بالنسبة للخطة الدراسية << نسيت أقلكم شي ،،

اذا إنتِ طالبة مستجدة فالخطة عندك حتكون بس أول مستويين ،،
وبعد ماتتخصصي إن شاءالله ينزلولك خطة تخصصك ،،

عمومًا أول سنة لاتشيلي همها ،،
المهم وقت التخصص تمشي ع الخطة

كتبت بواسطة فرولاية جده

قلبووووووو
مشاء الله عليك
من جد رائــــــــــع الله يبـــــــــــــــــارك
مجهود تشكري عليه
الله يعطيك الف عاااااااااااااااااااااافيـــــــــــــــــه

الله يعافيكِ فوفو

فينك من زمان استنى مروورك

حبيباتي مافي أسئلة ؟!

قلب أختها .: أنا عندي سؤال

قلب أختها أي قسم وأي مستوى لول ؟؟

كتبت بواسطة ^شوووق للجنان^

قلب أختها .: أنا عندي سؤال

قلب أختها أي قسم وأي مستوى لول ؟؟

مستوى رابع ،،
قسم إدارة واقتصاد ،، تخصص قانون

وشوقة ؟!

لقيت رموز في الجدول غريبة، مافهمتها ؟!

التسجيل:
مثلاً: 31/8/2007
هذا تاريخ إضافة المادة في جدولك ،،،، معناه انهم نزلولك هي في الجدول في هذا اليوم ،.
متى تحتاجيه؟!
اذا أضفتي مادة متأخر بعد أسبوعين مثلاً وكانت الأستاذة بدأت تشرحها من أسبوع، تجيبيلها هذا التاريخ عشان ماتحسب لك غياب عن الأيام اللي كنتِ لسه ما أضفتي المادة فيها


المادة:
مثلاً: B2 101 ISLS
في هذه الخانة كاتبين لك رمز المادة ISLS ،، ورقمها 101 ،، وشعبتك B2 ،،
طبعًا كل مادة لها رمز ورقم لازم تكوني عارفتهم كويس عشان ماتتلخبطي لما تضيفي مادة في جدولك << الإضافة تكون بالرمز والرقم موبالإسم

ISLS << رمز لمادة الثقافة الإسلامية ،.
101 << 1 يعني المستوى الأول ،، 102 يعني المستوى الثاني ،، 103 المستوى الثالث ،، وهكذا ...
B2 << هذي شعبتك في الثقافة ،، لما تحضري، انتبهي انك مع بنات شعبتك<< اسألي البنات هذي شعبة كم؛ لأن أحيانًا يصير تغيير ويبدلوا القاعات !!


إسم المادة:
مثلاً: الثقافة الإسلامية (3) << يعني ثقافة مستوى ثالث
اللغة العربية (1) << يعني عربي مستوى أول


الوحدات:
يعني عدد ساعات المادة ،،
في مواد 2 وحدة << يعني هذه المواد تدرسيها ساعتين في الأسبوع، ممكن تكون ساعة يوم السبت وساعة يوم الإثنين ،،
وممكن ساعة الأحد وساعة الثلاثاء ..
وفي مواد 3 وحدة << ممكن تاخذيها ساعة السبت، وساعة الاثنين، وساعة الأربعاء ،،
وممكن ساعة ونص الأحد، وساعة ونص الثلاثاء ..
وفي مواد 4 وحدات ،.


الأيام:
يعني الأيام اللي تدسي فيها هذه المادة ،،
.S << السبت
.S. << الأحد
M << الاثنين
T << الثلاثاء
W << الأربعاء


الوقت:
يعني وقت المحاضرة لهذه المادة ،،
مثلاً: 10.00 ــ 10.50 << المحاضرة تبدأ 10 تمامًا، وتنتهي 11 إلا 10 ،،
وأقل محاضرة مدتها 50 دقيقة


المبنى:
هنا كاتبين لك رقم المبنى اللي حتدرسي فيه المحاضرة ،،
مثلاًَ: 007 << المبنى السابع
006 << السادس
T09 << التاسع، و T تعني تلفزيون (يعني مع أستاذ أو دكتور) ،.

TBA << معناها إن البنى لم يُحدد بعد ،، في هذه الحالة لازم تتابعيهم أول بأول الين ما يحددوا المبنى وينزلولكم رقمه
باستثناء إذا كنتي طالبة علوم ،، فـ TBA في جدولك تعني معمل << مثلاً:
المـــــــــــــــــــــادة ــ اسم المــــادة ــ الوحدات ــ
BIO 251 SB ــ الحيوان العام ــ 3

ــ الأيــام ــ الوقـــــــــت ــ المبنى ــ الغرفة
S...... ــ 11.00 13.50 ــ TBA ــ TBA
S.M.... ــ 8.00 8.50 ــ 007 ــ A093
بنات فهمتوا الفرق ؟!


الغرفة:
وهنا بعد ماعرفتي رقم المبنى، تعرفي رقم الغرفة داخل هذا المبنى ،،
مثلاً: 621 << غرفة 21 ،، و6 تعني المبنى السادس
917 << غرفة 17 ،.

بس في العلوم: 2141 << كله رقم الغرفة، وأظن إنه في العلوم الجديد
1156 << كله رقم الغرفة، كمان في الجديد
A093 << أظن هذا يعني في العلوم القديم، والـ A تعني الدور الأول ،، واذا كان B يعني الدور الثاني ،، و C الدور الثالث ،.


النوع:
بصراحة ما اعرف لإيه ؟!
بس ما أظنه مهم !!


عدد الساعات الفعلية ======> 16
هذه معناها انك حتدرسي في هذا التيرم 16 ساعة
لازم تكوني حافظة كل تيرم كم عدد الساعات اللي بتدرسيها << وحاولي تكون نفس اللي في الخطة عشان تتخرجي في وقتك، وما تضطري تتطولي في الجامعة ،.


حبيباتي أي أسئلة على هذا الموضوع ،، أي شئ مافهمتوه << أنا حاضرة

مشكورة بس عندي سؤال
أنا في جدولي حاطين في خانة الأيام زي كذا .. SS. TW
ممكن تقوليلي إيش هذه الأيام
وفي يوم ثاني حاطين ...S. T. إيش معناه ؟؟؟
وفي جدولي كمان مافي شعبة ؟
وفي مرة حاطين أيام ومو واضعين شيء في خانة المادة
وإنتي قصدك إني أنا أضفت المادة فلازم أوريها التاريخ
ولا هذا ماينطبق على المستجدات
وكاتبين في خاتة المادة رموز زي SE
SG
SB
وليش لازم أحفظ عدد الساعات اللي حأدرسها ؟
وطولت عليكي معليش

كتبت بواسطة جوهرة السعوديه

أنا في جدولي حاطين في خانة الأيام زي كذا .. SS. TW
ممكن تقوليلي إيش هذه الأيام

معناه يا قلبي ان المادة هذي عندك يوم السبت و الاحد و الثلاثاء و الاريعاء

كتبت بواسطة جوهرة السعوديه

وفي يوم ثاني حاطين ...S. T. إيش معناه ؟؟؟

معناه ان المادة عندك يوم الاحد و الثلاثاء

كتبت بواسطة جوهرة السعوديه

وفي مرة حاطين أيام ومو واضعين شيء في خانة المادة

هذا قصدهم وقت المعمل او وقت المادة يوم تاني
المادة تكون اللي فوق تبع لها

وإنتي قصدك إني أنا أضفت المادة فلازم أوريها التاريخ
ولا هذا ماينطبق على المستجدات

كتبت بواسطة جوهرة السعوديه

وكاتبين في خاتة المادة رموز زي SE
SG
SB

هذا يا قلبي الشعب تبعك لازم تكوني عارفة شعبتك في كل مادة

كتبت بواسطة جوهرة السعوديه

وليش لازم أحفظ عدد الساعات اللي حأدرسها ؟

لا يا قلبي مو لازم
بس عشان تعرفي انتي كل ترم درستي كم ساعة

و اي اسئلة تانية احنا حاضرين

مشكورة طيووووفة
بس أنا كيف أعرف إنو شعبتي في هذا المكان
يعني يكون مكتوب برة الغرفة ؟

لا يا قلبي ما يكون مكتوب

انتي عندك قدام كل مادة مكتوب مكانها

يعني هي بأي غرفة و بأي مبنى

بس تروحي المكان اللي هو مكتوب