اريدالمساعدة فى عمل دراسة جدوى لمشروع كروشية وتريكو ماكينة وهل مجديين ولا لا ارجو الرد والمساعدة وشكر
للبحث في شبكة لكِ النسائية:
|
اريدالمساعدة فى عمل دراسة جدوى لمشروع كروشية وتريكو ماكينة وهل مجديين ولا لا ارجو الرد والمساعدة وشكر
ان شاء الله المختصات في هذا المجال ايفيدوك لاني اخذ الكروشيه من باب الهواية فقط
الموضوع مش سهل وعاوز دراسة حد مر يهذة التجربة و موفقة انشاء اللة
هي فكرة حلوة اوي
بس عيزة وقت وتفكير ودراسة جامدة
لان قليل اوي الي بيقدر الفن دا
ان شاء الله بالتوفيق
انا بصراحة مليش فى الموضوع ده ومقدرش افيدك بس بأذن الله اللى تعرف مش هتتأخر عليكى
بالتوفيق ان شاء الله
ان شاء الله الاخوات يساعدوكى
المشروع جميل ولكن بالنسبه للكروشيه لازم تحددى ايه اللى حاتعمليه لان كل حاجه بتاخد منك وقت غير الاخرى,يعنى وقت البلوزه غير الجيبه غير المفارش ...الخ وطبعا فى الكروشيه بتستعملى ايديكى. اما بالنسبه لماكينة التريكو فهى عاوزه تفرغ منك وبرضه لازم تختارى حاجات غير معقده وتاخد منك وقت فى التشطيب مثل البلوزات او الفساتين., لانك حتحتاجى انك تقفلى الشغل اما بماكينة اوفرلوك او باليد وده عاوز وقت ومهاره بالتشطيب. وبعدين لازم تعملى دراسه للسوق علشان تعرفى ايه اللى مطلوب وايضا الاسعار هل حتناسب مجهودك او لا. وفى اى الاحوال استعينى بأى شخص متخصص فى ماكينات التريكو بالتحديد. اذا كنتى من مصر ممكن تاخدى نصيحه مفيده من اى مركز للاسر المنتجه لان عندهم المدربين وممكن ياخدوا انتاجك ويقولوا لك ايه المطلوب للبيع. يارب بالتوفيق
شكرا على ردودكم ونصايحكم الغالية
اختى الحبيبه انا فكرت فى نفس لمشوع وعملت الدراسه وسألت اللى جربوا المشروع قبلى ولما شفت غيرى اتعظت وبعدت الفكره خالص عن راسى لانى مش حمل خساره
المشروع والدراسه والشراء كل ده سهل حتى الشغل سهل طالما فيه عزيمه وحب للشئ اللى بتعمليه
لكن الوحش اللى هيدهسك فى رجليه هو السوق حبيبتى. والقصد انك مستحيل هتقدرى بمشروع صغير فى البيت تنافسى المصانع الكبيره اللى بتنزل شغل فله و البلوفر ب15 جنيه اظن ال15 جنيه دول ما يسووش حتى كسرتك على الماكينه ولا هيجيب تكلفته
وكانت نصيحة المجرب خليكى فى الشغل اليدوى ده اللى مستحيل تنافسك فيه المصانع ابعدى عن المكائن كل شئ وله اصحابه واحنا اصحاب اشغل اليدوى ولو عاوزه تعرفى اللى عرفته لكى هذا بس طولى بالك معايا
بالنسبه ماكينة التريكو افضل نوع الان هو بساب6000 ده مكن بالكمبيوتر وهو جديد المكن تقريبا ب19000 جنيه مصرى ومستعمله من5000ل6000 وفيه واحد عارض مكنته ب4000 بس طبعا دى مش مضمونه امن شئ تجبيها من موقع باساب نفسه صحيح اغلى شويه لكن فى الغالب ده مكن نظيف استعمال خفيف عندهم ب6000 جنيه مصرى ودى ممكن تعملك 6 بلوفرات كبا او 12 صغير ف ى اليوم
ده مكن بالكمبيوت لكن مش متطور اوى نص نص يعنى
فيه مكن اقل منه ده بيطلع الشغل بدون رسومات اسمه باساب80 وده لازم تبتدى بيه مينفعش تدخلى على ال6000 على طول هيبوظ منك الشغل كتير
المكن ده من2000 الى 3000 جنيه مستعمل
فيه بقه المكن الاكثر تطورا وده بتاع المصانع ده مكن ضخم بالكمبيوتر طبعا وانتاجه اكتر كتير المكنه جديه ب50000 ومستعمله ب12 الف وطبعا محتاج محترفين عالشغل والصيانه
عشان تعملى المشروع هتحتاجى مكنه تريكو 80 واخرى 6000 ومكنة خياطه ومكنة اوفر وحد طبعا بيشتغل على كل ماكينه والخيوط حسبت التكلفه قبلك لقيتنى محتاجه ما لا يقل عن 50000 جنيه والربح مش مضمون ولازم يتوفر عندى اجرة الصنيعه واللى هيسوقلى
انا مش ببالغ فى تكاليف المشروع ومستلزماته ده اقل مشروع هتدخلى به السو ق وهتداسى
لانك فى الاخر هتشتغلى لاقاربك ومعارفك ويمكن محل او اتنين الله اعلم وهياخدوا انتاجك باقل سعر
لو تعرفى شهد الحياه وشفتى قد ايه نشيطه وخبيره ربنا يوفقها بس نجاحها ده كان قبل منه فشل فى نفس المشروع وقالتلى انا بكيت على خسارتى بدل الدموع دم ولولا ان ربنا عاطينى الاصرار كنت استسلم لفشل مره ومكملتش لكن انا اتعلمت من التجربه وعرفت السوق كويس ولقيت المجال الوحيد البعيد عن منافسة المصانع هو الشغل اليدوى
بصى انتى ممكن تعملى ايه اتفقى فى المنتديات مع اللى بيشتغلوا كروشيه وعاوزين يستفيدوا وهم فى بيوتهم وهتلاقيهم كتييييييييييييير
انزلى السوق واحصلى على اتفاقيات مع المحلات ويا حبذا لو بداتى بالشغل الخفيف مثلا اسكارفات كوفيات ملابس اطفال ويكون معاكى موديلات لو عندك طابعه على الكمبيوتر اعملى صور للموديلات وطبعا المنتدى مليان بتحف لو معندكيش نزليهم على cdوروحى لسيبر ينزلهم ويا حبذا لو تاخدى موديلات لها باترونات او ورش عمل عشان تكونى فى الامان
وخدى منهم ميعاد لا يقل عن شهر وزعى الموديلات المطلوبه على الناس اللى هتشتغل ويكون بينكم مكتب شحن مضمون انا شخصيا اتعاملت مع فيدكس وكان هايل وفيه مكاتب كتير شوفى اقرب مكتب ليكى وربنا يوفقك حبيبتى
انابشتغل مع شهد لسه فى اول تجربه شغاله من البيت لان عندى طفل خاص مش هقدر انزل السوق ولا اغيب عن البيت ربع ساعه واحده انت لو ظروفك تسمح انزلى وربنا يوفقك ويجعلك سبب لكتير عاوزين يشتغلوا
ممكن كمان تعملى orderعالنت اتفقى مع ناس كتير وهيطلبوا منك واعملى اتفاق كمان مع تجار الجمله للخيط اشترى خيط باسعار جمله واعطيها للى بيشتغلوا معاكى كل ما وفرتى كل ما كان افضل وكمان فيه محترفات فى اماكن معندهمش خيوط ومعطلين بالسبب ده
لوعاوزه تعرفى انواع الخيوط من عيونى هبقى اكلمك اظن ده مشروع بسيط وتكلفته يا دوب على الشحن والخيط الجمله واجرة المحترفات لكن مفيش فيه خساره تضيع تحويشة العمر ولا الوحوش ينافسوكى وتضيعى بينهم ولا اى ندم حتى مسألة الوقت اللى بياخده الشغل اليدوى اتحلت وكانك فتحتى مشغل بس وكل واحده فى بيتها
واهم شئ تستعينى بالله وتخلصى النيه يكون العمل صالح والقصد منه فيد واستفيد وبعيد عن الشبه او الحرام وخللى بالك الصبح بدرى ساعه مباركه توزع فيها الارزاق والناس بتكون رايقه ومودها تمام يعنى انزلى السوق من 9 ل10 واعملى اتفاقياتك قبل زحمةاليوم وقبل ماتنزلى قولى دعاء دخول السوق عشان ؤبنا يكون معاكى ويسهلهالك وحدش يضحك عليكى او يوعدك ويخلف
وفى رعاية الله
آخر مرة عدل بواسطة ام عمووور : 04-09-2009 في 04:01 AM
شكرا على النصايح الغالية المشكلة انى خايفة اجازف ومنجحش او مكنش على قد المسؤلية وشكرا
الروابط المفضلة