يمكن ممنوع دخول الرجال هالقسم
بس انا بحاجة لدعمكم لي


زوجي طول عمره وزنه عالي بس بعد زواجنا يعني من 3 سنين تقريبا
ارتفع وزنه كتير حتى وصل 122 كيلو
وكل ما نبدأ انا وياه ريجيم بمل بسرعه وبيرجع ياكل اكتر من قبل
بس هالمرة ان شاء الله عزيمته قويه واصراره اقوى انه ينزل وزنه
وفعلا بدأت معه
من اسبوعين تقريبا وتحديدا يوم 27-9-2011
بدات اعمل نظام غذائي ما بعرف على اي اساس مبني نظامي
يعني مش ملتزمه بنظام مكتوب من اخصائية تغذية
باخد افكار من انظمة غذائيه بس بنفذ اللي ممكن يخللي زوجي يستمر وبدون ملل

امبارح زوجي اتوزن ولقي وزنه نازل ولله الحمد حوالي 7 كيلو صار 115
يا الله شو فرحت انه فعلا بللشت تبين نتائج لاني بجد تعبانه زي ما هو تعبان على حاله
ويوميا لازم تكون وجباته جاهزه مشان ما يضطر يشتري اكل من برا خلال شغله ويضيع كل تعبنا ع الفاضي

احكيلكم النظام اللي ماشيين عليه

اول يوم ما افطر.. بس هو خلال وجوده بالشغل بيشرب نسكافيه وقهوه
كنت محضرتله غداه واخده معه كان صحن صغير ملوخية مع قطع دجاج مشوي مع كاسة رز مطبوخ.. وسلطة خضار

تاني يوم عملتله سمك مشوي مع برضه كاسة رز وسلطه بس هالمره حطيت مع السلطة دبس رمان كتغيير

تالت يوم عملتله لحمه مفرومه مع خضار سوتيه مع شوربة خضار وبرضه كاسة رز

اليوم الرابع كان سلطة معكرونه مع مايونيز لايت ولبن لايت.. ومعهم خضار سوتيه وشوربة خضار

اليوم الخامس كان يوم مفتوح طبختله اللي بيشتهيه من الاكل كان جاي على باله مقلوبه

اليوم السادس كمان كان مفتوح اجازة اخر الاسبوع لسه مخربط وضع الاكل فيها بس بصراحه هو كتير بقلل كميات الاكل عن ما كان قبل

اليوم السابع جهزتله للغدا دجاج قطع (شيش طاووق) مع سلطة (فليفله بألوانها ال3 مع دبس رمان) وشوربة بروكلي

اليوم التامن عملتله سلطة بروكلي حبها كتير^_^ وكمان شويتله كبدة دجاج

اليوم التاسع كمان مرة سلطة بروكلي وعملت جنبها كاسة برغل بدل الرز كتغيير برضه حب البرغل كتير مع انه قبل كان ما يرضى يدوقه
وبالعشا اخد البروتين اللزم كان بيضه مسلوقه مع خبز اسمر

اليوم العاشر سلطة بندورة وخيار وكتغيير ضفتلها زيتون اسود مع قطع شيش طاووق..

اليومين الماضيات كانوا تخبيص بما انهم نهاية الاسبوع
بس لما اتوزن ولقي حاله منقص من وزنه قرر يكمل واليوم كان غداه قطع لحم مشوي مع سلطة

وهلا بدي اقوم اجهزله غدا بكرا وهو عباره عن برغل وسلطة تونا وشوربة بروكلي..

طبعا بالنسبة للعشا بالغالب كان يا اما سلطة تونا او تفاحتين او بيضه مسلوقه
يعني مابعرف هل هدا النظام صحي او لا نفسي مشرفات القسم يحكولي اذا مقبول وضع نظامنا ولا فيه اخطاء ينبهوني الها
وان شاء الله رح اصير اجي كل يوم هون اكتب يومياتنا لحتى اضل على عزيمتي

دعواتكم

بالتوفيق عزيزتي
يا رب يوصل زوجك للوزن الصحي المثالي على خير وسلامة
بشجعك كتير ..عنجد برافو عليكي لازم تتعبي معو مشان يكمل مشواره
وإن شاء الله المشرفات بفيدوكي بنوعية الأكل

الله يجزيكي الخير هبهوبه
ان شالله يوصل للوزن المثالي
لانه بجد بللشت ركبه توجعه من وزنه الزايد
شكرا كتير ع كلامك الحلو

الله تعالى يعينك و يقويك

أنا زوجي عندو وزن زايد بس مو هالأد
و مشتهي ينزلن
بس أنا حابه أنو يتبع نظام مدروس يمكن أحسن
شو رأيها هبه خانم يا ترى ؟؟؟؟؟؟؟؟؟؟؟؟

سوما حبيبتي
أكيد لازم الأكل يكون مدروس وصحي وبعدين الرجال أسهل من المرا لأنو بدا تساويلو اللي بدو ياه .. أما إلها بطنش وبتتكسلن
ليه ما بتعملي متل الأخت ورد الصحراء (هيك أسهل من إنو أكتبه بالانكليزي هههههه)
شوفي ريجيم النقاط كتير ظريف واسألي الشفاعة بتفيدك لأنو الرجال أكلو أكتر منا

اها انا قرأت انه حاجة الرجال للسعرات اكبر من النساء
وفعلا ريجيم النقاط كويس
ربنا يقوينا ويقدرنا نساعد ازواجنا ينزلوا اوزانهم مشان اتضل صحتهم منيحه
ربنا يحفظلنا ياهم

حبيبتى ما شاء الله عنك
نعم الزوجة
بحترم الزوجة والام الواعية
برافو عليكى


حبيبتى تغيير نظام زوجك وهو التخفيف ئ رااااااااااااااائع وممتاز جدا

لكن وجبة الفطور جدا مهمة
حاولى لى مثل ما بترتبى الغدا
ترتبى الفطور كمان له
بكيس ظريف
تفاحة وعلبة لبن قليل الدسم وتوست او خبز قمح
وغيرى بهالافطار
مرة فول ومرة بيض مسلوق

والعشا كمان يكون مماثل للفطور

لانه بالبداية حيستجيب وزنه وينزل

ثم راح يثبت لا قدر الله

مثل الطفل لما يحبى بتفرحى كثير
لكن لما يضل يحبى اكيد بيكون فى مشكلة

على كلن ان شاء الله بناء على طول ووزن زوجك
ساساعدك بنظام غذائى صحى ومدروس

اذا ما راح تلتزمى فيه بالضبط

على الاقل ركزى على كمية النشويات

وما تنسوا ابدا اهمية الرياضة

خليه يبلش تدريجيا

ويزيد الوقت على حسب مقدرته

بنا يوفقكم ياااااااااااارب

ما بتتخيلي قديش انبسطت بردك
هو فعلا بدأ يلعب رياضه مع اصحابه كل يوم ثلاثاء بيروح يلعب كرة قدم
بس طبعا لانه وزنه عالي بيتعب وبيضل طول الاسبوع رجليه يوجعوه
بس يخف كمان شوي بده يصير يركض ع الكورنيش

هو طوله 172
ووزنه حاليا صار 115

وياريت فعلا تعطيني خيارات اكتر للوجبات
لانه هو فعلا سريع الملل من هيك كل يوم بدور ع سلطة جديده وشوربه جديده
وطريقه تانيه لعمل الدجاج او اللحمه او السمك
مشان ما يمل او يحس اني بأكله اكل مستشفيات زي ما بقول
ربنا يقدره ويقوي عزيمته اكتر واكتر
انا حكيتله اذا بتستمر على هاد التخفيف بإذن الله خلال شهر ونص رح تنزل عن ال100
انا مش طماعه بس ينزل عن ال100 وبعدها يلتزم بالرياضه اليوميه
ولانه طبيعة شغله طويله رح احاول استمر بتجهيز اكله يوميا بحيث ياكله بالشغل

وجزاكي الله خيرا مرة تانيه

ربنا عينك و يعينه عبيبتي
انا بعمري ما التزمت برجيم لاني مش من النوع الصبور
بس عارفة علاجي بقلة كمية الاكل و قلة الحلويات
و الحركة الكتير
طبعا انا وزني مش كتير كتير كان زايد بس طبعا مع الحمل و قلة الحركة لكن لما قررت انزل خففت كتيير من اكلي و كنت لما اجوع اكل خيار او الهي حالي بشغلة تانية او اطلع امشي
بالنسبة لزوجك الله يعينة و يقوي عزيمته بدو مشي كتير
و حركة اكتر يعني يحاول يعمل كل شغلاته بنفسه
ما يطلب من حد ناولني او اعطيني و كمان يستعمل الدرج مش السلم الكهربائي لو ركبو بيوجعوه يمشي حبة و يرتاح حبة
طبعا الشكر اولا لله و بعدين كل التحايا حبيبتي الك لانك انسانه مجتهدة و محبة لزوجك لولا كدة ما كنتي اصريتي تساعديه و تحاولي معاه عشان خاطر يكسب صحته
ربنا يوفقك و يعطيكي العافية و يقوي عزيمتك كمان و كمان
تحياتي
ام محمد