بنات مصر: ارجوكم افيدونى فى التشطيبات واسعارها

[ام توتة 2008]

اخواتى الحبيبيات
باختصار كدة
انا شقتى 170 متر
وع المحارة
وناوية انزل مصر اشطبها
عاوزة اعرف كل كبيرة وصغيرة فى عالم التشطيب
وياريت اللى يعرف اسعار اى حاجة يقولى

والوقت اللى بتاخده الحاجة فى التشطيب
يالا همتكم معايا بقى
من اول الابواب والشبابيك
لغايه المواسير وفيش الكهربا
والسيراميك والبياض طبعا

[FOFFA]

مبروك عليكم الشقة ...وربنا يكون في عونك
التشطيب من أصعب الأمور...والصنايعي يقولك النقاشة حتكلف 8آلاف..وتخلص في أسبوعين
واللي بيحصل إنه يفضل يسحب دفعة تحت الحساب..ورا دفعة...تلاقي نفسك دفعتي 15 ألف
والشغل يخلص بعد 3 شهور
وصاحبتي أشترت سيراميك وبورسلين للفيلا ب 28 ألف...وتاني يوم المبلط جاب عربية وحمل عليها السيراميك وإختفى...فات سنة ولم يتم القبض عليه
ياريت تكون أجازتك في مصر طويلة...وإعملي باب خارجي للشقة فيرفورجيه..ولازم زوجك يتفرغ للعمال
وهو اللي يفتح لهم الشقة...وآخر اليوم يقفلها بنفسه
أما من جهة التكلفة فتختلف حسب مستوى التشطيب

[شذىالعطور]

مبارك اختى

الى ركن ساعدونى ستجدى المساعدة اكثر

[≈ احـتِـوٍآءْ ≈]

حبيبتي ام توته

مبارك عليك الشقة
جار البحث لك عن أسعار مفصلة
بس نصيحة اكيدة ومؤكدة الاسعار تتضاعف بداية من شهر 6 و7 و8 و9
عودة المسافرين من الخارج تجعل الاسعار تزداد وأغلب العمال يعرفون
معاد نزولهم كما أن الضغط على العمال اكبر
تعرفي أغلب الافراح بالصيف والطلب يزداد عليهم
فلو هتشطبي حاولي يكون بالشتا مش الصيف
كمان معلومة مؤكدة أسعار الاسمنت ارتفعت في شهر واحد
150 جنية في العبوة الواحدة
كمان لو انتى في القاهرة نفسها سعر العامل اغلى يعنى لو انت
من محافظة خارج القاهرة هاتى العمال من هناك ارخص كتير
القاهرة اسعارها الضعف ويمكن اكتر
بالنسبة لدهان الشقه حسب راحتك ممكن تعملي البطانه الداخلية نوع غالي
وممكن نوع رخيص والدهان الاخير بس من النوع الغالي وده هيوفر لك كتير
الابواب والشبابيك حسب اختيارك وهجيب لك الاسعار بكرا ان شاء الله ان قدرت
السيراميك لاتشتري من معارض في شون ليها اماكن معروفة في بركة السبع
والعاشر من رمضان عندها سيراميك ارخص وتشكيلات كبيرة
ومعلومة هامة بعض المعارض الكبرى تبيع السيراميك على انه درجة اولى
وهوا اصلا درجة تانية !!!
بالنسبة للشون كله هناك مقسم من الدرجة الاولى للثالثه وممكن متقدريش
تفرقي بين الاولى والتانية لان تقريبا لايوجد فرق
فيش الكهرباء تبدأ من أول 3 جنيه الى الرقم اللي تحبيه
المقابض للابواب والشبابيك من اول 25 الى مافوق
بس استنى بكرا اجمع لك معلومات اكيدة


لي عودة مفصلة اكتر :)

[زوووزا]

السلام عليكم ورحمه الله وبركاته
الاخت الكريمه ام توته ربنا يباركلك فى توته واخواتها ومبروك عليك الشقه ربنا يجعلها قدم السعد عليك
انا ياستى زيك بالضبط نفس الكلام قاعده بره مصر وشقتى تقريبا نفس المساحه اقل حاجه بسيطه وكنت اخداها عالطوب واحترت نفس حيرتك دى بصى يا ستى تجربتى
لو انت بتنزلى اجازه قصيره زي كل اللى بيسافرو يعنى شهر او شهرين بالكتير يبقى ما ينفعش انت اللى تشطبيها بنفسك عشان الوقت مش حيكفى خالص الا اذا كان لك ناس فى مصر ثقه جدا حيتابعو الشقه وانت بره بس انها تخلص فى اجازه واحده صعب جدا
احنا الاجازه اللى فاتت قررنا نبدا التشطيب بنفسنا وقلنا للسباك يروح والاجازه خلصت والسباك ما خلصش لانه طبعا ماراحش تانى يوم حطيلك اسبوعين كده لما يفكر يهتم وطبعا هو عنده كل مره ذريعه للتاخير
المهم الاجازه دى بأه قررنا نعطى التشطيب لواحد مقاوله انت شوفى واحد ثقه حد مجربه او ناس معارفك يدلوكم عليه وتقاولى معاه عالشقه كلها يسلمهالك عالمفتاح وده اللى احنا عملناه عطيناها للمهندس اللى اشترينا منه وصراحه هو كسبان اكيد حلو بس بتشتري دماغك من الهم ده كله ولو لك حد فى مصر يبص على الشقه كل فتره يكون كويس وعلى فكره انت بتقعدى معاه قعده تطلبى كل اللى نفسك فيه من اول توزيع الكهربا والفيش عالحيطان لحد الالوان والاشكال والدهانات والجبس وكل حاجه وهو بيحسب الحسبانه وبيعمل مقايسه مفصله وبيديلك السعر النهائى وطبعا احنا عارفين انه كسبان بس صراحه اريح كتير من غلب الصنايعيه
وبالنسبه للتكلفه طبعا حسب اللى انت بتطلبيه بالضبط كده فى ابو جنيه وابو الف يعنى انا طلبت حاجات معقوله الدهان جوتن السراميك فى حدود 30-40 جنيه الشبابيك الومينتال وفى كرانيش بسيطه والحمامات ايديال ستاندرد تقريبا اتكلفت حوالى 90-100 الف بس انا عالطوب مش المحاره زيك والمهندس هو اللى بيفاصل ويشتري انت تختاري الالوان بس يارب اكون افدتك ربنا يكتبلك الخير وييسرهولك ويوقعكم فى حد كويس يارب
والسلام عليكم ورحمه الله وبركاته

[ام توتة 2008]

فوفا ربنا يطمنك
انا كنت عشمانه اشطب وانقل كمان هههه

عهد الامانى انا فى انتظارك وياريت متتاخريش عليا
زووزا
فكرة حلوة ببس انا عاوزة يبقى عندى تصور عن الاسعار
عشان اعرف احدد هننزل امتى

[زوووزا]

السلام عليكم ورحمه الله وبركاته
الاخت ام توته
انا جبت لك الاسعار اللى المهندس مشطب لينا بيها بس دى شامله الربح بتاعه كمان يعنى لو حتشطبى بنفسك السعر اقل
الكهربا شامله كل حاجه ماعدا وش الكهربا ب 8000ج
الصحى للحمامات والمطبخ بدون طقم الصحى والخلاطات 2875ج
المحاره المتر 18.5ج
السيراميك لو المتر35 جنيه كليوباترا يبقى يتكلف 80 جنيه بالمصنعيات والخامات
نجارة الباب خشب سويدى 575 ج ودهان الباب لاكيه ب86 جنيه
المونيوم الشبابيك والبلكونه المتر حوالى 800جنيه
فورم جبس المتر 17.5ج
النقاشه 2سكينه معجون +2 وجه بلاستيك جوتن المتر ب17.5
شبابيك حديد على المنور الشباك ب138ج
اسعار السيراميك فى السوق عندك من اول 20 ج لحد 100 واكتر المعقول رويال او كليوباترا فى حدود 30-45 ج
اطقم الحمامات عندك اشهر حاجه كليوباترا وديورافيت وايديال ستاندرد وفى ماركات ارخص كتييييييييير
طقم ايديال ستاندرد ارخص حاجه ب 850 ج وفى اغلى طبعا والبانيو ارخص حاجه ب700ج تقريبا
خلاطات الحمامات ايديال ستاندرد ل3 حمامات اتكلفت 2500ج بس طبعا فى انواع ارخص من كده بكتير
وطبعا المهندس فاصل فى الحاجات دى وجابهم ارخص من اللى مكتوب
يارب اكون ا فدتك وبالتوفيق
والسلام عليكم ورحمه الله وبركاته

[≈ احـتِـوٍآءْ ≈]

الاسعار متفاوته من مكان لاخر بشكل كبير
وتقريبا الخشب الويد المتر 1800
الاسمنت 500 للعبوة الواحدة
الدهانات حسب طلبك في من اول 75 الى مافوق
وفي الجرانيت كمان
الفيش للكهرباء من اول جنيه وربع
المقابض من اول 15 جنيه للمقبض
السيراميك من 30 للمتر واشكال حلوة
اطقم الحمام اللى شفته ديوروفيت ايطالي
بيبدا من 1500
البانيو يبدا من 300
لو عرفت اى معلومة تانيه اكيد هبلغك
وربنا يوفقك حبيبتي