بسم الله الرحمن الرحيم
وبة نستعين
والصلاة والسلام على اشرف المرسلين
سيدنا محمد صلى الله علية وسلم

اولا

احب اهنئكم بشهر رمضان المبارك اعادة الله علينا بالخير واليمن والبركات

ثانيا

احب اقول ان المسابقة دى مش خسارة وزن بس حتبقى خسارة ذنوب كمان اية رايكم!!!
احنا حنتفق على شوية حاجات كدة نعملها مع بعض


اول حاجة: كلنا بنحاول نختم القران فى رمضان ومننا كتير اوى بيبقى متحمس للفكرة بس للاسف بيبقى حماس لحظى واول اسبوع بنقرأ تمام بس بعد كدة بنهكع وبنبقى زعلانين اوى رمضان جة ومختمناش القران
انا حقولكوا على طريقة حلوة اوى اوى عشان نختم القران
بعد كل صلاة يا اختى تمسكى المصحف وتقرأى 4 صفحات فقط يعنى 20 صفحة فاليوم بس مقسمين على الخمس صلوات فهمتوا بس احنا بما اننا بنبقى متحمسين شوية اول الشهر نزودهم حبة عشان حيجلنا فى الشهر (الدورة الشهرية) ودة حيأثر معانا

تانى حاجة:نداوم على الصلوات الخمس فى اوقاتها

تالت حاجة:نداوم على اذكار الصباح والمساء وقيام الليل وصلاة التراويح فى المسجد بيبقى ليها طعم تانى غير البيت

واخيرا لو عندكوا اى مشاكل مع حد صفوها وحياة اغلى حاجة عندكوا احنا داخلين على شهر مفترج وكل سنة وانتوا طيبين


نيجى بقى لمصيبتنا السودة (الريجيم)
اقولكم حاجة بصراحة ودنى كرهت الكلمة دى اوى واول ما بسمعها بيجيلى احساس انى عاوزة اقوم اهجم على التلاجة(خلى بالكم منى انا شرسة)مع ان كلمة ريجيم معاناها تقليل الاكل مش كترة بس مين يشوف ومين يسمع!!
مكونات المسابقة


اولا النظام الغذائى
بصوا معنديش ليها شروط عندك ريجيم عجبك وعاوزة تعملية يا مرحبا
عملة ريجيم من دماغك وعاوزة تنفذية يا مرحبا
عاملة تخفيف بردوا يا مرحبا(كلوا يا مرحبا يا مرحبا مفيش ملوخية ابدا)

ثانيا

الرياضة
اى حاجة تمشى بردوا(اصل انا مش معقدة)
بس انا شايفة ان اسهل حاجة يعنى نص ساعة كدة بعد صلاة التراويح تبقى ميت فل وعشرة
اصلكم مش حتكسلوا عشان انتوا كدة كدة نازلين مش حتنزلوا عشان تمشوا مخصوص (فقساكوا متخافوش العبوا غيرها)
ثالثا الاعشاب
مش حقولك اعملى وصفة ام تتح ولا ام زغلول
كوبيتن شاى اخضر فاليوم تبقى عشرة على عشرة


اما الريجيم بتاعى حيبقى طريقة الطبق وحشرحها بعدين واكيد فى ناس عرفينها

استمارة الامتحان

(فى المتحان يكرم المرء او يهان) هعهعهع (يا ويلكم منى اللى بيخاف يطلع برة )
الاسم:
السن:
الوزن:
الطول:
نوع الريجيم:
الهدف الاول:
واخيرا

واللى عارفة ان مش حيعجبكوا خالص(انا متساهلة فى كل حاجة بس عندى شرط واحد بس يتيم فقير

)

العقاباى مشتركة حتبوز نظامها المتبع حيكون العقاب كالاتى
عذر مقبول:سماح(ومتكرريهاش تانى يا بت)
عذر مقبول نص نص:حنملك يوم اكل من تألفينا ويا ويلكيا سواد ليلك تقريبا مش حيبقى فى اكل
عذر تافهة ومجرد حجج وخلاص:حتكون برة المسابقة نهائيا وبدون نقاش

معلش انا مش قاسية اوى بس عشان نلتزم كلنا وانا اول واحدة فيكوا لو ملتزمتش حسلم المسابقة لواحدة فيكوا يعنى العقاب سارى عليا وعليكوا خلاويص
مستنياكوا يا كتاكيت
مس عسل
ومتنسوش

$$ الحياة مبتستناش$$

سلااااااااااااااااام
فينك يا بنت يا شيمو
الحمد لله انك رجعتي
عارفة انا حاسة بتفائل كبير في رمضان ده
وان شاء الله حنلتزم كلنا
اولا
الصلاة وقرائة القران والاذكار وكمان نكون
ملتزمين في صيامنا علشان يتقبل مننا ربنا
حتي في كلامنا ولباسنا وكل حاجة نحاول اننا نبقي احسن
والرجيم والرياضة الله يعينا
الاسم:مايا
السن:18
الوزن:60
الطول:160
نوع الريجيم: تخفيف
الهدف الاول:55

اما عن العقوبات
فهي جامدة
بس حنخاف منها
وتبحي علي الف خير يا قمر

ههههههههههههههههههههههههه بجد انتي عسل يا مس عسسسسسل .. انا نازلة ضحك وانا بقرا كلامك ومش قادرة امنع نفسي .. تقريبا خستلي نص كيلو بسبب الضحك هههههههه..

بس المهم ان كلامك عجبني جدا وياريت اشترك معاااااكم ..

وادي يا ستي الاستمااارة بتاعت الامتحان (( حرام عليكي مش كفاية امتحانات الجامعة كمان هنا فيه امتحان وقبل رمضان كمان .... -_* ))

الاسم: ريهام
السن:20
الوزن:... حاجة تكسف >_<... 90 كيلو
الطول:.... لازم يعني اقوله ؟

نوع الريجيم:
ريجيم رمضاني اخترعته من دماااغي وهتلاقيه على الصفحة دي..
http://www.lakii.com/vb/showthread.php?t=478073
الهدف الاول:70 ك

وكل عاااام وانتو بألف خير

الاسم:مس عسل
السن:18
الوزن :93 (زغرطوا يا عيال)
الطول:165
الريجيم المتبع:تخفيف
الهدف الاول:85


مايا
شكرا على تسجيلك وان شاء الله يهل عليكى رمضان وانتى بصحة وسلامة


الساجدة لله
شكرا على تسجيلك
ولا فضايح ولا حاجة منا زيك اهوة يا اوختى
وبعدين انتى قولتى الوزن اللى يكسف وجاية على الطول وتقولى مش لازم(حطخك عيارين)
ال مش لازم ال
ستات اخر زمن

بجد انتي عسل دمك شربات يابنت الايه

انا عجبني برنامجك قوي وفعلا الواحد لازم يستمر بنفس حماس اول اسبوع وانا بحاول علي قد ما اقدر اختم القران مرتين اصلي بعملها مسابقه بيني وبين ماما واخواتي



بالنسبه للبيانات ---- الاسم شوشكا
السن 25
الطول 176
الوزن 96.5
الهدف الاول 90

ورمضان كريم علي الجميع وان شاء الله ربنا يحقق للجميع ما يتمناه

السلام عليكم وكل عام وكل عضوات منتدى لك بالف خير
من غير تحيز عايزة اعرف جنسيتك وشكلك طبعا من خفة دمك مصريه هههههههههههههه
انا كمان مصريه وعاوزة اكون معاكو بس فيه مشكله
مش هعرف اقابلكو الا كل اسبوع عشان النت عند بابا وانا متزوجة وساكنة بعيد وباجى كل اسبوع بس هقولكم بالامانة على مافعلته وربنا يشهد استمارة عضويتى كالتالى :-
الاسم:باين من التوقيع نوره
السن: بلا فخر 29
الوزن: بلا حسد 90
الطول: من غير تريقه 176
نوع الريجيم: معملتش اى رجيم قبل كده لانى اول مرة انزل وزن بناء على راى الدكتور وحابه اعرف منكو رجيم لانى لازم انزل بحدود 15 كيلو قبل شهر عشان احتمال هعمل ان شاء الله عملية للانجاب الشهر الجاى لو قرر الدكتور ان حالتى تسمح وطلب اخس شوية ( بس ادعوا ليه بظاهر الغيب ان اعمل العملية ديه ونسبة نجاحها تكون مضمونة )
الهدف الاول: 75

كل عام وانتم جميعا بخير ودعواتكم اخواتى

شوشكا ميرسى يا بنت الاية انتى كمان على المدح دة (يا خراشى اروح من العيال دى فين بس)
ورمضان كريم عليكى وانا سجلت بياناتك خلاص يا عسل(حتقولى ماشى يا طحينة)


نورة
يا ستى وبدون تحيز انا مصرية زى ما قولتى واسكندرانية كمان(من بحرى وبنحبوة)
وانا سجلت بينانتك
وبالنسبة لحكاية النت دى مش مشكلة خالص نبقى على ميعاد ثابت معاكى كل اسبوع
عشان ظروف النت عندك بس يا جميل(لوحد تانى كنت قطعتة)
وبالنسبة للريجيمات اعملى بحث فى جوجل واكتبى ريجيم لشهر رمضان وحتلاقى كتير
وحتلاقى كمان فى المنتدى هنا ياما وانا ححاول اجبلك

ايوووووووووووه على بنات اسكندريه ايه كرم الاخلاق ده تسلميلى يا قمر لالالا قصدى يا عسل وتسلم الايادى اللى هدور على وصفات

شوفى يا نورة النظام دة يمكن يعجبك



ومن 1-3 تمر


افطار:-

- مقدار نصف فنجان شاى شوربة اى نوع
- مقدار علبة زبادى 125جم ارز او قطعة صغيرةرقاق او قطعة صغيرة مكرونة بالباشميل او قطعة صغيرة جلاش او 2 سمبوسك او 2 قطايف مملح او 7 ورق عنب او 1-2 محشى
- 1/4 فرخة او قطعة لحمة او 2 كفتة او 1 حمام ( مشوى او مسلوق )
- سلطة 4 وحدات( 1طماطم +اخيار+1/2 فلفل رومى+1/4 خس)
- خضار نىفى نى او مسلوق او سوتية

بعد 2-3 ساعات

2 فاكهة او اى حاجة حلوة

سحور متاخر

- 1/4 رغيف
-جبنة او بيضة مسلوقة او 3 معالق فول (1/2 ملعقة زيت صغيرة)
-1/2 سلطة = 2وحدة
- فاكهة او زبادى

حاجة حلوة= قطعة كنافة صغيرة او قطعة بسبوسة صغيرة
او واحدة من بلح الشام او واحدة جاتووة
او اتنين من قطايف او كل واشكر
او مقدار فنجان شاى من الخشاف - قمر الدين
او مقدار قالب صغير من المهلبية- ارز بلبن- قمر الدين مطبوخ-كريم كرمل-جيلى-كسترد-ام على
او مقدار نصف فنجان شاى مكسران

ملحوظة جميع المشروبات كاكركدية - تمر هندى- العرقسوس-الينسون- القرفة بدون سكر ويمن استعمال المحليات الصناعية

ماشاء الله هوا ده ريجيم؟ طب مهو حلو اهو؟ وده هيخسس فعلا؟