والله ما ادري ايش اقول و ابدا بصراحه معي مشكله مع ولدي و هو انه شيطاااااان مره

وكل ما كبر شوي يزيد بزياده مع اني كنت من قبل ما اطقه او اهاوشه لكن الحين زودها معي زياده و ماني قادره اتحمله فصرت في كل شي يسويه اطقه وودي اني اقطعه

حتى اخوه الصغير جننه من كثر ما يعضه في اصابعه ويرفسه ويطقه ما خلى شئ من انواع التعذيب الا وسواها فيه مع اني كنت احاول اني ما افرق بينهم في شئ بالعكس احس انه اعطيه حقه اكثر من اخوه الصغير والله بعض الا حيان يكون الصغير يصيح ويبغى يرضع يكون هو قاعد في حضني كذا عناد ما يبغاني اشيل اخوه مع انه عاش في بيئه منفرده معي ومع ابوه واخوانه يعني مو من حقه يكون مشاغب و شيطان واخوانه الكبار كانوا عايشين في بيئه كلها اطفال انواع واشكال وما صاروا مثله عله ???????

ياليت بنات تقولو لي كيف اتعامل معاه من غير طق اخاف بعدين يصير يكرهني

وعلى فكره عمره سنه وسبع شهور

تحياتي لكم

اختى طفلك بحاجة للحنان
((الحــــــــــنــــــــان))
لانه صغير وحملت عليه...
الله يخليه لك يا رب..
والعناد معاه ما فيه فايده لانه ما يفهم اصلاا...
احضنيه كل ما اتشاقى وسيهدا تدريجيا

سنة وسبع شهور؟؟
هذا رضيع بعده يا أختي!
يعني كل هذه التصرفات ما هي إلا غيره من أخيه، يريد لفت انتباهك. حتى وإن كنت تعطيه كما تظنين أكثر من اللازم، ولكنه يشعر أن لديك من هو يستحوذ على اهتمامك أكثر منه.
أخوه الصغير لن يشعر بالفرق إن دللته أم لا، فلا تدللي الصغير أمامه، ولا ترضعيه أمامه.
حاولي أن يأخذه أحد يلعبه في غرفة ثانية وقت الرضاعة، وإن كان لديه أخوه كبار فليلعبوه ويشعروه بأهميته وقت انشغالك بالصغير.
تفرغي له تماماً وقت نوم الصغير، العبي معه بلعبه، احضنيه، رددي له كم تحبيه، غني له، العبي معه لعبة وهو جالس في حضنك، اخرجي معه وحدكما إلى الحديقة مثلاً أو إلى السوق.
وكلما كان في وقت العصبية والصراخ، اسأليه: هل تريد أن تأتي تجلس في حضني أو هل تريد ان احتضنك؟ سرعان ما سيركض إليك وسيهدأ فوراً، هذه الطريقة لا تخيب أبداً. فهذا هو كل غايته.
وعندما يكون الصغير موجوداً حدثيه عن أخيه، رغم أنه لن يفهم. احمليهما معاً، ودلليهما معاً.
اطلبي منه أشياء يساعدك بها خاصة بأخيه، مثل وقت الحمام، أن يأتي لك بالمنشفة مثلاً أو يسكب الماء لك على أخيه، رغم أنه صعب عليه أن يتحكم او يفهم تماماً ولكنه سرعان ما سيستوعب ما تقولين.
بعض النقاط التي ذكرتها تجدينها في موضوع الأخت لؤلؤة القدس وهو مثبت في الركن.

والله كل اللي قلتولي عليه سويته معاه بس مافاد معه

وان شاء الله استمر معاه على كذا وتفيد

والله انكم طمنتوا قلبي الله لا يحرمني منكم

وشكرا على الردود

الله يعينك يااختي وانتي تتكلمين كانك توصفين حالي مع ولدي
انا ولدي عمره 3 سنوات بس والله العضيم ماشالله عليه ما عمري شفت احد شيطان مثله حتى لما نطلع ونروح مكان مثل سوق ولا ملاهي يسوي شطانه والله اقعد اطالع اعيال الناس كلهم عاقلين ويمشون في سبحانيتهم الا ولدي يسوي شي مااحد يسويه
وحركاته مع اخوه هذي القصه الي تتكرر كل يوم يحط اصبعه في اعيونه يرفسه بالجزمه الله يعزك على راسه وهو لسى بيبي عمره ايام كل انواع التعذيب سووا فيه
بس ايش انسوي والله في صلاة التراويح والقيام ادعو ربي انه يهديه حق نفسه
بس لا تشيلين هم انشالله الله يهديه ويهدي ولدي وجميع اعيال المسلمين
سلاااااااااااااااااام

اختي قراطيس بكفي متت من الضحك كلامك كله معاناة ربنا يعينك بتعرفي ابني عمره سنتين ونصف مشكلته انه بقلدني بكل شيء بده يمسك السكين والمقص...الان هو على المجلي بيجلي العابه وربنا يستر لو بقرب عليه بيطردني ...هههههههههههه..
***اخت نسيم الانس ابنك مثل ابني والسبب ابني الوحدة لانه وحيد.....وربنا يعين .

والله حاله صاروه هالعيال

قراطيس

تقولين ابنك مشاغب والله اني حاسه بيكون اهون من ابني البيت كله صار عزوز عزوز قد شفتي

طفل يفتح الفرن ويطلع عليه عشان يوصل للمغسله ويلعب بالماي ويشغل المايكروويف

اما الدعاء له بالهدايه فانا امشي وادعي في كل وقت وكل صلاه والله يعينا عليهم

zainab2000

ايه اضحكي الحين توك ماخذه هم واحد بس والله يعينه على الوحده

ويعطيكم العافيه على الردود

اختي نسيم الأنس والله العظيم انج توصفين حالتي بس ولدي عمره تقريبا سنتين واخنه الغلبانه عمرها سبعة شهور تعالي شوفي وجهها ورجولها اثار العض مشوهتنهم والشيطنة لا تسالين عنها ربي يهدي عيالنا
تصدقين لما قريت قصدتج والله اني ارتحت حسيت ان حد معاي في هذا الهم ربي يهدي ولدج ويعقل ويهدي عيالنا كلهم

أختك أم عبدالله

معقولة الاطفال كذا حتى البنات ولا بس الاولاد لاني خفت الله يستر من ساره لما تكبر ايش بتسوي الله يعينك والله والله يهديهم ويانسيم الانس كل هذا يسويه ولدك الله يعينك .

اهلين اختي نسيم الانس
شخبارك وشخبار ولدك اما بالنسبه انك تقولين ولدي اهون من ولدك والله مستحيييل في احد يسوي شطانه مثل ولدي بالنسبه للفرن يفتح الفرن ويركب على الباب علشان يشوف ايش فوق الفرن المايكروييف يحط اي شي ويشغله يسحب الكرسي ويفتح الفريز و يقعد يحذف الي فيه ..... يركب على الكنب ومن ثم الى المكتبه ويقط الي فيها يركب فوق التلفزيوون ويقعد يصيح ويصرخ الا ينام فوق التلفزيون حتى جهاز الصراف يساويلنا مناحه عند الصراف من الصراخ والياح ويطيح بالارض شوي ويتجمع الناس علينا راسه والف سيف لازم هو الي يدخل البطاقه وهو الي يضغط الازرار والله كل ما نوديه مكان لازم نطلع ابوه شايله بالعرض يصرخ ويصيح حتى اقول لابوه الحين الناس بيضنون انا احنا خاطفينه ما هو ولدنا من الصراخ الي يصارخه هذي بعض من مواقف ولدي العزيز الله يهديه ويهدي جميع اعيال المسلمين وباقي اشياء واشياء بس يبغالي ايام اكتب عنها
سلااااااااااااااااااااااام