اخواتي العزيزات
كيفكم ان شالله بخير
الصيف صار على الابواب والجو بلش يصير حلو وصار ما عنا اي عذر لعدم ممارسة الرياضة
فعشان هيك
رح نبدا بهذه الحملة اعتبارا من الاسبوع القادم
تحت شعار
وداعا للسمنه واهلا بالصحة مع منتديات لكِ
الحملة رح تكون عبارة عن جهد جماعي للكل
كلنا بدنا نشتغل ونتعب ونشجع بعض
والاهم نلتزم ونلتزم ونلتزم
الصحة ما بتكون بريجيم قاسي والوزن ما رح ينقص مع الحرمان بدون ما يرجع
هالمرة بدنا نبدا صح باذن الله
رح ناكل اكل صحي
رح نلعب رياضة
رح نشجع بعض
رح نحكي عن تجاربنا
رح نفيد ونستفيد
وتذكروا...............عمره ما كان الشي الحلو بييجي بسهولة وبسرعه
اذا بدك وزنك ينزل وبدك جسمك يكون مشدود مو مترهل
وبدك بشرة نضرة مع المحافظة على شعرك
ما الك غير الطريق الصحي الي هو النزول البطيء
النزول السريع انا ضده وضد كل الريجيمات الي بتنادي فيه
اذا بدنا ننزل بدنا نحافظ على نزولنا ما بدنا ننزل ونفرح شهرين زمان وبعدها نرجع نعاني
لااااااااااااااااااااااااااااااااااااااااااااااااا ااااااااااااااااااااااااااااا
الصحة ثم الصحة ثم الصحة
النظام الي رح نتبعه نظام تخفيف فيه كل الاكل مع مراعاة السعرات الحرارية وكميات الدهون والبروتين والنشا
نظامنا اليومي ما رح يقل عن 1000 سعرة حرارية
وما رح يزيد عن 1300
لانه بدنا نتبع نظام حياة يضل معنا على طول
ما بدنا نقضي هالعمر من دايت لدايت
ومن سمة بدن لتنكيد لما بعرف شو
بدنا نبدا صح
ما بدنا نضل نعمل ريجيمات ونشتهي الآيس كريم والشيبس والبسكوت والخبز والرز ونخرب الدايت ونرجع نزيد
بدنا ناكل كل شي وننحف
رح يكون عنا تمارين رياضية يومية وان شالله رح انزلهم بموضوع مستقل
والتمارين لجميع عضلات الجسم واي وحدة عندها اي مشكلة بجسمها رح تحلها مع التمارين
رح يكون في وصفات سعراتها الحرارية مناسبة
اما من النت او من تجارب الصبايا
ورح تكون بموضوع مستقل
رح يكون عنا اهداف يومية واسبوعية ورح نحققها باذن الله
رح نشتغل على اللياقة النفسية والبدنية ونزبط عادات اكلنا
رح نخسر كيلو بالاسبوع
رح نكسب عضلات قوية وبالتالي عظام قوية
رح نكسب جسم رائع مشدود<<قولوا ان شالله
رح نشجع بعض ونرفع معنويات بعض
وهيك رح نضمن انه ما في ملل او قلة عزيمة او ارادة رح تسيطر علينا
طبعا الكيلو الي رح نخسره رح يكون كيلو دهن صافي
لانه الجسم البشري مستحيل ثم مستحيل انه يخسر اكتر من كيلو بالاسبوع دهن
واذا خسر اكتر رح يكون عضلات وماء
ونحنا ما بدنا نخسر لا عضلات ولا ماء
رح ييجوا صبايا يحكولي شو كيلو بالاسبوع كتير قليل
رح احكيلهم انه كم اسبوع ضيعتوا من عمركم وانتم عم تجربوا بالريجيمات وتخسروا وترجعوا تكسبوا؟؟؟؟؟؟؟؟؟؟؟؟؟؟؟؟
انا رح امشي مع هاد النظام
الي بتحب تشاركني وتساعدني بالحملة وتمشي على برنامجنا اهلا وسهلا فيها
والي بتحب تشاركنا بس بنظامها الخاص كمان اهلا وسهلا فيها
واذا ما حدا بحب يشاركني انا رح امشي على الحملة ورح اكتبلكم شو بصير معي باذن الله
واكيد كلكم فيكم تستفيدوا من التمارين الرياضية واحكولنا عن النتائج
المطلوب منكم تكتبوا اوزانكم واطوالكم
ولوين حابين توصلوا
وتذكروا دائما بيت الشعر التالي
وما نيل المطالب بالتمني
ولكن تؤخذ الدنيا غلابا
الله يوفق الجميع
ويالله بدينا قولوا بسم الله
وتعالوا سجلوا بهادي الحملة الحصرية على منتديات لكِ
وخلوا هدفكم انه عام 2007 هو آخر عام للسمنة واول عام للصحة
الروابط المفضلة