لي سنتين وانا اتعالج في مستشفي التخصصي في مكه عندي الم في مفصل كتفي كل ما حركت يدي ومع مواعيد المشتشفي المتباعده زاد الالم وفي كل موعد تخيلو في كل موعد والله نادرا ما يتكرر الدكتور وكل دكتور اقدم له ال الهستوري المرضي واشرح حالتي وياريت اسجله في المسجل واعطيه للدكاتره لان لساني صار حبل وانا اشرح وكل دكتور يخمن ايش المشكله اول واحد اعطاني كيس من الادويه قال احولك للعلاج الطبيعي وكمادات ساخنه واجهزة مساج وارتاح شوي ويعاود الالم والتاني قال يمكن من رقبتك المشكله اعملي رنين مغناطيسي للرقبه والله لايوريكم علي جهاز زي القبر مررررره مخيف ....ومايطلع في الرقبه شي ويحولني للاعصاب لان مع طول المده والالم يزيد بدئت اطراف يدي (تنمل ) رحت للاعصاب قال سوي طبقي محوري للدماغ يمكن من الدماغ وسويت وطبعا تخيلو كل موعد وموعد احيانا بعد شهر والله زي ما اقول لكم وانا علي امل ان اجد الحل مالقي دكتور الاعصاب من الاشعه شي وقال مالقيت حاجه وبعدين تخيلو دكتور الاعصاب حولني لطبيب نفسي يقول يمكن انا مشكلتي نفسيه |( يعني مجنونه مثلا ) لكن برضو رحت ماعندي حل تاني انا مااقدر لفلوس الخاص وطول المده كل دكتور يعطيني كيس من المهدئات علي شان الم كتفي رحت لدكتور الاعصاب قال (بعد ما اعدت له الشريط cv)قال كيف يحولوكي عندي روحي قوليله انت ليه حولتني للنفسيه انا رح احولكن للعضام مره تانيه وهكذا الي ان تخيلو صارت يدي ما تتحرك وصرت ابكي كم يوم وانا عايشه علي الفولترين وغيره وحده ورا وحده فكرت بفكره مجنونه وهي اني اروح للمدير (مدير المشتشفي ) اشتكيه واشرح حالتي.....واكمل بعدين زوجي جا

ربنا يشفيك ويمتعك بالصحة والعافية

كتبت بواسطة ام عبودى القمر

وبعدين تخيلو دكتور الاعصاب حولني لطبيب نفسي يقول يمكن انا مشكلتي نفسيه |( يعني مجنونه مثلا )

شفاك الله و عافاك و الهمك الصبر. اختي من قال انه الطبيب النفسي للمجانين!!!!!!!!!!!!! صرنا في عصر العلم و بعدنا نظن انه الطبيب النفسي للمجانين!!!!! اين العلم و الفهم

شفاكى الله وعافاكى
ننتظر بقية القصة

أنتتتتتتتتتتتتتتتتتتتتتتتتتتتتتتتتتتظرك
بفااااااااااااااااااارغ الصبر

ربنا يشفيكي ويعافيك

...

شفاك الله و عافاك و الهمك الصبر

شكرا والف شكر لردكم ولمؤازرتي وانا ما قدرت اكمل لاني والله مشغوله مرررره نبغي نروح لاهل زوجي وزي ما تعرفو لازم الأم تشرف علي كل متطلبات الخروج من لبس وتمشيط وغيره .... المهم ابي اكمل القصه طبعا سبق وقلت اني زادت علي الالام ليلة خميس وجمعه واستنيت للسبت الصبح وانا اشرب المهداااات رغم اني ارضع طفلتي بس والله من الالم الله لا يوري مسلم وجا الصباح واخذني زوجي للمستشفي التخصصي ودخلت لعيادة العضام اللي لي سنتين وانا اراجع فيها طبعا بمواعيد .....وانا متاكده انهم مارح يدخلوني ولا الدكتور رح يحزن علي بس والله الامل بقدرة الحنون اللي عالم بحالي والله يا جماعه مفصل كتفي ما يتحرك مرررره مع الم شديد ولبست عباتي بملابس البيت لان ما قدرت البس ولي يومين ما مشطت شعري تخيلو شكلي كأني شجره قولو يالطيف المهم رحت ودخلت للممرضه طبعا المستشفي فاضيه انا اول الزائرين وقلت لها دخيلك الموضوع كذا وكذا وشوفي حالي والله ببرود قالت الدكتور اللي اخر مره دخلتي له مو اليوم دوره قلت لها الله يخليكي ساعديني انا يدي ما تتحرك قالت انا ما اقدر الا اقولك تعالي الثلوث تلاقيه يمكن يدخلك قلت وزدت مافي فايده قالت روحي للطوارئ ووانتو عارفين ما الطوارئ رح يعطوني زي العاده مخدرات وبس طيب ايش اسوي يااااربيقالت سوي انك طحتي عليا علشان يشوفك دكتور عضام والله من الالم قلت يمكن
ورحت للطوارئ الله لا يوريكم كاني شحاته هذا شعوري ساعة ما وقفت امام طبيب الطوارئ كان يقري في كتاب انجليزي وما كلف نفسه انه يتركه ويلتفت يشوف هذي ليش صوتها يبكي قال لي ببرود وهو ما ترك الكتاب ايش اسمك رديت عليه قال ايش تشتكي قلت يدي طحت عليا بالانجليزي علشان يفهم مضبوط وينادي لي دكتور عضام (بلاااااهه)كتب في ورقه شئ وقال روحي سوي اشعه ولا طالع في يدي ولا حتي اخذو حرارتي او اي شي قلت معليش ماشي ورحت اسوي الاشعه ورجعت طالع فيا وقال انا مو شايف فيه شي يعني(انتي ما فيكي شي )وخدي هدي الحبوب لقيت الدوا فيفادول طيب كييييييف قلت له انا مره تعبانه وشوف يدي ما تتحرك قال لي بعربيه ركيكه انا مافي غير كده خلاص والله والكتاب مازال في يده كنه ما عنده شغل انقهرت مررره وقلت له بالانجليزي انت المسؤووول لو حصل لي شئ اذا خرجت من غرفتك ....اعطيني اسمكو ساعتها كتب ورقه واعطانيها وقال روحي لغرفه رقم 2 رحت لقيت طبيب من نفس الجنسيه بس كبير في السن وبدقن فرحت وقلت هذا اتوسم فيه الخير قال ايش تشتكي رجعت شرحت الموضوع شاف الاشعه قال ما فيكي شي انا احولك علي دكتور الطوارئ الخاص بالعضام...... رحت للغرفه الكبيره المليانه اسره وجلست انتضر الدكتور اللي رجع يطلب مني اسوي اشعه بس تخيلو بالكتف الثاني استغربت قلت للدكتور ليه يا دكتور انا ما اشتكي من هذا الكتف قال وصدمني لما قال علشان اشوف ايش الاختلاف بين الكتفين قلت ماشي يلا يابنت هانت وسويت اشعة اكس رغم خوفي منها ومن ما قريت عنها واستعذت بالله من شرها ورجعت للدكتور وانا اجر نفسي جر من التعب والالم المستشفي كبير والاماكن متباعده للمريض وصرت افكر وانا ماشيه واقول لنفسي ياااالله هذا كيف لو كانت رجلي التعبانه كان ايش سويت ياتري لو احد عجوز مسكين كيف رح يتصرف تشعرو مافي رحمه او شفقه الحمدلله
الحمد لله وحده المهم قال الدكتور اكتافك زي بعض وما لقيت اي اختلاف قلت له يعني انا طيب ليش يدي ما تتحرك طيب وهذا الالم ايش اسوي فيه قال بعصبيه وتأفف انتضري موعدك عند دكتور ك وهو يشوف المشكله قلت له طيب موعدي بعد 3 اسابيع وانا حالتي مخوفتني قال هذا الحل الوحيد قلت له هذا مو حل انا عندي مشكله في مفصل يدي فيه التهاب والالتهاب مو واضح في اشعة اكس لانها ببساطه ما تبين الا العضم لقيته مشي وما رد علي لحقته وانا مقهوره وخايفه ارجع البيت واخذ المسكنات لليوم الرابع قلت له انا رح اشتكيك للمدير لانك ما عالجت مشكلتي ولا طلبت لي دكتور عضام قال روحي اشتكي مشيت وانا ابكي ترا يا جماعه لا تضنو اني قويه لكن انتو ما جربتو المي وانا خيفه ان يذهب مفعول المسكن ويرجع الالم ومشيت وانا هامه اني لازم ما اسكت علي قسوتهم ولا مبالاتهم وكأن الواحد يشحت منهم الله لا يحوجنا الا لوجهه الكريم
معليش ممكن اكمل في وقت تاني اصلي للان ما نمت والله مررره نعسانه بس ارتحت اني فضفضت بكره اكمل روحتي للمدير

لا حول ولا قوة الا بالله
حسبنا الله نعم الوكيل في دكاترة مثل هدول
وكأن قلوبهم ميتة
أنا حاسة فيك أختي لاني مررت بهكدا مرحلة
ربنايحاسبهم على ما يفعلوه بالناس كوارث في كل مكان
ربي يشفيك وننتظرك

ربنا يشفيك ويعافيك للاسف الدكاترة جدا مادين لو كنتي روحني عيادة خاص كان التعامل حيكون مختلف حسينا ونعم الوكيل في انتظار ياقي القصة