بنات مصر او اخواتنا من الدول العربية اللى جربوا دكاترة مصر فى الدايت
عايزيين نعرف تجاربكم مع دكاترة الدايت علشان كلنا نستفيد
انا حقولكم على تجربتى مع 2 دكاترة جربتهم
اولا دكتورة اسمها
ريموندا حنا ودى عيادتها فى العجوزة والكلام ده كان من سنة 2006
المهم هى العيادة نظيفة جدا وبتاخدى ميعاد بتدخلى فيه بالظبط ولوحدك مافيش حد تانى معاك بس المرة الأولى دفعت 250 جنية...بصراحة انصدمت
المهم اديتنى الدايت وكمية ادوية مهولة مش فاكرة منهم غير بايو كات
خسيت 5 كيلو فى عشر ايام
رحت المتابعة دفعت 75 جنية
ومش عارفة ليه مستمريتش معاها .... المسافة كانت بعيدة جدا غير انى بصراحة حسيت انها غالية قوى انى اروح كل اسبوع ادفع 75 جنية علشان عشر دقايق وورقة فيها الدايت
بعد كدة شفت دكتورة منى راداميس كتير قوى فى التليفزيون واتصلت بالدليل وسالت على تليفونها وعنوانها
رحت الأول عيادة مصر الجديدة ...لاقيتها فى بيت قديم ومش مجهزة خالص نقلت رحت عيادة مدينة نصر ..بصراحة انظف كتييير ومجهزة
وبتدفعى 100 جنية اول مرة والمتابعة 20 جنية
بصراحة كنت رايحة 87 كيلو تابعت معاها لمدة سنتين بس مش متابعة دائمة
يعنى كنت ساعات بسافر بالشهور مع زوجى وارجع اطخن واروحلها تانى وارجع اخس ... المهم وصلت معاها 73 كيلو
بس برده ما استمريتش معاها .... انا عارفة ان المشكلة فيا انا مش فى الدكتورة بدليل انى خسيت معاها
اللى معجبنيش عند دكتورة منى الزحمة الفظيعة اللى عندها وبتوصل ساعات الأنتظار علشان تدخلى يمكن 3 ساعات وبتدخلنا 10 مع بعض او اقل شوية وساعات اكتر ...على حسب الزحمة
وفى الأخر بتحسى انك مش واخدة اهتمام من الدكتورة بتاعتك ...
وساعات كتير بتدينى دايت مكرر يعنى اخدتة قبل كدة
غير ان الأستاف بتاعها بيتعاملوا مع الناس بشكل مش لطيف نتيجة الزحمة والضغوط اللى عليهم وكل شوية واحدة تقولها انا حدخل امتى ؟؟؟
ودلوقتى انا وزنى 81 كيلو ... وزهقت من الدايت والدكاترة ...بس حعمل ايه لازم اخس علشان صحتى وشكلى امام زوجى وبنتى
ياريت يا بنات تشاركوا فى الموضوع ده علشان نعرف الدكاترة الكويسة من الدكاترة اللى واخدة سمعة على الفاضى
وشكرا
الروابط المفضلة