السلام عليكم ورحمه الله وبركاته
طبعا كالعاده محتاجه ارائكم وخبراتكم للمره مش عارفه الكام وربنا يخليكم لنا ويجزاكم كل خير على المعلومات اللي باخدها منكم دائما
الاول بعتذر علشان بكتب باللغه العاميه شويتين لان لينه على ايدي وبكتب بسرعه سامحوني
طبعا دائما بسالكم علي ما يخص اولادي من مشاكل
عمار والاستاذ لؤي ومشاكله في المدرسه
ولينه ومشكله اكلها
وريان كمان كان عنده مشكله بس دلوقتي في حاجه اكبر من مشكله ريان حأجلها شويه حشوف حعرف احل مشكله ريان ولا لا
مشكلتي دلوقتي مع الاستاذ عمار والصلاه
عمار دلوقتي عمره ست سنوات ونص
وابتديت اعوده علي الصلاه هو عارف الصلاه بس انا عمري ما ضغطي عليه الفتره اللي فاتت وكنت بسيبه هو وريان براحتهم صلوا معايا صلوا مصلوش خلاص راحوا مع ابوهم الجمعه مرات قليله وهكذا على اساس لما يوصل عمار سبع سنين ابدأ مع بجد مثل الحديث اللي بيقول فيما معناه " علموهم الصلاه لسبع واضربوهم عليها لعشر " طبعا مش متأكده من صح نص الحديث او صحه روايته
المهم بدءت مع عمار وفهمته وقولت له انت كبرت خلاص ولازم نبدأ نصلي بقي وريان كمان بس انا في نيتي مش حشد علي ريان لانه اصغر عامين
طبعا مع جو المدرسه والرجوه قبل العصر
اتعلموا الوضوء وعلمتوهم التشهد وبدوا الحمد لله
بس بدء الكسل والدلع من عمار بشكل اصعب من ريان يعني ريان احيانا بيصلي بمجرد انه يشوفني اصلي ممكن من غير وضوء وانا بسكت بقول مش مشكله مش لازم اشد دلوقتي بس بيقف للاربع ركعات ويقرأ كويس وهادئ في قراته
لكن عمار وما ادراكم مع عمار واللي بيعمله في الصلاه وده لب الموضوع
طبعا عمار ماشاء الله عليه بيحفظ قرآن كويس وماشي كويس في الحفظ ربنا يبارك له
بس بدء بقي دلع فظيع في الصلاه
يقرأ السور بسرعه ومايكملش يركع وركبه مثنيه يتكلم وهو بيصلي لو شاف اي حاجه يطلع لسانه لريان وهكذا بقي بلاوي كتير
يشيل رجل وينزل رجل يتلفت شمال ويمين وتعبت من الكلام مع
مش عارفه اشد معه ولا لا
يعني ايه المطلوب مني اوجه له الصح والغلط بالنسبه للصلاه في السن ده
يعني بدءت معه يصلي اسبوعين الاول صلاه الصبح بس
وقولت له كل اسبوعين حنزود صلاه بس بقي الموضوع معه صعب اوي
بيصلي بالعافيه والحركات اللي قولت عليها في كل فرض مع انه بيعرف يصلي كويس وبهدوء لما كان بيصلي لوحده
دلوقتي مش عارفه اوجه ازاي ايه يعمله وايه منيفعش وايه ممكن يتأجل تعلمه لما يكبر شويه وخايفه اني اسيبه يدلع كده ياخد انه ما يتقنش الصلاه
مش عارفه اعمل ايه لازم يصلي كل الفروض
اسيبه يتدلع في الوقفه والركوع والسجود بلاش اشد عليه لاني احيانا بصمم واخليه يعيد الصلاه
مش عارفه والله اوجه ازاي لانه الكبير وعايزه يكون قدوه لاخواته ولاهميه الصلاه مش عايزة يكون التقصير من الصغر علشان ربنا يكرمني فيه وفي اخواته ويكون من الملتزمين بالصلاه
الروابط المفضلة