كيفكم يا صبايا
طبعا ما النا حكي غير شغلنا الشاغل الي هو الوزن الزايد والرشاقة ........
لازم كلنا نتفق مبدئيا انه لناخد خطوة جادة بانزال الوزن ونقرر فعلا انه نحنا بدنا ننزل وزننا لازم نعترف اول شي انه هيك قرار بده ارادة قوية وهدف محدد
رح تقولولي القصة مش قصة ارادة القصة بدها تنظيم
رح احكيلكم التنظيم اصلا بده ارادة لانه بشكل عام الدمار اسهل من البناء
والفوضى اسهل من النظام
والعشوائية اسهل من التنظيم
والانسان بطبعه بدور على السهل
لانه كل صعب في من وراه تعب
ولا شو رايكم؟؟؟؟؟؟؟؟؟؟؟؟؟
اذا اول شي اتفقنا على شغلة الارادة والعزيمة
نيجي للهدف الي رح يدعم ارادتنا
كل وحدة بدها تنزل وزنها لازم تحدد هدف محدد وتقرر انها توصله طبعا الهدف لازم يكون منطقي وواقعي مش خيال واوهام
يعني مش تيجي وحدة وزنها 130 تقول انا بدي اصير هيفاء وهبي ويصير وزني 55 بخلال 4 اشهر
لا
خطوة خطوة وبتوصل انا ما بحكي انه مستحيل
بس مش منطقي
يعني المفروض ترسم عدة اهداف اولها مثلا اتخلص من 10 كيلو....وهكذا وآخد وقتي ما استعجل على جسمي
طيب حددنا هدفنا هلا بدنا الوسائل الي تساعدنا للوصول الى هذا الهدف وتحقيقه وبالتالي دعم الارادة والعزيمة
وهون رح يدخل علم النفس بالموضوع شوي
يعني لما اي وحدة فينا تقول بدي اروح على المول محتاجة اغراض ضرورية
انت حطيتي هدف انك تروحي على المول
كيف بدك تروحي مو مهم سواء بالسيارة او مشي او بالباص او بالتكسي مو مهم طالما بالنهاية وصلتي المول وجبتِ الاغراض الضرورية
لانه فكرت بالهدف والاغراض الضرورية ما فكرت بالطريقة
يعني قلتِ انا رايحة المول ما قلتي انا رايحة السيارة
لانه السيارة وسيلة لوصول المول الي هو الهدف
في احدى القصص الي قراتها بتحكي انه احد مدربين السواقة
عم بدرب احد الطلاب وقله:
مهما صار معك لا تركز على العائق ركز على الهدف
في احد الايام وهم بيتدربوا اجا الطالب بده يخبط السيارة وكان في قدامه جدار كبير كتير والسيارة متجهة للجدار والطالب بيتفرج على الجدار وخايف
اجا المدرب فورا حرك راس الطالب باتجاه الطريق وفورا السيارة اتحركت على الطريق وغيرت مسارها وما خبطت لانه الطالب ركز على الطريق الي هو الهدف وشال عينه عن العوائق الي هي الجدار
والوزن نفس العمليه
يعني انا هدفي انزل 10 كيلو بركز على الهدف وبمشي باتجاهه
بلاقي وادي بنزل فيه بشوف جبل بتسلقه او بلف من حوله مش بوقف<<<<شو رحلة سياحية ؟؟؟
المعنى والله ظروفي ما بتسمح ووقتي ما بيسمح وبيتي وزوجي واهلي وما بعرف شو
هاد كله عوائق بدنا نتغلب عليها وما في مستحيل
طالما عيني على الهدف ما بهمني اي شي من العوائق وما بفكر فيها اصلا
اذا انا بقرر انه رح انقص وزني عن طريق عدة اشياء
الرياضة
تنظيم الغذاء
تغيير نمط الحياة الكسول واعتماد نمط نشيط
هادي الاشياء دائما بفكر فيها
وبالتالي ببطل الاكل شاغل بالي وما بضل هو محور تفكيري
لانه لو ضل محور تفكيري هو الاكل رح اشوف انه رح اضل دائما اشتهي الاكل واخرب الدايت واقول ما عندي ارادة
بينما بالاصل انا ما عندي هدف
اذا هدفنا الرئيسي هو الرشاقة وصحتنا ومنظرنا عندما نقف اما المرآة وماذا سيقول الآخرون عنا وهل سنصبح في يوم من الايام نماذج يحتذى فيها في خسارة الوزن واكتساب الرشاقة؟؟؟؟
وهيك رح يطلع الاكل من تفكيرنا ورح يصير مجرد نظام غذائي بساعدنا على الاستمرار في الحياة
وعلم النفس بالموضوع بكون بتوجيه اوامر للاوعي والعقل الباطن والتحكم فيه وتوجيهه للهدف الي انا بدي اوصله باذن الله
وهيك بنقدر نعمل عملية تناسق بين تفكيرنا الواعي وعقلنا الباطن او اللاوعي
حيث انه تفكيرنا الواعي هو بيحرك الاطراف مثلا هو الي بخلينا نمضغ الطعام هو الي بخلينا نعمل اي حركة ارادية
العقل الباطن هو الي بيبعث الايحاءات
فلو غذينا عقلنا الباطن بالهدف <الرشاقة>
رح يبعث ايحاءات للعقل الواعي بعدم اكل الدهون مثلا
ورح تكون تطلعاتنا وافعالنا بتعكس كل ما غذينا العقل الباطن به
وما سوف يخدم تحقيق الهدف مثل الرياضة والنظام الصحي
اذا كل ما علينا هو التفكير بالرشاقة والاسباب الي بتدفعنا للوصول للرشاقة وهي عديدة وكل واحد منا عنده اسبابه ومنها :
حياة صحية
احساس بالخفة والحيوية والقدرة على التحرك
التخلص من بعض الامراض مثل ربو ضغط ضيق تنفس....الخ
ممكن المظهر الجميل<<<اكيد المظهر الجميل مو ممكن
علاج بعض حالات العقم وتاخر الانجاب الي سببها السمنة
الثقة بالنفس
انتظار مناسبة معينة
تحسين الحياة الزوجية ونظرة الشريك الآخر لشخصي
وغيرها من الاسباب الي ممكن تساعدنا للوصول الى الهدف
مش نقعد نفكر ياه لو قدامي حبة سنيكرز ولا كيكه ولا الطبخة الفلانية ولا ما بعرف شو.............
اذا الشغلة مجرد تفكير وتلقين العقل الباطن باهدافنا ليساعدنا على بعث الايحاءات للعقل الواعي الي رح يصدر الاوامر لجسمنا بالتكيف مع ما يخدم هدفنا
اذا هاد اول شي لازم نصدق فيه لنوصل لاهدافنا الي موافقة معي
تعبر عن رايها والي مو موافقة كمان تعبر عن رايها
والموضوع اعلاه عبارة عن جهد شخصي حصيلة بحث دائم و قراءة كتب عديدة ومتابعة برنامج اوبرا وخصوصا نصائح الوزن
ان شالله تستفيدوا منه وللحديث بقية
رح احكي فيها باذن الله عن اساليب ممكن تساعد في الوصول للهدف بعد ما غذينا عقلنا الباطن
بالتوفيق للجميع
الروابط المفضلة