السلاام عليكم ورحمة الله وبركاته
اخواتي الامهات الفاضلاات ...حابة اني اشارككم بتجربتي مع ابني حفظه الله لي ... مع عملي انك كتير منكم عارفني لاني استشارتكم في بعض الحاجات في الركن دا ...
بس حابة احكيلكم لا لشئ والله الا عشان تستفيدوا ومحدش يقع بجد والله في اللي انا وقعت فيه ويااارب يااارب محدش يشوف اللي انا شفته في ابني ...
المهم عشان مطولش عليكم ... صحي ابني من النوم في احد الايام وكان بيتقيأ ... فقل يمكن دور برد بسيط ... المهم على العصر كدا لاحظت انه كل ما ياكل حاجة بيتقيأ ولقيت انه اتبعه دا باسهال ... فقلت الحق اوديه للدكتور عشان الحقه لو دور برد يعني برد في المعدة او كدا ... وقد كان فعلا قلت اوديه لمستشفى تبارك ... الفرع القريب مني على اساس انهم متخصصين في الاطفال ... وقد كان فعلا ...رحت بيه للدكتور فقالي انها نزله معوية وكتبله على حقن مضاد حيوي وللترجيع ... وفعلا خادهم في ساعتها ...
والدكتور قالي لو موقفش الترجيع او الاسهال اتصلي بيا ... وفعلا روحت البيت وبدأت اديله سوايل متل ما قالي الدكتور ...بس لقيته لازال بيرجع فاتصلت بالدكتور قالي هاتيه المستشفى نعلقله محاليل ... انا طبعا اول مرة اتعرض للموقف دا فاترعبت ... ومعيش ولا زوجي ولا والدي ولا اخويا بس امي واختي ... وطبعا ربنا قبل الكل ... المهم دا كله وابني عمره سنة وشهرين ...
المهم رحت بيه المستشفى علقوله كانيولا ... وعلقناله محاليل والدكتور قالي تيجي كل 12 ساعة عشان يتعلقله محاليل ...
وفعلا كنت بروح الصبح وبالليل .... بس الحالة زي ما هيا تقريبا ... كل اللي حصل ان الترجيع بدأ يقل ... وبجانب دا كله الحرارة مرتفعة جدا جدا ... المهم كنت كل ما اروح اركبله محاليل اعرضه على الدكتور اللي هناك ... عرضته هناك على اربع دكاترة تقريبا تلاتة منهم قالولي ماله ابنك ماهو بقى زي الفل اهو ... المهم خلال الفترة دي وانا في البيت بقى بين كل محلول والتاني ..كان طبعا ابني يكاد يلحس الارض لو لقى عليها نقطة ماية ... وانا كنت بشيل منه الماية زي ما الدكاترة قالولي اني اديله كميااااات قللللليلة كل فترة .. وهوا كان عطشان جدا جدا فكان بيصعب عليا وكنت سعات باديله ماية او اي عصير كان يشرب بشراااهة وشوية يروح مرجعهم ...ومهما اديتله كميات ضئيلة مكنش بيرتوي ابدا ... لدرجة اني كنت دايما شايلاه في مكان منعزل عن الماية او اي اكل وكان يحاول ينزل عشان يروح على المطبخ ولو سمع بس صوت الماية في اي مكان يجري جري عليها ... وكان والله العظيم عينه لا تغمض لمدة تلات ايام متواصلة ... من كتر ما جسمه كان فاقد سوايل ... مكنش قادر ينام ... احطه على السرير يتحامل على نفسه وينزل من جنبي ينام على الارض ... ويشد في كل الهدوم اللي على الشماعة كنوع من الاعتراض عشان عايز ماية ... وكان لو البيت كله ظلام يدخل المطيخ وميهمهوش عشان الماية ... وانا بغبائي كنت ببعد عنه الماية زي ما الدكاترة قالولي ... لدرجة اننا احنا كنا بنتعب ونتبادل عليه انا وماما واختي وهوا برضو مش بينام ...
لدرجة ان والله العظيم تحت عينه بقى اسوووود وبقى لونه اصفر شاحب من قلة النوم ...وولدرجة انه كان سخن وماما كانت سهرانة بيه بتعمله كمادات على راسة ... كان بيمسك الكمادات يمص الماية اللي فيها وكانه بيرضعها من كتر ماجسمه محتاج سوايل ...
المهم دا كله وكنا كل ما نكلم المستشفى ميقوللناش الا هوا اخد اخر مرة المحاليل امتى ... نقزلهم في الوقت كذا يقولوا طيب كمان 12 ساعة هاتوه ياخد المحلول التاني بسسسس... وللاسف احنا من لخمتنا مبقيناش عارفين نروح لدكاترة تانننيين ... ونسينا اي دكتور عارفينه ... وكان كل اللي ظاهر ان الترجيع بدأ يقل فاحنا قلنا اكيد هوا بيتحسن ...
المهم جينا لتالت يوم ... وديته الصبح ياخد المحلول... وقلت لازم اشوف الدكتور اللي هناك حد يطمني على ابني ... لانه بعد الشر عليه بقى خلااااص يكاد يكون بقى هيكل عظمي وهوا اصلا ضعيف ... لانه كمان بقى يعمل يسهل كل دقيقة تقريبا من غير ما ياكل حاجة ...
الدكتور دا قالي انه كدا داخل في بداية جفاف ولازم نعلقله محلول تاني ...وقالي ايدله سوايل بسيطة كل فترة ... انا انهرت ... قولتله متقوليش اديله كل فترة ... يعني اد ايه بسيطة وكل اد ايه بالظبط ... قالي معلقة كل دقيقتين ... قولتله طيب انا دلوقتي مش فاهمة الدور دا ايه وممكن يفضل اد ايه الولد خلاااص اتصفى ... قالي والله حسب دورة حياة الفيروس دا ... ممكن ياخد يوم ممكن اتنين ممكن اسبوع ...
مش عايزة اوصفلكم انا سمعت اسبوع دا كنت اكاد اغيب عن الوعي لان ابني ربنا يحفظه يااارب ويابركلي فيه من يومين وبقى خلاااااص فمابال بقى ...
علقتله فعلا المحاليل ... وخرجت من عنده انا وماما هااائمة على وجهي فعلا ... والله ما عارفة اعمل ايه ولا اروح فين ... كل اللي طالع عليا اني واخداه في حضني عشان احس بيه ...
المهم ملقتش قدامي الا اني ارجو عفو ربي ومبقتش عارفة اعمل ايه الا اني ابعت لكل صحابي انهم يدعوله ... وفعلا بعت وانا لسا في المستشفى لكل صحابي انهم يدعوله ان ربنا يلطف بيه ويشفيه شفاءا لايغادر سقما ...
وفعلا واحدة هنا على المنتدى هيا صديقة واخت عزيزة عليا فعلا ... ربنا يباكلها هيا وزوجها يااارب اللهم امين ويباركلهم في ابنهم ...enno اكيد انتوا عارفينها كتبت على المنتدى انهم يدعولي ويدعوا لابني ...
المهم لما روحت من المستشفى ... بدأ ابني يشحب اكترررر ... وبدأت عينه تزوغ ... واحاول انيم فيه وهوا برضو مش بينام ... مكنش بينام الا الساعة تقريبا اللي كنا بنعلق فيها المحلول ... او نص ساعة بالكتير ...
المهم كنت تعبانة جدا وسيبته لماما شوية ودخلت انام ... قمت لقيته مبقاش قادر يقف اصلا ... دخل في حالة ضعف شديدة ... وماما مكنتش ملاحظة اوي لانها شايلااه وهوا قدامها .. ومأكدليش احساسي الا اني باخده في حضني وعلى راسه الكمادات لقيته موللللع ... بقيس الحرارة بالترمومتر لقيته وفق الاربعين ودا في ثواني بعد ما حطيتله الترمومتر ... وبشيله لقيته اترمي عليا ومش بينطق ...رحت صحيت اختي شافته كدا صوتت واكدت احساسي ان الولد خلاص مش بينطق ... جه في دماغنا دكتور بعيد عننا جدا ... كلمناه قالنا لازم الحرارة تنزل ولازم تروحوا بيه لاقرب مستشفى يعلقوله محاليل كاسعافات اوليه وبعدين هاتوه ونشوف هنحوله فين ... المهم فعلا ماما واختي حموه وهوا مش بينطق برضو كل اللي بيعمله انه بيمد ايده اللي بقت زي الخيط يلحس الماية اللي نازلة عليه ... ورحت تاني لمستشفى تبارك لان دي اقرب مستشفى ليا ...وطول السكة وانا ضماه على صدري بشوفه بيتنفس ولا لأ واحس بنبض قلبه ...
المهم جريت بيه جري والدكتور شافه ... وشافني وانا منهارة قالي انت عاملة كدا ليه ماله بقى زي الفل اهو ... هوا بس داخل في حالة جفاف شوية ... هنعلقله محاليل ... قولتله انا جاية اصلا عشان اعلق محاليل ...
المهم الممرض بيشوف الكانيولا اللي بقالها تلات ايام في ايده لقاها فسدت ..فقالي لازم نغيرها ... وشالوها وجم يركبوا واحدة تانية ... قعدوا تقريبا نص ساعة عدت عليا كانها سنة او اكتر ... مبقاش فيه وريد من الضعف ... مش عارفين يلاقوه ... وشكشكوا جسمه كله تقريبا ايده ودراعه ورجليه وهوا من التعب مش بينطق ولا بيعيط ...لدرجة انهم اخر حاجة كانوا هيحلقولوا راسه ...عشان ياخدوا منها ... المهم لقوا في ايده ...ولله الحمد ...وقالي لازم نعلقله محلوليل ... وقد كان ... المهم خلصت المحاليل ... وماما افتكرت تكلم خالي انه يجيلنا وافتكرنا دكتور صاحب والدي استشاري كبير ... وكان قريب مننا ... فجرينا جري عليه ... كشف عليه ... وقال انه روتا فيروس ... مش عارفة انتوا عارفينه ولا لأ ... هوا فيروس ضعيييف جدا بيجي للاطفال اللي مناعتهم ضعيفة جدا ... وهوا غالبا بيجي في شهر 5 او 11 ... تمام ... وبيعمل عملية ترشيح لكل الماية الموجوده في الجسم سواء في الامعاء او في الدم او في كل حاجة فيالجسم ... وكتابلي الدكتور على علاج تان خالص وكتبله على حقنتين كورتيزون عشان جسمه يملأ ماية تاني ... المهم الممرضو بعد كدا قالتلي اننا كنا مستعوضين ربنا في ابنك ... عايزة اقولكم انه اول حاجة عملها لما روح واخد العلاج التاني بعد ما شرب مااااااااااية ... وسوايل ... انه نااااااااااااااااام ... كان تعباننننن جدا جدااااااااا ...اللهم لك الحمد على كل شئ ...
بدأ الاسهال ماشاء الله تبعد فتراته شوية ... المهم لما بدأ يفوق بقى مبقاش بيقدر يمشي ولا يقعد من التعب وقعد كذا يوم كدا ...وسالت الدكتور قالي انه فقد كميلة فظيعة من الاملاح وكان كاتبله على محلول جفاف ياخده كل ما يسهل ... ...
المهم عايزة اقولكم ان اكتر حاجة لطفت بيا الدعاء ... وطبعا طبعا لطف ربنا ... انا كنت من كتر ما انا مهمومة ومش عارفة اتصرف مكنتش قاردة ادعي حتى ... كنت باستغفر على اد ما اقدر ... وادعي باللطف ... ومكنتش عارفة اقول ايه لربنا ومكنتش قادرة حتى اقرا قران او اصلي غير الفرض ... كنت حاسة اني مشلولة ... وكنت عمالة افكر انا اخر مرة قرأت فيها قران امتى ؟؟؟ لقيت اني فعلا مقصرة في حق ربنا ... وان ربنا لو كرمني وخرجت من الموضوع دا هيبقى لطف وكرم من رب العباد مش اكتر ...بس بجد يا جماعة والله الاستغفار والدعاء فعلا معجزة من ربنا لينا .... بالله عليكم ياجماعة كل واحدة فينا تعرف قيمة ابنها او بنتها وانهم فعلا قرة اعيننا ...
وان بجد والله العظيم مفيش حاجة تساوي الابن ...
بجد احنا مقصرين اوي في حق ربنا ... وربنا بيبعتلنا رسايل لازم ناخد بالنا منها ...
اللهم لك الحمد حتى ترضى ولك الحمد بعد الرضى ولك الحمد ابدا ابدا...
المهم اخر مرة رحت استشارة حمزة ابني قلت للدكتور لازلت حاسة انه مظبوط ... قالي اعمليله صورة دم كاملة ...
وفعلا عملتها طلع الهموجلوبين بتاعه 7 ... طبعا ضعييييف جدا جدا ...
وديت النتيجة للدكتور قالي دا لازم نقل دم حالا ...
كلمت بنت عمتي دكتورة قالتلي هاتيه عندنا المستشفى فيه دكتورة كبيرة وشاطرة مش بتلجأ لموضوع نقل الدم الا للضرورة القصوى لانه صغير جدا ... وفعلا نزلنا بيه الساعة 11 بالليل على المستشفى ... كشفت عليه ... قالتلي من رحمة ربنا ولطفه بابنك انه اصلا ضعيف والدور دا كمل عليه ... يعني لا قدر الله محصلتلهوش نكسة مرة واحدة ... فجسمه بدأ يتعامل مع الضعف دا وزيتكيف معاه ... فقالتلي احسن اننا نديله علاج هوا ممكن يطول ياخد خمس او ست شهور بس هيكون احسن من نقل الدم ومخاطره وخاصه انه لسا صغير ...قالتلها طب خودي مني قالتلي انت كمان مش مضمونة ... لانك هتكوني مضمونة في حالة واحدة انك عمرك ما روحتي لدكتور اسنان او عمركعايزة اقولكم ما عملتي عملية ... وانا طبعا لا دا ولا دا ...
وقالتلي اهم الحاجة الغذاء بجانب الدوا ... وان النتيجة مش هتبان دلوقتي هتاخد وقت شوية ... والله المستعان ...وقالتلي ان حقن الحديد على المدى البعيد غلط على الطفل ... وانا فعلا سمعت حاجة زي كدا ...
بس واديني ماشية على العلاج مكملتش لسا اسبوعين ...الله المستعان ...
بس والله اللهملك الحمد حمدا كثير طيبا مباركا فيه ... بجد بعد الشر عن ابني وعن ابنائكم جميعا انا كان ابني لاقدر الله ممكن يروح مني وهوا في حضني لولا لطف ربنا ... وكرمه
عايزة اقولكم كمان ان اللي يدخل لاقدر الله في حالة جفاف يحمي ابنه لانه بيروي كمان الجلد من برا ... ودي غريزة البقاء اللي ربنا وهبها لينا ...
ولو اي ام فيكم حاسة ان ابنها مش مظبوط فصدقوني اكيد احساسها صح ...لان هيا ام وحب ابنها ليها غريزة ... اوعوا تهملوا في ابنائكم ... وخلوا ظنكم في ربنا كبير ...
واكثروا الاستغفار والصلاة على الحبيب المصطفى ... والصدقة بنية الشفاء لان رسول الله قال داوو مرضاكم بالصدقات ... وبالله عليكم ادعولي معاكم ان ربنا يتمم شفاء ابني على خير ويحفظه من اي مكروه ... ويباركلي فيه ويقر عيني بيه ...
يااارب ياارب محدش فيكم يشوف اللي شفتوا في ابني ...ولا اي حاجة وحشة يااارب اللهم امين
بالله عليكم متنسونيش من خالص دعائكم ... حبيت افيدكم لعلكم تستفيدوا من تجربتي ... ولعلها تكون علم نافع ينتفع بيه اي حد منكم
ارجو اني مكنش طولت عليكم ...
وجزاكم الله خيرا ...
الروابط المفضلة