حبايبي انا عندي ولد داخل في تسع سنوات متعبني مره في اختيار ملابسه يعني يوم يكون عندنا خرجه او يكون هو خارج مع ابوه اجي احدد له اللبس اللي راح يلبسه يقوم يرفض ويختار غيره ودائما على هذا الموال انا عارفه ان لازم نخلي الطفل يختار ملابسه بنفسه عشان يكون عنده ثقه بنفسه لكن هو يختار ملابس ما بتكون مناسبه للمكان اللي راح نطلع له يعني في ملابس رسميه للمناسبات وفيه ملابس عاديه للطلعات القريبه زي السوق او لبيت جدانه او للتمشيه هو ما عنده ذا الكلام عنده اللبس اللي يحبه يلبسه في اي مكان وبكذا نكون في صراع عند كل خرجه مع العلم اني ما احب اكرهه على اللبس اللي ابغاه عشان ماتضعف شخصيته وما يكون عنده ثقه بنفسه لكن ما احب انه يلبس لبس مو لايق .... فايش رايكم كيف اتعامل معاه هل اغصبه على رايي ولا ايش اسوي معاه نوروني الله يخليكم

كان الله في عونك وهدى لك ابنك
أختي في طريقة أحيانا بأجربها مع بنتي بالرغم من إختلاف الأعمار (بنتي أربع سنوات )بينهم لكن ممكن تنفع معاك
أول شيء دائما لما تشتري الملابس وضحي له إيش حقت البيت من حقت الخروج الرسمي والخروج العادي وفهميه إنه كل الناس كذا وطبعا الجمل التي تختاريها له لازم ومهم جدا ما يكون فيها كلمة لا لأنه مازال عقله يتخطى هذه الكلمة فمثلا أحيانا لبس الخروج الرسمي بعد فترة ينفع إنه يتلبس في الخروج العادي لما تبدأ ألوانه تتغير فيكيف تفهميه قول له يا فلان تال شوف إيش أنا اشتريت لولدي البطل اشتريت له هذا اللبس عشان لما نروح عند الضيوف عشنه جديد ولما يصير قديم شوي ينفع نلبسه عند جدك وبس أياك أن تقولي هذا اللبس عشان الخروج مو عشان نلبسه لما نروح السوق لأنه راح يخزنها مخه إن هذا لبس السوق
ثانيا دائما لما تخرجي له ملابسه قبل الخروج خرجي قطعتين أو ثلاث من الملابس المناسبه لك وناديه وقولي له إنه يختار وبكذا تصرفي تفكيره بطريقة غير مباشرة عن الملابس الغير مناسبه
وبعدين إذا أصر على شيء غير مناسب لبسيه له وقولي له إنه بهدوء إن هذا اللبس غير مناسب أو قولي له ألبسه بس أنا زعلانه واتركيه واخرجي من الغرفة لا تعندي معه عشان لا يعندك معاك ومرة على مرة إذا فيه من الأساس علاقة طيبة بينكم راح يرجع يسمع كلامك وممكن من أول مرة يسمع
الموضوع يبغاله استراتيجية و هدوء وعدم التشبث بالرأي لأنه يتعلم منك هذا الشيء
وإن شاء الله أكون أفدتك

سبراي فكرتها حلوة كنت لسة جية اقول لك اعملي نفس الفكرة.

ربنا يهديه ويوفقه.

ماشالله علي ههههههه كنت حاقول نفس كلام سبراي وام سهيل

اتاريني ام خبيره بالفطره ......خخخخخ

جزاك الله خير يا اخت سبراي وان شاء الله اعمل بنصائحك وعساها تنفع معاه لانه والله عبيط ويفحس القلب الله يهديه ويصلحه وعيالكم جميع . واشكر كمان الاخت ام سهيل وام شهد على مروركم وتعقيبكم وعسى الله يصلح لكم ذريتكم ويرزقكم برهم