بسم الله
نبدأ جزء جديد بهمه ونشاط ونيه جديده لبدايه صفحه جديده للدايت
احنا حنفضل مستهترين بجسمنا لغاية امتى
محملينه فوق طاقته وجسمنا يا عينى عليه شايل ومستحمل وساكت مع انه امانه فى ايدينا لازم نحافظ عليها
الربيع قرب والصيف كمان بعديه والملابس الشتويه اللى مخبيين فيها جسمنا حتروح ويبقى الفشكله ونزعل على روحنا
طيب ليه منستعدش من دلوقتى لفصل الربيع والصيف
وبصراحه كد انا زهقت من الدلع والعك والتخبيص لبعض المشتركات ناهيك عن الاعتذارات المتكرره وزيادة الوزن بدون مبرر يقنعنى
لو حملتى اشترك فيها حتى ولو 2 نشاط ابرك مية مره من ......
سمحونى لكن انا فاض بيه خلااااص
سامحتكم كتير وفاضل انكم تفكروا مع نفسكم كويس انتم فعلا عاوزين تعملوا دايت وتبقوا فى صحه ورشاقه ولا الموضوع صحبه حلوه وبس
نرجع تانى
للتنافس الجديد
حنقسم البنات مجموعات متساويه فى العدد ( وانا اللى حختارهم لانى حعمل تشكيله فى الاوزان ما بين الاوزان الكبيره والصغيره ) يتعاونوا مع بعض وكل اسبوع ننزل الاوزان ( عادى خالص زى المعتاد وده لان فيه ناس متابعه مع دكاتره بالاسبوع ) ونجمع نسبة النزول لكل مجموعه وبعد اسبوعين نطلع افضل مجموعه متعاونه وخسرانه فى الوزن ( يعنى نتيجة المسابقه كل اسبوعين لكن الوزن كل اسبوع مفهومه )
فكرت ان النتايج تبقى كل اسبوعين علشان لو مجموعه قصرت اسبوع تلحق نفسها الاسبوع اللى وراه
طبعا كل مجموعه ممكن يتشاركوا تمرين معين مع بعض كل يوم ويحمسوا بعض زى ما هما عايزين
الفرى وجبه واحده فى الاسبوع بعد الميزان
اعتقد ان التنافس كده يعمل تعاون مع بعض ويقربنا من بعض اكتر
الشروط المطلوووووووب توافرها لكل المجموعات
1. الالتزام بالدايت مهما حصل ولينا وجبه فرى بعد الميزاااان
2. شرب المااء فى الشتاء نكتفى بلتر ونصف
3. الرياضه كل يوم نصف ساعه ( تمارين او مشى اللى يريحك )
4. الوزن مره فى الاسبوع كل جمعه او سبت
من الاخر كده اللى مش ناويه تلتزم بالشروط دى تعتذر وحتلاقى حملات كتير من غير شروط ربنا يوفقها
عاوزين بنات نشيطه مش تنيمنا جنبها
الوزن كل اسبوع مهم والرياضه اهم وشرب الميه والالتزام
نقول تانى فكروا مع نفسكم لو فيه شرط مش حتلتزمى بيه وحتتحججى يبقى بلاش تدخلى التنافس معانا افضل ليكى
علشان متزعليش منى وانا بطلبهم منك
اقولكم ليه
كل الشروط دى لمصلحتكم لان فى حالة عدم تطبيق الشرط 2و3 حنزعل يوم الميزان يا زايده يا ثابته ويجيلك احباط وتحبطينا معاكى
عاوزين نشااااااااااااااااااااااااااااااااااط
حنبدأ الانذارات من اول وجديد يعنى اللى كانت واخده انذار من قبل مسحناه
عارفه انى رزله جداااا وفيه بنات مش حتتقبل كلامى بس سامحونى عاوزه اخس وابقى رشيقه بدون تضييع وقت
يلا اللى حتحب تشترك معانا تكتب ميزانها من اليوم وغداااااا
وفيه عقوبات اخرى حاستاذن صاحبة الفكره فى لطشها منها ونطبقها
بس علشان تبقوا عارفين
اللى مش حتطبق الشروط لمدة اسبوعين بجد حتنطرد من الحمله وده للعلم وابقى عملت اللى عليه كلنا استحملنا بعض الايام اللى فاتت وكفايه قوووى كده
كان نفسى اكتب اسماء البنات المشتركه فى التنافس الجديد بس اغلبكم لسه موافقنيش على الفكره الجديده
على فكره اللى حتتاخر عن النهارده فى كتابة وزنها حتبقى مضطره تستنى اسبوعين لبداية مجموعات جديده وتنافس جديد
الروابط المفضلة