كثييير وكزبرة وما بعرف شو كمان اعتقد كمون و.........

وعود الخير

25-11-2003, 06:18 AM

صبايا فلسطين في كل انحاء وارجاء المعمورة، انا عملت اللي علي وبعثت لكم كعك العيد كنوني وصل والا تصادر على الحدود

Dandosh

25-11-2003, 01:26 PM

وعود الخير كل سنة وانت سالمة ...
المعمول شكله تصادر عالحدود :(.. بس اعتبريه وصل ..
احنا كنا بالكويت في حولي "بحس كل الفلسطينيين كانوا في حولي و الفروانية".. وبالنسبة للدقة .. لا ذكاء ولا شي.. استغرق الموضوع مني ساعتين و انا افحص الزعتر و الدقة عشان أعرف شو الفرق.. و يا ريتني كنت متأكدة :)..

إماراتية الغالية كل عام و انت بخير
و الله عائلة الدباس عائلة كبيييييييييييييييييرة ما شاء الله .. يعني لو عم تدوري على حدا منها صعب يتلاقى بسهولة !
بصراحة انا ما بعرف منها حد شخصيا و متل ما قلت لك العائلة كبيرة يعني مو كل واحد بيعرف التاني متل عيلتنا :)

أفنـ أم عمر ـان

25-11-2003, 04:23 PM

والله يا دندوش ما عرفت ولد ولاّ بنت لإنه هون السونار بس مرتين , أول مرة بالرابع وبيكتوبولك بورقة الموعد اللي ببعتوها على البيت (لاااااااااااااااااا تسأل عن جنس المولود) قال بكون صغير وما بشوفوا
والسونار الثاني بالشهر التامن
بس بتعرفي ما كتير فارقه معي أعرف !!

هو بيني وبينك الطفل الثاني ما بفرق بالمرة ولا بإشي ههههههههههههههه:D
بس أول واحد إله بهجة كتير.

العيد عنا يا ستي عادة ما إله طعم ولا ريحه

بس أنا السنة عملت عيد لحالي , المعمول معمول , والقهوة السعودية قهوة (ما بنشرب قهوة إحنا بس عملتها عشان أشم الريحة ههههههههه)
وزينت البيت , وشخصت أنا وعمر وأبو عمر وقعدنا :D

وما بدي نتغدى برى , حابة كل اليوم نقضيه في البيت مع بعض , فعاملة للغدا دجاج محشي(هاي من طقوس ماما يوم العيد)

وعود الخير

25-11-2003, 05:02 PM

dandosh
تصدقي انا كنت جوالة في الكويت من الشرق للفروانية للنقرة والشعيبة والفحاحيل والصباحية وابو حليفة وختمتها في خيطان بس حولي ما كانت في الجدول

في الاردن كنت في الجبل الأخضر. مش باقولك ولا ابن بطوطة في زمانه.
هنلي وينك حبيبتي ديري بالك تكوني عم تاكلي كعك العيد ولحمة مشوية ربنا يستر؟؟؟؟

Dandosh

25-11-2003, 11:26 PM

فنو يا حبيبتي الله يرضى عليك ركزي .. دندون اللي عم تسألك مو أنا ..

هاد بالأسماء كيف لو تشوفينا عالطبيعة بتلتخمي رسمي :)

وعود!!
ليش كل هاد خير ان شاء الله :)

(سمية)

26-11-2003, 04:32 AM

ماشاء الله عليكم ...تصدقون اول مرة ادخل هذا الموضوع...بس ماشاء الله عليكم ..كلكم سمن على عسل ..
بس تدرون..احنا عندنا بالخليج الفطور اول يوم العيد مو مثلكم ضلع مشوي ولا كتف ...احنا ما نعترف الا بخروف مفطح مع كبسة محترمة..وعقب نهبس بالخمس...
وطبعا هذا يكون الساعة 8 ونص او تسع الصبح...

وعود الخير

26-11-2003, 11:48 AM

عزيزتي سمية
صحتين وعافية على قلبك وقلب عيالك وابو العيال، ينعاد عليكم بالسعادة انشاء الله وراحة البال بس ما عرفت العيد الكبير شيكون الفطور العادة عندنا في فلسطين الفطور المعلاق(الكبد والرئة وتوابعه)

أفنـ أم عمر ـان

26-11-2003, 01:02 PM

دندوش هيك كتييييييييييييييييييييييير

انا كنت متأكده إنه إنت اللي بتسألي !!! خاصة إني لما دخلت الركن كان اسمك فوق

عن جد لخمتوني

هذا توأم وبتلخبط فيكم حتى بدون ما نشوفكم !!!!

أفنـ أم عمر ـان

26-11-2003, 01:04 PM

يا جماعة , شو ضلع وما ضلع , وخروف وكبسه !!

عن جد بتحكوا هذا على الفطور الصبااااااااااااحي!!! ولا قصدكم الغدا !؟

بتزكر كم مرة ماما عملت نهفات إخوانا في مصر قال الفطور فسييييخ :D

لولا خايفة على زوجي يغمى عليه ولاّ كنت بدي أعملها السنة !

أفنـ أم عمر ـان

26-11-2003, 03:13 PM

كم مرة يا دندوش قلتلك هالكلام .... ما بتردّي

ههههههههههههههههههههه

فلسطينية

29-11-2003, 11:07 PM

W: W: W: W: W: W: W: W:
مساء الخير على الجميع
انا رجعت اليوم من بيت حماي (لاني عيدت عندهم)
وحبيت اول شي اعملة في البيت اني اهنيكم بالعيد
ينعاد علينا وعليكم يا رب وانتو جميعا هاديين البال وفي احسن حال امين
اما احنا بالنسبة للعيد طبعا في البيت بنستقبل الناس ليهنونا بالعيد ويعزونا بوفاة حماتي الله يرحمها لانه هذا اول عيد النا بعد وفاتها ومن عادة الاقارب هون عند بيت حماي يعزوا من جديد في اول عيد بعد الوفاة ادعوا معي ربنا يرحمها ويسكنها فسيح جناته (لانها فعلا تستحق ذلك) اللهم امين يا رب العالمين
اما بالنسبة للمعمول انا كل سنة بستنا الوالدة الله يعطيها العافية ويطول عمرها بتبعتلي اياة بس السنة بيني وبينكم حبيت افرجي شطارتي شوي وعملتة لوحدي;)
بس الحمد لله اعملتة وكان طيب كتير وربنا ستر :D

المبدعه

30-11-2003, 10:32 AM

ياعيني على فلسطين وأهلها الطيبين

أنا ماني من فلسطين ولا من الإردن ودخلت الموضوع حب إستطلاع والله قريته

مره أضحك ومره أبكي الله يسعدكم ويبسطكم وينصركم على اليهود المغتصبين

سوالفكم حلوه وبصراحه تجري الريق ..

أنا من السعوديه ..
ياليتني دريت عن دندون ولا دندوش مين فيهم إللي راحت العمره ...

أنا كنت في الحرم الخميس إللي قبل الأخير والله كان مره زحمه وكانت الشوارع مليانه
بالمصلين .. وسبحان من جمع البشر من كل مكان ووحد ألسنتهم بذكره ..

إللي تجي للسعوديه للعمره صدقوني ماراح تغلب بيت الله فيه خير وأهله كلهم خير وبركه
والله يبلغ الجميع العمره والحج ويمتعكم بالأمن والأمان ويزيل الهم عن قلوبكم جميعاً

وكل عام وأنتوا بصحه وسلامه .. وسلام حار ملهلب لهنلي الله يسعدك ويهنيك يارب
والله حبيتك من كل قلبي في الله ....

تحــــــــــــــياتي للجميع

وعود الخير

30-11-2003, 12:10 PM

أختى المبدعة
حياك الله وأهلا وسهلا بك ، وي ألف مرحبا بأهل السعودية.
هنلي،،،،،، وين اخبارك وين ، شو كل هذا تقل ما تخفي شوية وتتكرمي علينا بكلمة.

Dandoon

30-11-2003, 03:33 PM

السلاااااااااااااااااااااااااااااااااااام عليكم يا جماعة الخير :) :)

وكل عام و انتو بالف الف خير ..
والله يمسيكم بالخير ..

و معلش انا هلا عندي شغل و حبيت اسلم ... فتصبحو على خير :)

Dandosh

30-11-2003, 03:45 PM

دندون.................... ؟

خير ... ؟ !!!

Dandoon

30-11-2003, 03:47 PM

لا خير اللهم اجعله خير يا دودو...

بس شكلي خلص انهبلت :)
العوض بسلامتك ...

أفنـ أم عمر ـان

30-11-2003, 07:14 PM

الفلسطينية وغنت بألف خير يا رب

أفنـ أم عمر ـان

30-11-2003, 07:15 PM

غـ = إ

هنلي

01-12-2003, 10:49 AM

كل عاااااااااااام وانتوا بخير والشعب العربي كله بسلام ان شاء الله وربنا يبعد اليهود وكل اشي سيئ عن بلادنا وبلاد المسلمين قولوا امييييييين
طيب بعد التحيه والسلام
نبدا بحلو الكلام -عاد بتقولوا لسانها صار بينقط عسل من كثر الحلو اللي اكلته على العيد-هههههه
طيب
كيف حالكم واخباركم دندووووش ودندووون وافنان ووعود الخير ......... وكل اللي في المنتدى من مشرفات وعضوات وزائرات
على فكره انا استغربت اليوم ردي ما طلع شكلها الخدمه كانت بطيئه لاني عايدت عليكم ورديت بس ما طلع يلا مش مشكله
والله اني اشتقتلكم كثير كثير وخاصه لانها قطعت الخدمه عنا لانه في امطار كثيره وصواعق لما يكون المطر كثير بتنقطع الخدمه
بس صلحوها بس كانت بطيئه
على فكره اختي وعود هيني هون ما تخافي علي زي البساس(وهي القطط) بسبع رواح
وحبيت اعايد عليكي وعلى كل اخواتي كل سنه وانتوا بخير
وكمان اختي المبدعه سلام خاص الها ولاهل السعوديه لانهم زي اهلي انولدت قيها وتربيت فيها 13 سنه وخاصه على ذكر العمره كنا نروح في رمضان وياالله شو الواحد يببكي لما يشوف الناس متوحدين ومتجمعين في الحرم الواحد بينشرح قلبه
الله يطعمني حجه انا وجوزي ان شاء الله يارب
وسلامي للجميع
رح ارجع بعدين لاني عندي حكي كثير
بس اليوم رح اروح عند ماما بروح من الصبح لحد الليل فراح اشوفكم بكره ان شاء الله
يلا سلام