السلام عليكم ورحمة الله وبركاته
والله ياجماعه تعبت مع ولدي وابغى حل
انا احكي لكم القصة اللي حصلت
كنت اقلب في ايميلي واولادي الاثنين كانو جالسين معايا في نفس الغرفة الكبير عمره 5سنين والصغير عمره
3سنوات ونص المهم فتحت ايميل كان عنوانه مولود اتولد باسنان المهم وكان المشهد كاتالي رضيع نايم ومغمض عينه وفمه عادي وبعد ثواني يتقلب وجهه وحش ويطلع صوت مرعب ولدي الكبير نط فوق صدري بكل قوه وصرخ ماما ماما ايش هادا ومسكني ولا رضي يفكني والله العظيم كان قلبة يدق بكل قوة كانة بيخرج من مكانه قعدت اقرا عليه واسمي واقوله ماما هادا كدب والولد رافض ينزل من فوقي قفلت الكمبيوتر وقعدت اهدي عليه والولد صار بس ساكت مايتكلم بعدماهدي شوي اقوله قوم العب مع اخوك الولد مايبغى يقول ابغى ارتاح بطني تعورني المهم قعد الولد 3 ايام بعدها بس هادي مايتكلم ولا يلعب الا ماندر ولا يروح ولا مكان لوحده لازم اخوه يكون معاه او انا اكون في الصاله اطلب منه يجيب الجوال من غرفة النوم يرفض والله صار خواف بطريقة فضيعة والكمبيوتر كل ما مر من عنده يطالع فيه ويمشي بسرعه مع انه كان جنونه وموته الكمبيوتر اقوله فك الكمبيوتر العب يقول ماابغى بعد ماكان يضاربني عليه بعد كم يوم اشتهى يلعب قلي اقعدي جنبي العبي معايا
المهم في البداية داريت عليه ومافتحت الموضوع معاه تاني
اليوم صار للموضوع شهر ونص الحمد لله صار يقعد عالكمبيوتر ويلعب عادي صار تقريبا طبيعي
بس المشكله الحمام مستحيل مستحيل يروح لوحدة لازم احد واقف له عند الباب
والله انا وابوه في الشهر هادا حاولنا معاه بشتى الطرق بالحنيه بالكلام بالخصام بالثواب بالعقاب وانا بدا صبري ينفد
خصوصا اني في حامل في الشهر السابع ومافيا حيل ابغاهم يعتمدوا على نفسهم قبل لا اولد ماشاء الله اخوه الصغير
يروح وحدة الحمام وكل مكان ويقول لاخوه مافي شي في الحمام يخوف
امس قبل لا انام قلت يالله ماما روح الحمام عشان ننام قال تعالي شديت عليه بكي قلت لو مارحت الحمام وحدك بكره
ماراح تاكل من الشكولاتات اللي بابا اشتراها والشبسات يالله اختار تدخل الحمام ولا ماتاكل بكي وعاند المهم رحت معاه الحمام ولمن خرج من والحمام قلت ماما ماتكدب بكره مافي اكل المهم فطرته ساندوش وطلب بسكوت بعده قلت انا مااكدب انقهر ومشي قلت لعل وعسى هادي الطريقة تجيب معاه المهم لمن جا ابوه من الدوام قام يشتكي لابوه
يقول شوف ماما ماهي راضيه تعطيني بسكوت قال ليه قلتله هو يقول لك قال عشان مارضيت اروح الحمام وحدي
قاله تستاهل لين جا العصر قله ابوه يالله يابطل وريني كيف تروح الحمام وحدك وانا اشتريلك دونات قام يبكي
ابوه فلتت اعصابه وقام يصرخ عليه فهمني ايش فية في الحمام اتكلم لتكلم والولد يبكي يقوله اخوك اصغر منك يروح
وحده ولا يخاف ولا يصير له شي اتكلم لشبك الولد يبكي ويقول بابا قله انا اوديك المستشقى خليهم يضربوك ابره حق الخوف الولد زاد بكى وصراخ قلت لا كدا انت بتزيده سحبه للحمام وقال ادخل ووريني تخرج من الحمام قبل لا اناديك والله الولد في الحمام يصرخ وابوه من بره يصرخ عليه والله عيوني دمعت عليه انا مره زعلت من ابوه لانه ابدا مو هادا اسلوبه مع اولاده هو احن مني عليهم بس من قهره
المهم ممكن تلاقولي الحل لاني والله تعبت وانا ادور حلول واقرا ولا في نتيجه وانتو عارفين كيف نفسيت الحامل على اخر الشهور الله يخليكم ساعدوني
واللي عندها ايميل الدكتور ميسره تعطيني احول اراسلهله
ادعولي الله يفرج همي ويطمن قلب ولدي والله اني خايفه هادا الشي يأثر على شخصيته بالذات انه ولدي مرررررررررررره هادي ومطيع ومرتب الله يرضى عليه
اسفه طولت عليكم لكن الله يعلم كيف انا خلاص تعبت من هادا الموضوع
الروابط المفضلة