"عروسات المستقبل تعالوا اقولكم".. جزء ( 8 )

السلام عليكم
غروسات المستقبل الحلوين نهاردة نكمل جزء 8
انا فرحانة اوى عشان حاسة اننا بنستفيد سوا ومعنى ان الجزء بيخلص ونبتدى جديد
اننا كلنا مرتاحين ومبسوطين فى الموضوع ده وبقينا اصحاب واخوات
كمان فرحانة ان فى عرايس كتير بقوا معانا يعنى رنا وزكية وفرفورة و alzaa وايمان مونى ونورا ,, مش عايزة انسى حد وطبعا غير اصحاب الموضوع كل البنوتات القدماء

تعالوا نكمل نهاردة موضوع التوتر قبل الفرح

نهاردة حنقول حاجات بسيطة نعملها تهدى شوية من توترنا وعصبيتنا قبل الفرح

وهى حاجات عملية مجربة لان قبل الفرح التوتر والضغط بيبقى كبير حتى لو كل حاجتك خلصت وكل حاجة مظبوطة بردو بيفضل قلق وتوتر وده حاجة طبيعية
لانك داخلة على مرحلة جديدة فى حياتك

طيب نيجى بقى للخطوات عملية اللى نعملها قبل الفرح عشان نريح اعصابنا خاصة فى الاسبوع الاخير

زى ما اتفقنا اننا مفروض كل حاجة فى شقتك وطلباتك والفرش وغيره تكون خلصت قبل الفرح باسبوع يعنى مرحلة التجهيز تكون خلاص خلصت وتبتدى الاسبوع الاخير اللى قبل الفرح يبقى بتاعك تريحى نفسك وتهتمى بنفسك ...

ومتفضليش تقولى اروح البيت اطمن على ان كل حاجة مظبوطة .ز اروح بنسى القاعة عشان اتاكد ان الكوشة والبوفيه تمام ... اروح اجيب حاجات ناقصنى ...

لا كل ده خلاص يننتهى قبل فرحك باسبوع اللى خلص خلص واللى لسه فاضل اما تخلى حد يعمله ليكى او تاجليه لان مادول اساسيات بيتك وحاجتك خلصت مش لازم تدورى على حاجات فرعية وانتى مفروض من الاول عارفة ميعادج فرحك يبقى تكونى عاملة زى جدول زمنى لكل حاجتك وانك تخلصيها فى وقت بدرى مش تيجى اخر اسبوع تلفى فى الشمس وبشرتك تتعب وتسمرى وجسمك يبقى مرهق ؟؟؟؟؟

طيب دلوقتى احنا خلاص خلصنا كل حاجتنا وفاضل على الفرح اسبوع نعمل ايه عشان التوتر والقلق ؟؟؟؟

اول حاجة امنعى تماما شرب القهوة والشاى ونسكافية ليه ؟؟
دول منبهات يعنى بيخلى جهاز عصبى فى حالة منتبهة يعنى مع كتر شرب حاجات ديه يوميا بهدف انك تبقى فايقة ومش نايمة بيخلى جهاز عصبى بتاعك مشدود بالتالى تبقى متوترة وكمان بيسد شهية الاكل يعنى مش بتاكلى طبعا كل ده بيتعب جسمك وبشرتك وتحسى بارهاق لانك بتشربى حاجة مش مفيدة وتمنعك انك تاكلى المفيد ..

تانى حاجة :: بدل القهوة ومنبهات ديه اشربى الصبح كوب لبن وممكن عليها ملعقة عسل وقبل ما تنامى نفس الكلام طبعا اللبن مفيد جدا لجسمك والعسل مغذى طبيعى وكمان قبل النوم بيهدى الاعصاب عشان كدا تلاقى الاطفال قبل ما يناموا بيشربوا اللبن الدافى

ثالث حاجة ::: امنعى المشروبات الغازية عشان بتعمل غازات فى البطن وتلاقيها منتفخة وتحسى انها كبيرة ولما تلبسى فستان الفرح تحسى انها بارزة فتتضايقى وتتعبى كمان بتزود عسر هضم انتى تجنبى كل ده وابعدى عن كوكا وبيبسى ختى لو دايت استبدليها بعصير على الاقل العصير الطبيعى مغذى ليكى جدا ولبشرتك ويعوض نقص ماء اللى فى جسمك وكمان مش حيتخن زى البيبسى وكوكا وبيهدى الاعصاب

رابع حاجة ::: يوميا قبل ما تنامى دش دافى واستخدمى شاور ريحته انتى بتحبيها ده بيفرق لانه بتحسى براحة اوى وعدوء وريحة حلوة يخليكى حاسة انك عايزة تنامى فى هدوء

خامس حاجة ::: العبى يوجا طبعا حتقولى يوجا ايه ياهند فى الوقت ده انتى فاضية

حاقولك والله اليوجا اهم وقت ليها هو الوقت ده مش حاقولك تمارين وغيره لا مطلوب منك حاجة بسيطة زى اللى كنا بنشوفها فى فيلم عائلة زيزى لما كان احمد رمزى بيحب جارته اللى بتلعب يوجا فاكرينها ؟؟ فاكرين كانت بتعمل ايه كانت بتقعد على الارص وتحط ايدها على رجلها وتقعد ساكته من غير كلام او تمرين تانى لما كانت بتنام وترفع رجلها على الحيطة

فايدة تمرين ده انك بتهدى اعصابك خلى الاوضة مفهاش اضاءة جامدة ونامى على الارض وارفعى رجلك على الحيطة خليكى كدا ربع ساعة او اكتر حتلاقى نفسك نمتى واعصابك هدت .. انا مجربها وبتنفعنى لما اكون عايزة افصل دماغى من التفكير الكتير

سادس حاجة :: فاكرين موضوع الزيوت العطرية ده بقى وقته .. بسرعة املى بانيو ماء دافيةو وعليه زيت عطرى تحبيه والافضل لافندر او كاموميل او نعناع لانها من زيوت اللى بتهدى الاعصاب جدا وتزيل التوتر حطى فى ماء واقعدى زى ما تحبى وغمضى عينك اعمليها حتى مرة فى الاسبوع ده

سابع حاجة ::: بلاش تليفزيون وكاسيت فى الوقت ده عشان مش تزودى دوشة جنبك يعنى ريحى دماغك من الناس والدوشة ومكالمات وغيره نامى على قراءن احسن اختارى شيخ بتحبيه ونامى على صوت قراءن بلاش تقعدى تسمعى ناس بتكلم وكدا

ثامن حاجة ::: الاسبوع ده بليز امنعى اكل تيك اواى وفاست فود خليكى فى كل ماما واكل البيتى عشان اولا اكل مطاعم مليان دهون وسعرات زيادة بلاش تدخليها جسمك وكمان اكل مش مفيد وحتاكلى حاجات نشويات وخلاص مفيش بروتين ولا فيتامين كنمان اوقات بيبقى بيعمل انتفاخ وتعب لمعدتك وممكن يكون الاكل مش نظيف لاقدر الله يعمل مشاكل ليكى ابعدى عن الاكل اللى برا البيت كلى اكل ماما حيبقى انظف واحسن واضمن ومغذى وده المهم
مش ليكى نفس تاكلى يبقى خليكى فى فاكهة وعصاير طبيعية

دول اكتر حاجات اهتمى بيها قبل الفرح حتلاقى اعصابك حتهدى وتطمنى وتوكلى على الله وافرحى واعرفى انك عروسة وحتبقى زى القمر مفيش عروسة بتطلع وحشة مجرد الفستان الابيض بيدى بهجة وجمال لللبنت

**drhappy68** · 01-08-2009, 10:13 PM

تسلمى يا قمر على الموضوع الرائع
اتسفدت من موضوعك كتير ....رغم انى مش عروسة حاليا

**sutsut** · 01-08-2009, 10:31 PM

مبسوطة قوى انى سبقت كل نجوم المنتدى بالردالمرةدى.وبقول لهنودة اية الجمال والعظمة دى ياست البنات.ايوة كدة ابدعى واحنا معاكى.بقولك اية يا هنودة اخبارجوزك اية؟ماتنسيش تعزمينى فى الفرح انا من المنصورة يعنى فى الشارع اللى وراكى ههههههههههههه

**sutsut** · 01-08-2009, 10:38 PM

الزااااااااااا......أنااسمى رناومتجوزة وعندى بنتين وولد بس مش كبيرة قوى اناموليد85 يعنى عندى24 سنة.عقبال منفرح بيكى انتى وكل عرايسناالحلوين ونشوف ولادكم كمان......

**انا اموله** · 01-08-2009, 11:23 PM

مبروك يا نوده الجزء الجديد وان شاء الله ع طول بنجاح وروقان انا كنت حطيت عاجل الى هنوده بالصفحه الرئيسيه وما ردتيش علي ياريت تشوفي الموضوع وتجاوبيني ربنا يوفقك ودمتي في حفظ الله شكرا

**زكية 300** · 01-08-2009, 11:37 PM

الف مبروووك هنودة حبيبتي علي الجزء الجديد وعقبال المية يارب انا فرحت اوي لما شفته بجد جميل وفيه معلومات جميلة وهايلة ان شاء الله استفيد منها اما ابقي عروسة ان شاء الله ادعوولي لاني لسه ما اتخطبتش وانا كمان فرحانة ان انا بقيت صاحبتكوا ومعاكوا في الموضوع الجميل دة وفي المنتدي كمان يارب تدووم المحبة ديه داءما بين كل بنات المنتدي وبصراحة يا هنوودة انتي بتجمعينا عندك بمواضيعك الجميلة يارب داءما تكوني متالقة ومتجددة

**slavotta** · 02-08-2009, 12:33 AM

الف مبروك على الجزء الجديد و بجد كلامك حلو اوى هحاول اطبقه لما اكون مشدوده مش شرط ايام الفرح و لما اجى اتجوز ان شاء الله

**سماح عزت** · 02-08-2009, 12:42 AM

عظمة على عظمة ياست على راى الى بيقول ههههههههههه ايوة كدا كدا حسينا ان نودى رجعت لينا بالسلامة تانى ربنا مش يحرمنا منك ... مليون مبروك يا نودى على الجزء الجديد وطبعا من غير مبالغة متالقة كالعادة

يارب يدمها عليكى نعمة موضوع جميل جدا وانا عن نفسى ناويه ان شاء الله احطه ادام عينى عشان لما اغلط واخالف النصايح دى افكر نفسى بيها احسن بعيد عنك اختك فى اقل المواقف بتبقى شايلة الدنيا فوق دماغها ومتعصبة وحالتى بتبقى صعبة ربنا يسترها علينا كلنا

**alzaa** · 02-08-2009, 12:45 AM

الف مبروك هنودة علي الجزء الجديد ووعد والله اول ما يجي الاسبوع الاخير بتاعي هعمل كدة انشاء الله ويارب يجي بسرعة
[QUOTE]رنا ياجميلة كنت فاكراكي لسة مجوزتيش بس يالا طلعت اوت ربنا يخليلك اولادك وعقبالي لما يكون عندي اولادي انتي اكبر مني بسنة عندي 23

هنودة حبيبتي معلش كنت عاوزة اسئلك علي كام حاجة كدا بصي يا ستي
1 زيت الوز المر والحلو اية استخدماتهم وينفع يتحط علي الوش يعني لو في ماسكات ليهم قوليلي انتي قولتي زيت الوز المر بعد الشاور احطة كمان علي وشي والايد
2 كريم جليسوليد دة كان لية وصفة كنت عاوزاكي تقولي عليها لان عمالة ادور علي الوصفة بتاعتو ومش عارفة فين ويستخدم علشان اية اكنت عاوزاكي تقوليلي علي كام اسم بيرفيوم حلو ومجرباهم معلشي طولت عليكي اوي وعارفة ان اسئلتي انتي كنتي كدبة ردها بس عاوزاكي تجمعهولي ومتنسيش علي كريم الجليسوليد انا جبتة ومش عارفة دة علشان اسمرار بين الفخدين ولا الركبة

**سماح عزت** · 02-08-2009, 12:46 AM

المشاركة الأصلية بواسطة sutsut

الزااااااااااا......أنااسمى رناومتجوزة وعندى بنتين وولد بس مش كبيرة قوى اناموليد85 يعنى عندى24 سنة.عقبال منفرح بيكى انتى وكل عرايسناالحلوين ونشوف ولادكم كمان......

ما شاء الله عليكى يارنا انا برده كنت عاوزة اعرف اسمك ربنا يبارك لكى فى اولادك ويجعلهم ذرية صالحة للاسلام والمسلمين ويرزقك برهم

**ملوكة 12** · 02-08-2009, 01:12 AM

ألففففففففف مليووووووون مبروك يا هنودة على الجزء 8
عقبال المليون واحنا بردو مع بعض احلى الاخوات ان شاء الله
وكالعادة كلامك صح مليون فى الميه

**ايمان مونى** · 02-08-2009, 01:37 AM

هنودة يا حبيبتى الف مبروك على الجزء الجديد حلو اوى زى ما معودانا دايما بكلامك الجميل ده والله انا بستفيد منه كتييييييييييير ودايما كده يا رب تمتعينا بحاجاتك الحلوة و مايحرمناش منك ابدا والله المنتدى مش منور غير بيكى انتى يا قمر وعلى فكرة انا عاوزة اقولك ان انتى كنتى السبب فى اشتراكى فى المنتدى اول ماقريت ليكى اول جزء بقيت بدخل المنتدى علشانك لحد ما اتشرفت بانى اكتبلك وكمان عاوزة اشكرك لانك رحبتى بيا فى اول كلامك و الله مش غريب على عسل زيك معلش طولت عليكى بس اعذرينى من حبى فيكى من غير ما اشوفك حبيتك والله مش عشان انا بستفيد منك لالالالالالالالالالالالا ده حب فى الله ويارب دايما تكونى بخير وسعيدة مع زوجك
مع السلامة يا عسل وتقبلى مرورى

**pink_heart** · 02-08-2009, 03:23 AM

نوده ياقمررررررررر مليون مبروك على الجزء الثامن وكالعاده موضوع جامد جداااااااااااااااااااااااااااااااااا ومهم اوى

"عروسات المستقبل تعالوا اقولكم".. جزء ( 8 )

"عروسات المستقبل تعالوا اقولكم".. جزء ( 8 )

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق