السلام عليكم ورحمة الله وبركاته
ازيكوا يا بنات يارب تكونوا كلكوا بخير واولادكوا فى اتم صحة وعافيه
انا النهارده حبيت اعمل الموضوع دى علشان نجمع فيه كل افكارنا عن الطرق المناسبة لتنميه مهارات الاطفال باللعب
انا سالت السؤال دى من فتره لما كان ابنى عنده سنه والاخوات فادونى كتير وخصوصا الاخت ام سيف عن العاب الشحن والتفريغ والمكعبات والرسم والالوان والسيارات
والحقيقه انا عملت كل دى وهو دلوقتى بيستمتع انه يشخبط على كراسه الرسم جدا وطبعا جبت له الوان خشب علشان مش تاذيه لو حطها فى فمه بس لاحظت ان ابنى ميال اكتر للحاجات الهندسيه
يعنى فى البدايه هو بيموت فى المكعبات فاحضرت له مكعبات كتير وما شاء الله عليه بقى بيركبهم بطرق مختلفه
وبعدين احضرت له البازل الهندسى علشان يقدر يفرق بين الالوان والاشكال وقدر يعملهم كلهم صح وهو عنده سنه وشهرين تقريبا
ومن 4 شهور احضرنا له بازل الحيوانات والفواكه بس دى كان على امل انه يقدر يفرق بينهم ويعرف اسمائهم ولكن للاسف فشلت انى اعلمه ينطق اى حاجه منهم لانه لسه رافض ينطق اى كلام غير بابا وماما وباى :-)
بس ما شاء الله قدر يحط كل حاجه فى مكانها الصح بالظبط بناء على المساحه الفاضيه
ومن اسبوع احضرت له البازل الاخير بتاع الارقام برده على امل انه ينطق الارقام والعجيبه انه قدر يعمل 50 فى الميه منهم صح بمجرد برده النظر للمساحه الفاضيه
البازل والمكعبات والرسم بقوا احلى لعب بالنسبة له بس انا نفسى ادور على العاب تانيه كمان تزود مهاراته وتنمى ذكائه وبحثت كتير بس اغلب الالعاب فى السن دى بتتكلم عن التمثليات والحكايات وهو مش بيحب يسمع قصص وطبعا قلة الكلام مش مديانا فرصه اننا نمثل
فياريت البنات اللى عندهم خبره يفيدونى وياريت الموضوع دى يجمع اكتر افكار والعاب مناسبة لتنميه مهارات الطفل
الروابط المفضلة