السلام عليكم ورحمة الله وبركاته
يا بنات انا والحمدلله بدأت ادخل في ما يسمى (احساس الرشاقة)
من شهر لحد اليوم وانا ماشية صح
والحمدلله لقيت ثمرة تعبي
.....
رح احكيلكم تجربتي
انا كان وزني تقريبا بين 81 و 82 وطولي 159
وكان كل همي في هالدنيا الريجيمات واني انحف وكنت متعقدة من حالي لابعد الحدود
حتى ما كنت احب اطلع على افراح ولا عزايم ولاااشي !
ولما تعرفت على منتدى لكي صرت مدمنة ليل نهار على قسم الريجيم لاني وجدت فيه ناس عندها نفس معاناتي ولكن ارادتها قوية وبتتساعد
وقررت اني اصنع لنفسي ارادة من حديد
وابدا ريجيم من الريجيمات
بس انا عندي مشكلة!! هي اني لما اتبع ريجيم سهل ما بمشي فيه ابدااا بالعكس بخربه بسرعة
يعني جسمي ما بيجي الا بالعين الحمرة ^_^
المهم ... وقعت على ريجيم طرحته الاخت لولة وهو ريجيم اللي بيعتمد على انك باليوم تشربي حليب وعصير وتاكلي زبادي بس !
http://www.lakii.com/vb/showthread.php?t=239915
وانا باعتباري بحب العصير والحليب والزبادي قلت مالي الا اجرب هالريجيم (ماني خسرانة)
وفعلا بدأت فيه
المفاجئ بالموضوع اني ما كنت اجوع خلال النهار
لان ما بتتخيلو العصير والحليب والزبادي قد ايش بيملوا البطن وبيحسسوا بالشبع
وبعدين صدقيني لو انتي راسمة صورة لك بخيالك وانتي نحيييفة رح تقوى ارادتك
تخيلوا اني ياما اتبعت ريجيمات (الكيميائي والكربوهيدرات واتكنز ولا مدري شو كان اسمه وغيييييييييييييره .. كنت اتعب اتعب وما اقدر اشوف الاكل قدامي) بس هالمرة والله كنت اقعد مع اهلي على الطاولة اللي عليها كل انواع الاكل وعااادي اجيب كاستي الحليب واشرب وانا مروقة !
المهم استمريت على هالريجيم اسبوع كامل بهالاسبوع نقصت 5 كيلو !!!! وجسمي بدا يحلوو (بس لا تقولولي هذا نقص سريع وبيرجع بسرعة ) ابدا ابدا .. انما يا بنات الوزن الزائد كتير بينقص بسرعة وبعدين لما تقتربي من الطبيعي بيتباطئ شوي شوي .....
وبعدين انا رح اقلكم بعض الاشياء اللي عملتها واللي ساعدتني على الانقاص
بس اكمل قصتي .. المهم خلص اول اسبوع ونقص وانبسطت
جيت اول يوم في تاني اسبوع اخدت راحة *** شو معنى راحة ؟؟؟
راحة معناها انك تاكلي من الموجود اليوم
ولكن بكمية قليلة ((واصلا رح تشوفي انك ما رح تقدري تاكلي كتير لانو معدتك بدها تكون بلشت تصغر))
لا تهتمي لكمية الدسم الموجود باكل اليوم معليش,,,انتي كلي وما عليكي بس شووووي ولا تاكلي كتير
يا بنات السر بيوم الراحة هو كالتالي؛::
اولا انك تنبسطي وتاكلي اكل بتحبيه
وثانيا والاهم .. جسمك خلال اسبوع بيكون اتعود على نوع الغذاء وكميته يعني اتعود على الحليب والزبادي والعصير
خلص
ما عاد يحرق الدهون بسرعة لانو خلص اتعود
فانتي لما تعطيه يوم راحة وتاكلي فيه شوية اكل دسم رح يرجع يقاوم ويحرق اسرع
المهم انا بعد يوم الراحة عملت اسبوع تاني من هالريجيم .. وكمان اول يوم الاسبوع التالت اخدت يوم راحة ...
بس لاحظوا انو تاني اسبوع النقص بيكون اقل وهاد شي طبيعي
وبعدها يا اخواتي كان عندي سفرة مع عائلتي سياحة على المغرب
طبعا بتعرفوا .. الريجيم في السفر من اصعب ما يكون!!
ولكن انا استغليت هالسفرة (لتثبيت وزني)!!!
انتوا اكيد بتعرفو المغاربة اكلهم دسم
فانا لما رحت للمغرب انتبهت كتير
بس بنفس الوقت اكلت من كل شي
وما خليت شي بخاطري
بس كمياااااااااااات قليللللة ولما اكل ما احسس نفسي بالشبع خلاص اتذوق الاكلة واكل منها شوي وبس
مشان تعبي كلو ما يروح هدر ... وضليت اسبوع كامل بالمغرب وانا على هالنظام ما حرمت نفسي من شي ابداااا انما بكميات قليلة
(((وكنا نمشي كتير))))
تصدقوا اني رجعت لباريس ماني زايدة ولا كيلو!!!!!!!!! صحيح اني ما نقصت بس اششششوى اني ما زدت
والحمدلله الدكتور قلي انت بهالخطوة ثبتتي وزنك اللي وصلتيله
ولما رجعت من تاني يوم رجعت لريجيمي القديم وانا اليوم وصلت لليوم السادس منه ونقص وزني 2 كيلو هالاسبوع ... مو كتير بس عادي انا مبسوطة كتير كتير
لو حسبنا كم كيلو صرت ناقصة ... 5 اول اسبوع ((وهي الكيلوات الزائدة جدا والتي تذهب بسرعة))
و3 تاني اسبوع ((=8))
تالت اسبوع (تثبيت وزن لا نقصت ولا زدت)
رابع اسبوع اللي هو انا فيه هلأ 2
كم كلهم؟؟؟ 10 كيلو
يعني صرت 70
صح لسه عندي وزن زيادة ما انكر
بس الحمدلله الزيادة هلأ صارت اسهل من قبل
وبدي انقص 10 كيلو كمان وبس وقتها بوصل للوزن اللي انا بتمناه
بس في ملاحظة مهمة جدا تركتها للاخر
الريــــــــــــاضة
يمكن من اسرار نحفي كمان .. هي الرياضة
رح اعطيكم نظامي اليومي من الرياضة ..
كل يوم 30 دقيقة عالجهاز .. جهازي بيحرك الارجل والايدي مفيد جدا
واي وحدة عندها اي جهاز بالبيت لازم تعملي عليه 30 دقيقة كل يوم
بس كنت اضيف كمان كل يوم 15 دقيقة رياضة للذراعين ((لاني اعاني من سمنه في الذراعين))
رياضة وجدتها على موقع فرنسي على الانترنت مفيدة جدا
بس بعرف انو قليل البنات اللي بيعانوا من سمنة الزنود (الاذرع) فاللي حبت اني اعطيها الرياضة اللي كنت بعملها للاذرع ترد علي وتقلي وانا جاهزه ان شاء الله
وعلى فكرة انا هالاسبوع اشتريت بذرة الكتان وصرت اشرب منها كاسة الصبح عالريق وكاسة قبل النوم وحسيت انها مفيدة وطعمها عاادي بس مو ضرورية
ارجو يا رب اني اكون افدتكم او عالاقل اشجعكم شوي
ولا تنسو اهم شي التوكل على الله ومن ثم الارادة فالارادة فالارادة فالارادة
بالتوفيق لكل البنات واتمنى لكم اجساما رشيقة
والحمدلله اولا واخيرا
الروابط المفضلة