$$$ كيفية تحديد عدد غرز البداية لأى عمل $$$ "تريكو وبس"
حبيباتى الغاليات
وحشتونى كتييييييييييييير
كل سنة وانتم طيبين
عام هجرى سعيد موفق آمن للجميع ان شاء الله
كتير من حبيباتى محبات التريكو سألونى عن ازاى تآخذ المقاس لأى قطعة تريكو لأن دى على حد تعبيرهم
"مشكلتي مع التريكو "
الموضوع سهل جدا يا حبيباتى
ولكل البنوتات الحلوات اللى سألونى
وكمان اللى ما سألونيش
الموضوع سهل جداً يا جماعة
أولاً: معظم الخيوط بيكون مكتوب عليها حجم الابر المناسب للشغل
لأن حجم الابر مهم جداً عشان شد الخيط يكون مضبوط
يعنى لو الخيط تخين والابر رفيعة بيكون الشغل مشدود وتقيل (يعنى مسامه يتكون ضيقة جداً)
ولو الخيط رفيع والابر كبيرة
بيكون الشغل مفرغ ومش حلو
فمراعاة تناسب حجم الابر مع سمك الخيط من الحاجات المهمة
طيب نيجى بأة للخطوة التانية وهى خطوة أخذ المقاسات
عادة بيكون فيه جداول مقاسات ممكن نمشى عليها ونعرف المقاس المطلوب
لكن مش دائماً الجداول دى بتتماشى مع اجسامنا... ده فى حالة وجودها من أساسه
بنتغلب على الموضوع ده باننا ناخد مقاساتنا باستخدام المازورة
أو نقيس على قطعة ملابس مضبوطة موجودة عندنا
طيب بعد ما حددنا المقاس الطلوب
ازاى نحدد عدد الغرز اللى هنشتغل بيها الموديل (واللى أعتقد انه الهدف الأساسى من السؤال)
أفضل طريقة اننا نشتغل عينة من الغرز اللى ناويين نستخدمها بنفس الخيط ونفس حجم الابر اللى ناويين نشتغلهم
ونقيس محيط الصدر ومحيط الوسط للشخص اللى احنا عايزين نعمله الموديل
طبعا بالنسبة للمحيطات نقسمها على 2
يعنى لو المحيط مثلا = 80 سم يبقى اذاً نصفه (اللى بيمثل الصدر او الظهر) هيساوى 40 سم
وبعدين نقيس أبعاد العينة بالسم
يبقى لو احنا محتاجين 40 سم والعينة مثلاً تكرار 13 غرزة وعرضها 7 سم
يعنى السم الواحد فيه غرزتين تقريبا يعنى احنا محتاجين 80 غرزة بداية
يعنى وممكن نزود غرزتين أو 4 غرز مثلاً عشان الخياطات والكلام ده
هى تبان صعبة شوية لكن مع الخبرة والتكرار هتعمليها بمجرد النظر
وآخر حاجة بأة
توزيع الغرزة على الشغل
اللى هى (تقسيم الشغل)
بنشوف احنا محتاجين نكرر الغرزة كام مرة عشان خاطر نجيب العرض اللى احنا محتاجينه
ويبقى ده نفس تكرار الغرزة
يعنى فى المثال اللى فات
احنا قلنا اننا محتاجين 80 غرزة للبداية وعرض الغرزة = تكرار 13
يبقى محتاجين نقسم 80 على 13 = 6
ويزيد غرزيتن (13× 6 = 78) نعمل واحدة على الحافة يمين وواحدة شمال للخياطات
دى تقريباً كل الخطوات المطلوبة لتنفيذ أى موديل
أتمنى ان الشرح يكون واضح ومفهوم
وأنا حاضرة لأى استفسار أو تساؤل
رد مع الاستدلال
كتبت بواسطة نجمة 2
الروابط المفضلة