السلام عليكم ورحمة الله وبركاته

طبعا أنا عارفة انى مقصرة جدا فى الركن ده
بعد ماكنا عاملين أحلى تجمع هنا أنا وأحلى بنات فى الدنيا

بس انشغلت الفترة اللى فاتت بخطوبتى وكتب كتابى ودلوقتى باستعد للفرح
وفى وسط كل مشغولياتى دى أخدت بالى انى لسه كلبوظة ههههههههههههههه(قال يعنى اتفاجئت)

المهم فقررت بسرعة إنى أداوى الجرح واتحدى المستحيل (تحسوا انى خارجة من فيلم عربى ابيض واسود)

انا اساسا قبل كده عملت ييجى 1500 ريجيم
بس ماكنتش باثبّت وزنى للأسف

ومرة نزلت 18 كيلو
ومرة 10 ومرة 8
وكل شوية اعمل ريجيم لفترة كده وبعدين اكسل وأسيبه

بس المرة دى ماينفعــــــــــــــــــــــش
ده جواز ياجدعااااااااااااااان
يعنى كده كده هاتخن أصلا بعد الجواز
فكده العملية هايبقى شكلها وحش اوى يعنى

المهم درست وفحصت وتمحصت (ياثقافته ياثقافته)
وعملت ايه بقى رحت جرررررررى حجزت الجيم
ورحت مرة واحدة من يومين وهو معاده 3 ايام فى الأسبوع
وكمان بدأت ريجيم
أصل انا بصراحة عايزة أنزل 15 كيلو فى شهرين وماتسألونيش ازاى
سامعة حد بيسأل ازاى مش قلت ماحدش يسأل


المهم قررت بقى اعمل التالى
واللى يدخل معايا ويشجعنى يبقى له الأجر والثواب
وهنيالك يافاعل الخيييييييييييييييييير (ايه امور الشحاتة دى؟؟)

بصوا بقى باعمل ايه من يومين (اخلصى بقى انتى هاتذلينا)

بافطر ربع رغيف عيش اسمر+ بيضة مسلوقة+1 خيار+جبنة
والغدا 4 ملاعق رز+خس+(قطعة لحمة او صدر فرخةاو 2سمكة مشوية)
والعشا...............نو عشا...........يعنى مافيش عشا

وطبعا بما انى خبيرة فى الدايت (ياسيدى على الواضع)
احم احم

فالمفروض اننا مانعديش اكتر من 3 ساعات بين كل وجبة والتانية علشان نظام حرق السعرات فى جسمنا يفضل شغال (شغاااااااااااااااااال يونيفرسال)

علشان كده بعد الفطار بساعتين باكل فاكهة (1 برتقالة)
وبعد الغدا بساعة باشرب شاى اخضر

وآخر وجبة اللى هى الغدا يعنى بتكون قبل النوم بكتييييييييييييييييييير
وباشرب لتر ونص ماء فى اليوم (ماء؟؟ طب امشى يامعزة)

مممممممممممممم
وايه كماااااااااااااااان؟؟
اه بالعب رياضة بقى فى الجيم 3 مرات فى الأسبوع كل مرة ساعة
وبامشى قبل الجيم ساعة
يعنى فى الأسبوع 3 ساعات مشى و 3 ساعات رياضة


انا بالنظام ده كنت بانزل قبل كده 8 كيلو فى الشهر
ربنا يسهل ونعرف ننزلهم تانى يااااااااااااااااارب


بصوا اللى تحب تعمل معايا نفس نظامى ماشى
واللى حتى بتعمل نظام تانى تدخل تشجعنى
ماهو انا مش قاعدة أوجع فى صوابعى واكتب كل ده وفى الاخر ماحدش يشجعنى(مش باقول لكم هاتذلنا)


وياااااااااااااااار ب حد من البنات اللى كانوا معايا يرجعوووووووووا (عودى ياهاميس)

بس بقى انا ماشية علشان اقوم اشوف هانطبخ ايه النهارده


عايزة لما أرجع ماالاحقش على الردود

salam 3alaykom ana aloula alati hatsaj3ik
walakin ana kaman badi min yisaji3ni
wa inchalah rah atkouni bi 3orsik ahla 3arousa fi al3alam

جزاك الله خير اختي على الرجيم
ومشكوووووووووووووووووووووره كتير والله يوفقك

الله يوفقك يا حبيبتي يا ايمان
ان شاء الله تنزليهم وانتي بصحه وسلاممه الله يثبتك
وازا الله قدرني راح افوت اشجعك من فتره وتانيه
والف مبروووك يا عرووووووووووووسه

مبرووووك يا حبيبتي الف الف مبروك قرب فرحك وان شاءالله يتمملك على خير
وتكوني احلى احلى عروسة
انا عايزة اخبرك ان ريجيمك نفس ريجيمي بس الفرق انه بمكان العشا فاكهة او كوب حليب خالي الدسم وانا كمان بلعب رياضة بس انا مشكلتي ان جسمي مابينزل بسهولة يعني نزل هالشهر 5كيلو وكل جسم وطبيعته ان شاءالله تنزلي اكثر
بس لازم اعترف اني ماالتزمتش في الريجيم مضبوط يعني في بعض الاحيان عزايم وكده طبعا انتي عارفة
يالله انا معاكي وخلينا نشجع بعض

والله أغبطكم .... أنا ** الله يستر** إن اردت عمل ريجيم لا آكل شيئا و إن بقيت على طبيعتي اكلت كل شيء

بالتوفيق أخيتي ومبارك عليك

عزيزتى
دمك شربات وزى العسل
الف الف الف مبروك وعقبال الدخلة
انا معاكى ان شاء اللة
انا عايزة انزل وزنى حوالى 20ك
انا زمان قبل الجواز كنت65 ك
بعد الجواز زدت كتير ومع الحمل وصلت 97 ك
انا حاليا بعد الولادة بشهر 87 ك ودة بعد التخفيف فى الاكل
حاليا باتبع ريجيم السعرات الحرارية وبحاول تكون وجباتى بين 900 و 1000 سعر
نزلت عليهم الاسبوع الى فات 2 ك
اما بالنسبة للرياضة فانا مأجلاها شوية لانى عاملة عملية قيصرية والدكتور نصحنى ما اعملش دلوقتى عشان الجرح

هاكتبلك يومياتى وحساباتى وانتى اكتبيلى وتعالى نشجع بعض احسن انا عندى حالة احباط ونفسى ارجع زى ما كنت



حــــــــوريا

وهذا نظامى الغذائى لليوم الاثنين 24/11/2008

الافطار حبة واحدة كيوى + كوب نسكافية = 46+ 80 = 126
الغذاء كوب حليب خالى الدسم + تفاحة متوسطة = 86+81 = 167
العشاء نصف كوب رز بسمتى بدون زيت + قطعة لحم + كوب شوربة =131+200+100=431
وبعد العشا شربت كوب قرفة بزنجبيل بسكر الدايت بدون لبن لاسراع عملية حرق الدهون

قطعة بسكويت بالشوكولاتة تقريبا 100 سعر

الاجمالى 824 سعر

ياسلااااااااااام
ده انتوا عسل خالص والله
بجد شكرا اوى انكم اهتميتوا ودخلتوا وشجعتونى
وان شاء الله ربنا يحقق لنا كل اللى بنتمناه

حوريا حبيبتى ربنا يكمل شفاكى على خير ان شاء الله والجرح يخف بسرعة


انا يومياتى النهارده
فطرت ربع رغيف اسمر+بيضة مسلوقة+خيارة+جبنة
والغدا كان 3 ملاعق رز+شريحتين بطاطس مسلوقة

وشربت لحد دلوقتى نص لتر ماء
ولسه هاشرب لتر ان شاء الله

ومشيت ساعة الا ربع تقريبا ولعبت رياضة ساعة


وانا هاكتبلكم يومياتى دايما ان شاء الله

السلام عليكم

مبروك عليك الخطبة وعقد القران، عقبى لليلة الكبيرة
أنا كذلك أريد نقص وزني، ولقد بدأت حميتي منذ شهور مارس وخسيت 10 كلغ، وحاليا عدت لنفس الريجيم، إني أتعشى بشوربة خالية من الدسم مع ياغورت لايت