السلام عليكم ورحمة الله وبركاته
هذه مقاله كتبها واحد دمه خفيف( تجننن بالمره روووووووعه ) في نفس موضوعي
وحبيت اني انقلها لكم
تخين و عايز تخس. بدينة و مش عارفة تخشي في هدومك القديمة..جزارة المعلم اتكينز ترحب بكم
________________________________________
اعزائي ال كتكوت المقلوظين
كام واحد هنا عندة وزن زايد بل كام مصري عندة وزن زايد او كام مليون عربي
يتميز بالبدانة
النسبة بتقول 68 بالمائة من التعداد العربي مصاب بالبدانة
ان ان ان اااااان .........
البدانة المقصودة هي ان وزنة ممكن يكون ازيد ب 10 كيلو عن المفروض
يعني لو واحد طولة 2 متر المفروض الوزن المثالي يكون 95 كيلو
خلاصة الامر ان الشعوب العربية شعوب طفسة و همها علي بطنها
يقترب الامر لدرجة العشق و الغرام بينها و بين الاكل
كان لي صديق اذا شاف حلة ملوخية بجوارها استقر ارنب محمر فوق تل رز معمر
بكي و شهد الشهادتين خوفا من ان تزهق روحة قبل ان ياتي علي ما امامة
واخر اذا وعدتة زوجتة بصينية بطاطس مدفوس يها قطع لحم معتبرة
قام ورقص عشرة بلدي و عزف النشيد الوطني لجمهورية باطستطا المتحدة
لي صديق لدية طفلان اية في الجمال لا يعيبهما سوي ان كل واحد منهما يزن حوالي
73 كيلو و هما بالصف التثاني الاعدادي
و السبب في ذلك امهم فهي تصر ان من مظاهر العز و الصحة الوش المربرب
و الكرش المهرر و اللغد المدلدل
بل امتد تأثيرها الي صديقي المسكين
فاقنعتة ان اذا اصبح من اصحاب الكروش سيحظي باحترام الجميع
لكنة اقصي ما حصل علية احترام البواب كلما رأة يلهج ولا يقدر علي التقاط انفاسة عرض علية الجلوس بجوارة علي الدكة و كرسي معسل
بل انا في فترة ما من عمري كنت اتمتع بكيلوهات زائدة و دهون تكفي لايقاد فرن بلدي شهر متواصل لكن لاسباب صحية كورتوزونية ادت لهذا الوزن
المهم علي مدد زمنية كثيرة جربت انواع ريجيم لا تعد ولا تحصي
بعضها كان ذا مفعول واخرين اكتسبت منهم كيلوجرامات
و هنا سوف اشارككم خبرتي و تجربتي مع الريجيم
و هوب اتنين تلاتة اربعة التخين ادام و الاقرع ورا
من الاخر اذا لم تمارس الرياضة اي نوع من الرياضة
سواء مشي او هرولة او تنطيط في بيتكو
لا تعتقد انك سوف تحصل علي نتيجة جيدة
حد يقولي لية...؟
جابر...لية؟
علشان هناك اماكن في الجسم بها خلايا دهنية متركزة ربما منذ قديم الازل خاملة
مش ناوية تفوق
لازم ولابد تعملها ازعاج علشان تتخلص منها
ازاي..؟؟
تمشي مثلا ...تروح تبلبط في الترعة اللي وراكو ...تنط الحبل
كل المطلوب تقص متر و نص من حبل غسيل بيتكو
وتقول للوالدة ان نزل علية قانون الضرايب الجديد
ثانيا كل ما تشتهي نفسك لكن باعتدال
اتباعا لقول الرسول صلي الله علية و سلم
نحن قوم لا ناكل حتي نجوع و اذا اكلنا لا نشبع
و ايضا
ثلث لطعامك وثلث لشرابك وثلث لنفسك
ثالثا و هو الاهم
لا تجعل كل تفكيرك انك هاتنزل وزن محدد و بعد كدة ترجع باكينام لعادة زمان
المفروض دة يكون نظام حياتك الدائم
اكل معتدل و رياضة
حد سمع عن نظام اتكنز.
بالمختصر دة دكتور اكتشف في اثناء تشريحة لجثث الجنود في حرب فيتنام وجود نسبة دهون عالية جدا فيهم بالرغم من انهم جنود و رياضين و اكلهم ليس بالكثير
نظرا لظروف الحرب
و كانت النتيجة ان دة يرجع لنسبة الكربوهيدرات العالية في اجسامهم يعني النشويات
فعمل ريجيم يعتمد علي الدهون مش علي النشويات
بمعني مفيش سكر عيش مكرونة خضار فاكهة
لكن في لحمة فراخ سمك زيت سمنة زبدة محمر و مقلي و مشوي
و بالغرم من غرابة المحتوي
فا الريجيم دة جاب نتيجة ممتازة مع كثيرين اكثر من اي ريجيم تاني
منهم انا شخصيا
فهي نظرية بسيطة ان الجسم بيحرق الكربوهيدرات يوميا و اكثر من مرة في اليوم لسهولة حرقها
اما الدهون فلا يقترب منها لصعوبة التخلص منها
قوم اية تحرم الجسم من الكروهيدرات يضطر يروح للدهون
يعني كل ممكن فرخة مشوية محمرة بدون جلد علي الغدا
و اتعشي كيلو كفتة
و برضة هاتخس
لكن كبعد اول اسبوع ابتدي ضيف نسبة كبروهيدرات لاكلك يعني فاكهة سلطة معلقة رز
علشان متفطس منا
الريجيم دة تمشي علية شهر او اتنين
مش اكتر
من اعراضة الجانبية لمن يستمر علية لفترة اكبر من 6 او 7 شهور
داء النقرس
ضعف العضلات
هشاشة العظام
لامساك المزمن
امراض القلب
طبعا كل دة بسبب نسبة البروتين العالية
دة في حالة الاستمرار علية لفترة كبيرة
بالنسبة للرجال لازم تلعب رياضة
و يفضل تمارين السويدي او بناء الاجسام
مبقولش تبقي عامل زي الشحات مبروك
لا بس خلي لجسمك مظهر و قوام معتدل
يفرد ضهرك و ينزل كرشك و يعرض كتافك و انت رايح تخطب كدة تبقي هيبة و طول بعرض تملا العين كدة ابوها يعملك احترام برضة
العب تمارين ضغط الصبح اعمل علي قد ما تقدر
النهاردة 5 بكرة 7 بعدة 10 في 20
انا بقالي 14 سنة بلعب ضغط
انا نزلت علي الريجيم دة حوالي 18 كيلو في شهرين او اكتر و داخل مسابقة ملك جمال سنغافورة
طبعا انا مكنتش ماشي بالظبط
يعني ممكن حتة بسبوسة الهف
خرطة مكرونة بالبشمل الهط
حتة سينابون ازلط
لان جسمي في فترات كان بيحتاج نسبة سكريات و الياف لاني بالعب حديد من فترة كبيرة
فا علشان اقدر اتمرن لازم اخد نسبة من الحاجات دي
كل وجباتك الاساسية فطار وغدا و عشا عبارة عن عصير او ثمرة فاكهة
و بطل عك بين الوجبات
مرفق هنا بعض الاطعمة و كم الكربوهيدرات اللي فيها
http://www.geocities.com/celini2000/atkins.zip
ارجو ان اكون افدتكم و كل ما اريد ايصالة لكم لكي تفقد وزن يجب ان يكون هذا نمط حياتك
و ليس مجرد فترة . لانك بعد كدة هاترجع تفشول كعهدك السابق
لاي استفسار متنكسفش انا زي بابا
الناضورجي والد
ولا تنسوني من دعائكم
علي السادة الرفيعين الابراص اقل من 60 كيلو احترام اخوانهم المزقلطين و عدم حرق دم من هم اتخن منهم
منقووووول
رد مع الاستدلال
الروابط المفضلة