السلام عليكن اخواتي الحبيبات
حبيت انقل لكم تجربتي مع بنتي في التسلخات اللي سببتها الحفاضات، انا بنتي دلوقتي عندها شهر ربنا يخليهالي يارب، من حوالي اسبوعين كدة او بمعنى اصح اول ما اتولدت بدأ يجيلها تسلخات في منطقة البامبرز وخصوصا من قدام، جربت كل حاجة وكل مادا بتزيد مش بتقل لحد اما بقت زي حتة اللحمة الحمرا المسلوخة ويا حبيتي كانت مهرية ، وكل ما تيجي تعمل حمام تصوت والله يكون في عونها، وديتها للدكتور وشافها وقاللي معلومة اول مرة كنت اسمعها، قاللي ان اغلب التهابات الاطفال الحفاضية وخصوصا اما تبقى بالشكل دة بتكون فطريات، واي كريم او مضاد حيوي بيستخدم بيزود مش بيقلل، ولازم يستخدم مضاد فطريات، ولازم التشطيف يبقى بمية دافية وتنشفي كويس، مش بمناديل الاطفال ومش كدة، ومش بمية وصابون، مية دافية وبس، وتنشفي كويس جدا، وبعدين تحطي المضاد الفطريات(ميكوناز) عند كل تغيير، وتغسلي حاجتها وفطوتها بالمية المغلية والكلور لمنع العدوى ابامبرز نفسه بيبقى سبب الالتهاب لان جلد الطفل بيعمل حساسية منه، لازم تغيري النوع ، وكمان قاللي ان ما اخليهاش في البامبرز كتير، ويستحسن انها ما تلبسوش غير للضرورة ، ويستغنى عنه بالبسة قطنية وتحطيها فوق مشمع او اي حاجة عازلة للمية، بس اقيت تطبيق دة صعب لانها صغيرة، وخفت تبرد، فغيرتلها نوع البامبرز، وكنت مش بخليه عليها اكتر من 3 ساعات، واشطفها كويس بالمية الدافية واعط الكريم، والله ماشاء الله لاقوة الا بالله بعد يومين كأن شيئا لم يكن، انا ما كنتش مصدقة نفسي ، واهم حاجة انها ما تعدش في البامبرز كتير.
سألت الدكتور وقلتله طيب اعرف ازاي الفرق بين الفطريات والاتهابات التانية، قاللي ان اغلب الالتهابات بتبقى فطريات ، فنحط الكريم دة ونتبع التعليمات ولو مش كدة هتروح لوحدها، واي حاجة تانية حتى لو فازلين بتسد المسام وبتجيب التهاب، اختي كان ابنها ملتهب جدا برضو، وقلتلها على الكلام دة وماشاء الله برضو خف وبقى زي الفل .
ربنا يكرم الجميع واللي تستفيد من كلامي دة ياريت تدعيلي ان ربنا يجعل بناتي من الذرية الصالحة، ويخليهم لي ويسخر لي ابوهم ويحسن ختامنا جميعا، ويكرم امي وابي ويرحمهما كما ربياني صغيرا، اللهم امين.
كتبت بواسطة omfatema
الروابط المفضلة