كل عام وانتم بخير رمضان على الابواب ..ومع ان رمضان هوة شهر الصيام اللى يعنى الامتناع عن الطعام ..الا انا بنجد فيه مفارقة عجيبة وهى الاكثار من الطعام بعد المغرب و الحشو الزائد والبلع عمال على بطال بعد المغرب..
تعالو بس كدة نشوف ازاى بعض الاعشاب بتشتغل على الجهاز الهضمى و مشكلة الهضم و الانتفاخات ...و هاختصر طبعا علشان متملوش وركزو بس معايا كدة ....
الاعشاب اللى بتشتغل فى وظيفة الهضم تنقسم الى عدة انواع
اولها : الاعشاب القابضة ودى تحتوى على مادة اسمها التانين او العفص بالعربى ودى هيه المادة القابضة واللى بتتحد مع البروتين المبطن للامعاء وتعمل حاجز يمنع غزو البكتريا لجدران الامعاء وبكدة يقل الالتهاب وتزداد كفاءة الجهاز الهضمى و تقل بالتالى مشكلة سوء الهضم او تخمر الغذاء ..وكمان الاسهال ...من امثلة الاعشاب دى
*الغافث
*البلوط
*الهماميليس
*التوت الاحمر
*ملكة المروج
*الاخيلية
ثانيا وبسرعة كدة احسن انضرب:الاعشاب المرة ودى بتفتح الشاهية عن طريق زيادة افراز العصارت الهاضمة ..و بتحفز افراز الانزيمات الهاضمة ..و لها قدرة على تقوية الجهاز الهضمى بشكل عام و اعادة بناء نفسه و اصلاح مشاكله
ومن الجميل ان الاعشاب دى بيبدا عملها من الفم ..من خلال الحساس بالمرارة من اماكن التذوق فى اللسان اللى هوة كدة التلت الاول وبعدين باة اشارة تروح للمخ ومنه للمعدة فتفرز عصارة اكثر والامعاء فتفرز عصارة معادلة و انزيمات معوية و بعدها الكبد تفرز الصفرا فيلم كبير اخره ..تحسن الهضم ووظيفة الجهاز الهضمى مما يعنى قله تخمر و قله انتفاخات ,,من امثلة الاعشاب دى
*الافسنتين
* الاخيلية
*البرباريس
*القنطريون
*الطرخشقون او الهندبا بالبلدى
*الجنتيانا ودى من اقواها
ثالثا ..معلش يا جماعة ايدى كلتنى ومش عارف اوقفها ..: الاعشاب الملطفة ..ودى اللى بتحتوى على صموغ ..اللى بتتحول لمواد تعمل على تهدئة جدران الجهاز الهضمى و امتصاص السموم من سطحة و التقليل من حركته ...وده طبعا يؤثر ايجابا على الهضم و كفاءة الجهاز و يقلل من الانتفاخات و التخمرات ..من امثلة النوع ده
*عرق السوس
*الحلبة
*البوقيصا
رابعا ..اعشاب الهضم المهدئة للقولون و دى طبعا اللى بنستخدمها غالبا فى حالة القولون العصبى طبعا مع غيرها ..ودى وظيفتها التقليل من تقلص الامعاء و رد فعل الامعاء للغازات ..ومن امثلتها
*الميليسا
*البابونج
*اللافندر
*خامسا : الاعشاب الطاردة للغازات ..ودى غالبا غنية بالغازات الطيارة و بتعمل على طرد الغازات بميكانيكية معينة و تهدئة حركة القولون ومن اشهرها
*الكمون
*الكراوية
*الزنجبيل
*النعناع العادى و الفلفلى
*الانيسون الينسون يعنى بالبلدى
*الحبهان ..وغيرها
سادسا : الاعشاب المحتوية على انزيمات هاضمة تهضم البروتينات و غيرها ..ودى بتساعد الانزيمات الطبيعية فى الوظيفة و تقلل سوء الهضم من خلال هذه الطريقة ...من امثلتها
*الاناناس اللى بيحتوى على البرومالين الهاضم
*البابايا المحتوية على البابين وده جيد جدا للهضم
طبعا تقلت عليكم و غلست ..بس كلام كان لابد منه ...علشان بكرة باذن الله نعمل اقوى تركيبة طاردة للغازات و مضادة للتخمر و مهضمة ....استعدادا لرمضان شهر الصيام
...وشكرا لكم

السلام عليكم
جزاك الله خيرا اخي العزيز
وانت مش تقلت علينا انت تفضلت علينا بالمعلومات المفيدة
شكرا كتيييير
وكل عام وانت بخير

كل عام و الجميع بخير

الف شكر عالمعلومات القيمة

شكرا للجميع

الف شكر يا دكتور وحمد الله على السلامة

الله يسلم الجميع

شكرا حورية وكل سنة ونتى طيبة