من 69 ل 66 كيلو في 5 أيام والسر في ريجيم اسمه الارادة ( الصارم البتار)
أخواتي حبيباتي...
أبدأ بقول الله تعالى والذي عرف دائي و اعطاني دوائيأمّن يجيب المضطر إذا دعاه) صدق الله العظيم
حبيباتي الحمد لله الذي هداني و عسى ان تكرهوا شيئا و يجعل الله فيه خيرا كثيرا...
انا لازم احكيلكم ايش صار معي لحتى اشكر ربي على ما وهبني من نعمة الارادة و امساك نفسي عن الطعام
أخواتي انا صارلي تقريبا سنة كاملة و انا بقول بدي انزل 10 كيلو و مو قادرة للآن انزل كيلو واحد
و سبحان الله كل ما أخت تحطلنا نظام بتشجع و بمشي فيه يومين بالكتير و بعدين خلص ما عندي ارادة اكمل بفرطه و بخبص اكتر لعند ما قلت يا بنت ما الك الا انك تدعي ربنا رب العالمين مين غيره بيفرج كربك و بيحللك مشكلتك
و فعلا قعدت يومين بالعدد ادعي ربنا على صلاة الفجر إنه يرحمني و يفرج همي و يمنحني ارادة على الامتناع عن الاكل اللي ما منه فايدة و ينزل وزني و ادعي و احكي يااااااااااااااااااارب ياااااااااااااارب ما الي غيرك أنا ضعيييييفة امام شهوة البطن و ما بقدر امسك حالي الهمني يا رب خليني اعرف انظم أكلي
دعيت و كلي تأكد إنه ربنا رح يعطيني الحل و انحف
المهم يا بنات سبحان الله يعد يومين صحيت الصبح لقيت طاحونتي بتوجعني
والوجع بيروح و بييجي
و قلت عادي بدي اكمل اكل
و كنت كل ما آكل توجعني اكتر حكيت خلص مارح آكل عليها رح آكل على الجهة التانية و خففت أكل غصبن عني لمدة يومبن و الوجع بيروح و بييجي و باخد مسكنات و انا بالعادة بلعب في اليوم رياضة نص ساعة بس ما بينزل وزني بسبب الاكل
المهم بعد هاليومين تخفيف برضو وزني زي ما هوه وفجأة صار العصب يضرب على راسي و الوجع يزيد و ابكي منه راح جوزي جابلي اقوى مسكن يمشي معي لعند ما آخد موعد مع دكتورة سنان و اروح عندها
و فعلا اخدت موعد بعد يومين و خلال هاليومين و انا آخد مسكن و ما آكل الا وجبة وحده و أمضغ ببطئ و كل ما جوزي وولادي يتعشوا و يتغدوا أقعد و أقول لجوزي ما بقدر آكل او اشرب بالمرة من وجع سناني
و يومين و انا مات آكل الا يا دوب وجبة وحده و طبعا الرياضة ممارستها تقريبا 45 دقيقة
و رحت عالدكتورة و فعلا تعالجت والحمد لله و زال الالم
في اليوم التاني توزنت لقيت حالي ناقصة 3 كيلو ب 5 ايام و السبب وجع سني اللي ربنا أكرمني فيه و سبحان الله يا بنات بعد ما تعالجت لقيت نفسي بكره آكل و فعلا لقمة صغيرة و وجبة وحده بتكفيني و بهالفترة من الام و الوجع اللي صابني اسال الله ان يغفرلي ذنوبي و يثبتني على مسك شهيتي
و اليوم الاثنين هوه اليوم التاني اللي بيمر بدون وجع سناني بس بنظام مشيت عليه غصبن عني و اليوم ماشية عليه برضاي لأني تعودت عليه طوال الخمس ايام
والنظام هوه يا بنات: اول ما تصحي من الصبح احكي اليوم بدي العب رياضة لمدة ساعة او 45 دقيقة بالاضافة الى إني مارح آكل طول اليوم الا أكلة بحبها كتييييييييييييير و بس
مثلا انا اليوم ما أكلت الا الساعة 12 نصف رغيف تميس بالجبن + 2 كاسة شاي بسكر( التميس هوه خبز عادي محشي بالجبنة)
و اتفقت مع نفسي إني ما آكل طول اليوم غيرهم و الحمد لله اليوم مر زي ما بدي و لعبت رياضة ساعة
و اللي حابة تمشي معي بهالنظام يللا سوا
انك تلعبي باليوم رياضة ساعة و ما تاكلي الا اشي بتحبيه كتيييييير و قرري انه كل يوم مارح تاكلي الا اشي بتحبيه والاشياء التانية اللي بتحبيها اجليها لليوم اللي بعده
انا هيك سويت
يعني اليوم زي ما حكيتلكم
و امبارح اكلت زبدية و اقل من زبدية فتفوتة دجاج مسلوق اقل من 250 غم مع فريكة و كاسة عصير وحده و ضليت عليها طول اليوم و إجا بنفسي آكل سندويشة زعتر و شاي و تفاح و غيره بس حكيت لا اليوم انا اخترت آكل الفريكة
و ممكن بكرة او بعده آكل سندويشة زعتر و شاي و أضل عليهم طول اليوم مع رياضة ساعة
و بكرة يا بنات اليوم التالت رح أختار من الصبح ايش اكتر شي نفسي فيه و أقرر اني آكله لوحده مع رياضة ساعة و رح اوزن بكرة و أحكيلكم النتيجة
إذا الخلاصة يا حبايب قلبي:
1-الدعااااااااااء لله و ما تنسي اني كل تجاربي لمدة سنة باءت بالفشل و لما رفعت ايدي و توجهت لربي الرحيم بالدعاء المخلص و بكيت بين يديه جاءتني الاجابة و أعطاني رب العزة الارادة من حيث لا احتسب و نقصت مو بس كيلو بل 3 كيلو ب 5 ايام.
2-رياضة ساعة في اليوم.
3-اختاري من الصبح ايش اكتر شي نفسك فيه اليوم و كليه و ضلك صايمة طول اليوم و ازا نفسك بشي غيره اقنعي نفسك انك رح تاكليه بكرة و تضلك عليه طول اليوم و ما تنسي الرياضة.
مثلا انا ناوية بكرة اتغدى قرص عرايس أو بيتزا مع كاسة عصير و القرص تقريبا حجمة دائرة قطرها 20 سم محشي باللحمة.و رح اضل عليه طول اليوم مع رياضة لمدة ساعة. و هيك ابدا ما بحرم حالي من شي كل الموضوع انك بتأجلي كل اللي نفسك فيه لليوم التالي.
و رح اضل احكيلكم كل 3 ايام كم صار وزني
بالتوفيق ان شاء الله
و يللا بدي ردودكم و تفاعلكم يا قمرات
رد مع الاستدلال
الروابط المفضلة