بسم الله الرحمن الرحيم
السلام عليكم ورحمة الله وبركاته

أهلاً وسهلاً بكن أخواتي المستجدات في جامعة الملك عبدالعزيز


هذا موقع جامعتنا ،، ووضعت لكم رابط الصفحة الرئيسية ،،
من خلالها توصلي لكل شئ
>> موقع الجامعة <<


أول شي حابة أنبهكم إن الجداول نزلت من أمس ..



كيف أشوف جدولي ؟!

1 - افتحي رابط الموقع ،،

2 - اضغطي على كلمة odus نظام الخدمات الجامعية ،،
تلاقيها يسار الصفحة ،،
وهذا شكلها

3 - اختاري نظم الخدمات الأكاديمية - طلاب ،، حتلاقيها أول واحدة ،،


4 - على يمين الصفحة ،، في خانة رقم الطالب << ضعي رقمك الجامعي ،،
وفي خانة كلمة المرور << رقم سجلك المدني ،،
ثم اضغطي على دخول ،،

5 - على يمين الصفحة ،، من خانة تقارير استعلامات ،،
اختاري الجدول الدراسي


وانتظرن المزيد أخياتي ،،
وأي سؤال << ولا يهمكم

مشكووووووووووورة

العفو أخت بقبق

وأي سؤال أنا في الخدمة ،.

بالنسبة للنظام في الجامعة >> الملابس، والأحذية والشنطة، والمكياج، ومثل هذه الأشياء ؟!

الملابس >> تنورة طويلة وبلوزة ،،
التنورة القصيرة ممنوعة ،، والبلوزة بدون كم طبعًا ممنوعة حتى لو جلستي بالعباية، حيقولولك فكي العباية ،،
والبنطلون طبعًا ممنوع،
باستثناء طالبات العلوم لما يكون عندهم معمل ممكن يلبسوا البنطلون تحت الـ lap coat ،،
أي لون تحبي تلبسيه مو مشكلة، مافي ألوان تقيدك ،،

الحذاء >> -الله يكرمكم- لستِ مقيدة بأي شيء ،،
اللي تحبي ألبسي حذاء، صندل، شبشب ،،
أنا أحب ألبس حذاء رياضي << مريــــح في المشي والتنقل بين المباني

الشنطة >> طبعًا على كيفك ،، صغيرة، كبيرة، ع الكتف، ع الظهر ،،
أنا أحب الشنطة تكون كبيرة نوعًا ما؛ عشان تكفي كتبي

المكياج >> مو ممنوع
بس بعض الطالبات الله يهديهم يحطوا مكياج، كأنهم رايحين سهرة !!
أنا كويس اذا حطيت الكحل << ماني فايقة من الصباح

>> انصحكم يا بنات تحطوا كريم واقي من أشعة الشمس، حفاظًا على بشرتكن من التجاعيد << الله يعينكم حتسمروا
>> كمان ممكن تلبسوا نظارات شمسية؛ لأنكم حتمشوا في الشمس كثيـــر ،.

انتظر أسئلتكن أخياتي ،,

طيب وجوالي ؟!

الجوال مسموح به داخل الجامعة ،، طبعًا ما يكون كاميرا ،،
جوالات الكاميرا تُصادر(بالـ memory card)، ومايرجع لك إلا آخر التيرم مع كتابة تعهد ،،
وكل ماتكرري الغلط،، كلما تزيد العقوبة ..

أعرف واحدة أخذوا جوالها مرتين ،، المرة الثالثة مارجعوه ،، من العام أخذوه، وقالولها السنة الجاية، والله العالم حيرجع السنة ولا لأ ؟!!

أغلب الأستاذات مايحبوا الجوال يدق في المحاضرة،، اذا كانت طيبة ممكن تمشيها لكِ ،،
بس بعضهم يهزؤوا
فالأفضل قبل ماتدخلي المحاضرة خليه silent

مشكورة قلب أختها على هذا المجهود الرائع
ممكن تقوليلي البلايز اللي أكمامها تجي قصيرة شوي يعني إلين ربع الكوع من فوق
لإني أشتريت بلوزة زي كذا وخايفة تكون ممنوعة لإنها مرةةة عجبتني
وكمان البلايز اللي تكون مفتوحة من فوق مو مرة بس شوي ممنوعة ولالأ ؟
لإني مني ناقصة إني أتهزأ أول يوم
وكمان البلايز الضيقة ممنوعة ولالأ ؟ ولا لازم تكون الملابس واسعة ؟
مشكورة ومعليش كثرت أسئلة ونسيت
بالنسبة للشنطة إيش أشتري أخاف أشتري صغيرة وماتكفي
وهل ممكن أشيل كتبي في يدي
وممكن توريني صورة شنطة ممكن تكفيني علما بأنني كلية علوم
وشكرا طولت عليكي

حبيبتي جوهره السعوديه
كيف حالك؟
ربي يوفقك في الدراسه
لا تخافي من الجامعة
انت داوم أول يوم و تشوفي بنفسك الوضع كيف
بالنسبه للشنطه فهذا يرجع على حسب المواد و الاستاذات ايش
يطلبوا منكم
فبعض الاستاذات تنقلك المحاضرات بنفسها و البعض الاخر تشتري كتاب و العض الاخر تشتري ملازم
أما الملابس خذ راحتك بس باحترام بعض الاستاذات بذات في المستوي الاول
يكون متشدد نوع ما في الملابس بس لا تخافي هذا الاشياء كله ترجع تعرفي تتعاملي معها مع الدوام
أهم شي المعدل الدراسي في الجامعة اهتمي فيه
إذا تبغي تسأل عن شي أنا تحت أمرك أنا موجوده
قراءة الموضوع ليه مكتوب عن المباني الجامعة أنا اليوم كتب رد عليه عشان تعرفي الجامعة

مشكورة صيبا على تواجدك معايا
وربنا إن شاء الله يوفق أمة محمد صلى الله عليه وسلم أجمعيـــــــــــن في الدنيا والأخرة
آآآآآآآآآآميـــــــــــــــن
وحابة أسألك على شيء بالنسبة للمعدل كم لازم أجيب عشان اقدر أتخصص في القسم اللي أبغاه ؟
لإني سمعت إنه اللي ماتجيب معدل كويس يدخلوها في أي تخصص
يعني مو على كيفها صح ؟
وأبغى أسأل عن الروائح في كلية العلوم أي في المعامل كيــــــــــــف مرة قوية يعني في بنات أغمى عليهم ولاشيء من الريحة لإني ماأستحمل الروائح القوية جدا اا وخايفة إنهم يخرجوني من الكلية عشان كذا ؟
ومشكورة

وفقك الرحمن أختي قلب أختها أشياء جدا هاااااااامة وحسيت تفيد الكل .. عاجبتني ..

الله يسعدك ويجعله في موازين حسناتك